Wan feanti foe têgo libi
Kapitel 2
Wan feanti foe têgo libi
1. Sortoe aksi e kon na fesi, foe di kolokoe nanga vrede no de foeroe foe feni?
WAN KOLOKOE LIBI na grontapoe — pikinmoro ala sma ben sa wani dati. Ma, foe san ede someni sma no de kolokoe? Fa disi doe kon? Foe san ede nâsi e go na feti èn foe san ede libisma no wani si makandra na ai, ala di pikinmoro ala sma wani vrede? Wan krakti de, di e troesoe den foe doe den ogri sani disi? A ben sa kan de taki wan makti, di de na baka ala sani èn di wi no kan si, e tiri den nâsi?
2. Sortoe takroedoe di doe na ini a historia, e meki foeroe sma e aksi densrefi efoe sonte a no wan ogri makti di wi no kan si, e tiri libisma?
2 Foeroe sma ben aksi densrefi den sani disi di den ben go prakseri den kefalek ogri-ati doe foe libisma — den takroe sortoe gas di ben gebroiki na ini feti foe stek èn bron sma kiri, so srefi den napalmbom nanga den atonbom. Prakseri den fetisani toe di e spiti faja, den strafoeman-kampoe, a kiri foe miljoenmiljoen sma di no ben kan jepi densrefi, soleki na Kambodja na ini den jari no so langa pasa. Joe e denki taki ala den ogri disi ben pasa foe densrefi? Ala di libisma foe ensrefi man foe doe kefalek takroe sani, tokoe te joe prakseri a kefalek ogrifasi foe den doe foe en, dan a no gersi leki wan ogri makti di wi no kan si, abi krakti na en tapoe?
3. Soema bijbel e taki na a tiriman foe grontapoe?
3 A no de fanowdoe foe go rai san na a tori. Bijbel e sori krin taki wan koni sma di wi no kan si, e tiri libisma nanga nâsi. Ini bijbel Jesus Krestes e kari a maktiwan disi „a tiriman foe a grontapoe disi” (Johanes 12:31; 14:30; 16:11). Soema na en?
4. San Didibri ben sori Jesus, èn san a ben pristeri en?
4 Foe jepi wi foe kon sabi soema na en, dan wi moesoe prakseri pikinso san ben pasa na a bigin foe a diniwroko foe Jesus dja na grontapoe. Bijbel e froeteri wi taki, baka di Jesus ben teki dopoe, a ben go na a gran sabana pe wan mekisani, di wi no kan si èn di nen Satan Didibri, ben tesi en. Bijbel e froeteri foe wan pisi foe a tesi dati na a fasi disi: „Agen Didibri ben teki en go na wan boen hei bergi, èn ben sori en ala den kownoekondre foe grontapoe nanga a glori foe den, èn a ben taigi en taki: ’Ala den sani disi mi sa gi joe, efoe joe fadon na doti èn doe wan sani foe anbegi mi.’” — Mateus 4:8, 9.
5. (a) San e sori efoe ala tiri foe grontapoe na foe Didibri? (b) Soema na „a gado foe a seti foe sani disi”, soleki fa bijbel e taki?
5 Prakseri pikinso san Didibri ben pristeri Jesus Krestes. A ben de „ala den kownoekondre foe grontapoe”. Ala den tiri disi foe grontapoe ben de troetroe foe Didibri? Ija, noso fa a ben kan pristeri den na Jesus? Jesus no ben taki dati den no ben de foe Satan. Efoe den no ben de troetroe foe Satan, dan Jesus ben o taki dati. Satan, di wi no kan si, na troetroe a tiriman foe ala nâsi foe grontapoe! Bijbel e taki krin: „Heri grontapoe didon na ini a makti foe na ogriwan” (1 Johanes 5:19). A Wortoe foe Gado, te joe loekoe en boen, e kari Satan „a gado foe a seti foe sani disi”. — 2 Korentesma 4:4.
6. (a) San den tori disi foe a tirimakti foe Satan e jepi wi foe froestan? (b) San Satan ben sa wani doe nanga wi, èn san wi moesoe doe foe dati ede?
6 Den tori disi e jepi wi foe froestan foe san ede Jesus ben taki: „Mi kownoekondre no de wan pisi foe a grontapoe disi” (Johanes 18:36). Den e jepi wi toe foe froestan foe san ede den nâsi no wani si makandra na ai èn e proeberi foe kiri makandra, ala di a de a winsi foe ala normaal sma foe libi ini vrede. Ija, „Satan . . . e kori heri grontapoe pe sma e libi” (Openbaring 12:9). A ben sa wani foe kori wi toe. A no wani foe wi kisi a presenti foe Gado foe têgo libi. Dati meki wi moesoe feti foe a no kisi wi go so fara foe doe san ogri (Efeisesma 6:12). Wi moesoe sabi soema na Satan èn fa a e wroko, so taki wi kan kakafoetoe gi den moeiti foe en foe kori wi.
SOEMA NA DIDIBRI?
7. Foe san ede wi no kan si Didibri?
7 Satan Didibri na wan troetroe sma. A no de kwetikweti so, taki en na a ogri na ini ala libisma, neleki fa son sma e bribi kande. A no de foe taki, dati libisma no kan si Didibri, neleki fa den no kan si Gado. Gado nanga Didibri na jejesma, dati wani taki, wan sortoe libi di hei moro leki libisma èn di wi no kan si nanga wi ai. — Johanes 4:24.
8. Foe san ede foeroe sma e bribi taki Gado ben meki Didibri?
8 ’Ma efoe Gado na lobi’, kande wan sma sa aksi, ’dan foe san ede a ben meki Didibri?’ (1 Johanes 4:8) A tori de, taki a no Gado ben meki Didibri. ’Ma, efoe Gado ben meki ala sma’, kande wan sma sa taki, ’dan na en ben moesoe meki Didibri toe. Sortoe tra sma ben sa man doe dati? O pe Didibri komoto?’
9. (a) Sortoe sma na den engel? (b) San den wortoe „didibri” nanga „satan” wani taki?
9 Bijbel e taki dati Gado ben meki foeroe, foeroe jejesma neleki ensrefi. Na ini bijbel den e kari den jeje disi engel. Den e kari den „manpikin foe Gado” toe (Job 38:7; Psalm 104:4; Hebrewsma 1:7, 13, 14). Gado ben meki den alamala volmaakti. No wán foe den ben de wan didibri noso wan satan. A wortoe „didibri” wani taki leiman di e pori sma nen èn a wortoe „satan” wani taki gensman.
10. (a) Soema ben meki Satan Didibri? (b) Fa wan boen sma ben sa kan meki ensrefi tron wan ogriman?
10 Ma, a ben pasa so, taki wán foe den jeje manpikin disi foe Gado ben meki ensrefi kon tron Didibri, dati wani taki, wan ogri-ati leiman di e taki ogri sani foe tra sma. A ben meki ensrefi kon tron Satan toe, dati wani taki, wan gensman foe Gado. Gado no ben meki en so, ma baka ten a ben kon tron a sortoe sma dati. Meki wi tjari disi kon na krin nanga wan eksempre: Wan foefoeroeman no gebore leki wan foefoeroeman. Kande a foefoeroeman kon foe wan boen osofamiri, abi papa nanga mama di de eerlijk èn brada nanga sisa di e gi jesi na Lanti wet. Ma en eigi lostoe gi san moni kan bai, kande ben meki taki a tron wan foefoeroeman. Fa a doe kon dan, taki wan foe den jeje manpikin foe Gado ben meki ensrefi kon tron Satan Didibri?
11. (a) Sortoe prakseri foe Gado wan engel, di ben opo ensrefi teige Gado, ben sabi? (b) Sortoe lostoe na engel disi ben abi, èn san a lostoe disi ben meki a doe?
11 Na engel di ben tron Didibri, ben de drape di Gado ben meki grontapoe èn baka ten a fosi libisma paar, Adam nanga Eva (Job 38:4, 7). So boen, a ben sa jere di Gado ben taigi den foe meki pikin (Genesis 1:27, 28). A ben sabi taki baka wan pisi ten heri grontapoe ben sa kon foeroe nanga regtfardiki sma, di ben o anbegi Gado. Dati ben de a prakseri foe Gado. Ma na engel disi ben kisi bigimemre foe a moi di a ben moi èn foe a koni di a ben koni èn a ben wani kisi na anbegi di sma ben o gi Gado (Esekièl 28:13-15; Mateus 4:10). Na presi foe a ben poeroe a takroe lostoe disi na en ede, a ben tan e denki a tori. Disi ben tjari en go so fara, taki a doe wan sani foe kisi a grani nanga a biginen di a ben wani sote. San a ben doe? — Jakobus 1:14, 15.
12. (a) Fa na engel disi ben taki nanga Eva, èn san a ben taigi Eva? (b) Fa na engel disi ben kon tron Satan Didibri? (c) San na wan fowtoe prakseri foe a fasi fa Didibri tan?
12 Na engel di ben opo ensrefi teige Gado, ben gebroiki wan sneki di ben moro lagi, foe taki nanga a fosi oema, Eva. A ben doe disi neleki fa wan sma na wan koni fasi e doe, foe meki a gersi leki wan meti di de na ini a birti, noso wan popki e taki. Ma a ben de troetroe na engel disi, di ben opo ensrefi teige Gado, èn di bijbel e kari „a fosi sneki”, di ben e taki nanga Eva (Openbaring 12:9). A ben taki dati Gado no ben froeteri Eva san ben troe èn dati a ben hori sabi, di Eva ben abi reti na tapoe, na baka (Genesis 3:1-5). Disi ben de wan ogri-ati lei èn disi ben meki a kon tron wan didibri. Na so fasi a ben tron wan gensman foe Gado toe, noso wan satan. Soleki fa joe kan si, dan a no joisti foe denki taki Didibri na wan mekisani nanga toetoe nanga wan langa forkoe èn di de na edeman foe wan ondrogron presi pe sma e kisi skin-ati. En na troetroe wan toemoesi makti, ma ogri engel.
A ROETOE FOE GRONTAPOE PROBLEMA
13. (a) San Eva ben doe tapoe a lei foe Didibri? (b) Sortoe sani Didibri ben taki?
13 A lei di Didibri ben froeteri Eva, ben wroko soleki fa a ben prakseri. Eva ben bribi a lei dati èn foe dati ede a ben trangajesi Gado. Èn a ben man foe tjari en masra go so fara foe pasa a wet foe Gado toe (Genesis 3:6). Didibri ben taki dati libisma no abi Gado fanowdoe. A ben taki dati libisma kan tiri densrefi meki sani waka boen, sondro a jepi foe Gado. Didibri ben taki toe, dati a man foe drai ala den bakapikin foe Adam nanga Eva poeroe na Gado sei.
14. Foe san ede Gado no ben kiri Satan poeroe wantewante?
14 A no de foe taki, dati Gado ben man foe kiri Satan poeroe wantewante. Ma dati no ben sa gi piki tapoe den aksi di Satan ben tjari kon na fesi, aksi di ben kan tan ini a prakseri foe den engel di ben e loekoe san ben e pasa. Dati meki Gado ben gi Satan ten foe proeberi foe boeweisi taki den sani di a ben taki de so. Nanga sortoe bakapisi?
15, 16. (a) San a ten di pasa, tjari kon na krin foe den sani di Didibri ben taki? (b) Sortoe sani de krosibei foe feni presi?
15 A ten di pasa sori taki, sondro a jepi foe Gado, libisma no man tiri densrefi meki sani waka boen. Den moeiti foe den no waka boen srefisrefi. Den sma pina kefalek na ondro den tiri foe libisma, di, soleki fa den Boekoe foe bijbel e sori, na kibrifasi Didibri e tiri den. A ten di Gado ben gi, sori krin toe, taki Satan no ben man drai ala sma poeroe foe na anbegi foe Gado. Ala ten wan toe sma ben de, di ben tan getrow na a tiri foe Gado. Joe kan leisi na ini bijbel foe eksempre, taki, sondro foe sani ben waka boen gi Satan, a ben proeberi foe tapoe Job foe dini Gado. — Job 1:6-12.
16 So boen, den sani di Didibri ben taki, ben sori taki den no troe. A e froedini troetroe foe den kiri en poeroe, foe di na en ben bigin nanga na opo di sma opo densrefi na wan ogri fasi teige Gado. Kolokoe taki wi doro a ten now, foe Gado sa tjari wan kaba kon na a tiri foe Satan. Te bijbel e froeteri foe a fosi stap foe doe disi, dan a e froeteri foe wan prenspari feti na hemel, di, a no de foe taki, no wan sma na grontapoe ben si noso ben jere. Leisi a pisi tori foe bijbel di e kon now, finifini:
17. (a) Fa bijbel e taki foe a feti na hemel? (b) San ben de a bakapisi foe a feti gi den wan di ben de na hemel, èn gi den wan di ben de na grontapoe?
17 „Feti ben broko na hemel: Mikaèl [di de a Jesus Krestes di ben opo baka na dede] nanga den engel foe en ben feti nanga a draak, èn a draak nanga den engel foe en ben feti, ma a no ben wini, so srefi no wan presi no ben feni moro gi den na ini hemel. Foe dati ede den ben fringi a bigi draak go na ondro, a fosi sneki, a wan di den e kari Didibri nanga Satan, di e kori heri grontapoe pe sma e libi; den ben fringi en go na grontapoe, èn den engel foe en den ben fringi go na ondro nanga en. ’Foe dati ede oen prisiri, oen hemel nanga oenoe di e libi drape! Heloe foe grontapoe nanga se, bika Didibri saka kon na oenoe, a abi bigi atibron, foe di a sabi taki a abi wan sjatoe pisi ten nomo.’” — Openbaring 12:7-9, 12.
18. (a) O ten a feti na hemel ben feni presi? (b) San ben pasa na grontapoe sensi a ten di den ben „fringi” Satan „go na ondro”?
18 O ten a feti disi ben feni presi na hemel? Den boeweisi e sori taki a ben feni presi na ini a ten foe a Fosi Grontapoefeti, di ben bigin ini 1914. Soleki fa Openbaring e sori, dan den ben poeroe Satan na hemel na a ten dati, san wani taki, dati wi e libi foe sensi a ten dati na ini a „sjatoe pisi ten” foe en. So boen, disi na den „lasti dei” foe a grontapoe foe Satan. A kon di kroektoedoe e kon moro foeroe, a frede di sma e frede, den feti, a mankeri di njanjan e mankeri, den siki nanga tra banawtoe fasi fa sani de di wi e ondrofeni, na boeweisi taki disi de so. — Mateus 24:3-12; 2 Timoteus 3:1-5.
19. (a) Sortoe moeiti Satan e doe now? (b) San ben sa de wan koni sani gi wi foe doe?
19 Foe di Satan sabi taki pikinmoro en „sjatoe pisi ten” klari, dan moro leki iniwan ten na fesi a e doe ala moeiti foe tapoe sma foe dini Gado. A wani tjari someni sma leki a kan go nanga en na ini pori. Nanga reti bijbel e taki foe en leki wan krasi lew di e soekoe foe njan wan sma (1 Petrus 5:8, 9). Efoe wi no wani foe a kisi wi, dan wi moesoe kon sabi fa a e kon doe sma ogri èn so srefi na sortoe fasi a e kori sma. — 2 Korentesma 2:11.
FA SATAN E KORI SMA
20. (a) Omeni winimarki a kon di Satan e kon doe sma ogri, ben abi? (b) Foe san ede wi kan froewakti taki den plan foe en nofotron sa gersi leki den no de foe doe sma ogri, ija, de srefi foe a boen foe sma?
20 No denki taki den taktik foe Satan foe meki sma waka na en baka, de ala ten makriki foe si. En na wan basi ini a bidrigi foe sma. Den taktik foe en na ini den doesoendoesoen jari di pasa, ben de na so wan koni fasi, taki na ini a ten disi foeroe sma no e bribi srefi taki Satan de. Gi den a de so, taki ogridoe nanga ogri de soso normaal fasi fa sani o de ala ten. Satan e wroko neleki disiten fesiman foe ogridoe di abi wan lespeki fasi foe libi na fesi foe ala sma, ma di na kibrifasi e doe toemoesi ogri sani. Bijbel e tjari kon na krin: „Satan srefi e tan kenki ensrefi ini wan engel foe leti” (2 Korentesma 11:14). Dati meki wi kan froewakti taki den plan foe en foe kori sma, nofotron sa gersi leki den no de foe doe sma ogri, ija, de srefi foe a boen foe sma.
21. San na wán foe den plan di Satan gebroiki?
21 Tjari kon baka na prakseri, taki Satan ben doe leki a ben de wan mati foe Eva. Ne a ben kori Eva go doe wan sani di Eva ben denki taki a ben sa de foe a boen foe en (Genesis 3:4-6). A de a srefi na ini a ten disi. Foe eksempre, nanga jepi foe den sma di e teki presi gi en djaso na grontapoe, Satan e gi sma deki-ati na wan koni fasi foe poti den afersi foe libisma tiri srefi moro hei leki a diniwroko foe den gi Gado. Disi meki a jeje foe nationalisme kon na libi, èn disi tjari kefalek ogri feti kon. No so langa pasa, Satan tjari sma go so fara foe meki difrenti plan ini a soekoe di den e soekoe foe tjari vrede nanga seikerfasi kon. Wán foe den plan disi na a Verenigde Nâsi. Ma disi tjari wan grontapoe foe vrede kon? Fara foe dati! Na presi foe dati, a Verenigde Nâsi sori taki a de wan wrokosani di e poeroe a prakseri foe sma na a seti foe Gado foe tjari vrede kon gi a libisma famiri, namkoe, a kownoekondre foe Gado di e kon krosibei èn di de na ondro Jesus Krestes, a „Granman foe Vrede”. — Jesaja 9:6; Mateus 6:9, 10.
22. Sortoe sabi Satan no wani foe wi abi?
22 Efoe wi wani kisi têgo libi, dan wi abi soifri sabi foe Gado, en Kownoe-Manpikin nanga en kownoekondre fanowdoe (Johanes 17:3). Joe kan de seiker taki Satan Didibri no wani foe joe abi a sabi disi, a sa doe ala san a man foe tapoe joe foe kisi a sabi disi. Fa a sa doe disi? Wán fasi na foe sorgoe taki joe ondrofeni gens, kande ini a fasi foe spotoe. Bijbel e froeteri wi: „Ala sma di e winsi foe libi ini a gi di den e gi densrefi ini a dini foe Gado ini wánfasi nanga Krestes Jesus, sa kisi froefolgoe toe.” — 2 Timoteus 3:12.
23. (a) Fa Satan ben sa kan gebroiki srefi mati nanga famiriman foe meki wi lasi-ati? (b) Foe san ede joe no moesoe broko kindi noiti gi gens?
23 A kan taki srefi krosibei mati noso famiriman sa taigi joe taki den no e feni en boen dati joe e ondrosoekoe den Boekoe foe bijbel. Jesus Krestes srefi ben warskow: „Ija, den feanti foe wan sma sa de sma foe en eigi osofamiri. A sma di abi moro bigi lobi gi papa noso mama leki gi mi, no warti gi mi; èn a sma di abi moro bigi lobi gi manpikin noso oemapikin leki gi mi, no warti gi mi” (Mateus 10:36, 37). Kande famiriman sa proeberi foe meki joe lasi-ati, èn den e doe dati ini ala opregtifasi, bika den no sabi den kefalek moi waarheid di de foe feni na ini bijbel. Ma efoe joe tapoe nanga a studeri foe a Wortoe foe Gado te gens opo ede kon, dan fa Gado sa si joe? Boiti foe dati, efoe na joe tapoe a studie, dan fa den mati nanga lobiwan dati sa kisi jepi foe joe, foe froestan taki soifri sabi foe bijbel na wan afersi foe libi noso dede? A hori di joe e hori tranga na den sani di joe leri foe a Wortoe foe Gado, kan meki taki baka wan pisi ten den go so fara toe foe leri sabi a waarheid.
24. (a) Sortoe tra fasi Didibri e gebroiki foe tapoe sma foe teki sabi ini den, di e gi libi? (b) O prenspari a de gi joe foe studeri a Wortoe foe Gado?
24 Na a tra sei, a kan pasa taki Satan kan kori joe go teki prati na wan afersi di de teige boen gwenti nanga wet èn di no e plisi Gado (1 Korentesma 6:9-11). Noso a kan meki joe prakseri, taki joe abi toemoesi foeroe foe doe foe go studeri bijbel. Ma te joe e denki a tori pikinso, wan moro prenspari sani ben kan de oiti leki foe kisi a sortoe sabi disi? No meki noti tapoe joe foe kisi a sabi disi, di kan meki joe kisi têgo libi na ini wan paradijs na grontapoe!
25. Efoe wi tan kakafoetoe gi Didibri, dan san a no sa man doe nanga wi?
25 Bijbel e gi wi a deki-ati: „Kakafoetoe gi Didibri.” Efoe joe doe dati, dan „a sa lon gowe libi joe” (Jakobus 4:7). Disi wani taki dan, dati Satan sa kon weri èn no sa trobi joe moro langa efoe joe e kakafoetoe gi a kon di a e kon doe joe ogri? Nôno, a sa proeberi ala ten baka foe tjari joe go so fara foe doe san en wani. Ma efoe joe tan kakafoetoe gi en, dan noiti a no sa man foe tjari joe go so fara foe doe wan sani teige Gado. So boen, doe moeiti foe kisi a toemoesi prenspari sabi foe bijbel èn libi leki fa joe leri. Disi de toemoesi prenspari foe kibri joe, so taki wan tra wrokosani foe Satan foe kori libisma, no kisi joe, namkoe, falsi relisi.
[Aksi foe a tori disi]
[Prenki na tapoe bladzijde 16, 17]
Satan ben kan pristeri Krestes ala den grontapoe tiri disi, efoe den no ben de foe en?
[Prenki na tapoe bladzijde 19]
A foefoeroeman disi no ben gebore leki wan foefoeroeman, neleki fa Gado no ben meki Didibri leki wan „didibri”
[Prenki na tapoe bladzijde 20, 21]
A feti na hemel ben kon na wan kaba, di den ben fringi Satan nanga den ogri jeje foe en go na grontapoe. Now joe e firi den bakapisi
[Prenki na tapoe bladzijde 24]
Kande joe sa kisi gens te joe e go doro foe studeri bijbel
