Kapitel 25

Joe de na a sei foe Satan grontapoe noso na a sei foe Gado njoen seti?

1. San e sori troetroe taki joe de na a sei foe Gado njoen seti?

JOE DE NA A SEI FOE Gado regtfardiki njoen seti, èn joe wani foe a kon? Joe de teige Satan èn joe wani foe wan kaba kon na en grontapoe? Kande joe sa piki ala den toe aksi disi nanga Ija. Ma dati nofo? Wan owroe odo e taki, dati taki a no noti, ma doe na basi. Efoe joe e bribi ini Gado njoen seti, dan na a fasi fa joe e libi sa sori disi troetroe. — Mateus 7:21-23; 15:7, 8.

2. (a) Soema na den toe meester di wi kan dini? (b) San e sori soema srafoe noso foetoeboi wi de?

² A no de foe taki, dati a fasi fa joe e libi no kan plisi toe meester na a srefi ten. Noso joe e dini Jehovah Gado, noso joe e dini Satan Didibri. Wan gronprakseri di wi e feni ini bijbel, e jepi wi foe froestan disi. A e taki: „Oenoe no sabi taki te oenoe e tan pristeri oensrefi leki srafoe na wan sma foe gi en jesi, oenoe na srafoe foe en, foe di oenoe e gi en jesi?” (Romesma 6:16) Na soema joe e gi jesi? A wani foe soema joe e doe? Awinsi fa a piki foe joe de toe, efoe joe e waka baka den onregtfardiki pasi foe grontapoe, dan joe no kan dini a troe Gado, Jehovah.

SAN NA A GRONTAPOE FOE SATAN?

3. (a) Soema na a tiriman foe grontapoe, soleki fa bijbel e sori? (b) Fa Jesus ben sori ini begi, taki wan difrenti de na mindri a grontapoe nanga den disipel foe en?

³ Jesus ben kari Satan „a tiriman foe a grontapoe disi”. Èn na apostel Johanes ben taki: „Heri grontapoe didon na ini a makti foe na ogriwan” (Johanes 12:31; 1 Johanes 5:19). Loekoe taki, di Jesus ben e begi na Gado, a no ben taki dati den disipel foe en ben de wan pisi foe Satan grontapoe. A ben taki: „Mi e begi gi den [den disipel foe en]; mi no e begi gi grontapoe . . . Den no de wan pisi foe grontapoe, neleki fa mi no de wan pisi foe grontapoe” (Johanes 17:9, 16; 15:18, 19). Nanga disi a e kon na krin, taki troe kresten moesoe hori densrefi aparti foe grontapoe.

4. (a) Na soema a wortoe „grontapoe” ini Johanes 3:16 e sori go? (b) San na „a grontapoe” di den bakaman foe Krestes moesoe poti densrefi aparti foe en?

 ⁴ Ma na san Jesus ben sori go di a ben taki foe „grontapoe”? Na ini bijbel sontron a wortoe „grontapoe” wani taki nomo a heri libisma famiri. Gado ben seni en Manpikin foe gi en libi leki wan loesoe-paiman foe a boen foe a grontapoe disi foe libisma (Johanes 3:16). Ma tokoe Satan ben orga a moro bigi pisi foe a libisma famiri foe de teige Gado. So boen, a grontapoe foe Satan na a libisma libimakandra disi di orga, èn di de aparti noso dorosei foe Gado organisâsi di wi kan si. Na foe a grontapoe disi troe kresten moesoe de aparti. — Jakobus 1:27.

5. San na wan prenspari pisi foe grontapoe, èn fa bijbel e prenki en?

⁵ A grontapoe foe Satan — en libisma libimakandra di orga — de ini difrenti pisi di abi foeroe foe doe nanga makandra. Wan prenspari pisi na falsi relisi. Ini bijbel den e prenki falsi relisi leki wan „bigi hoeroe”, noso motjo, di nen: „Babilon a Bigiwan”. A hoeroe disi na wan grontapoemakti, soleki fa a e kon na krin ini disi, taki a „abi wan kownoekondre na tapoe den kownoe foe grontapoe” (Openbaring 17:1, 5, 18). Ma san e sori taki Babilon a Bigiwan na wan relisi grontapoemakti?

6, 7. (a) San e sori taki Babilon a Bigiwan na wan relisi makti? (b) Sortoe matifasi falsi relisi abi nanga den politiek tiri?

⁶ Foe di bijbel e taki dati „den kownoe foe grontapoe” ’e doe hoeroedoe’ nanga Babilon a Bigiwan, dan a no kan de wan politiek grontapoemakti. Èn foe di den „bisnisman” foe grontapoe „di e waka doe bisnis”, e tanapoe farawe èn e sari foe a pori di Babilon a Bigiwan kisi pori, dan a no de wan bisnis grontapoemakti toe (Openbaring 17:2; 18:15). Ma, taki a de troetroe wan relisi makti, e kon na krin nanga jepi foe den wortoe foe bijbel di taki dati nanga ’den afkodrei doe foe en, a ben kori ala nâsi’. — Openbaring 18:23.

⁷ Wan sani san e sori toe taki Babilon a Bigiwan na wan relisi makti, na a matifasi di a abi nanga wan „ogri meti”. Ini bijbel den sortoe meti dati e prenki politiek tiri (Danièl 8:20, 21). Bijbel e taki foe Babilon a Bigiwan, taki a „e sidon na tapoe wan  redi kloroe ogri meti, . . . di ben abi seibi ede nanga tin toetoe”. Na so fasi a e proeberi foe abi makti tapoe na „ogri meti”, noso grontapoe tiri disi (Openbaring 17:3). Èn a de wan troe sani, taki relisi moksi densrefi nanga politiek na ini a heri historia, èn foeroetron e taigi den tiri san den moesoe doe. Foe troe a ben abi „wan kownoekondre na tapoe den kownoe foe grontapoe”. — Openbaring 17:18.

8. San na wan tra prenspari pisi foe Satan grontapoe, èn fa bijbel e prenki den?

⁸ Den politiek tiri disi na wan tra prenspari pisi foe a grontapoe foe Satan. Soleki fa wi si kaba, dan bijbel e prenki den leki meti (Danièl 7:1-8, 17, 23). Taki den tiri disi, di joe kan teki gersi nanga meti, e kisi a makti foe den foe Satan, e kon na krin ini wan fisjoen di na apostel Johanes ben skrifi poti na boekoe: „Mi ben si wan ogri meti opo komoto na se, nanga tin toetoe nanga seibi ede . . . Èn a draak ben gi a meti en makti” (Openbaring 13:1, 2; 12:9). Ete wan boeweisi taki den kownoekondre noso tiri disi na wan pisi foe Satan grontapoe, na a troe tori taki Satan ben tesi Jesus, foe di a ben pristeri Jesus den kownoekondre disi. Satan no ben kan doe disi, efoe a no ben de a tiriman foe den kownoekondre disi. — Mateus 4:8, 9.

9. (a) Fa Openbaring 18:11 e taki foe wan tra pisi foe Satan grontapoe? (b) San a e doe èn san a e meki go na fesi, ala di disi e sori taki Satan de na baka?

⁹ Ete wan tra prenspari pisi foe Satan grontapoe, na a bigi-ai bisnis sistema di e kwinsi sma, èn di Openbaring 18:11 e taki foe en leki „bisnisman di e waka doe bisnis”. A bisnis sistema disi e wiki na ini sma wan lostoe foe prakseri densrefi nomo foe bai den sani di a e meki, awinsi kande den sma no abi den fanowdoe èn kande ben o de moro boen srefi sondro den sani disi. Na a srefi ten a bigi-ai bisnis sistema e tjari boen foeroe njanjan kon makandra na ini maksin, ma e meki miljoenmiljoen sma dede foe angri, bika den no man pai foe a njanjan. Na a tra sei, den e meki fetisani di man kiri a heri libisma famiri poeroe èn den e seri den foe meki moni. Na a fasi disi a bisnis sistema foe Satan, makandra nanga falsi relisi nanga den politiek tiri, e meki a prakseri di sma e prakseri densrefi nomo, takroedoe nanga kefalek ogri feti go na fesi.

10, 11. (a) San na wan tra pisi foe Satan grontapoe? (b) Fa bijbel e warskow wi foe no abi noti foe doe nanga dati?

¹⁰ A libisma libimakandra di orga èn di de na ondro Satan Didibri, ogri èn pori troetroe. A e gens den regtfardiki wet foe Gado èn a lai nanga ala sortoe doe di de teige boen gwenti nanga wet. So boen, wi  kan taki dati wan tra pisi foe a grontapoe foe Satan, na en loesoe fasi foe libi, den fasi foe en di de teige boen gwenti nanga wet. Na foe a sani disi ede meki den apostel Paulus nanga Petrus ben warskow kresten foe tan farawe foe den takroe doe foe den sma foe den nâsi. — Efeisesma 2:1-3; 4:17-19; 1 Petrus 4:3, 4.

¹¹ Na apostel Johanes ben poti krakti toe na tapoe a fanowdoe taki kresten moesoe de na ai gi den fowtoe lostoe nanga fasi foe grontapoe di de teige boen gwenti nanga wet. A ben skrifi: „No lobi grontapoe noso den sani ini grontapoe. Efoe wan sma lobi grontapoe, dan a lobi foe a Tata no de na en ini; bika ala sani ini grontapoe — a lostoe foe skin nanga a lostoe foe ai nanga a prodo di wan sma e prodo nanga den sani di a abi foe tan na libi — no e komoto na a Tata, ma e komoto na grontapoe” (1 Johanes 2:15, 16). A disipel Jakobus ben taki dati ’efoe wan sma wani de wan mati foe grontapoe, dan a e meki ensrefi tron wan feanti foe Gado’. — Jakobus 4:4.

 FA FOE TAN FARAWE FOE DE WAN PISI FOE GRONTAPOE

12, 13. (a) Fa Jesus ben sori taki kresten moesoe de na ini grontapoe? (b) Fa a kan foe de na ini grontapoe, ma no de wan pisi foe en?

¹² So langa leki a grontapoe foe Satan de, kresten moesoe libi na ini. Jesus ben sori disi di a ben begi na en Tata: „Mi e begi joe, foe no teki den poeroe na grontapoe.” Ma dan Jesus ben taki moro fara foe den bakaman foe en: „Den no de wan pisi foe grontapoe” (Johanes 17:15, 16). Fa a kan foe de na ini Satan grontapoe ma tokoe ete no de wan pisi foe en?

¹³ We, joe libi na mindri den sma di de a disiten libisma libimakandra di orga. Na mindri den sma disi joe abi hoeroeman, bigi-aiman nanga tra sma di e doe ogri sani. Kande joe e wroko makandra nanga den, e go na skoro nanga den, e njan nanga den èn e teki prati na tra srefi sortoe sani nanga den (1 Korentesma 5:9, 10). Joe moesoe lobi den toe, neleki fa Gado lobi den (Johanes 3:16). Ma wan troe kresten no lobi den ogri sani di sma e doe. A no e teki den fasi, den doe noso den marki foe den ini libi, abra. A no e teki prati na a pori relisi nanga politiek foe den. Èn ala di a moesoe wroko foeroetron na ini a bisnis grontapoe foe feni moni foe tan na libi, tokoe a no e teki prati na kroeka bisnis afersi; na so a kisi foe materia sani a no a prenspari sani na ini en libi toe. Foe di a de na a sei foe Gado njoen seti, dan a e tan farawe foe a takroe demakandra nanga sma di e libi gi Satan grontapoe (1 Korentesma 15:33; Psalm 1:1; 26:3-6, 9, 10). Leki wan bakapisi foe dati, dan a de na ini Satan grontapoe, ma tokoe ete a no de wan pisi foe en.

14. Na sortoe bijbel komando joe sa gi jesi, efoe joe de na a sei foe Gado njoen seti?

¹⁴ Fa a de nanga joe? Joe wani de wan pisi foe Satan grontapoe? Noso joe de na a sei foe Gado njoen seti? Efoe joe de na a sei foe Gado njoen seti, dan joe sa hori joesrefi aparti foe grontapoe, èn so srefi foe en falsi relisi. Joe sa gi jesi na a komando: „Komoto na en [Babilon a Bigiwan], mi pipel” (Openbaring 18:4). Ma, foe komoto na Babilon a Bigiwan, noso a grontapoemakti foe falsi relisi, wani taki moro leki foe broko den koneksi nomo nanga organisâsi foe falsi relisi. A wani taki toe, taki joe no moesoe abi noti foe doe nanga den relisi fesa foe grontapoe. — 2 Korentesma 6:14-18.

15. (a) Sortoe fesa Jesus ben komanderi kresten foe hori, na presi foe hori a dei di Jesus mama ben meki en? (b) San e sori taki Jesus mama no ben kan meki en na ini a kowroe ten foe winter? (c) Foe san ede den ben teki 25 december leki a datum foe hori a fesa foe a dei di Jesus mama ben meki en?

¹⁵ Kresneti na wan prenspari relisi fesa na ini a ten disi. Ma historia  e sori taki den fositen kresten no ben hori a fesa disi. Jesus ben taigi den bakaman foe en foe hori wan fesa foe memre a dede foe en, no a dei di en mama ben meki en (1 Korentesma 11:24-26). A troe tori de, taki 25 december a no a datum di Jesus mama ben meki en. Dati no ben kan de so, foe di bijbel e sori taki na a ten di Jesus mama ben meki en, den skapoeman ben de na netiten na ini den sabana ete. Den no ben o de drape na ini a kowroe alenten foe winter (Lukas 2:8-12). Te joe loekoe en boen, dan sma ben teki 25 december leki a datum foe hori a fesa foe a dei di Jesus mama ben meki en, foe di, soleki fa The World Book Encyclopedia e tjari kon na krin, „den sma foe Rome ben hori disi kaba leki a fesa foe Saturnus, pe den ben hori a frijaridei foe a son”.

16. (a) Sortoe tra prenspari relisi fesa no ben abi wan kresten bigin? (b) Foe sortoe boen sani ede meki troe kresten no e hori Kresneti nanga Pasen?

¹⁶ Pasen na wan tra prenspari relisi fesa. A Santa Wiki na ini son Latino-Amerkan kondre e kroederi nanga a fesa disi. Ma den fositen kresten no ben hori Pasen toe. Pasen ben abi en bigin so srefi toe na fesa di no ben de kresten fesa. The Encyclopœdia Britannica e taki: „No wan sani de na ini a Njoen Testament, di e sori taki den ben hori a fesa foe Pasen.” Ma a abi trobi troetroe taki Kresneti nanga Pasen no de kresten fesa, ma te joe loekoe en boen, ben abi den bigin na anbegiman foe falsi gado? Na apostel Paulus ben warskow foe no moksi waarheid nanga lei, di a ben taki dati srefi „wan pikinso sroedeki e  meki a heri lala brede kon swa” (Galasiasma 5:9). A ben taigi wan toe fositen kresten, taki a no ben de joisti foe den hori dei di sma ben hori na ondro a wet foe Moses, ma di Gado ben poeroe na pasi gi kresten (Galasiasma 4:10, 11). O moro prenspari a de gi troe kresten na ini a ten disi foe tan farawe foe fesa di Gado no ben taki noiti dati sma ben moesoe hori den èn di ben kon foe falsi relisi!

17. (a) San fowtoe na fesa di e gi grani na barinen sma noso nâsi? (b) Fa bijbel e sori taki kresten moesoe handri?

¹⁷ Tra fesa foe grontapoe e gi grani na barinen man. Trawan baka e gi grani nanga glori na nâsi noso grontapoe organisâsi. Ma bijbel e warskow foe no gi libisma grani di de leki anbegi, noso foe froetrow na tapoe libisma organisâsi foe doe san Gado wawan man foe doe (Tori foe den Apostel 10:25, 26; 12:21-23; Openbaring 19:10; Jeremia 17:5-7). So boen, fesa di abi leki marki foe gi glori na wan sma noso na wan libisma organisâsi, no de ini akroederi nanga a wani foe Gado èn troe kresten no sa teki prati na den. — Romesma 12:2.

18. (a) Sortoe sani sma meki foe gi grani na den noso foe anbegi den? (b) San Gado wet e taki ini a tori foe gi wan sani grani di de leki anbegi?

¹⁸ Libisma meki foeroe sani di sma moesoe gi grani na den noso anbegi den. Son wan foe den sani disi meki foe isri noso foe oedoe. Trawan meki foe krosi èn kande den nai noso ferfi wan prenki foe wan sani na hemel noso na grontapoe na den tapoe. Wan nâsi kan meki  wan wet di e taki dati ibri sma moesoe gi so wan sani grani di de leki anbegi. Ma a wet foe Gado e taki, dati den foetoeboi foe en no moesoe doe dati (Exodus 20:4, 5; Mateus 4:10). San Gado pipel doe na ini so wan situwâsi?

19. (a) San a kownoe foe Babilon ben komanderi ala sma foe doe? (b) Kresten e doe boen foe waka baka na eksempre foe soema?

¹⁹ Kownoe Nebukadnesar ben bow wan kefalek bigi popki foe gowtoe na ini Babilon foe owroeten èn ben komanderi taki ibri sma ben moesoe boigi gi dati. ’Ibri sma di no e doe dati’, a ben taki, ’den sa trowe go na ini a faja onfoe di e leti.’ Bijbel e froeteri wi taki dri jongoe Hebrewman, Sadrak, Mesak nanga Abednego, ben weigri foe doe san a kownoe ben komanderi. Foe san ede? Foe di dati ben abi foe doe nanga anbegi, èn na anbegi foe den ben de gi Jehovah wawan. Gado ben feni san den ben doe, boen, èn a ben kibri den foe na atibron foe a kownoe. Nebukadnesar ben kon si srefi taki den foetoeboi disi foe Jehovah, no ben de wan kefar gi a Kondre, foe dati ede a ben meki wan wet foe kibri a fri foe den (Danièl 3:1-30). Joe no e froewondroe foe a getrowfasi foe den jonkoeman disi? Joe sa sori taki joe de troetroe na a sei foe Gado njoen seti, foe di joe e gi jesi na ala den wet foe Gado? — Tori foe den Apostel 5:29.

20. San na difrenti sani di Satan e gebroiki foe proeberi foe meki wi broko den wet foe Gado tapoe a kontren foe seks?

²⁰ A no de foe taki, dati Satan no wani foe wi dini Jehovah. A wani foe wi dini en. Foe dati ede a e proeberi foe kisi wi so fara foe doe san en wani, foe di a sabi taki wi e tron den srafoe noso foetoeboi foe a sma di wi e gi jesi na en (Romesma 6:16). Nanga jepi foe difrenti sani, soleki telefisi, felem, son fasi foe dansi nanga seks boekoe, Satan e gi sma di no trow, deki-ati foe abi seks nanga makandra èn sma di trow foe doe soetadoe. A e meki a gersi leki so wan fasi foe libi, boen èn taki a de srefi joisti. Ma, disi de teige den wet foe Gado (Hebrewsma 13:4; Efeisesma 5:3-5). Èn wan sma di abi foe doe nanga so wan fasi foe libi, e sori, te joe loekoe en boen, taki a de na a sei foe Satan grontapoe.

21. San na tra sani di, te wan sma abi foe doe nanga den, sa sori taki a de na a sei foe Satan grontapoe?

²¹ Tra sani de ete di Satan grontapoe ben meki kon de pôpi, ma di de teige den wet foe Gado. Kon droengoe nanga a dringi foe sopi, na wan foe den sani (1 Korentesma 6:9, 10). Wan trawan na foe gebroiki drug soleki marwana nanga heroïne foe prisiri ede, èn so srefi a  gebroiki foe tabaka. Den sani disi e doe ogri na a skin èn den no krin. Foe gebroiki den, de krinkrin teige a wet foe Gado di e taki foe „krin wisrefi foe ibri doti foe skin nanga jeje” (2 Korentesma 7:1). A smoko foe tabaka e doe ogri toe na a gosontoe foe sma di de ini a birti èn di moesoe hari a smoko go na inisei; dati meki a smokoman e pasa a wet foe Gado, di taki dati wan kresten moesoe lobi a sma na en sei. — Mateus 22:39.

22. (a) San bijbel e taki foe broedoe? (b) Foe san ede a teki foe broedoe transfusie, te joe loekoe en boen, no de tra fasi leki a „njan” foe broedoe? (c) San e sori taki ’foe tan farawe foe broedoe’ wani taki, foe no teki en kwetikweti na ini joe skin?

²² Wan tra sani di foeroe sma gwenti foe doe na difrenti pisi foe grontapoe, na a njan foe broedoe. Na so sma e njan meti di a broedoe no lon komoto na wan boen fasi noso kande sma e meki a broedoe lon komoto èn e gebroiki dati na ini njanjan. Ma a Wortoe foe Gado e tapoe wi foe njan broedoe (Genesis 9:3, 4; Lefitikus 17:10). Fa a de dan nanga wan broedoe transfusie, dati wani taki, a teki foe broedoe ini wi skin? Kande son sma e taki-go-taki-kon, taki a kisi foe wan broedoe transfusie no de troetroe leki a „njan” foe broedoe. Ma a no de so, taki, te wan sikiman no man njan nanga en mofo, taki foeroetron datra e gi rai foe gi en njanjan na a srefi fasi leki fa den e gi wan broedoe transfusie? Bijbel e taigi wi, foe „tan farawe foe . . . broedoe” (Tori foe den Apostel 15:20, 29). San disi wani taki? Efoe wan datra ben sa taigi joe foe tan farawe foe sopi, dan dati ben sa wani taki nomo, dati joe no moesoe dringi en nanga joe mofo, ma dati joe ben sa kan spoiti en langalanga go na ini joe broedoetitei? Kwetikweti! Na so a de toe, taki, foe ’tan farawe foe broedoe’ wani taki, foe no teki en kwetikweti na ini joe skin.

23. (a) Sortoe bosroiti joe moesoe teki? (b) San o sori sortoe bosroiti joe teki?

²³ Joe moesoe sori Jehovah Gado, taki joe de na a sei foe a njoen seti foe en èn taki joe no de wan pisi foe a grontapoe disi. Disi e aksi foe joe teki wan bosroiti. A bosroiti di joe moesoe teki, na foe dini Jehovah èn doe en wani. Joe no kan tan sondro foe teki wan bosroiti, soleki fa son Israèlsma foe owroeten ben doe (1 Kownoe 18:21). Bika prakseri pikinso, efoe joe no e dini Jehovah, dan joe e dini Satan. Kande joe e taki dati joe de na a sei foe Gado njoen seti, ma san e kon na krin na ini a fasi fa joe libi? Foe de na a sei foe Gado njoen seti wani taki, foe tan farawe foe ala doe di Gado e kroetoe èn di no sa de moro na ini en regtfardiki njoen seti.

[Aksi foe a tori disi]

[Prenki na tapoe bladzijde 209]

San na a grontapoe di Jesus no ben sa begi gi en èn di den disipel foe en no de wan pisi foe en?

[Prenki na tapoe bladzijde 211]

Ini bijbel, den e prenki falsi relisi leki wan droengoe motjo, èn a grontapoe tiri di a e rèi na tapoe, den e prenki leki wan ogri meti

Loesoe fasi foe libi na wan pisi foe Satan grontapoe. A bigi-ai bisnis sistema na wan prenspari pisi toe

[Prenki na tapoe bladzijde 213]

Foe di skapoeman ben de nanga den ipi foe den na netiten na ini den sabana ete na a ten di Jesus mama ben meki en, dan a no ben kan, taki en mama ben meki en na tapoe 25 december

[Prenki na tapoe bladzijde 214]

Den foetoeboi foe Gado ben weigri foe anbegi wan popki di wan kownoe ben meki. San joe ben sa doe ini wan srefi sortoe situwâsi?