LUKU den bigi bon dati, den moi bromki nanga den hei bergi. Sani moi dyaso, a no so? Luku fa a pikin dia e nyan na ini na anu fu a pikin boi! Yu e si den lew nanga asi drape na ini a wei? Yu no ben sa wani libi na so wan moi presi?

Gado wani fu yu libi fu têgo na ini wan paradijs na grontapu. A no wani fu yu siki èn fu yu abi pen soleki furu sma na ini a ten disi. Bijbel e pramisi ala sma di sa libi na ini a nyun paradijs: ’Gado sa de nanga den. Dede noso krei noso pen no sa de moro. Den fosi sani pasa kaba.’

Yesus sa sorgu taki den moi kenki disi kon. Yu sabi o ten? Iya, baka te a krin grontapu puru ala ogridu nanga ogri sma. Prakseri taki di Yesus ben de na grontapu, a ben dresi ala sortu siki. Iya, a ben wiki dedesma srefi. Yesus ben du disi fu sori libisma san a sa du na heri grontapu te a o tiri leki a Kownu fu Gado Kownukondre.

Prakseri pikinso o moi a sa de na ini a nyun paradijs na grontapu! Yesus sa tiri na hemel makandra nanga wan tu sma di a sa teki. Den tiriman disi sa sorgu gi ala sma na grontapu èn ala sma sa de koloku. Meki wi go luku now san wi musu du fu de seiker taki Gado sa gi wi têgo libi na ini en nyun paradijs.