YU SABI suma na a uma nanga den tu man? Na uma na Maria Magdalena, di ben de wan mati fu Yesus. Èn den man na ini weti krosi na engel. A pikin kamra disi pe Maria e luku go na ini, na a presi pe den sma ben poti a skin fu Yesus baka di a ben dede. Den e kari en wan grebikamra. Ma now a skin no de dya moro! Suma teki en puru? Meki wi go luku.

Baka di Yesus dede, dan den priester e taigi Pilatus: ’Di Yesus ben de na libi ete, a ben taki, dati baka dri dei a ben sa opo baka. Gi komando fu dati ede fu sma hori wakti na a grebikamra. Dan en disipel no kan fufuru en skin èn taki dati a ben opo baka na dede!’ Pilatus e taigi den priester fu seni srudati fu hori wakti na a grebikamra.

Ma bun fruku na a di fu dri dei, baka di Yesus ben dede, wan engel fu Yehovah e kon wantronso. A e lolo a ston puru fu a grebikamra. Den srudati e skreki te fu dede. Te fu kaba, te den e luku go na ini a grebikamra, dan a skin no de moro! Wan tu fu den srudati e go na ini a foto fu fruteri den priester san pasa. Yu sabi san den ogri priester e du? Den e pai den srudati fu den lei. Den srudati musu taki: ’En disipel ben kon na neti, aladi wi ben e sribi èn den ben fufuru a skin.’

Disiten wan tu uma di ben de mati fu Yesus e go na a grebikamra. Ma den e fruwondru taki a grebikamra leigi. Wantronso tu engel e sori densrefi na ini brenki krosi. ’Fu san ede unu e suku Yesus dya?’ den e aksi. A opo baka. Go esi fu fruteri disi na en disipel.’ Den uma e lon gowe esi-esi! Ma na pasi wan man e hori den tanapu. Yu sabi suma na a man? Na Yesus! ’Go fruteri disi na mi disipel’, a e taki.

Te den uma e fruteri den disipel taki Yesus e libi èn taki den si en, dan den disipel e feni en tranga fu bribi dati. Petrus nanga Yohanes e lon go na a grebikamra fu densrefi luku, ma a grebikamra leigi! Te Petrus nanga Yohanes e gowe baka, dan Maria Magdalena e tan na baka. Dati na a momenti di Maria e luku go na ini a grebikamra èn e si den tu engel.

Yu sabi san pasa nanga a skin fu Yesus? Gado ben meki a no ben de fu feni moro. Gado no ben meki Yesus kon na libi na ini a libisma skin di a ben dede na ini. A ben gi Yesus wan nyun skin leki wan yeye, wan skin neleki fa den engel na hemel abi. Ma fu sori en disipel taki a e libi, meki Yesus man fu teki wan skin di sma man si. Wi sa leri moro fu a tori dati.