LUKU san e pasa dya! Dati na Moses di langa en tiki abra a Redi Se. Den sma di de nanga en na syoro, na den Israelsma. Den no de na ini kefar. Ma Farao nanga en heri legre e dede na ini a se. Meki wi go luku fa disi ben du kon.

Soleki fa wi ben leri kaba, dan Farao ben taigi den Israelsma fu gowe libi Egepte, baka di Gado ben tyari a di fu tin plaag kon na tapu den Egeptesma. Sowan 600.000 man fu Israel, sosrefi furu uma nanga pikin ben gowe. So tu wan lo tra sma, di ben tron bribiman fu Yehovah, ben gowe nanga den Israelsma. Den alamala ben teki den skapu nanga bokoboko nanga kaw fu den go nanga den.

Bifo den Israelsma ben gowe, den ben aksi den Egeptesma krosi nanga sani fu gowtu nanga solfru. A lasti plaag di ben kon na tapu den Egeptesma, ben meki den kon frede tumusi. Fu dati ede den ben gi den Israelsma ala san den ben aksi.

Baka wan tu dei den Israelsma ben kon na a Redi Se. Drape den ben teki bro. Na a srefi ten dati, Farao nanga den man fu en ben sari taki den ben seni den Israelsma gowe. ’Wi ben meki den srafu fu wi gowe!’ den ben taki.

Dati meki Farao ben kenki en prakseri ete wan tron. Esi-esi a ben sreka en fetiwagi nanga en legre. Ne nanga 600 spesrutu wagi nanga ala tra wagi fu Egepte a ben bigin hari go na baka den Israelsma.

Di den Israelsma ben si Farao nanga en legre e kon na den baka, den ben kon frede tumusi. Nowan fasi ben de fu lon komoto. A Redi Se ben de na a wan sei fu den, aladi den Egeptesma ben e kon fu a tra sei. Ma Yehovah ben poti wan wolku na mindri en pipel nanga den Egeptesma. Fu dati ede den Egeptesma no ben man si den Israelsma fu ròs den.

Now Yehovah ben taigi Moses fu langa en tiki abra a Redi Se. Di a ben du dati, dan Yehovah ben meki wan tranga owstu winti wai. A watra fu a se, di ben kon prati na tu, ben tan tanapu leti-opo na ala tu sei.

Ne den Israelsma ben bigin fu waka pasa a se na tapu dreigron. A ben teki furu yuru fu den milyunmilyun sma nanga ala den meti fu den waka pasa na se èn kon bun na abrasei. Te fu kaba, dan den Egeptesma ben man fu si den Israelsma baka. Den srafu fu den ben e hari gowe! Dati meki den ben hari go na den baka na ini a se.

Di den ben du dati, dan Gado ben meki den wiel fu den wagi broko komoto. Den Egeptesma ben kon frede tumusi. Den ben bari tranga: ’Yehovah e feti nanga wi gi den Israelsma. Meki wi hari komoto fu dya!’ Ma a ben lati.

Disi na a yuruten di Yehovah ben taigi Moses fu langa en tiki abra a Redi Se, soleki fa yu ben si na tapu a prenki. Di Moses ben du dati, dan den skotu fu watra ben bigin drai kon baka èn ben tapu den Egeptesma nanga den wagi fu den. A heri legre ben hari go na baka den Israelsma na ini a se. Nowan Egeptesma ben komoto libilibi!

Fa a pipel fu Yehovah ben de koloku taki den ben tan na libi! Den mansma ben singi wan singi fu taki Yehovah tangi. Den ben singi: ’Yehovah ben wini wan bigi wini. A trowe den asi nanga den tyariman fu den na ini a se.’ Moses sisa Miryam ben teki en gengen èn ala den uma ben waka na en baka nanga den gengen. Aladi den ben e dansi nanga prisiri, dan den ben e singi a srefi singi leki den mansma: ’Yehovah ben wini wan bigi wini. A trowe den asi nanga den tyariman fu den na ini a se.’