Jesus Krestes — Na Gado ben seni en kon?
Kapitel 6
Jesus Krestes — Na Gado ben seni en kon?
1, 2. (a) Sortoe boeweisi de, taki Jesus ben de wan troetroe sma di ben libi? (b) Sortoe aksi di abi foe doe nanga Jesus sma e aksi?
PIKINMORO ala sma na ini a ten disi ben jere foe Jesus Krestes. A krakti foe en na tapoe a historia ben de moro bigi leki di foe ibri tra sma. Srefi a kalender di sma e gebroiki na moro foeroe presi na grontapoe, abi leki fondamenti a jari di sma e denki taki Jesus mama ben meki en! Soleki fa The World Book Encyclopedia e taki: „Datum bifo a jari dati den e skrifi nanga b. Kr., noso bifo Krestes. Datum baka a jari dati den e skrifi nanga A.D., noso anno Domini (na ini a jari foe wi Masra).”
2 So boen, Jesus no ben de wan sma di ben de soso na ini a prakseri foe sma. A ben libi troetroe leki wan libisma na grontapoe. „Na ini owroeten, srefi den gensman foe a krestendom no ben degedege noiti taki Jesus ben [libi troetroe]”, na so na Encyclopœdia Britannica e taki. So boen, soema Jesus ben de troetroe dan? Na Gado ben seni en kon troetroe? Foe san ede sma sabi en na ala pe?
A BEN LIBI NA FESI KABA
3. (a) Akroederi den wortoe foe na engel, dan a manpikin foe soema Maria ben o meki? (b) Fa a ben kan, taki a njoenwenke Maria ben kan meki Jesus?
3 Jesus ben de a wan-enkri libisma di wan njoenwenke ben meki. A nen foe a njoenwenke ben de Maria. Wan engel ben taki foe a pikin foe en: „A wan disi sa bigi èn den sa kari en a Manpikin foe a Moro Heiwan” (Lukas 1:28-33; Mateus 1:20-25). Ma fa wan oema, di noiti ben abi seks nanga wan man, ben kan kisi wan pikin? Dati ben kan nanga jepi foe a santa jeje foe Gado. Jehovah ben tjari a libi foe en makti jeje Manpikin komoto na hemel go na a moeroe foe a njoenwenke Maria. A ben de wan wondroe! A no de foe taki, dati a Sma di ben meki a fosi oema nanga a froewondroe krakti foe man meki pikin, ben man meki wan oema kisi wan pikin sondro a jepi foe wan libisma papa. Bijbel e tjari kon na krin: „Di a reti ten ben doro, dan Gado ben seni en Manpikin go, di ben kon gebore foe wan oema.” — Galasiasma 4:4.
4. (a) Sortoe libi Jesus ben abi bifo en mama ben meki en leki wan pikin? (b) San Jesus ben taki foe sori taki a ben libi na fesi kaba na hemel?
4 So boen, bifo Jesus mama ben meki en djaso na grontapoe leki wan libisma, a ben libi kaba na hemel leki wan makti jejesma. Neleki Gado, na so a ben abi wan jeje skin di libisma no kan si (Johanes 4:24). Jesus srefi ben taki foeroetron foe a hei posisi di a ben abi na hemel. Wan leisi a ben begi, taki: „Tata, gi mi a glori na joe sei di mi ben abi na joe sei bifo grontapoe ben de” (Johanes 17:5). A ben taigi en arkiman toe: „Oenoe na foe den kondre na ondrosei; mi na foe den kondre na tapoesei.” „San dan, efoe oenoe ben sa si a Manpikin foe libisma e opo go na pe a ben de bifo?” „Bifo Abraham ben kon foe de, mi ben de kaba.” — Johanes 8:23; 6:62; 8:58; 3:13; 6:51.
5. (a) Foe san ede den ben kari Jesus a „Wortoe”, a „Fosi Geborewan” nanga a „wan-enkri gebore” Manpikin? (b) Sortoe wroko Jesus ben doe makandra nanga Gado?
5 Bifo Jesus ben kon na grontapoe, den ben kari en a Wortoe foe Gado. A titel disi e sori taki a ben doe wroko na hemel leki a sma di ben taki gi Gado. Den e kari en toe a „Fosi Geborewan” foe Gado, so srefi en „wan-enkri gebore” Manpikin (Johanes 1:14; 3:16; Hebrewsma 1:6). Disi wani taki, dati Gado ben meki en bifo ala den tra jeje manpikin foe Gado, èn taki en na a wan-enkriwan di Gado srefi ben meki sondro jepi foe wan tra sma. Bijbel e tjari kon na krin taki a ’fosi gebore’ Manpikin disi ben wroko makandra nanga Jehovah na ini a meki foe ala tra sani (Kolosesma 1:15, 16). So boen, di Gado ben taki: „Meki wi meki libisma leki a prenki foe wi”, a ben taki nanga a Manpikin disi. Ija, a Manpikin disi di ben kon na grontapoe baka ten, èn di wan oema ben meki, ben abi wan prati na ini a meki foe ala sani! A ben libi kaba na en Tata na hemel wan lo jari di sma no sabi omeni! — Genesis 1:26; Odo 8:22, 30; Johanes 1:3.
EN LIBI NA GRONTAPOE
6. (a) Sortoe sani ben pasa sjatoe bifo èn baka di Jesus mama meki en? (b) Pe Jesus mama meki en, èn pe a ben gro kon bigi?
6 Den ben pramisi Josef taki a ben mag trow nanga Maria. Ma di a ben kon sabi taki Maria ben de nanga bere, a ben prakseri taki Maria ben abi seks nanga wan tra man, èn dati meki a no ben o trow moro nanga en. Ma di Jehovah ben taigi en taki nanga jepi foe En santa jeje Maria ben kisi bere, dan Josef ben teki Maria leki en wefi (Mateus 1:18-20, 24, 25). Baka ten, di den ben go na a foto Betlehem, dan Maria ben meki Jesus (Lukas 2:1-7; Mika 5:2). Di Jesus ben de wan beibi ete, kownoe Herodes ben proeberi foe kiri en. Ma Jehovah ben warskow Josef, so taki a ben teki en osofamiri lon gowe na Egipti. Baka di kownoe Herodes dede, dan Josef nanga Maria ben drai go baka nanga Jesus na a foto Nasaret na ini Galilea. Djaso a ben gro kon bigi. — Mateus 2:13-15, 19-23.
7. (a) San ben pasa di Jesus ben abi 12 jari? (b) Sortoe wroko Jesus ben leri foe doe di a ben gro kon bigi?
7 Di Jesus ben abi 12 jari, a ben go nanga en famiri na Jerusalem foe de na a spesroetoe fesa di ben nen Paska. Di a ben de drape, a ben tan dri dei na ini a tempel, ala di a ben arki den leriman èn ben poti aksi gi den. Ala sma di ben arki en, ben froewondroe taki a ben sabi someni sani (Lukas 2:41-52). Ini a pisi ten di Jesus ben e gro kon bigi na Nasaret, a ben leri temrewroko. A no de foe taki, dati en kwekipapa, Josef, di ben de wan temreman toe, ben leri en foe doe a wroko disi. — Markus 6:3; Mateus 13:55.
8. San ben pasa di Jesus ben abi 30 jari?
8 Di Jesus ben abi 30 jari, wan bigi kenki ben kon na ini a libi foe en. A ben go na Johanes a Dopoeman èn ben aksi foe kisi dopoe, foe Johanes saka en go krinkrin na ondro a watra foe a Jordan liba. Bijbel e froeteri, taki: „Baka di Jesus kisi dopoe, a ben opo komoto wantewante na a watra; èn loekoe! hemel ben kon opo èn a ben si a jeje foe Gado leki wan doifi e saka kon na en tapoe. Loekoe! Wan sten ben komoto na hemel toe, di ben taki: ’Disi na mi Manpikin, a lobiwan, di mi feni boen’” (Mateus 3:16, 17). Johanes no ben tweifri kwetikweti taki na Gado ben seni Jesus kon.
9. (a) O ten Jesus ben tron Krestes, te joe loekoe en boen, èn foe san ede na a ten dati? (b) Jesus ben pristeri ensrefi foe doe sortoe sani, di a ben kisi dopoe?
9 Foe di Jehovah ben kanti En santa jeje na tapoe Jesus, dan a ben salfoe en noso ben poti en foe de a kownoe foe En kownoekondre di e kon. Foe di Jesus ben kisi salfoe nanga a jeje na a fasi dati, dan a ben tron a „Mesias” noso a „Krestes”; den wortoe disi na ini Hebrewtongo nanga Grikitongo wani taki „Salfoewan”. Na so fasi, te joe loekoe en boen, a ben tron Jesus Krestes, noso Jesus a Salfoewan. Foe dati ede, en apostel Petrus ben taki foe „Jesus di ben de foe Nasaret, fa Gado ben salfoe en nanga santa jeje èn nanga krakti” (Tori foe den Apostel 10:38). So srefi, di Jesus ben kisi dopoe na ini watra, dan a ben pristeri ensrefi na Gado foe doe a wroko di Gado ben seni en kon na grontapoe foe doe. San ben de a prenspari wroko dati?
FOE SAN EDE A BEN KON NA GRONTAPOE
10. Jesus ben kon na grontapoe foe meki sortoe waarheid bekènti?
10 Di Jesus ben tjari kon na krin foe san ede a ben kon na grontapoe, dan a ben froeteri a tiriman Pontius Pilatus di ben de wan Romesma: „Na foe a sani disi ede mi mama meki mi, èn foe a sani disi ede mi kon na grontapoe, so taki mi ben sa gi kotoigi foe a waarheid” (Johanes 18:37). Ma foe meki sortoe spesroetoe waarheid bekènti meki Gado ben seni Jesus kon na grontapoe? Na a fosi presi, den waarheid di abi foe doe nanga en hemel Tata. A ben leri den bakaman foe en foe begi taki a nen foe en Tata kon „santa” (Mateus 6:9). Èn a ben begi, taki: „Mi ben tjari joe nen kon na krin gi den sma di joe ben gi mi” (Johanes 17:6). A ben taki toe: „Mi moesoe meki a boen njoensoe foe a kownoekondre foe Gado bekènti, bika na foe a sani disi ede [Gado] ben seni mi kon.” — Lukas 4:43.
11. (a) Foe san ede Jesus ben feni en wroko so prenspari? (b) Noiti Jesus ben meki wan sani tapoe en foe doe sortoe sani? So boen, san wi moesoe doe?
11 O prenspari a wroko disi, foe meki a nen nanga a kownoekondre foe en Tata bekènti, ben de gi Jesus? A ben taigi den disipel foe en, taki: „Mi njanjan de, foe mi doe a wani foe en di ben seni mi kon èn foe klari en wroko” (Johanes 4:34). Foe san ede Jesus ben si a wroko foe Gado so prenspari leki njanjan? Na foe di a Kownoekondre na a wrokosani di nanga dati Gado sa meki en kefalek moi prakseri gi a libisma famiri kon troe. Na a kownoekondre disi sa wai ala ogridoe poeroe èn soifri a nen foe Gado foe a sjen di ben tjari kon na tapoe (Danièl 2:44; Openbaring 21:3, 4). So boen, Jesus noiti ben meki wan sani tapoe en foe meki a nen nanga a kownoekondre foe Gado bekènti (Mateus 4:17; Lukas 8:1; Johanes 17:26; Hebrewsma 2:12). Ala ten a ben taki a waarheid, efoe foeroe sma ben lobi dati noso no ben lobi dati. Na so fasi a ben gi wan eksempre di wi moesoe waka na en baka, efoe wi wani prisiri na ati foe Gado. — 1 Petrus 2:21.
12. Foe sortoe tra prenspari sani ede Jesus ben kon na grontapoe?
12 Ma foe meki a kan, taki wi kisi têgo libi na ondro a tiri foe Gado kownoekondre, dan Jesus ben moesoe gi en libibroedoe ini dede. Soleki fa toe apostel foe Jesus ben taki: „Now Gado froeklari wi regtfardiki nanga jepi foe en broedoe.” „A broedoe foe Jesus, [Gado en] Manpikin, e krin wi foe ala sondoe” (Romesma 5:9; 1 Johanes 1:7). So boen, wan prenspari sani foe san ede Jesus ben kon na grontapoe ben de foe dede gi wi. A ben taki: „A Manpikin foe libisma no ben kon foe sma dini en, ma foe dini sma èn foe gi en sili [noso libi] leki wan loesoe-paiman ini a presi foe foeroe sma” (Mateus 20:28). Ma san a wani taki, dati Krestes ben gi en libi „leki wan loesoe-paiman”? Foe san ede a gi di a ben moesoe gi en libibroedoe ini dede ben de fanowdoe foe wi kisi froeloesoe?
A BEN GI EN LIBI LEKI WAN LOESOE-PAIMAN
13. (a) San na wan loesoe-paiman? (b) San na a loesoe-paiman di Jesus ben pai foe fri wi foe sondoe nanga dede?
13 A wortoe „loesoe-paiman” nofotron sma e gebroiki en te den foefoeroe wan sma tjari go kibri noso gèisel en. Baka te wan foefoeroeman kisi wan sma tjari go kibri, dan kande a e taki dati a sa loesoe a sma dati, efoe wan seiker moni pai leki wan loesoe-paiman. So boen, wan loesoe-paiman na wan sani di e meki wan sma di den ben hori na strafoe, kon fri. Na wan sani di den e pai, so taki a sma di den hori na strafoe, no lasi en libi. A volmaakti libisma libi foe Jesus ben gi foe meki a libisma famiri kon fri foe katibo na sondoe nanga dede (1 Petrus 1:18, 19; Efeisesma 1:7). Foe san ede so wan fri ben de fanowdoe?
14. Foe san ede a loesoe-paiman di Jesus ben gi, ben de fanowdoe?
14 Disi ben de fanowdoe, foe di a fositen papa foe wi alamala, Adam, ben opo ensrefi teige Gado. A kroektoe doe foe en ben meki a tron wan sondoeman, bikasi bijbel e tjari kon na krin taki ’sondoe na kroektoedoe’ (1 Johanes 3:4; 5:17). Leki wan bakapisi foe disi, dan Adam no ben warti foe kisi a presenti foe Gado foe têgo libi (Romesma 6:23). So boen, Adam ben lasi volmaakti libisma libi na wan paradijs grontapoe gi ensrefi. So srefi a ben lasi a kefalek moi froewakti disi gi ala den pikin di a ben o kisi. ’Ma foe san ede’, kande joe sa aksi, ’na ala en pikin ben moesoe dede, ala di na Adam ben de a sma di ben sondoe?’
15. Foe san ede den pikin foe Adam ben moesoe njan pina èn dede ala di na en ben de a sma di ben sondoe?
15 Disi doe kon, foe di Adam, di a ben tron wan sondoeman, ben tjari sondoe nanga dede kon na tapoe den pikin foe en, so srefi na tapoe ala libisma di de now na libi (Job 14:4; Romesma 5:12). „Ala sma sondoe èn no e doro a glori foe Gado”, bijbel e taki (Romesma 3:23; 1 Kownoe 8:46). Srefi David di ben lobi dini Gado, ben taki: „Nanga fowtoe mi mama ben meki mi nanga foeroe pen, èn ini sondoe mi mama ben kisi bere foe mi” (Psalm 51:5). So boen, sma ben dede èn e dede te now ete, foe a sondoe ede di den ben kisi foe Adam. Fa a ben kan dan, taki nanga jepi foe na ofrandi foe a libi foe Jesus ala sma ben sa kon fri foe katibo na sondoe nanga dede?
16. (a) Fa Gado ben sori lespeki gi en wet, taki ’libi ben moesoe gi foe libi’, di a ben gi a loesoe-paiman? (b) Foe san ede Jesus ben de a wan-enkri libisma di ben kan pai a loesoe-paiman?
16 Wan gronprakseri na ini a wet foe Gado gi a nâsi Israèl de ini a tori. A e taki dati den ’ben moesoe gi libi foe libi’ (Exodus 21:23; Deuteronomium 19:21). Nanga a trangajesi di a volmaakti libisma Adam ben trangajesi, a ben lasi volmaakti libi na wan paradijs grontapoe gi ensrefi èn gi ala en pikin. Jesus Krestes ben gi en eigi volmaakti libi foe bai baka san Adam ben lasi. Ija, Jesus ben gi ensrefi „leki wan srefi sortoe loesoe-paiman gi ala sma” (1 Timoteus 2:5, 6). Foe di Jesus ben de wan volmaakti libisma, neleki fa Adam ben de dati, meki den e kari en „a lasti Adam” (1 Korentesma 15:45). No wan tra libisma leki Jesus ben kan gi a loesoe-paiman. Disi de so, foe di Jesus na a wan-enkri libisma di oiti ben libi na grontapoe èn di ben de a srefi leki Adam leki wan volmaakti libisma manpikin foe Gado. — Psalm 49:7; Lukas 1:32; 3:38.
17. O ten a loesoe-paiman ben pai na Gado?
17 Jesus ben dede di a ben abi 33 1/2 jari. Ma na a di foe dri dei baka di a dede, a ben kisi wan opobaka foe libi. Fotenti dei baka dati a ben drai go baka na hemel (Tori foe den Apostel 1:3, 9-11). Drape, leki wan jejesma di a ben kon de baka èn nanga a waarde foe en froeloesoe-ofrandi na en, a ben sori ensrefi „na fesi a Sma di de Gado foe a boen foe wi” (Hebrewsma 9:12, 24). Na a ten dati, a loesoe-paiman ben pai na Gado na hemel. Now a libisma famiri ben man kisi froeloesoe. Ma o ten sma sa kisi den wini foe en?
18. (a) Fa wi kan njan boen now kaba foe a loesoe-paiman? (b) San a loesoe-paiman sa man meki kon na ini a ten di de na wi fesi?
18 Now kaba wi kan kisi wini foe Jesus froeloesoe-ofrandi. Fa? Te wi e sori bribi na ini a froeloesoe-ofrandi, dan wi kan njan boen foe wan krin posisi na fesi Gado èn kon na ondro a lobi-ati èn switi sorgoe foe en (Openbaring 7:9, 10, 13-15). Foeroe foe wi ben doe kande kefalek bigi sondoe bifo wi ben leri sabi Gado. Èn te now ete wi e meki fowtoe, sontron toemoesi bigi fowtoe srefi. Ma na tapoe a fondamenti foe a loesoe-paiman, wi kan aksi Gado pardon na wan fri fasi, nanga a froetrow taki a sa jere wi (1 Johanes 2:1, 2; 1 Korentesma 6:9-11). Boiti foe dati, djonsro a loesoe-paiman sa opo a pasi gi wi foe kisi a presenti foe Gado foe têgo libi na ini en regtfardiki njoen grontapoe (2 Petrus 3:13). Na a ten dati, ala den sma di e sori bribi na ini a loesoe-paiman sa kon fri dorodoro foe katibo na sondoe nanga dede. Den kan loekoe go na fesi foe kisi têgo libi ini volmaaktifasi!
19. (a) Sortoe krakti a seti foe a loesoe-paiman abi na joe tapoe? (b) Fa wi moesoe sori taki wi de grantangi foe a loesoe-paiman, soleki fa na apostel Paulus ben taki?
19 Fa joe e denki now di joe kon leri sabi a tori foe a loesoe-paiman? A no e meki joe ati firi waran gi Jehovah Gado, foe di joe sabi taki a e broko en ede nanga joe sote, taki a ben gi en lobi Manpikin foe a boen foe joe? (Johanes 3:16; 1 Johanes 4:9, 10) Ma denki pikinso toe foe a lobi di Krestes ben sori. Nanga ala prisiri a ben kon na grontapoe foe dede gi wi. Wi no moesoe de grantangi foe dati? Na apostel Paulus ben tjari kon na krin fa wi moesoe sori taki wi de grantangi, di a ben taki: „A dede gi ala sma, so taki den wan di e libi, no ben sa libi moro langa gi densrefi, ma gi en di dede gi den èn di ben kisi wan opobaka” (2 Korentesma 5:14, 15). Joe sa sori taki joe de grantangi foe di joe e gebroiki joe libi foe dini Gado nanga en hemel Manpikin, Jesus Krestes?
FOE SAN EDE JESUS BEN DOE WONDROE
20. San wi e leri foe Jesus foe a dresi di a ben dresi a gwasiman?
20 Sma sabi Jesus heri boen foe den wondroe di a ben doe. A firi di a ben firi gi sma di ben de ini problema, ben dipi srefisrefi, èn a ben wani sote foe gebroiki a krakti di Gado ben gi en, foe jepi den. Foe eksempre, wan sma di ben abi a kefalek ogri siki, gwasi, ben kon na en èn ben taki: „Efoe joe wani nomo, joe kan meki mi kon krin.” „Sari ben boeweigi Jesus èn a ben langa en anoe, fasi en èn ben taigi en: ’Mi wani dati. Kon krin.’” Èn a sikiman ben kon boen! — Markus 1:40-42.
21. Fa Jesus ben jepi den ipi sma?
21 Loekoe wan tra bijbel tori, èn proeberi foe tjari kon na joe prakseri o dipi Jesus firi ben de gi den sma di bijbel e taki foe den, taki: „Dan bigi ipi sma ben kon na en, den ben tjari malengriwan, sma di lasi wan pisi foe den skin, breniwan, babaw-wan nanga foeroe trawan kon nanga den, èn den ben trowe den gewoon na en foetoe, èn a ben dresi den, so taki na ipi sma ben froewondroe di den ben si taki den babaw-wan ben e taki èn den malengriwan ben e waka èn den breniwan ben e si, èn den ben gi a Gado foe Israèl glori.” — Mateus 15:30, 31.
22. San e sori taki Jesus troetroe ben broko en ede nanga den sma di a ben jepi?
22 Taki Jesus ben broko en ede nanga den sma disi, di ben e njan pina, èn troetroe ben wani jepi den, e kon na krin ini san a ben taigi den disipel foe en moro fara. A ben taki: „Mi e sari na ipi sma, bikasi na dri dei kaba di den tan nanga mi èn den no abi noti foe njan; èn mi no wani seni den gowe sondro foe den njan wan sani fosi. Noso den kan fadon na pasi.” Èn foe dati ede Jesus ben gi den „fo doesoen man, sondro foe teri den oema nanga jongoe pikin”, njanjan na wan wondroe fasi, nanga soso seibi brede nanga wan toe pikin fisi. — Mateus 15:32-38.
23. San ben boeweigi Jesus foe gi a dede manpikin foe wan weduwe wan opobaka?
23 Na wan tra okasi Jesus ben miti wan beri di ben komoto na a foto Na-in. Bijbel e froeteri foe a tori disi na a fasi disi: „Den ben tjari wan dedesma gowe, a wan-enkri gebore manpikin foe en mama. Boiti foe dati, a mama ben de wan weduwe. . . . Èn di Masra ben kon si en, dan sari gi na oema ben boeweigi en.” A ben firi dipi a sari di a mama ben sari. Dati meki Jesus ben taki nanga a dede skin, èn ben komanderi: „Jonkoeman, mi e taigi joe: Opo tanapoe!” Èn leki wan wondroe: „A dedesma ben opo sidon èn ben bigin taki, èn a ben gi en na en mama.” Prakseri fa a mama dati ben moesoe firi! Fa joe ben sa firi? A njoensoe foe na aparti sani disi di ben pasa, ben panja go na ala sei. A no wan wondroe taki sma sabi Jesus so boen. — Lukas 7:11-17.
24. San den wondroe foe Jesus ben sori foe a ten di e kon?
24 Tokoe, den wini foe den wondroe foe Jesus ben de soso foe wan pisi ten. Den sma di a ben dresi, ben kisi problema baka na skinfasi. Èn den sma di a ben opo baka, dede baka. Ma den wondroe foe Jesus ben boeweisi taki Gado ben seni en kon, taki a ben de troetroe a Manpikin foe Gado. Èn den ben boeweisi taki nanga a krakti foe Gado ala problema foe libisma kan kon loesoe. Ija, den e sori na wan pikin fasi san sa pasa na grontapoe ondro a tiri foe a kownoekondre foe Gado. Na a ten dati, den angriberesma sa kisi njanjan, den sikisma sa kon betre èn srefi den dedesma sa kisi wan opobaka! Èn siki, dede noso tra problema noiti moro sa meki taki sma no de kolokoe. Fa dati sa de wan blesi! — Openbaring 21:3, 4; Mateus 11:4, 5.
TIRIMAN FOE A KOWNOEKONDRE FOE GADO
25. Ini sortoe dri aparti pisi ten wi kan prati a libi foe Jesus?
25 A libi foe a Manpikin foe Gado kan prati na ini dri aparti pisi ten. Na a fosi presi, wi abi den jari, di sma no sabi omeni den de, di a ben de nanga en Tata na hemel bifo a ben tron wan libisma. Dan wi abi den 33 1/2 jari di a ben de na grontapoe, baka di en mama ben meki en. Èn now a e libi baka leki wan jejesma na hemel. Sortoe posisi a abi na hemel sensi na opobaka foe en?
26. Foe di Jesus ben sori taki a ben de getrow na grontapoe, dan sortoe posisi a ben warti foe kisi?
26 A de krin taki Jesus ben sa tron wan kownoe. Srefi na engel ben froeteri Maria, taki: „Leki kownoe a sa tiri . . . foe têgo èn wan kaba no sa kon na a kownoekondre foe en” (Lukas 1:33). Na a ten foe en diniwroko na grontapoe, a ben taki ala ten baka foe a kownoekondre foe Gado. A ben leri den bakaman foe en foe begi: „Meki joe kownoekondre kon. Meki joe wani pasa, soleki na hemel, so toe na grontapoe.” Èn a ben gi den tranga foe „tan soekoe a kownoekondre fosi” (Mateus 6:10, 33). Jesus ben sori nanga a getrowfasi foe en na grontapoe, taki a ben de warti foe de kownoe foe Gado kownoekondre. A ben bigin foe tiri leki kownoe so esi leki a ben drai go baka na hemel?
27. (a) San Jesus ben doe, baka di a ben drai go baka na hemel? (b) San ben de a fosi sani di Jesus ben doe, leki kownoe foe Gado kownoekondre?
27 Nôno, a no ben doe dati. Na apostel Paulus e sori go na Psalm 110:1 èn e tjari kon na krin: „A man disi [Jesus] ben tjari foe ala ten wán ofrandi gi sondoe èn ben go sidon na a reti-anoe foe Gado, foe sensi a ten dati a e wakti te leki den feanti foe en ben sa poti leki wan foetoebangi gi en foetoe” (Hebrewsma 10:12, 13). Jesus ben e wakti tapoe a komando foe Jehovah, taki: „Go poti na joe ondro na mindri den feanti foe joe” (Psalm 110:2). Di a ten dati ben doro, a ben bigin krin hemel foe di a poeroe Satan nanga den engel foe en drape. Bijbel e skrifi foe a bakapisi foe a feti dati na hemel, nanga den wortoe disi: „Now a froeloesoe nanga a krakti nanga a kownoekondre foe wi Gado nanga a makti foe en Krestes kon, bikasi a kragiman foe den brada foe wi, di e kragi den na wi Gado fesi dei nanga neti, ben fringi go na gron” (Openbaring 12:10). Soleki fa wi ben si ini wan kapitel na fesi foe a boekoe disi, dan den troe tori e sori taki a feti disi na hemel ben feni presi kaba èn taki Jesus Krestes e tiri now na mindri den feanti foe en.
28. (a) San Krestes sa doe heri esi? (b) San wi moesoe doe foe a kibri wi?
28 Heri esi Krestes nanga den hemel engel foe en sa opo doe wan sani foe krin grontapoe foe ala disiten grontapoe tiri (Danièl 2:44; Openbaring 17:14). Bijbel e taki, dati a abi „wan srapoe langa feti-owroe foe naki den nâsi nanga dati, èn a sa wei den nanga wan isri tiki” (Openbaring 19:11-16). Te wi wani sori taki wi de warti foe kisi kibri na a ten foe a pori disi di e kon, dan wi moesoe sori bribi ini Jesus Krestes (Johanes 3:36). Wi moesoe tron en disipel èn saka wisrefi na en ondro leki wi hemel Kownoe. Joe sa doe dati?
[Aksi foe a tori disi]
[Prenki na tapoe bladzijde 58]
Jesus ben libi en temrewroko foe teki dopoe èn tron a salfoewan foe Jehovah
[Prenki na tapoe bladzijde 63]
Jesus ben de a srefi leki a volmaakti man Adam
[Prenki na tapoe bladzijde 64]
Sari ben boeweigi Jesus foe jepi den sikisma nanga angriberesma
[Prenki na tapoe bladzijde 67]
Nanga na opo di Jesus ben opo den dedesma, a ben sori san a ben sa doe na wan moro bigi fasi te a kownoekondre foe Gado e tiri
