San joe moesoe doe foe libi foe têgo
Kapitel 30
San joe moesoe doe foe libi foe têgo
1. (a) Sortoe toe fasi foe libi de, di joe moesoe teki wán foe den? (b) Fa joe kan teki a joisti fasi foe libi?
JEHOVAH GADO e pristeri joe wan kefalek moi sani — têgo libi na ini en regtfardiki njoen seti foe sani (2 Petrus 3:13). Ma foe kan libi na ini a ten dati, e anga foe a doe di joe e doe a wani foe Gado nownow. A disiten ogri grontapoe, makandra nanga ala sma di e tan de wan pisi foe en, de foe pasa gowe, „ma a sma di e doe a wani foe Gado, e tan foe têgo” (1 Johanes 2:17). So boen, joe moesoe teki wán foe den toe fasi foe libi di de. A wán e tjari joe go na dede èn a trawan na a libi foe têgo (Deuteronomium 30:19, 20). Sortoewan joe sa teki?
2. (a) Efoe joe abi troetroe bribi, dan sortoe overtoigi joe sa abi? (b) Fa froetrow na tapoe Gado, soleki fa wan pikin e froetrow na tapoe wan lobi-ati tata, sa jepi joe foe dini en?
2 Fa joe e sori taki joe e teki libi? Na ini a fosi presi, joe moesoe poti bribi na Jehovah nanga den pramisi foe en. Joe abi a fasti overtoigi taki Gado de, „èn taki a e tron a sma di e pai den wan di e soekoe en serjoesoe”? (Hebrewsma 11:6) Joe moesoe froetrow na tapoe Gado soleki fa wan manpikin noso wan oemapikin e froetrow na tapoe wan lobi-ati nanga sari-ati tata (Psalm 103:13, 14; Odo 3:11, 12). Te joe abi so wan bribi, dan joe no sa degedege efoe a rai foe Gado boen noso efoe den pasi foe en reti, awinsi sontron joe no e froestan sani krinkrin.
3. (a) San moro de fanowdoe boiti bribi? (b) Sortoe wroko de fanowdoe foe sori taki joe e teki libi?
3 Ma moro leki bribi de fanowdoe. Wroko moesoe de toe foe sori san joe e denki troetroe foe Jehovah (Jakobus 2:20, 26). Joe doe sani kaba foe sori a sari di joe e sari, taki na ini a ten di pasa joe no ben doe san boen? Sani ben boeweigi joe foe sori berow noso foe tjari kenki kon, so taki joe fasi foe libi tjari kon ini akroederi nanga a wani foe Jehovah? Joe ben drai joesrefi, dati wani taki, wai iniwan fowtoe fasi foe libi di kande joe ben waka na en baka poti na wan sei, èn joe bigin e doe den sani di Gado e aksi foe joe? (Tori foe den Apostel 3:19; 17:30) Den sortoe wroko disi sa sori taki joe e teki libi.
A GI DI WAN SMA E GI ENSREFI ABRA NANGA DOPOE
4. (a) San moesoe boeweigi joe foe doe a wani foe Gado? (b) Te joe teki a bosroiti taki joe wani dini Gado, dan san na a joisti sani san joe moesoe doe?
4 San moesoe boeweigi joe foe teki libi èn doe a wani foe Gado? Warderi moesoe boeweigi joe. Prakseri pikinso: Jehovah meki a kan, taki joe kon fri foe ala siki, pina èn srefi dede. Nanga a diri presenti foe en Manpikin a ben opo a pasi gi joe foe kisi libi sondro wan kaba na tapoe wan paradijs grontapoe (1 Korentesma 6:19, 20; 7:23; Johanes 3:16). Te a lobi foe Jehovah e boeweigi joe foe joe lobi en toe, san joe moesoe doe dan? (1 Johanes 4:9, 10; 5:2, 3) Joe moesoe go na Gado na ini a nen foe Jesus èn froeteri en na ini begi taki joe wani de en foetoeboi, taki joe wani de foe en. Na a fasi disi joe e gi joesrefi abra na Gado. Disi na wan froetrow afersi foe joesrefi. No wan tra sma kan doe disi gi joe.
5. (a) San Gado e froewakti foe joe, baka te joe gi joesrefi abra na en? (b) Sortoe jepi de gi joe foe kan libi leki fa joe ben pramisi di joe ben gi joesrefi abra na Gado?
5 Baka te joe gi joesrefi abra na Gado, dan a e froewakti foe joe foe libi leki fa joe pramisi en. So boen, sori taki joe na wan sma di e hori joe wortoe, foe di joe e hori na a bosroiti disi, noso na a gi disi di joe e gi joesrefi abra, so langa leki joe e libi (Psalm 50:14). Efoe joe e tan krosibei na Gado organisâsi di wi kan si, dan joe kan kisi jepi foe kompe kresten, di nanga ala prisiri sa gi joe lobi-ati deki-ati nanga jepi. — 1 Tesalonikasma 5:11.
6. (a) Sortoe stap de fanowdoe, baka te joe gi joe libi abra na Gado? (b) San dopoe wani taki?
6 Ma joe moesoe doe moro leki foe froeteri Jehovah na wan froetrow fasi taki joe wani de foe en. Joe moesoe sori na fesi foe trawan taki joe gi joesrefi abra foe dini Gado. Fa joe e doe dati? Foe di joe e meki den dopoe joe na ini watra. Nanga a dopoe disi na ini watra wan sma e sori na poebliki taki a gi en libi abra na Jehovah èn taki a e pristeri ensrefi foe doe Jehovah wani.
7. (a) Sortoe eksempre Jesus ben gi kresten? (b) Foe san ede a dopoe di Jesus ben gi komando foe en, no de foe pikin-nengre?
7 Taki a dopoe na ini watra na wan prenspari sani san Gado e aksi, e kon na krin na ini na eksempre foe Jesus Krestes. Jesus no ben froeteri en Tata nomo taki a ben kon foe doe En Tata wani (Hebrewsma 10:7). Di Jesus ben de foe bigin nanga en wroko leki wan preikiman foe Gado kownoekondre, a ben pristeri ensrefi na Jehovah èn ben teki dopoe na ini watra (Mateus 3:13-17). Foe di Jesus ben gi a model, dan den wan na ini a ten disi di e gi densrefi abra na Jehovah foe doe en wani, moesoe teki dopoe toe (1 Petrus 2:21; 3:21). Te joe loekoe en boen, Jesus ben komanderi en bakaman foe meki disipel foe sma foe ala nâsi èn dan dopoe den njoen disipel disi. Disi a no wan dopoe foe pikin-nengre. Na wan dopoe foe sma di tron bribiman, foe di densrefi teki a bosroiti foe dini Jehovah. — Mateus 28:19; Tori foe den Apostel 8:12.
8. Na soema na ini a gemeente joe moesoe froeteri taki joe wani teki dopoe, èn foe san ede?
8 Efoe joe teki a bosroiti foe dini Jehovah èn wani teki dopoe, san joe moesoe doe dan? Joe moesoe froeteri a fesiman opziener foe a gemeente foe Jehovah Kotoigi di joe de na ini, san na a winsi foe joe. En, makandra nanga tra owroeman na ini a gemeente, nanga ala prisiri sa loekoe den tori nanga joe, di joe moesoe sabi foe kan dini Gado na wan fasi di a e teki. Dan sani kan seti gi joe foe teki dopoe.
A WANI FOE GADO GI JOE NA INI A TEN DISI
9. San Noa ben doe bifo a froedoe, di de so srefi a wani foe Gado gi joe nownow toe?
9 Bifo a froedoe, dan Jehovah ben gebroiki Noa, „wan preikiman foe regtfardikifasi”, foe warskow den sma gi a pori di ben o kon èn foe sori den tapoe a wan-enkri presi foe kibri, na ark (Mateus 24:37-39; 2 Petrus 2:5; Hebrewsma 11:7). A de a wani foe Gado, taki joe doe nownow wan srefi sortoe preikiwroko. Jesus ben taki na fesi foe a ten foe wi: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Tra sma moesoe sabi den sani toe di joe leri foe den prakseri foe Gado, efoe den wani foe pasa a kaba foe a seti disi libilibi èn kisi libi foe têgo (Johanes 17:3). Disi no e boeweigi joe ati foe prati nanga trawan a sabi disi di e gi libi?
10. (a) Na baka sortoe eksempre foe Jesus wi moesoe waka foe di wi abi lobi gi sma? (b) Fa wan bigi pisi foe a preikiwroko e doe?
10 Waka baka na eksempre foe Krestes. A no ben wakti foe sma kon na en, ma en ben go soekoe den sma di ben wani arki a Kownoekondre boskopoe. Èn a ben gi en bakaman — ala en bakaman — a komando foe doe a srefi (Mateus 28:19; Tori foe den Apostel 4:13; Romesma 10:10-15). Foe di den fositen kresten ben waka na baka a leri nanga eksempre foe Krestes, dan den ben go na den sma na den oso. Den ben go „oso foe oso” nanga a Kownoekondre boskopoe (Lukas 10:1-6; Tori foe den Apostel 20:20). Disi de te now ete a moro prenspari fasi fa troe kresten e doe a diniwroko foe den na ini a ten foe wi.
11. (a) Foe san ede meki a e teki deki-ati foe preiki foe a kownoekondre foe Gado, ma foe san ede wi no abi foe frede? (b) Fa Jehovah e si a wroko di wi e doe?
11 A e teki deki-ati foe doe a wroko disi. Satan nanga en grontapoe sa proeberi seiker foe tapoe joe, neleki fa den ben proeberi foe tapoe den fositen bakaman foe Krestes foe doe a preikiwroko (Tori foe den Apostel 4:17-21; 5:27-29, 40-42). Ma joe no abi foe frede. Neleki fa Jehovah ben hori baka gi den fositen kresten dati èn ben gi den tranga, na so a sa doe a srefi gi joe na ini a ten disi (2 Timoteus 4:17). So boen, teki deki-ati! Boeweisi taki joe lobi Jehovah nanga joe kompe libisma troetroe, foe di joe e teki prati dorodoro na a preikiwroko nanga na a leriwroko di kan kibri sma libi (1 Korentesma 9:16; 1 Timoteus 4:16). Jehovah no sa frigiti joe wroko, ma sa pai joe pasa marki. — Hebrewsma 6:10-12; Titus 1:2.
12. San wi kan leri foe na eksempre foe a wefi foe Lot?
12 Na owroe seti disi no abi noti foe pristeri di warti troetroe, so boen, no denki noiti taki joe e misi wan sani efoe joe drai joe baka gi en. „Prakseri a wefi foe Lot”, Jesus ben taki (Lukas 17:32). Baka di en nanga en osofamiri ben lon komoto na Sodom, dan nanga tranga lostoe a ben loekoe go na den sani di den ben libi na baka. Gado ben si pe na ati foe en ben de, èn a ben tron wan sowtoe postoe (Genesis 19:26). No de leki a wefi foe Lot! Poti joe ai na tapoe san de na joe fesi e kon, na tapoe „a troetroe libi” na ini Gado regtfardiki njoen seti. — 1 Timoteus 6:19.
TEKI TÊGO LIBI NA INI WAN PARADIJS NA GRONTAPOE
13. Fa Jesus ben tjari kon na krin sortoe sei wi alamala moesoe teki?
13 Foe troe, soso toe sei de pe joe kan teki a wán noso a trawan. Krestes teki en gersi nanga toe pasi pe joe moesoe teki wán foe den toe. A wán pasi, a ben taki, „bradi èn bigi”. Sma di e waka na tapoe a pasi dati abi a fri foe doe san den wani. Ma a tra pasi „smara”. Ija, den e aksi foe den sma di de na tapoe dati, foe gi jesi na den leri nanga wet foe Gado. Moro foeroe sma, Jesus ben taki, e teki a bradi pasi, soso wan toe sma e teki a smarawan. Sortoewan foe den toe pasi joe sa teki? Hori disi na prakseri te joe o teki wán foe den toe pasi: A bradi pasi sa kon wantronso na wan kaba, ija, a o wai poeroe na pasi! A smara pasi na a tra sei, sa tjari joe langalanga go na ini Gado njoen seti. Drape joe kan abi wan prati foe meki a grontapoe tron wan glori paradijs, pe joe kan libi foe têgo na ini kolokoe. — Mateus 7:13, 14.
14. Foe sortoe sani joe moesoe de wan pisi, foe kan pasa libilibi go na ini Gado njoen seti?
14 No kon na a bosroiti taki difrenti pasi noso fasi de, di joe kan waka na den baka foe kisi libi na ini Gado njoen seti. Soso wán nomo de. Soso a wán ark ben pasa a Froedoe, a no ben de wan frak boto. Èn soso wán organisâsi — Gado organisâsi di wi kan si — sa pasa libilibi a „bigi banawtoe” di e hari kon miti wi esi-esi. A no troe srefisrefi taki ala relisi e tjari joe go na a srefi presi (Mateus 7:21-23; 24:21). Joe moesoe de wan pisi foe na organisâsi foe Jehovah, èn e doe a wani foe Gado foe kisi en blesi foe têgo libi. — Psalm 133:1-3.
15. (a) San wi moesoe doe ibri dei? (b) Sortoe howpoe de moro leki wan dren?
15 So boen, hori a prenki foe Gado njoen seti foe sani di a pramisi, boen na ini joe froestan nanga ati. Prakseri ibri dei foe a toemoesi bigi prijs di Jehovah Gado e poti na joe fesi — libi foe têgo na ini wan paradijs na grontapoe. Disi a no wan dren. Na wan troetroe sani! Bikasi a bijbel pramisi sa kon troe seiker: „Na den regtfardikiwan sa abi grontapoe, èn den sa libi na tapoe foe têgo. . . . Te den koti den ogri sma poeroe, joe sa si dati.” — Psalm 37:29, 34.
[Aksi foe a tori disi]
[Prenki na tapoe bladzijde 251]
Gi joesrefi abra na Jehovah . . . èn meki den dopoe joe
[Prenki na tapoe bladzijde 253]
„Prakseri a wefi foe Lot”
[Prenki na tapoe bladzijde 254]
Hori Gado njoen seti boen na ini joe froestan nanga ati
