YOSEF no man hori ensrefi moro. A e taigi ala en futuboi fu gowe libi a kamra. Te en wawan de nanga en brada, a e bigin krei. Yu kan prakseri pikinso fa en brada e fruwondru, bika den no sabi fu san ede a e krei. Te fu kaba a e taki: ’Mi na Yosef. Mi papa e libi ete?’

Den brada fu en de nanga opo mofo, den no man taki. Den e frede. Ma Yosef e taki: ’Grantangi, kon krosibei.’ Dan te den kon krosibei, a e taki: ’Mi na Yosef, un brada, di unu ben seri kon na Egepte.’

Yosef e tan taki na wan switi fasi. A e taki: ’No kosi unsrefi fu di unu ben seri mi kon dyaso. Te unu luku en bun, na Gado ben seni mi kon dya na Egepte fu kibri a libi fu sma. Farao meki mi de tiriman fu a heri kondre. Fu dati ede, go esi-esi na mi papa fu fruteri en disi. Taigi en taki a musu kon libi dya.’

Dan Yosef e brasa en brada, a e bosi den alamala. Te Farao e yere taki Yosef brada kon, a e taigi Yosef: ’Gi den wagi, meki den tyari a papa fu den nanga den osofamiri kon dya. Mi sa gi den a moro bun pisi gron na ini heri Egepte.’

Dati den ben du. Dyaso yu e si fa Yosef e brasa en papa, di a papa ben doro na Egepte nanga en osofamiri.

Yakob osofamiri ben kon bigi srefisrefi. Ala nanga ala 70 sma ben kon na Egepte, te yu teri Yakob, en pikin nanga en granpikin. Ma yu ben abi den wefi tu, èn kande furu futuboi tu. Den alamala ben kon libi na Egepte. Den ben kari den Israelsma, fu di Gado ben kenki a nen fu Yakob kon de Israel. Den Israelsma ben tron wan spesrutu pipel gi Gado, soleki fa wi sa si bakaten.