MEKI wi go luku pikinso san ben pasa wan tu yari bifo Esra ben go na Yerusalem. Mordekai nanga Ester na den moro prenspari Israelsma na ini a kownukondre fu Persia. Ester na a umakownu èn en omu pikin, Mordekai, na a moro makti man baka a kownu. Meki wi go luku fa disi ben du kon.

Ester papa nanga mama ben dede di a ben de wan nyofi pikin ete. Fu dati ede Mordekai kweki en. Ahasferos, a kownu fu Persia, abi wan palèisi na a foto Susan èn Mordekai na wan fu en futuboi. We, wan dei a kownu wefi di nen Vasti e weigri fu gi yesi na en masra. Fu dati ede a kownu e teki wan nyun wefi leki en umakownu. Yu sabi sortu uma a e teki? Iya, na a moi uma Ester.

Yu e si a heimemre man di sma e boigi gi? Dati na Haman. A de wan tumusi prenspari man na Persia. Haman wani fu Mordekai, di yu e si sidon drape, boigi gi en tu. Ma Mordekai no wani du dati. A e denki taki a no de wan yoisti sani fu boigi gi so wan ogri sma. Dati e meki Haman ati e bron tumusi. Èn yu sabi san Haman e du?

A e fruteri a kownu soso lei fu den Israelsma. ’Den na ogri sma, di no e gi yesi na yu wet’, a e taki. ’Den musu dede.’ Ahasferos no sabi taki en wefi Ester na wan Israelsma. Dati meki a e arki Haman èn a e meki den meki wan wet pe tanapu taki den musu kiri ala Israelsma na wan spesrutu dei.

Te Mordekai e yere fu a wet, dan a e bruya srefisrefi. A e seni wan boskopu gi Ester: ’Yu musu taki nanga a kownu èn begi en fu kibri a libi fu wi.’ A de wan wet na Persia taki yu no mag go na a kownu sondro fu a seni kari yu. Ma Ester e go na a kownu, sondro fu a seni kari en. A kownu e langa en gowtu tiki gi en. Disi wani taki dati den no sa kiri en. Ester e kari a kownu nanga Haman kon na wan bigi fesa-nyanyan. Drape a kownu e aksi Ester san a wani fu a du gi en. Ester e taki dati a sa fruteri a kownu efu a kownu nanga Haman kon nyan tamara baka.

Na a fesa-nyanyan dati Ester e taigi a kownu: ’Den o kiri mi nanga mi pipel.’ A kownu ati e bron. ’Suma e prefuru fu du so wan sani?’ a e aksi.

’A man, a feanti, na a ogri man Haman disi!’ Ester e taki.

Now a kownu ati e bron trutru. A e gi komando fu den kiri Haman. Baka dati a kownu e meki Mordekai tron a moro makti man baka en. Dan Mordekai e sorgu taki wan nyun wet meki, di e gi den Israelsma pasi fu feti gi den libi na a dei di sma ben o kiri den. Fu di Mordekai de so wan prenspari man now, meki furu sma e yepi den Israelsma, èn so den e komoto na a anu fu den feanti fu den.