Kapitel 24

Wi de na ondro den Tin Komando?

1. Sortoe wet Moses ben gi na a pipel?

NA SORTOE WET Jehovah Gado wani foe wi gi jesi na den? Wi moesoe hori san bijbel e kari „a wet foe Moses” noso san a e kari sontron, „a Wet”? (1 Kownoe 2:3; Titus 3:9) So srefi den e kari a wet disi „a wet foe Jehovah”, foe di na en na a Sma di ben gi a wet (1 Kroniki 16:40). Na tjari Moses ben tjari a Wet kon nomo gi a pipel.

2. Omeni wet a wet disi e teri?

² A wet foe Moses abi moro leki 600 aparti wet noso komando, èn den 10 moro prenspariwan de na ini toe. Soleki fa Moses ben taki, dan „En [Jehovah] ben komanderi oenoe foe hori — den Tin Wortoe [komando], di a ben skrifi na tapoe toe ston tafra baka dati” (Deuteronomium 4:13; Exodus 31:18). Ma na soema Jehovah ben gi a Wet, di den Tin Komando de na ini toe? A ben gi den na a heri libisma famiri? San ben de a prakseri foe a Wet?

GI ISRAÈL NANGA WAN SPESROETOE PRAKSERI

3. Fa wi sabi taki a Wet ben gi na a nâsi Israèl wawan?

³ A Wet no ben gi na a heri libisma famiri. Jehovah ben meki wan froebontoe, noso wan kroederi, nanga den bakapikin foe Jakob, di ben tron a nâsi Israèl. Jehovah ben gi den wet foe en na a nâsi disi  wawan. Bijbel e tjari disi kon na krin na Deuteronomium 5:1-3 nanga Psalm 147:19, 20.

4. Foe san ede a Wet ben gi na a nâsi Israèl?

⁴ Na apostel Paulus ben aksi: „Foe san ede a Wet de dan?” Ija, nanga sortoe prakseri Jehovah ben gi en wet na Israèl? Paulus ben piki: „Foe meki sondoe kon na krin, te leki a siri ben sa kon di a pramisi ben gi na en . . . Foe dati ede a Wet tron wi tjariman [noso leriman], di e tjari wi go na Krestes” (Galasiasma 3:19-24). A spesroetoe prakseri foe a Wet ben de foe kibri èn foe tiri a nâsi Israèl, so taki den ben kan de klariklari foe teki Krestes te a ben kon. Den foeroe srakti-ofrandi di a Wet ben aksi foe tjari, ben memre den Israèlsma, taki den ben de sondari, di ben abi wan Froeloesoeman fanowdoe. — Hebrewsma 10:1-4.

„KRESTES NA A KABA FOE A WET”

5. San ben pasa nanga a Wet, di Krestes ben kon dede gi wi?

⁵ A no de foe taki, dati Jesus Krestes ben de a pramisi Froeloesoeman dati, soleki fa na engel ben meki disi bekènti na a ten di Jesus ben gebore (Lukas 2:8-14). So boen, san ben pasa nanga a Wet, di Krestes ben kon gi en volmaakti libi leki wan srakti-ofrandi? A Wet ben komoto na pasi. „Wi no de moro na ondro wan tjariman”, Paulus ben tjari kon na krin (Galasiasma 3:25). A komoto di a Wet ben komoto na pasi, ben de wan froelekti gi den Israèlsma. A ben tjari kon na krin taki den ben de sondari, foe di den alamala ben misi foe hori a Wet dati na  wan volmaakti fasi. „Krestes ben bai wi kon fri foe a floekoe foe a Wet”, Paulus ben taki (Galasiasma 3:10-14). Foe dati ede bijbel e taki toe: „Krestes na a kaba foe a Wet.” — Romesma 10:4; 6:14.

6. (a) San ben de a bakapisi gi den Israèlsma nanga den sma di no ben de Israèlsma, di a Wet ben kon na wan kaba, èn foe san ede? (b) San Jehovah ben doe nanga a Wet?

⁶ Te joe loekoe en boen, dan a Wet ben de leki wan „skotoe” na mindri den Israèlsma nanga den tra pipel di no ben de na ondro a Wet. Ma foe di Krestes ben gi en libi leki wan srakti-ofrandi, dan a „ben tjari . . . a Wet foe den komando di de ini reglementi, kon na wan kaba, so taki ini wánfasi nanga ensrefi a ben kan meki den toe pipel [den Israèlsma nanga den sma di no ben de Israèlsma] kon tron wán njoen libisma” (Efeisesma 2:11-18). Foe a sani san Jehovah Gado ben doe ensrefi nanga a wet foe Moses, wi e leisi: „Nanga boen-atifasi a ben gi wi pardon foe ala wi sondoe èn ben wai a dokumenti poeroe di anoe ben skrifi èn di ben de teige wi, èn di ben de ini reglementi [den Tin Komando de na ini toe] èn di ben gens wi [foe di a ben kroetoe den Israèlsma leki sondari], èn A ben poeroe en na pasi, foe di a ben spikri en na a pina-postoe” (Kolosesma 2:13, 14). So boen, nanga a volmaakti srakti-ofrandi foe Krestes, wan kaba ben kon na a Wet.

7, 8. San e boeweisi taki a Wet no ben prati na ini toe pisi?

⁷ Ma son sma e taki, dati a Wet prati na ini toe pisi: Den Tin Komando, nanga den tra wet. Den tra wet, na so den e taki, ben kon na wan kaba, ma den Tin Komando de ete. Ma disi no troe. Ini en Bergitaki, Jesus ben teki wortoe foe den Tin Komando èn so srefi foe tra pisi foe a Wet toe, èn a no ben sori taki wan difrenti de na den mindri. Na so Jesus ben sori taki a wet foe Moses no ben prati na ini toe pisi. — Mateus 5:21-42.

⁸ Poti prakseri toe na tapoe san na apostel Paulus ben skrifi na ondro a krakti foe Gado santa jeje: „Now wi kon fri foe a Wet.” Den djoe ben kon fri foe den tra wet nomo èn no foe den Tin Komando? Nôno, bika Paulus e taki moro fara: „Foe troe, mi no ben sa leri sabi sondoe efoe a no ben de nanga a Wet; èn, foe eksempre, mi no ben sa sabi foe na abi foe bigi-ai efoe a Wet no ben taki: ’Joe no moesoe abi bigi-ai’” (Romesma 7:6, 7; Exodus 20:17). Foe di „Joe no moesoe abi bigi-ai” na a lastiwan foe den Tin Komando, dan wi kon froestan taki den Israèlsma ben kon fri foe den Tin Komando toe.

9. San e sori taki na alawiki sabadeiwet ben poeroe toe?

 ⁹ Disi wani taki, dati a wet foe hori wan alawiki sabadei, di de a di foe fo foe den Tin Komando, ben komoto na pasi toe? Ija. San bijbel e taki na Galasiasma 4:8-11 nanga Kolosesma 2:16, 17, e sori taki kresten no de na ondro a wet di Gado ben gi den Israèlsma, èn pe den ben aksi foe den hori na alawiki sabadei nanga tra spesroetoe dei ini a jari. Dati a hori foe wan alawiki sabadei no de wan wet gi kresten e kon na krin toe na Romesma 14:5.

WET DI DE GI KRESTEN

10. (a) Na ondro sortoe wet kresten de? (b) O pe den ben teki foeroe foe den wet disi, èn foe san ede a de wan reti sani taki den ben teki den foe drape?

¹⁰ Disi wani taki, dati foe di kresten no de na ondro den Tin Komando, den no abi foe hori no wan enkri wet? Kwetikweti. Jesus ben tjari wan „njoen froebontoe” kon, di ben abi leki fondamenti a moro boen srakti-ofrandi foe en eigi volmaakti libisma libi. Kresten e kon na ondro a njoen froebontoe disi èn moesoe saka densrefi na ondro kresten wet (Hebrewsma 8:7-13; Lukas 22:20). Foeroe foe den wet disi ben teki poeroe foe a wet foe Moses. Disi a no wan sani di wi no ben kan froewakti noso di de wan freimde sani gi wi. Wan srefi sortoe sani e pasa foeroetron, te wan njoen tiri e teki a makti abra foe wan kondre. Den ben kan poeroe a mamawet foe na owroe tiri èn poti wan trawan ini en presi, ma a njoen mamawet kan hori foeroe foe den wet foe na owroe mamawet. Na a srefi fasi toe wan kaba ben kon na a Wetfroebontoe, ma foeroe foe den fondamenti wet nanga gronprakseri foe en ben teki poti ini a krestendom.

11. Sortoe wet noso leri di ben gi na kresten, e kroederi foeroe nanga den Tin Komando?

¹¹ Poti prakseri na tapoe disi te joe e leisi den Tin Komando na tapoe bladzijde 203, èn dan teki den gersi nanga den kresten wet nanga leri di e kon now: „Na Jehovah, joe Gado, joe moesoe anbegi” (Mateus 4:10; 1 Korentesma 10:20-22). „Kibri oensrefi gi den kroektoe gado” (1 Johanes 5:21; 1 Korentesma 10:14). „Wi Tata na hemel, meki joe nen kon santa [sma no moesoe handri nanga a nen na wan fasi di no warti]” (Mateus 6:9). „Oen pikin, gi jesi na oen papa nanga mama” (Efeisesma 6:1, 2). Èn bijbel e tjari kon na krin, taki kiri, doe soetadoe, foefoeroe, lei nanga abi bigi-ai, de so srefi teige den wet di de gi kresten. — Openbaring 21:8; 1 Johanes 3:15; Hebrewsma 13:4; 1 Tesalonikasma 4:3-7; Efeisesma 4:25, 28; 1 Korentesma 6:9-11; Lukas 12:15; Kolosesma 3:5.

12. Fa a gronprakseri foe a sabadeiwet tjari kon na ini a kresten seti?

 ¹² Ala di kresten no kisi a komando foe hori wan alawiki sabadei, tokoe wi e leri wan sani foe a seti dati. Den Israèlsma ben rostoe troetroe na skinfasi, ma kresten moesoe rostoe na wan jeje fasi. Fa so? Leki wan bakapisi foe a bribi nanga a gi di troe kresten e gi jesi, dan den no e doe wroko pe den e prakseri densrefi nomo. Ini den wroko disi, pe den e prakseri densrefi nomo, joe abi den moeiti toe di e doe foe poti na eigi regtfardikifasi foe den steifi (Hebrewsma 4:10). A rostoe disi na jejefasi, den no e hori soso wán dei ini wan wiki, ma ala seibi dei. A sani san a troetroe sabadeiwet ben aksi foe sma poti wán dei na wan sei gi jeje afersi, ben kibri den Israèlsma foe no gebroiki ala a ten foe den na wan fasi pe den e prakseri densrefi nomo foe soekoe den eigi materia wini. A poti di wi o poti a gronprakseri disi ala dei ini wi libi na wan jeje fasi, na wan moro boen fasi srefi foe kibri wisrefi gi materialisme.

13. (a) Den e gi kresten a deki-ati foe doe sortoe wet, èn fa den e doe san a wet disi e taki? (b) Na tapoe sortoe wet Jesus ben poti krakti? (c) Sortoe wet na a fondamenti foe a heri wet foe Moses?

¹³ Dati meki den e gi kresten deki-ati foe „doe san a wet foe Krestes taki” na presi foe hori den Tin Komando (Galasiasma 6:2). Jesus ben gi foeroe komando nanga leri, èn te wi e gi jesi na den, dan wi e hori en wet noso e doe san en wet taki. Jesus ben poti krakti spesroetoe na tapoe a prensparifasi foe lobi (Mateus 22:36-40; Johanes 13:34, 35). Ija, foe lobi tra sma, na wan kresten wet. Disi na a fondamenti foe a heri wet foe Moses, soleki fa bijbel e taki: „A heri Wet e kon troe ini wán wortoe, namkoe: ’Joe moesoe lobi a sma na joe sei leki joesrefi.’” — Galasiasma 5:13, 14; Romesma 13:8-10.

14. (a) Sortoe boen bakapisi wi sa kisi efoe wi e studeri den gronprakseri foe a wet foe Moses èn e poti den na ini wi libi? (b) San lobi sa boeweigi wi foe doe?

¹⁴ A wet di ben gi nanga jepi foe Moses, nanga den Tin Komando di ben de na ini, ben de wan regtfardiki wet-sistema di ben kon foe Gado. Èn awinsi wi no de na ondro a wet dati ini a ten disi, tokoe den gronprakseri di kon foe Gado èn di de leki fondamenti foe en, abi te now ete bigi waarde gi wi. Te wi e studeri den èn e poti den ini wi libi, dan wi sa gro ini warderi gi a bigi Giman foe wet, Jehovah Gado. Ma wi moesoe studeri spesroetoe den kresten wet nanga leri, èn poti den na ini wi libi. Lobi gi Jehovah sa boeweigi wi foe gi jesi na ala san a e aksi foe wi now. — 1 Johanes 5:3.

[Aksi foe a tori disi]

[Faki na tapoe bladzijde 203]

DEN TIN KOMANDO

1. „Mi na Jehovah, joe Gado . . . Joe no moesoe abi no wan tra gado na mi fesi.

2. Joe no moesoe meki gi joesrefi wan popki, di temre nanga anoe, noso wan skin di gersi iniwan sani di de ini den hemel na tapoe, noso di de na grontapoe na ondro, noso di de na ini den watra na ondro grontapoe. Joe no moesoe boigi gi den, noso meki sma boeweigi joe foe dini den . . .

3. Joe no moesoe teki a nen foe Jehovah, joe Gado, na wan fasi di no warti . . .

4. Foe memre a sabadei, foe hori en santa, joe moesoe doe diniwroko èn joe moesoe doe ala joe wroko siksi dei langa. Ma a di foe seibi dei na wan sabadei gi Jehovah, joe Gado. Joe no moesoe doe no wan wroko, no joe, no joe manpikin, no joe oemapikin . . .

5. Gi grani na joe papa nanga joe mama, so taki den dei foe joe kan sori taki den de langa na tapoe a gron di Jehovah, joe Gado, e gi joe.

6. Joe no moesoe kiri.

7. Joe no moesoe doe soetadoe.

8. Joe no moesoe foefoeroe.

9. Joe no moesoe gi wan falsi froeklari leki wan kotoigi kontrari a sma na joe sei.

10. Joe no moesoe abi bigi-ai tapoe na oso foe a sma na joe sei. Joe no moesoe abi bigi-ai tapoe na oema foe a sma na joe sei, no tapoe en mansrafoe, no tapoe en oemasrafoe, no tapoe en mankaw, no tapoe en boeriki, no tapoe iniwan sani di de foe a sma na oen sei.” — Exodus 20:2-17.

[Prenki na tapoe bladzijde 204]

A Wet ben de leki wan skotoe na mindri den Israèlsma nanga den tra pipel