A DE moro leki tin yari sensi Kownu Nebukadnesar ben teki ala den Israelsma di kisi moro bun leri tyari gowe na Babilon. Èn luku san e pasa now! Yerusalem e bron krinkrin. Èn den Israelsma di den no kiri, den e tyari leki strafuman go na Babilon.

Soleki fa yu sabi, dan disi na san Yehovah profeiti ben warskow taki ben o pasa, efu a pipel no ben kenki den ogri fasi fu den. Ma den Israelsma no ben arki den profeiti. Den ben tan anbegi falsi gado na presi fu Yehovah. Dati meki a pipel ben musu kisi strafu. Wi sabi disi, bika Gado profeiti Esekièl e fruteri wi fu den ogri sani di den Israelsma ben e du.

Yu sabi suma na Esekièl? En na wan fu den yonkuman di Kownu Nebukadnesar ben tyari gowe na Babilon moro leki tin yari bifo a bigi pori disi fu Yerusalem ben kon. Na a srefi ten dati den ben tyari Danièl nanga en dri mati, Sadrak, Meisak, nanga Abedneikow go na Babilon.

Aladi Esekièl de ete na Babilon, dan Yehovah e sori en den ogri sani di e pasa na a tempel na Yerusalem. Yehovah e du disi nanga wan wondru. Esekièl de trutru ete na Babilon, ma Yehovah e meki a si ala san e pasa na a tempel. Èn den sani di Esekièl e si, ogri srefisrefi!

’Luku den tegu sani di a pipel e du dya na a tempel’, Yehovah e taigi Esekièl. ’Luku den skotu di lai nanga prenki fu sneki nanga tra meti. Èn luku fa den Israelsma e dini den!’ Esekièl e si den sani disi èn a e skrifi san e pasa.

Dan Yehovah e aksi Esekièl: ’Yu e si san den fesiman fu Israel e du na wan kibri fasi?’ Iya, dati Esekièl e si tu. Yu abi 70 man èn den alamala e dini falsi gado. Den e taki: ’Yehovah no e si wi. A gowe libi a kondre.’

Dan Yehovah e sori Esekièl wan tu uma na a noordsei doro fu a tempel. Den sidon drape e anbegi a falsi gado Tamus. Èn luku den man dati di e sidon na a doromofo fu a tempel fu Yehovah! Sowan 25 fu den Esekièl e si! Yu sabi san den e du drape? Den e boigi densrefi go na owstusei èn e anbegi a son!

’Den sma disi no abi lespeki gi mi’, Yehovah e taki. ’Den no e du takru sani wawan, ma den e kon du den leti na mi tempel!’ Fu dati ede Yehovah e pramisi: ’Den sa firi mi atibron. Èn mi no sa sari den te den e kisi pori.’

A de soso wan dri yari so, baka di Yehovah ben sori Esekièl den sani disi, taki den Israelsma e opo meki opruru nanga Kownu Nebukadnesar. Dati meki Nebukadnesar e hari go feti nanga den. Baka wán nanga afu yari den Babilonsma e boro pasa den skotu fu Yerusalem èn den e bron a foto te na gron. Moro furu sma e lasi den libi noso den e tyari den gowe na Babilon leki strafuman.

Fu san ede Yehovah gi pasi taki so wan ogri pori kon na tapu den Israelsma? Iya, fu di den no ben arki Yehovah èn den no ben gi yesi na en wet. Disi e sori fa a de wan prenspari sani fu wi du ala ten san Yehovah e taki.

Biginbigin wan tu sma kisi pasi fu libi na a kondre Israel. Kownu Nebukadnesar e poti wan Dyu di nen Gedalya fu luku den sma disi. Ma dan wan tu Israelsma e kiri Gedalya. Now den sma e frede, taki den Babilonsma sa kon kiri den alamala fu na ogri sani disi ede di pasa. Dati meki den e lowe gowe na Egepte èn den e dwengi Yeremia fu go nanga den.

Disi e meki a kondre Israel kon de sondro sma. Seibitenti yari langa, sma no e libi na a kondre. A leigi krinkrin. Ma Yehovah e pramisi taki baka 70 yari a sa tyari en pipel go baka na a kondre. Ma san e pasa na ini a pisi ten dati nanga a pipel fu Gado na ini a kondre Babilon, pe den tyari den go? Meki wi go luku.