Libi na ini wan njoen grontapoe pe vrede de

Sortoe firi joe e kisi te joe e loekoe a prenki na tapoe a traktaat disi? Joe ati no e angri foe a vrede, a kolokoe nanga a tanboen di de foe si drape? A no de foe taki. Ma a de soso wan dren noso froeberde foe bribi taki den fasi disi fa sani de, oiti sa de na grontapoe?

Moro foeroe sma e denki dati kande. Feti, takroedoe, angri, siki, kon owroe — foe kari soso wan toe sani nomo — na fa sani de troetroe na ini a ten disi. Tokoe reide de foe abi howpoe. Bijbel e sori go na a ten di e kon te a e taki foe ’njoen hemel nanga wan njoen grontapoe, di wi e froewakti soleki fa [Gado] pramisi, èn na drape regtfardikifasi sa de’. — 2 Petrus 3:13; Jesaja 65:17.

Den „njoen hemel” nanga „njoen grontapoe” disi, soleki fa bijbel e taki, a no wan njoen materia hemel noso wan troetroe njoen grontapoe. Gado ben meki a troetroe grontapoe nanga hemel volmaakti, èn bijbel e sori taki den sa tan foe têgo (Psalm 89:36, 37; 104:5). A „njoen grontapoe” sa de wan regtfardiki libimakandra foe sma di e libi na grontapoe, èn den „njoen hemel” sa de wan volmaakti hemel kownoekondre noso tiri, di sa tiri a libimakandra foe sma disi na grontapoe. Ma a de leki fa sani de troetroe foe bribi taki „wan njoen grontapoe”, noso wan kefalek moi njoen grontapoe, sa kan kon?

We, prakseri taki den sortoe toemoesi boen fasi disi fa sani de, ben de wan pisi foe a prakseri foe Gado di a ben abi nanga a grontapoe disi biginbigin. A ben poti a fosi libisma paar na ini a grontapoe Paradijs foe Eden èn a ben gi den wan toemoesi moi wroko: „Oen meki pikin èn kon foeroe èn foeroe grontapoe èn poti en na oen ondro” (Genesis 1:28). Ija, a ben de a prakseri foe Gado foe den kisi  pikin èn te foe kaba bradi a Paradijs foe den go na a heri grontapoe. Ala di baka ten den ben froekisi foe trangajesi Gado, èn nanga dati ben sori taki den no warti foe libi foe têgo, tokoe a prakseri di Gado ben abi biginbigin no ben kenki. Èn a moesoe kon troe na ini wan njoen grontapoe! — Jesaja 55:11.

Te joe e begi a Wi Tata begi èn e aksi foe a Kownoekondre foe Gado moesoe kon, dan foe taki en leti, joe e begi foe a hemel tiri foe en kon foe wai ogridoe poeroe na grontapoe èn foe tiri a njoen grontapoe disi (Mateus 6:9, 10). Èn wi kan froetrow na tapoe taki Gado sa jere a begi dati, foe di a Wortoe foe en e pramisi: „Na den regtfardikiwan sa abi grontapoe, èn den sa libi na tapoe foe têgo.” — Psalm 37:29.

Libi na ini a njoen grontapoe foe Gado

A Kownoekondre foe Gado sa tjari blesi kon na grontapoe di joe no kan teki gersi nanga no wan tra sani, èn a sa doe ala boen sani di Gado ben abi biginbigin na prakseri gi en pipel, foe den njan boen foe den na grontapoe. Taki sma no wani si trawan na ai èn foe kroetoe sma sondro foe sabi fa sani de, no sa de moro, èn te foe kaba ala sma na grontapoe sa de wan troetroe mati foe ibri tra sma. Gado e pramisi na ini bijbel taki a sa ’meki feti kon na wan kaba te na a moro farawe presi foe grontapoe’. „Nâsi no sa opo feti-owroe teige nâsi, èn den no sa leri feti moro toe.” — Psalm 46:9; Jesaja 2:4.

Te foe kaba, a heri grontapoe sa kon tron wan paradijs di gersi wan moi djari. Bijbel e taki: „A gran sabana nanga a kontren sondro watra sa prisiri srefisrefi, èn a plata woestijngron sa breiti èn sa meki bromki leki a safran. . . . Bika na ini a gran sabana watra sa poesoe kon na doro, èn kriki na ini a plata woestijngron. Èn a gron, di faja son drei te a priti, sa kon de leki wan swampoe nanga warimbo èn a doti di watra e kiri, leki watrafonten.” — Jesaja 35:1, 6, 7.

Wi sa abi ala reide foe de kolokoe na ini a Paradijs  grontapoe. Noiti moro sma no sa pina foe angri foe di njanjan no de. „Grontapoe srefi sa gi troetroe en njanjan”, bijbel e taki (Psalm 67:6; 72:16). Ala sma sa njan boen foe den froktoe foe na eigi wroko foe den, soleki fa wi Mekiman e pramisi: „Seiker den sa prani droifi-djari èn njan a froktoe foe den. . . . den no sa prani èn wan tra sma go njan foe en.” — Jesaja 65:21, 22.

Na ini a njoen grontapoe foe Gado, sma no sa libi na bosoe moro na ini bigi sodro-oso noso pôti bakabini, bika Gado poti na prakseri taki „den sa bow oso troetroe èn go libi na ini . . . Den no sa bow èn wan tra sma go libi na ini.” So srefi bijbel e pramisi: „Den no sa wroko tranga foe soso” (Jesaja 65:21-23). So boen, sma sa abi prisiri wroko di e tjari boen bakapisi kon. A libi no sa soi.

Baka wan pisi ten a Kownoekondre foe Gado sa meki den vrede fasi di ben de na ini a djari foe Eden, na mindri meti èn na mindri meti nanga libisma, kon baka. Bijbel e taki: „A wolfoe sa tan troetroe wan pisi ten na sei a pikin manskapoe, èn a bigi sortoe penitigri srefi sa go didon na sei a pikin bokoboko, èn a pikin kaw nanga a jongoe lew di abi neki-wiwiri, nanga a meti di kisi boen njanjan, alamala makandra; èn wan pikin boi ete sa de fesiman foe den.” — Jesaja 11:6-9; Hosea 2:18.

Prakseri disi pikinso: na ini a Paradijs grontapoe [Gado] sa dresi ala siki nanga mankeri na skinsei toe! A Wortoe foe Gado e gi wi a djaranti: „No wan sma di e libi drape sa taki: ’Mi siki’” (Jesaja 33:24). „[Gado] sa figi poeroe ala watra-ai na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” — Openbaring 21:4.

 Fa joesrefi kan kisi den blesi disi

Den pramisi foe Gado ini a tori foe libi na ini en njoen grontapoe foe regtfardikifasi seiker ben moesoe naki joe ati. Èn ala di son sma e denki kande taki a kontroe foe den sortoe blesi disi moi toemoesi foe de troe, tokoe den no moi toemoesi foe kon foe na anoe foe wi lobi-ati Mekiman.​— Psalm 145:16; Mika 4:4.

A no de foe taki, dati foe libi foe têgo na ini a Paradijs di e kon na grontapoe, dan wi moesoe doe den sani san Gado e aksi foe wi. Jesus ben sori tapoe wan prenspariwan di a ben taki nanga Gado ini begi: „Disi wani taki têgo libi, foe den e teki sabi na ini den foe joe, a wan-enkri troe Gado, èn foe en di joe ben seni kon, Jesus Krestes.” — Johanes 17:3.

So boen, efoe troetroe wi wani libi na ini a njoen grontapoe foe Gado, dan wi moesoe kon sabi a wani foe Gado fosi èn dan doe a wani dati. Ija, bika a „grontapoe [disi] e pasa gowe, èn so srefi a lostoe foe en, ma a sma di e doe a wani foe Gado, e tan foe têgo”, so taki a kan njan boen foe têgo foe den blesi di wi lobi-ati Mekiman sa kanti kon. — 1 Johanes 2:17.

Te a no taki tra fasi, dan ala den bijbel tekst na ini a traktaat disi teki skrifi foe a New World Translation of the Holy Scriptures.