BAKA di Yesus nanga en apostel ben gowe libi a kamra na sodro, dan den e go na a dyari fu Getseimanei. Na fesi fu disi, den ben kon dya furu tron kaba. Yesus e taigi den now fu tan na ai èn fu begi. Dan a e waka gowe pikinso moro fara èn e trowe ensrefi nanga en fesi na gron èn e begi.

Bakaten Yesus e drai kon baka pe en apostel de. San yu denki den e du? Den e sribi! Te dri tron Yesus e taigi den taki den musu tan na ai, ma ala tron te a e drai kon baka a e feni den e sribi. ’Fa unu kan sribi na wan ten leki disi?’, Yesus e taki te a e kon baka fu a lasti tron. ’A yuru doro fu den gi mi abra na mi feanti.’

Leti na a momenti dati, a babari fu wan bigi ipi sma de fu yere. Luku! Drape man nanga feti-owru nanga kodya e kon! Èn den e tyari frambo tu fu den kan si na ini a dungru. Te den kon moro krosibei, dan wan fu den e waka go na fesi èn e go langalanga na Yesus. A e bosi en soleki fa yu e si dya. A man dati na Yudas Iskariot! Fu san ede a e bosi Yesus?

Yesus e aksi en: ’Yudas, yu e tori mi nanga wan bosi?’ Iya, a bosi na wan marki. Nanga dati den man di de nanga Yudas e kon sabi Yesus, a man di den e suku. Sobun den feanti fu Yesus e waka kon na fesi fu grabu en. Ma Petrus no o meki den kisi Yesus sondro wan feti kon. A e hari a feti-owru puru di a tyari nanga en èn a e kapu go na a man di e tanapu krosibei fu en. A feti-owru e misi a ede fu a man èn e koti a retisei yesi fu en puru. Ma Yesus e meri a yesi fu a man èn a e kon bun baka.

Yesus e taigi Petrus: ’Poti yu feti-owru baka na en presi. Yu denki taki mi no man aksi mi Tata fu seni dusundusun engel kon fu frulusu mi?’ Iya, dati Yesus man du! Ma Yesus no e aksi Gado fu seni engel kon, fu di a sabi taki a ten doro gi en feanti fu kisi en. Dati meki a e meki den tyari en gowe. Meki wi luku san e pasa now nanga Yesus.