Soema e go na hemel, èn foe san ede?
Kapitel 14
Soema e go na hemel, èn foe san ede?
1. Fa foeroe sma sa piki na aksi: Soema e go na hemel, èn foe san ede?
FOEROE SMA e taki: ’Ala boen sma e go na hemel.’ Ma efoe sma aksi den foe san ede den e go na hemel, dan kande den e taki: ’Foe de nanga Gado’, noso, ’Dati na a paiman foe di joe ben de wan boen sma.’ San bijbel e leri foe a tori disi?
2, 3. (a) Foe san ede wi kan de seiker taki son sma sa go na hemel? (b) Tapoe sortoe aksi wi moesoe gi wan piki?
2 Bijbel e tjari kon na krin, taki Gado ben opo Jesus baka na dede èn taki Jesus ben go na hemel. Bijbel e taki dati tra sma ben sa go na hemel toe. A neti bifo Jesus dede, a ben taigi den getrow apostel foe en, taki: „Na ini na oso foe mi Tata foeroe tanpresi de. Noso, mi ben o taigi oenoe, bika mi e go drape foe sreka wan presi gi oenoe. Èn te mi go sreka wan presi gi oenoe drape, dan mi e kon baka èn sa teki oenoe go na mi oso, so taki oenoe kan de toe pe mi de.” — Johanes 14:1-3.
3 A de krin taki Jesus ben froeteri den apostel foe en, taki den ben sa go na hemel foe de nanga en. Na apostel Paulus ben froeteri den fositen kresten foeroetron foe a kefalek moi howpoe dati. Na so a ben skrifi foe eksempre: „Foe wi sei, wi de borgoe foe hemel, a presi pe wi e froewakti fajafaja wan froeloesoeman toe, Masra Jesus Krestes” (Filipisma 3:20, 21; Romesma 6:5; 2 Korentesma 5:1, 2). Na tapoe a fondamenti foe den sortoe pramisi disi meki miljoenmiljoen sma poti den ati na tapoe hemel libi. Ma na ala boen sma sa go na hemel?
ALA BOEN SMA E GO NA HEMEL?
4, 5. Sortoe boeweisi de taki David nanga Job no ben go na hemel?
4 Sjatoe baka di Gado ben opo Jesus baka na dede, dan na apostel Petrus ben froeteri wan ipi djoesma, taki: „A famiri edeman David . . . dede èn beri èn en grebikamra de na wi te na a dei foe tide. Tokoe David no ben opo go na hemel” (Tori foe den Apostel 2:29, 34). So boen, a boen man David no ben go na hemel. Fa a de nanga a regtfardiki man Job?
5 Di Job ben njan pina, a ben begi Gado: „O, taki joe ben sa kibri mi na ini Sjeol [a grebi], taki joe ben sa hori mi kibri te leki joe atibron pasa, taki joe ben sa poti wan pisi ten gi mi èn ben sa prakseri mi!” Job ben froewakti taki te a dede, a no ben sa sabi noti moro na ini a grebi. A ben sabi taki a no ben sa go na hemel. Ma a ben abi howpoe, soleki fa a ben taki: „Efoe wan gosontoe tranga man dede, a kan libi baka? Ala den dei foe mi froeplekti diniwroko [a fasti ten na ini a grebi] mi sa wakti, te leki mi froeloesoe kon. Joe sa kari, èn misrefi sa piki joe.” — Job 14:13-15.
6, 7. (a) San e sori taki no wan sma di dede bifo Krestes, ben go na hemel? (b) San sa pasa nanga ala getrow sma di dede bifo Krestes?
6 Johanes, di ben dopoe Jesus, ben de wan boen man toe. Tokoe Jesus ben taki: „Wan sma di de wan moro mendriwan ini a kownoekondre foe hemel, de moro bigi leki en” (Mateus 11:11). Disi de so, foe di Johanes a Dopoeman no sa go na hemel. Di Jesus ben de na grontapoe, san ben de moro leki 4000 jari baka na opo di Adam nanga Eva ben opo densrefi teige Gado, a ben taki: „No wan sma opo go na hemel, boiti en di ben saka komoto na hemel, a Manpikin foe libisma.” — Johanes 3:13.
7 So boen, soleki fa Jesus srefi ben taki, dan no wan sma ben go na hemel na ini ala den 4000 jari foe libisma historia te kon miti a ten foe en. David, Job nanga Johanes a Dopoeman sa kisi wan opobaka foe kisi libi na grontapoe. Te joe loekoe en boen, dan ala getrow man nanga oema di dede bifo Jesus dede, ben abi a howpoe foe libi baka na grontapoe, no na hemel. Den sa kisi wan opobaka foe tron den borgoe foe a kownoekondre foe Gado na grontapoe. — Psalm 72:7, 8; Tori foe den Apostel 17:31.
FOE SAN EDE SON GETROW SMA E GO NA HEMEL
8. Den piki tapoe sortoe aksi de prenspari, èn foe san ede?
8 Foe san ede Jesus ben go na hemel? Sortoe wroko a abi foe doe drape? Den piki tapoe den aksi disi de prenspari. Disi de so, foe di den sma di e go na hemel, sa teki prati nanga Jesus ini a wroko di a moesoe doe. Na foe dati ede meki den e go na hemel.
9, 10. Soema moro, boiti Krestes, sa tiri na ini a tiri foe Gado, soleki fa Danièl ben taki?
9 Wi ben leri na ini den kapitel na fesi, taki Jesus sa tiri a njoen paradijs grontapoe leki kownoe foe Gado hemel tiri. Langa ten bifo Jesus ben kon na grontapoe, a bijbel boekoe Danièl ben taki na fesi, taki a „manpikin foe libisma” ben sa „kisi tirimakti”. A „Manpikin foe libisma” na Jesus Krestes (Markus 14:41, 62). Èn Danièl e go moro fara foe taki: „A tirimakti foe en na wan tirimakti di e tan go doro te ten di no skotoe, èn a no sa pasa gowe, èn en kownoekondre na wan di no sa kisi pori.” — Danièl 7:13, 14.
10 Ma, a de prenspari foe si dja na ini a boekoe Danièl, taki a „manpikin foe libisma” no sa tiri en wawan. Bijbel e taki: „Èn a kownoekondre nanga a tirimakti . . . ben gi na a pipel di de den santawan foe a Moro Heiwan. A kownoekondre foe den na wan kownoekondre di e tan go doro te ten di no skotoe” (Danièl 7:27). Den wortoe disi, „a pipel” nanga „a kownoekondre foe den”, e meki wi froestan taki tra sma sa tiri makandra nanga Krestes na ini a tiri foe Gado.
11. San e sori taki Krestes en fosi bakaman sa tiri nanga en?
11 Na a lasti neti di Jesus ben de nanga den erfoe getrow apostel foe en, a ben sori taki den ben sa tiri nanga en na ini Gado kownoekondre. A ben froeteri den, taki: „Oenoe na den wan di tan nanga mi ini den tesi foe mi; èn mi e meki wan froebontoe nanga oenoe, neleki fa mi Tata meki wan froebontoe nanga mi, foe wan kownoekondre” (Lukas 22:28, 29). Baka ten na apostel Paulus nanga Timoteus ben kon de toe na ini a froebontoe noso kroederi disi foe wan kownoekondre. Dati meki Paulus ben skrifi Timoteus: „Efoe wi e tan hori doro, dan wi sa tiri makandra leki kownoe toe” (2 Timoteus 2:12). Na apostel Johanes ben skrifi toe foe den sma di sa „tiri grontapoe leki kownoe” makandra nanga Jesus Krestes. — Openbaring 5:9, 10; 20:6.
12. Sortoe sani di abi foe doe nanga a „siri” foe Abraham, e tjari kon na krin taki Krestes sa abi kompe tiriman?
12 So boen, den sma di e go na hemel, e go drape foe de kompe tiriman foe Krestes na ini Gado hemel tiri. Ala di Jesus na a moro prenspari „siri” foe a pramisi, tokoe Gado e teki trawan na mindri a libisma famiri foe tiri nanga Jesus na ini a kownoekondre. Na so den e tron wan pisi foe a „siri”, soleki fa bijbel e taki: „Efoe oenoe de foe Krestes, dan oenoe de troetroe a siri foe Abraham, erfgenaam ini a tori foe wan pramisi.” — Galasiasma 3:16, 29; Jakobus 2:5.
OMENI SMA E GO NA HEMEL?
13. (a) Foe san ede meki beibi no sa go na hemel? (b) Fa Jesus ben taki foe na ipi di sa kisi a Kownoekondre?
13 Foe di den sma di e go na hemel moesoe tiri grontapoe, dan a de krin taki den sa de bakaman foe Krestes di den proeberi loekoe èn tesi loekoe. Disi wani taki, dati beibi noso pikin-nengre, di no ben ondrofeni tesi dorodoro na ini den jari foe kresten diniwroko, no sa go na hemel (Mateus 16:24). Ma, den sortoe pikinwan disi di dede, abi a howpoe foe kisi wan opobaka foe libi na grontapoe (Johanes 5:28, 29). So boen, a heri ipi foe sma di e go na hemel sa pikin te joe teki en gersi nanga den foeroe sma di sa kisi libi na grontapoe na ondro a Kownoekondre tiri. Jesus ben froeteri den disipel foe en: „No frede, pikin ipi, bika oen Tata feni en boen foe gi oenoe a kownoekondre.” — Lukas 12:32.
14. Omeni sma a „pikin ipi”, di e go na hemel, abi na ini en?
14 O pikin na ipi foe a groepoe dati foe Kownoekondre tiriman sa de? Na soso den apostel nanga tra fositen bakaman foe Jesus sa de na ini? Nôno, bijbel e sori taki a „pikin ipi” sa abi moro sma na ini. Ini Openbaring 14:1, 3 bijbel e taki: „Èn mi ben si, èn loekoe! a Pikin Skapoe [Jesus Krestes] ben tanapoe na tapoe a [hemel] bergi Sion, èn nanga en wan hondro fotenti na fo doesoen, . . . di den ben bai [noso, teki] na grontapoe.” Loekoe taki den e si soso 144.000 sma nanga a Pikin Skapoe, Jesus Krestes, na tapoe a hemel bergi Sion (Hebrewsma 12:22). So boen, na presi taki ala boen sma e go na hemel, bijbel e tjari kon na krin taki soso 144.000 getrow sma, di den proeberi loekoe, sa go drape foe tiri nanga Krestes.
FOE SAN EDE DEN TEKI DEN NA GRONTAPOE
15. Foe san ede Gado e teki den Kownoekondre tiriman na mindri a libisma famiri?
15 Ma foe san ede Gado e teki den tiriman disi na mindri a libisma famiri? Foe san ede a no e meki engel tiri nanga Krestes? We, a ben de dja na grontapoe taki den ben tjalensi a reti di Jehovah abi foe tiri. Na dja den ben kan tesi libisma loekoe efoe den ben sa tan getrow na Gado ondro a gens foe Didibri. Na dja Jesus ben boeweisi na ondro tesi taki a de loyaal na Gado dorodoro èn ben gi en libi leki wan loesoe-paiman gi a libisma famiri. Dati meki Jehovah ben seti sani foe teki wan „pikin ipi” foe sma na grontapoe foe de nanga en Manpikin na ini a hemel kownoekondre. Den na den sma di, foe di den ben tan getrow na Gado, ben boeweisi taki san Didibri ben taki, dati libisma e dini Gado soso foe di den e prakseri densrefi nomo, no troe. A fiti foe dati ede, taki Jehovah e gebroiki den sma disi foe gi en glori. — Efeisesma 1:9-12.
16. Foe san ede wi kan de grantangi taki den Kownoekondre tiriman ben libi na grontapoe?
16 Prakseri toe, o kefalek boen a sa de foe abi sma leki tiriman di ben boeweisi na grontapoe, taki den ben de getrow na Gado èn di foeroe foe den ben gi den libi srefi foe a Kownoekondre ede (Openbaring 12:10, 11; 20:4). Engel no ben tanapoe na fesi den sortoe tesi dati. Den no ben ondrofeni den problema toe di a libisma famiri ondrofeni. So boen, den no ben sa froestan dorodoro, san a wani taki foe de wan sondoe libisma èn foe abi den problema di wi libisma abi. Ma den 144.000 sa froestan disi, foe di den ben abi foe doe nanga den srefi sortoe problema disi. Wan toe foe den ben moesoe wini bigi sondoe di den ben gwenti foe doe, èn den sabi o moeilek dati kan de (1 Korentesma 6:9-11). Dati meki den sa handri nanga den grontapoe borgoe foe den na wan fasi di e sori taki den e froestan den. — Hebrewsma 2:17, 18.
A GEMEENTE FOE GADO
17. Nanga san a wortoe „gemeente” abi foe doe?
17 Bijbel e froeteri wi taki Krestes na a ede foe a gemeente foe Gado èn taki den memre foe a gemeente moesoe saka densrefi na ondro Jesus (Efeisesma 5:23, 24). Dati meki a wortoe „kerki”, noso „gemeente foe Gado”, no abi foe doe nanga wan oso. Na presi foe dati a abi foe doe nanga wan groepoe kresten (1 Korentesma 15:9). Na ini a ten disi wi e taki foe a gemeente foe kresten, di wi de na ini. Na a srefi fasi wi e leisi na ini bijbel foe „a gemeente foe den Laodiseia-sma”, èn na ini a brifi di na apostel Paulus ben skrifi gi Fileimon, wi e leisi foe „a gemeente di [ben de ini en] oso”. — Kolosesma 4:16; Fileimon 2.
18. (a) Soema „a gemeente foe a libi Gado” abi na ini en? (b) Sortoe wortoe bijbel e gebroiki toe gi a gemeente disi?
18 Ma, te bijbel e taki foe „a gemeente foe a libi Gado”, dan a e taki foe wan spesroetoe groepoe foe Krestes en bakaman (1 Timoteus 3:15). So srefi den e kari den, „a gemeente foe den fosi geborewan, di den nen skrifi na ini den hemel” (Hebrewsma 12:23). So boen, a „gemeente [disi] foe Gado” abi na ini en ala kresten na grontapoe di abi a howpoe foe libi na ini hemel. Ala nanga ala, soso 144.000 sma te foe kaba sa de na ini a „gemeente foe Gado”. Na ini a ten disi soso wan toe foe den wan disi, wan fikapisi, de na grontapoe ete. Kresten di abi a howpoe foe libi foe têgo na grontapoe, e soekoe tiri na jejefasi na den memre foe a „gemeente [disi] foe a libi Gado”. Bijbel e gebroiki gi a gemeente disi foe 144.000 memre den wortoe leki „a trowmisi, a wefi foe a Pikin Skapoe”, „a skin foe a Krestes”, „a tempel foe Gado”, „na Israèl foe Gado” nanga a „Njoen Jerusalem”. — Openbaring 21:9; Efeisesma 4:12; 1 Korentesma 3:17; Galasiasma 6:16; Openbaring 21:2.
A NJOEN SANI NA INI A PRAKSERI FOE GADO
19. Sortoe njoen sani Gado ben tjari kon foe meki a prakseri di a ben abi biginbigin nanga grontapoe, kon troe?
19 Jehovah Gado no ben kenki en prakseri di a ben abi nanga grontapoe nanga den libisma di e libi na tapoe, di Adam ben tjari a libisma famiri go na tapoe a pasi foe sondoe nanga dede. Efoe Gado ben doe dati, dan disi ben sa wani taki, dati a no ben man foe meki a prakseri di a ben abi biginbigin, kon troe. A prakseri foe en, di a abi foe sensi a bigin, ben de foe abi wan paradijs na heri grontapoe, di foeroe nanga kolokoe, gosontoe sma, èn a prakseri dati de so te now ete. A wan-enkri njoen sani di Gado tjari kon ini a tori, ben de a seti foe en foe abi wan njoen tiri foe meki a prakseri foe en kon troe. Soleki fa wi si kaba, dan en Manpikin, Jesus Krestes, na a moro prenspari tiriman na ini a tiri disi, èn Gado sa teki 144.000 sma foe a libisma famiri foe tiri nanga Jesus na hemel. — Openbaring 7:4.
20. (a) Soema na den „njoen hemel” nanga a „njoen grontapoe”? (b) San joe moesoe doe foe kan de wan pisi foe a „njoen grontapoe”?
20 Den tiriman disi na hemel sa de den „njoen hemel” foe a njoen seti foe Gado. Ma a de krin taki efoe den sortoe regtfardiki tiriman disi sa tiri grontapoe, sma moesoe de toe di den e tiri. Na ini bijbel den e kari den sma disi a „njoen grontapoe” (2 Petrus 3:13; Openbaring 21:1-4). Job, David nanga Johanes a Dopoeman sa de na mindri den sma disi — ija, ala den getrow sma, di ben libi bifo Krestes ben kon na grontapoe. Ma foeroe sma moro ete sa de wan pisi foe a „njoen grontapoe”, so srefi den sma di sa pasa a kaba foe na ogri seti foe sani disi libilibi. Joe sa de wan foe den sma disi di sa tan na libi? Joe wani de wan borgoe foe Gado tiri? Efoe dati de so, dan joe moesoe doe den sani di Gado e aksi foe joe.
[Aksi foe a tori disi]
[Prenki na tapoe bladzijde 121]
Den boen sma disi ben go na hemel?
Kownoe David
Job
Johanes a Dopoeman
[Prenki na tapoe bladzijde 122]
Na a lasti neti di Jesus ben de nanga den apostel foe en, a ben taki dati den ben sa tiri nanga en na ini a kownoekondre foe en Tata
