San yu musu du?

50 Yu wani libi fu têgo na ini a moi paradijs dati?

We, dan yu musu kon sabi moro fu san Gado e taki. Pruberi fu leri leisi Bijbel.—Yohanes 17:3; Openbaring 1:3

51 Kon sabi moro fu Yesus.—Deuteronomium 18:18, 19; Yohanes 3:16; Tori fu den Apostel 3:19-23

52 Pruberi fu du soso bun sani èn gi yesi na Yehovah.—Romesma 6:17, 18, 22

 53 Memre taki Yehovah e taki dati wi no musu kiri sma.—Exodus 20:13; 1 Yohanes 3:11, 12

54 Wi no musu teki sani di de fu tra sma.—Exodus 20:15; Efeisesma 4:28

55 Wan man no musu libi èn sribi nanga wan uma efu a no de en wefi.—Exodus 20:14, 17; 1 Tesalonikasma 4:3

56 Yu e memre ete omeni wefi Gado wani taki wan man musu abi? O langa wan masra musu tan nanga en wefi?—Genesis 2:22, 24; Mateyus 19:5, 6; 1 Korentesma 7:2, 10, 11

 57 Memre tu taki wi musu anbegi Yehovah wawan.—Mateyus 4:10; 1 Korentesma 8:6

58 Kruktugado nanga popki no man yepi wi. Fu san ede?—1 Korentesma 8:4

A bun fu abi popki leki gado?—Deuteronomium 27:15; 1 Yohanes 5:21

59 Fu san ede a de wan ogri sani fu gebroiki tapu?—Deuteronomium 18:10-13; Openbaring 21:8

60 Den ogri engel noso ogri yeye ben opo densrefi teige Gado. Den e gebroiki lukuman fu kori sma.—Tori fu den Apostel 16:16

 61 Wi musu begi Gado. Begi wani taki dati wi e taki nanga Gado, taki wi e fruteri en dati wi wani dini en èn taki wi e aksi en fu yepi wi.—Filipisma 4:6, 7

62 Wi musu gi yesi na Yesus èn bribi na ini en.—Hebrewsma 5:9; Yohanes 3:16

63 Memre taki a dede fu frulusu wi.—Romesma 5:8

 64 Memre taki Yesus na wi Kownu di wi no man si nanga wi ai. Wi musu gi yesi na en.—Filipisma 2:9-11; Openbaring 19:16

 65 Yesus ben taki dati yu musu fruteri tra sma den bun sani di yu e leri. A ben taki tu dati den sma di wani dini Gado musu teki dopu.—Mateyus 28:19, 20; Yohanes 4:7-15

66 Sobun, yu kan fruteri den mati fu yu den bun sani disi.—Mateyus 10:32

67 Efu yu leri fu leisi bun, yu sa man leri moro furu sani èn yu sa man yepi tra sma moro bun.—2 Timoteyus 2:15

 68 Yesus ben leri pikin-nengre tu taki den musu gi yesi na Gado. Aladi a ben abi so furu fu du, toku a ben teki ten fu taki nanga den.—Mateyus 19:13-15

69 Ala ten papa nanga mama musu leri den pikin fu den fu gi yesi na Gado èn fu lobi en.—Deuteronomium 6:6, 7; Odo 6:20-22; Efeisesma 6:4

70 Furu difrenti kerki de. Furu fu den leri fu den no komoto fu Bijbel. Yehovah e taigi wi fu komopo fu den kerki di no e leri tru tori fu Bijbel.—Openbaring 18:4; Yohanes 4:23, 24

 71 Yehovah abi sma na grontapu di kan yepi yu fu kon sabi en moro bun. Yu sabi suma na den sma dati?—Tori fu den Apostel 15:14; Romesma 10:14, 15

72 Den sma dati na Yehovah Kotoigi. Den e libi na ini vrede nanga makandra. Yu sabi fu san ede? Fu di den lobi makandra.—Yesaya 43:10-12; Yohanes 13:34, 35

73 Fu di den lobi Yehovah tu, meki den teki dopu. Na so den sori sma taki den drai baka gi den ogri sani di den ben e du èn taki den wani gebroiki den libi fu dini Gado.—Tori fu den Apostel 2:41

 74 Yehovah Kotoigi abi a howpu fu libi na ini a moi nyun paradijs.—Psalm 37:9-11, 29

San yu kan du fu libi drape nanga den?—Yakobus 1:22, 25; 2:20-26

75 Kon makandra nanga den fu leri dini Yehovah. Den lobi Yehovah nanga Krestes Yesus èn den e gi yesi na den. Yu lobi Yehovah nanga Yesus? Yu wani yepi trawan fu kon sabi Gado?—Yohanes 6:45-47

 76 Yehovah nanga Krestes Yesus lobi yu èn den wani yu fu libi fu têgo na ini paradijs.—Yohanes 3:16

A no de fu taki dati den sani di yu leri fu den prenki èn fu den sani di skrifi na ini a brochure disi, meki taki yu wani libi fu têgo na grontapu. Efu yu wani kon sabi moro fu disi, dan wi e gi yu a deki-ati fu taki nanga wan fu den Kotoigi fu Yehovah na ini a birti pe yu e tan. Noso yu kan skrifi go na a kantoro fu Yehovah Kotoigi na ini a kondre pe yu e libi, noso yu kan meki wan sma skrifi gi yu. Luku den adres fu den kantoro na tapu bladzijde 2 fu a brochure disi.