Libi foe têgo a no soso wan dren
Kapitel 1
Libi foe têgo a no soso wan dren
1, 2. Foe san ede a de wan moeilek sani foe bribi taki libisma kan libi foe têgo ini kolokoe na grontapoe?
WAN KOLOKOE LIBI na grontapoe — a no gersi leki sma kan njan boen foe en, srefi no foe wan sjatoe ten. Nofotron siki, kon owroe, angri, takroedoe — foe kari soso wan toe problema — e meki a libi no switi. So boen, kande joe e taki, dati na tapoe wan sma e tapoe en ai gi a troe foe a tori, te a e taki foe libi foe têgo na ini wan paradijs na grontapoe. Kande joe e denki taki na wan lasi ten foe taki foe en èn dati libi foe têgo na soso wan dren.
2 A troe, taki moro foeroe sma sa agri nanga joe ini disi. Ma, foe san ede wi kan de so seiker dan taki joe kan libi foe têgo na ini wan paradijs na grontapoe? Foe san ede wi kan bribi taki têgo libi a no soso wan dren?
FOE SAN EDE WI KAN BRIBI DATI
3. San e sori taki Gado wani foe libisma de kolokoe na grontapoe?
3 Wi kan bribi dati, foe di wan Moro Hei Makti, na Almakti Gado, ben sreka grontapoe nanga ala san de fanowdoe foe meki san wi e winsi kon troe. A ben meki grontapoe ini wán wortoe volmaakti gi wi! Èn a ben meki man nanga oema na a moro boen fasi di de, so taki den ben kan njan boen dorodoro foe a libi na ini a grontapoe oso disi — foe têgo. — Psalm 115:16.
4. San den sabidensiman kon sabi foe a skin foe libisma, di e sori taki a ben meki foe libi foe têgo?
4 Sabidensiman sabi langa kaba foe a krakti foe a skin foe libisma foe njoen ensrefi. Na wan froewondroe fasi njoen cel foe a skin e kon ini a presi foe owroewan noso owroewan e sreka kon boen baka, te disi de fanowdoe. Èn a gersi leki a sani disi, a njoen di cel e njoen densrefi, ben sa moesoe go doro foe têgo. Ma disi no e pasa èn dati na san sabidensiman no man tjari kon na krin. Te nanga now den no man froestan krinkrin foe san ede sma e kon owroe. Den e taki dati na ondro den joisti fasi fa sani moesoe de, libisma ben moesoe man foe libi foe têgo. — Psalm 139:14.
5. San bijbel e taki dati Gado ben abi na prakseri nanga grontapoe?
5 Ma a de troetroe a prakseri foe Gado foe libisma libi foe têgo ini kolokoe na grontapoe? Efoe dati de so, dan têgo libi a no soso wan winsi noso wan dren — a sa kon troetroe! San bijbel, a boekoe di e froeteri foe den prakseri foe Gado, e taki foe a tori disi? A e kari Gado „a Sma di seti grontapoe èn a Mekiman foe en”, èn a e taki moro fara: „En, a Sma di ben poti en steifi, di no ben meki en foe soso, di ben seti en foe sma libi na tapoe.” — Jesaja 45:18.
6. (a) Fa sani de na grontapoe na ini a ten disi? (b) Na so Gado wani en?
6 Joe e feni taki libisma e libi now na grontapoe na a fasi fa Gado ben abi dati na prakseri? A troe, libisma e libi pikinmoro na ala pisi foe grontapoe. Ma den e libi kolokoe nanga makandra leki wan osofamiri di bondroe kon na wán, ini a boen fasi fa a Mekiman foe den ben abi dati na prakseri gi den? Grontapoe prati na ini a ten disi. Sma no wani si makandra na ai. Takroedoe de. Feti de. Miljoenmiljoen sma de nanga angri èn nanga siki. Trawan abi broko-ede ala dei nanga wan tanpresi, nanga wroko èn nanga kostoe. Èn no wan foe den sani disi e gi Gado grani. So boen, a de krin taki libisma no e libi na grontapoe na a fasi fa na Almakti Gado ben abi dati na prakseri biginbigin.
7. San Gado ben abi na prakseri nanga grontapoe, di a ben meki a fosi libisma paar?
7 Baka di Gado ben meki a fosi libisma paar, a ben poti den na ini wan paradijs na grontapoe. A ben wani foe den ben sa njan boen foe a libi na grontapoe foe têgo. A sani di a ben abi na prakseri nanga den ben de foe bradi a paradijs foe den go na heri grontapoe. Disi e kon na krin ini san a ben taigi den: „Oen meki pikin èn kon foeroe èn foeroe grontapoe èn poti en na oen ondro” (Genesis 1:28). Ija, a ben de a prakseri foe Gado, taki baka wan pisi ten heri grontapoe ben sa kon na ondro a tiri foe wan regtfardiki libisma famiri, di ben sa libi makandra ini vrede nanga kolokoe.
8. Foe san ede wi kan de seiker taki san Gado abi na prakseri nanga grontapoe, no ben kenki, ala di a fosi libisma paar ben trangajesi Gado?
8 Ala di a fosi libisma paar ben trangajesi Gado èn ben sori nanga dati taki den no ben warti foe libi foe têgo, tokoe a prakseri di Gado ben abi biginbigin no ben kenki. A sa kon troe nomonomo! (Jesaja 55:11) Bijbel e pramisi: „Na den regtfardikiwan sa abi grontapoe, èn den sa libi na tapoe foe têgo” (Psalm 37:29). Foeroetron bijbel e froeteri foe a seti foe Gado foe gi sma di e dini en, têgo libi. — Johanes 3:14-16, 36; Jesaja 25:8; Openbaring 21:3, 4.
PE JOE E ANGRI FOE LIBI FOE TÊGO?
9. (a) Sortoe angri libisma abi moro foeroe? (b) San bijbel wani taki te a e taki dati ’Gado poti têgo ten na ini den froestan’?
9 Wi kan prisiri foe troe, taki a de a prakseri foe Gado foe wi libi foe têgo. Bika prakseri pikinso: Efoe na joe ben moesoe poti wan dei o ten joe wani dede, sortoe dei joe ben sa poti dan? Joe no sa man foe poti wan dei, a no so? Joe no wani foe dede èn na so no wan enkri tra normaal sma, di abi wan seiker marki foe gosontoe, wani dati toe. Gado meki wi nanga na angri foe tan na libi, no nanga na angri foe dede. Foe a fasi fa Gado ben meki libisma, bijbel e taki: „A poti srefi têgo ten na ini den froestan” (Preikiman 3:11, Byington). San disi wani taki? A wani taki dati libisma moro foeroe e angri foe libi go doro, sondro foe dede. Foe na angri disi ede foe abi wan tamara sondro kaba, meki libisma soekoe langa na wan fasi foe tan jongoe foe têgo.
10. (a) Pe libisma e angri foe libi foe têgo soleki fa a e firi dati? (b) Foe san ede wi kan de seiker taki Gado sa meki a kan, taki wi libi foe têgo na grontapoe?
10 Pe libisma wani libi moro foeroe foe têgo? Na pe den gwenti foe libi, djaso na grontapoe. Libisma meki gi grontapoe, èn grontapoe gi libisma (Genesis 2:8, 9, 15). Bijbel e taki: „A [Gado] poti a fondamenti foe grontapoe na en fasti presi; sani no sa meki a seki te ten di no skotoe, noso foe têgo” (Psalm 104:5). Foe di grontapoe ben meki foe tan foe têgo, dan libisma moesoe libi foe têgo toe. Wan lobi Gado seiker no ben sa meki libisma nanga wan angri foe libi foe têgo èn dan no meki taki a kan, dati na angri dati kon troe gi den! — 1 Johanes 4:8; Psalm 133:3.
A SORTOE LIBI DI JOE E ANGRI FOE EN
11. San bijbel e taki foe sori taki libisma kan libi foe têgo ini volmaakti gosontoe?
11 Loekoe a tra bladzijde. Foe sortoe libi den sma disi e njan boen foe en? Joe ben sa wani de wan foe den? Ija, joe sa taki! Loekoe o gosontoe èn o jongoe den de! Efoe den ben taigi joe taki den sma disi ben libi doesoendoesoen jari kaba, joe ben sa bribi dati dan? Bijbel e froeteri wi taki den owroe sma sa kon jongoe baka, den sikiwan sa kon gosontoe baka èn den malengriwan, den breniwan, den dofoewan nanga den babaw-wan sa kon betre foe ala den siki foe den. Di Jesus Krestes ben de na grontapoe, a ben doe foeroe wondroe nanga a dresi di a ben dresi siki sma. Nanga disi a ben sori fa ala sma, di de na libi, sa kon kisi volmaakti gosontoe na ini a toemoesi moi ten dati, di no de fara moro. — Job 33:25; Jesaja 33:24; 35:5, 6; Mateus 15:30, 31.
12. Sortoe fasi fa sani o de, wi e si na den prenki disi?
12 Loekoe fa disi de wan moi djari foe libi na ini! Soleki fa Krestes ben pramisi, dan a de troetroe wan paradijs, neleki a paradijs di a fosi trangajesi man nanga oema ben lasi (Lukas 23:43). Èn loekoe a vrede nanga wánfasi di de drape. Sma foe ala ras — blakawan, wetiwan nanga geriwan — e libi leki wán famiri makandra. Srefi den meti e libi ini vrede. Loekoe a pikin fa a e prei nanga a lew. Èn tokoe, noti no de foe frede. Ini a tori disi a Mekiman e taki: „A bigi sortoe penitigri srefi sa go didon na sei a pikin bokoboko, èn a pikin kaw nanga a jongoe lew di abi neki-wiwiri, nanga a meti di kisi boen njanjan, alamala makandra; èn wan pikin boi ete sa de fesiman foe den. . . . Èn srefi a lew sa njan drei grasi leki a mankaw. Èn a pikin na bobi sa prei foe troe na a olo foe a kobrasneki.” — Jesaja 11:6-9.
13. San no sa de moro na grontapoe te den prakseri foe Gado kon troe?
13 Na ini a paradijs di Gado abi na prakseri gi libisma, joe sa abi ala sani foe san ede sma sa de kolokoe. Grontapoe sa gi foeroe boen sani foe njan. No wan sma sa de oiti nanga angri moro (Psalm 72:16; 67:6). Feti, takroedoe, doe ogri na sma nanga tranga, srefi a si di sma no wani si makandra na ai, nanga a prakseri di sma e prakseri densrefi nomo, sa de sani foe a ten di pasa. Ija, den sa komoto na pasi foe têgo! (Psalm 46:8, 9; 37:9-11) Joe e bribi taki ala den sani disi kan pasa?
14. San e meki joe bribi taki Gado sa tjari wan kaba kon na pina?
14 We, prakseri pikinso: Efoe joe ben abi a makti, joe ben sa tjari wan kaba kon na ala den sani di e tjari pina kon gi libisma? Èn joe ben sa tjari den fasi kon fa sani moesoe de, di libisma ati e angri srefisrefi foe den? A no de foe taki, dati joe ben sa doe dati. Èn dati na joisti san wi lobi hemel Tata sa doe. Na en sa gi san wi abi fanowdoe èn meki den winsi foe wi kon troe, bika Psalm 145:16 e taki foe Gado: „Joe e opo joe anoe èn e meki a tranga lostoe foe ala san e libi kon troe.” Ma o ten disi sa pasa?
BIGI BLESI DE KROSIBEI
15. (a) San a kaba foe grontapoe sa wani taki gi a gron? (b) San a sa wani taki gi den takroe sma? (c) San a sa wani taki gi den sma di e doe Gado wani?
15 Foe opo a pasi meki den toemoesi moi blesi disi kon na grontapoe, dan Gado e pramisi foe tjari wan kaba kon na ogridoe, so srefi na den sma di e meki ogridoe kon. Na a srefi ten Gado sa kibri den sma di e dini en, bika bijbel e taki: „Grontapoe e pasa gowe, èn so srefi a lostoe foe en, ma a sma di e doe a wani foe Gado, e tan foe têgo” (1 Johanes 2:17). Fa dati sa de wan bigi kenki! A kaba foe grontapoe no sa wani taki a kaba foe a gron foe wi. Na presi foe dati a sa wani taki a kaba nomo foe takroe sma nanga a fasi fa den e libi, neleki fa a ben pasa na a froedoe di ben kon na heri grontapoe na ini den dei foe Noa. Ma den sma di e dini Gado, sa pasa a kaba libilibi. Dan, na tapoe wan grontapoe di kon krin, den sa njan boen foe a fri di den kon fri foe ala sma di wani pina èn kwinsi den. — Mateus 24:3, 37-39; Odo 2:21, 22.
16. Sortoe sani ben taki na fesi, taki ben o pasa na ini den „lasti dei”?
16 Ma, kande wan sma sa taki: ’A fasi fa sani de, e kon moro takroe, no moro betre. Fa wi kan de seiker taki a bigi kenki disi de krosibei?’ Jesus Krestes ben taki na fesi taki foeroe sani ben o pasa di en bakaman di ben moesoe kon ete, ben sa moesoe poti ai na tapoe, so taki den ben o sabi taki a ten foe Gado ben doro foe tjari wan kaba kon na grontapoe. Jesus ben taki dati den sani leki bigi feti, mankeri foe njanjan, bigi gronseki, kroektoedoe di ben o kon moro foeroe, nanga a lobi di ben o kon moro pikinso dei foe dei, ben o marki den lasti dei foe a seti foe sani disi (Mateus 24:3-12). Bijbel e taki moro fara toe: „Na ini den lasti dei moeilek ten sa kon, di sa tranga foe pasa” (2 Timoteus 3:1-5). A no joisti disi na den fasi fa sani de di wi e ondrofeni nownow?
17. San sma di e denki dipi foe sani, taki foe den fasi fa sani de na ini a ten disi?
17 Foeroe sma di e studeri den sani di e pasa na grontapoe, e taki dati wan bigi kenki de foe kon. Foe eksempre, a skrifiman foe a Miami Herald ben skrifi: „Wan sma no abi foe tja-ede foe kan poti den rampoe foe den wan toe jari di pasa, na makandra èn si taki grontapoe de na a dromofo foe bigi sani di o pasa na ini a historia. . . . A sa tjari foe ala ten wan kenki kon ini a fasi fa sma e libi.” Na a srefi fasi na Amerkan skrifiman Lewis Mumford ben taki: „A boen kweki di sma ben e kisi e go na baka. Dati de seiker. . . . Te a boen kweki di sma ben e kisi ben e go na baka na ini a ten di pasa, dan a ben de wan sani di joe ben si na wanwan presi. . . . Ma now, di den grontapoe afersi frekti kon moro krosibei na makandra nanga jepi foe den njoenten komunikâsi jepisani, dan a no soso a boen kweki di sma ben e kisi e go na baka, ma a heri planeiti e go na ondro toe.”
18. (a) San den fasi fa sani de na grontapoe e sori foe a ten di e kon? (b) San sa kon na ini a presi foe den disiten tiri?
18 Ija, den fasi fa sani de na grontapoe na ini a ten disi, e sori taki wi e libi now na ini a ten, pe a pori foe a heri seti foe sani moesoe foe feni presi. Ija, now heri esi Gado sa krin grontapoe foe ala den sma di ben sa wani foe pori grontapoe (Openbaring 11:18). A sa poeroe den disiten tiri, foe meki presi gi a regtfardiki tiri foe en foe tiri heri grontapoe. Na foe a Kownoekondre tiri disi Krestes ben leri den bakaman foe en foe begi. — Danièl 2:44; Mateus 6:9, 10.
19. San wi moesoe doe efoe wi wani libi foe têgo?
19 Efoe joe lobi a libi èn wani foe libi foe têgo na grontapoe na ondro a tiri foe Gado, dan joe moesoe doe esi foe teki soifri sabi na ini joe, foe Gado, foe den prakseri foe en èn foe san a e aksi. Jesus Krestes ben taigi Gado ini begi: „Disi wani taki têgo libi, foe den teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes” (Johanes 17:3). Fa a de wan prisiri foe sabi taki wi kan libi foe têgo — taki a no de soso wan dren! Ma foe njan boen foe a bigi blesi disi foe Gado, dan wi moesoe leri foe wan feanti di e doe ala moeiti foe tapoe wi foe kisi a blesi disi.
[Aksi foe a tori disi]
[Prenki na tapoe bladzijde 8, 9]
Na so Gado ben abi na prakseri taki grontapoe ben moesoe de?
[Wan prenki di e tapoe heri bladzijde 11]
