Kapitel Feifi

A Bribi fu Den Ben Pasa a Hebi Tesi

1. Fa furu sma e si loyaalfasi na Gado èn na a mamakondre fu den?

NA SUMA yu musu de loyaal, na Gado noso na a kondre pe yu e libi? Furu sma ben sa piki fu di den e taki: ’Mi e gi grani na ala tu. Mi e anbegi Gado akruderi den sani di a relisi fu mi e leri; na a srefi ten mi e pramisi fu de getrow na mi mamakondre.’

2. Fa a kownu fu Babilon ben de wan relisiman èn wan politiekman?

² A ben sa kan gersi taki a difrenti na mindri a faya di wan sma abi gi relisi nanga a lobi di wan sma abi gi en mamakondre no de krin fu si na ini a ten disi, ma na ini Babilon fu owruten pikinmoro a difrenti dati no ben de. Iya, sani fu a kondre nanga sani fu relisi tori ben moksi so kefalek nanga makandra taki sontron a no ben de krin fu si pe a difrenti ben de. „Na ini Babilon fu owruten”, na so profesor Charles F. Pfeiffer e skrifi, „a kownu ben e dini leki Granpriester èn leki tiriman fu kondre. A ben e tyari ofrandi èn ben e bepaal a relisi libi fu den sma di ben de na en ondro.”

3. San e sori taki Nebukadnesar ben de wan fayafaya relisiman?

³ Luku Kownu Nebukadnesar fu eksempre. En nen wawan wani taki: „¡O Neibow, Kibri na Erfgenaam!” Neibow ben de a gado fu Babilon fu koni nanga prani gronwroko. Nebukadnesar ben de wan fayafaya relisiman. Soleki fa wi ben taki kaba, dan a ben bow den tempel fu furu gado fu Babilon èn ben meki den kon moi èn ben abi faya, spesrutu gi na anbegi fu Marduk, a gado di a ben gi a grani fu ala den feti di a ben wini. * A e gersi tu taki Nebukadnesar ben e  frutrow tranga tapu lukuman-wroko te a ben e teki sreka fu go na feti.​—Esekièl 21:18-23.

4. Fruteri fu den sani di ben du na relisi sei na Babilon.

⁴ Fu tru, sani di ben du na relisi sei ben furu heri Babilon. A foto ben meki bigi, taki a ben abi moro leki 50 tempel pe den ben anbegi wan lo difrenti mangado nanga umagado, èn so srefi a dri-wánfasi fu Anu (gado fu hemel), Enlil (gado fu a gron, loktu nanga bigi winti) nanga Ea (gado fu den watra) ben de na ini. Wan tra dri-wánfasi ben de Sin (a mungado), Syamas (a songado) nanga Istar (na umagado di ben kan meki sma kisi furu pikin). Obiawroko, towfruwroko nanga astrologie ben e plèi wan prenspari ròl na ini na anbegi fu Babilon.

5. Sortu tyalensi a relisi libimakandra fu Babilon ben de gi den Dyu katiboman?

⁵ Fu libi na mindri sma di ben e anbegi furu gado ben de wan kefalek bigi tyalensi gi den Dyu katiboman. Furu yarihondro na fesi, Moses ben warskow den Israèlsma taki den ben sa kisi takru bakapisi efu den ben teki a bosroiti fu opo densrefi teige a Moro Hei Giman fu wet. Moses ben taigi den: „Yehovah sa tyari yu nanga yu kownu di yu sa poti na yu tapu, go na wan nâsi di yu no sabi, no yu, no den fositen tata fu yu; èn drape yu sa musu dini tra gado, fu udu èn fu ston.”​—Deuteronomium 28:15, 36.

6. Fu san ede a ben de wan spesrutu tyalensi gi Danièl, Hananya, Misaèl nanga Asarya fu libi na ini Babilon?

⁶ Now den Dyu ben de na ini a muilek situwâsi dati. A ben sa de wan muilek sani fu hori a soifri retifasi fu den na Yehovah, spesrutu gi Danièl, Hananya, Misaèl nanga Asarya. Den ben teki den fo yongu Hebrewsma disi spesrutu fu kisi leri fu du wroko na lanti (Danièl 1:3-5). Memre taki den ben kisi Babilon nen srefi — Bèltsasar, Sadrak, Meisak nanga Abedneikow — kande fu abi krakti na den tapu fu fiti densrefi na a nyun situwâsi fu den. * A hei posisi di den man disi ben abi  ben sa meki taki den hari a prakseri fu sma efu den ben sa weigri fu anbegi den gado fu a kondre — èn sma ben sa si den leki sma di e tori trawan srefi.

WAN GOWTU POPKI DE WAN KEFAR

7. (a) Fruteri fa a popki di Nebukadnesar ben meki ben de. (b) San ben de a marki fu a popki?

⁷ Soleki fa a sori, dan Nebukadnesar ben meki wan gowtu popki na a lagipresi fu Dura fu pruberi fu tranga a wánfasi na ini a gran kownukondre fu en. A ben de 27 meter langa èn 2,7 meter bradi. * Son sma e bribi taki a popki ben de wan postu nomo noso wan monumenti kande. Kande a ben abi wan kefalek hei futu pe wan kefalek bigi popki di ben gersi wan libisma ben de na tapu, wan popki di kande ben e prenki Nebukadnesar srefi noso a gado Neibow. Awansi fa a no fa, a kefalek hei monumenti disi ben de wan simbôl fu a Gran Kownukondre Babilon. So bun, a ben meki fu sma ben kan si en èn fu sma ben kan anbegi en.​—Danièl 3:1.

8. (a) Suma ben kisi wan kari fu go na a wij di den ben o wij a popki, èn san ala sma di ben de drape ben musu du? (b) San ben de a strafu gi a sma di ben sa weigri fu boigi na fesi a popki?

⁸ Na so Nebukadnesar ben seti sani gi wan seremonia fu wij a popki. A ben tyari den ondro-kownu, ede-granman, granman, raiman, basya fu gudu, krutuman, skowtu-krutuman fu en nanga ala den distrikt komsarsi fu den distrikt kon na wán. Wan bariwrokoman ben bari tranga taki: „Den e taigi unu, o pipel, nationaal grupu nanga tongo, taki na a ten te unu e yere a babari fu a tutu, a froiti, a siter, a dri-uku harpu, a pokusani di abi titei, a bigi froiti nanga ala sortu sani fu meki poku, dan unu musu fadon na gron èn anbegi a gowtu popki di Kownu Nebukadnesar meki. Èn iniwan sma di no e fadon na gron èn e anbegi, sa trowe go na ini a bun faya onfu na a srefi momenti dati.”​—Danièl 3:2-6.

9. San a ben sa kan wani taki fu boigi na fesi a popki di Nebukadnesar ben meki?

 ⁹ Son sma e denki taki a seremonia disi di Nebukadnesar ben seti ben de fu pruberi fu dwengi den Dyu fu skeki nanga na anbegi fu den fu Yehovah. A no sori leki dati ben de so, fu di, soleki fa buweisi e sori, dan soso lanti-tiriman ben kisi wan kari kon na a okasi. So bun, den wan-enkri Dyu di ben de drape ben sa de den wan di ben e du a wan noso tra wroko leki tiriman. Dati meki a gersi taki a boigi di wan sma ben musu boigi na fesi a popki ben de wan seremonia di ben seti nanga a marki fu tranga a wánfasi na mindri den sma di ben e tiri. Sabiman John F. Walvoord e taki: „So wan fasi fu tyari tiriman kon na makandra ben de na a wan sei wan buweisi, di e gi satisfaksi, fu a makti fu a gran kownukondre fu Nebukadnesar, èn na a tra sei, wan prenspari fasi fu erken den gado di, soleki fa den sma fu Babilon ben e prakseri, ben de frantiwortu fu a wini di den ben e wini den feti fu den.

DEN FUTUBOI FU YEHOVAH E WEIGRI FU SKEKI

10. Fu san ede sma di no ben de Dyu no ben sa abi problema fu hori densrefi na a komando fu Nebukadnesar?

¹⁰ Ala di a moro bigi pisi fu den sma di ben kon makandra na fesi a popki fu Nebukadnesar, ben e anbegi difrenti gado di den sma ben bribi taki den ben e kibri den, toku den no ben sa abi konsensi fonfon fu anbegi a popki. „Den alamala ben gwenti fu anbegi kruktugado, èn na anbegi di den ben e anbegi a wán gado no ben e tapu den fu gi grani na wan tra gado tu”, wan Bijbel sabiman ben fruklari. A ben taki moro fara: „A ben de akruderi a fasi fu denki fu furu anbegiman fu kruktugado taki furu gado ben de . . . èn taki a no ben fowtu fu gi grani na a gado fu awansi sortu pipel noso kondre.”

11. Fu san ede Sadrak, Meisak nanga Abedneikow ben weigri fu boigi na fesi a popki?

¹¹ Ma den Dyu ben e si a sani disi na wan tra fasi. Den  ben kisi a komando fu a Gado fu den, Yehovah: „Yu no musu meki wan popki gi yusrefi, di yu temre, noso wan fasi di gersi iniwan sani di de na hemel na tapu noso di de na grontapu na ondro, noso di de na ini den watra na ondro grontapu. Yu no musu boigi gi den, noso meki sma kori yu fu dini den, bika mi, Yehovah, yu Gado, na wan Gado di e aksi taki sma e dini mi wawan” (Exodus 20:4, 5). Fu dati ede, di a poku ben bigin èn den sma di ben kon makandra ben trowe densrefi na gron na fesi a popki, den dri yongu Hebrewsma — Sadrak, Meisak, nanga Abedneikow — ben tan tanapu.​—Danièl 3:7.

12. Fu sortu ogri wan tu Kaldewsma ben kragi den dri Hebrewsma, èn fu san ede?

¹² A weigri di den dri Hebrew tiriman disi ben weigri fu anbegi a popki, ben meki wan tu Kaldewsma atibron. Wantewante den ben go na a kownu èn „ben kragi den Dyu”. * Den no ben wani arki fu san ede den dri Hebrewsma no ben du dati. Fu di den ben wani taki den Hebrewsma ben musu kisi strafu fu a de di den no ben de loyaal èn fu a tori di den ben tori trawan, meki den sma di ben kragi den ben taki: „Wan tu Dyu de di yu ben poti na wroko fu tiri a distrikt Babilon, Sadrak, Meisak nanga Abedneikow; den man disi di gosontu èn tranga na skin fasi no sori lespeki gi yu, o kownu, den no e dini den gado fu yu, èn a gowtu popki di yu meki, den no e anbegi.”​—Danièl 3:8-12.

13, 14. San Nebukadnesar ben piki tapu a bosroiti di Sadrak, Meisak nanga Abedneikow ben teki?

¹³ ¡A ben musu bruya Nebukadnesar taki den dri Hebrewsma no ben gi yesi na en komando! A ben de krin taki a no ben man kenki Sadrak, Meisak nanga Abedneikow kon tron sma di ben e horibaka na wan loyaal fasi gi a Gran Kownukondre Babilon. ¿A no ben gi den leri na ini a koni  fu den Kaldewsma? ¡Iya, a ben kenki den nen srefi! Ma efu Nebukadnesar ben prakseri taki wan kefalek hei leri ben sa leri den wan nyun fasi fu anbegi noso taki a kenki di a ben kenki a nen fu den, ben sa kenki a fasi fa den ben de, dan a prakseri dati ben fowtu srefisrefi. Sadrak, Meisak nanga Abedneikow ben tan de loyaal futuboi fu Yehovah.

¹⁴ Kownu Nebukadnesar ben atibron. Wantewante a ben seni kari Sadrak, Meisak nanga Abedneikow kon. A ben aksi den: „A de trutru so, o Sadrak, Meisak nanga Abedneikow, taki unu no e dini den gado fu mi èn no e anbegi a gowtu popki di mi meki?” Sondro tweifri Nebukadnesar ben taki den wortu disi na wan fasi di e sori dati a no ben man bribi dati srefisrefi. Bika a ben musu fu denki: ’Fa dri man nanga bunbun frustan ben kan afrontu so wan komando di de krin fu frustan — èn wan komando di ben abi so wan hebi strafu leki bakapisi te wan sma no ben sa gi yesi?’​—Danièl 3:13, 14.

15, 16. Sortu tyans Nebukadnesar ben gi den dri Hebrewsma?

¹⁵ Nebukadnesar ben wani gi den dri Hebrewsma disi wan tra tyans. „Now efu unu de klariklari”, na so a ben taki, „so taki te unu e yere a babari fu a tutu, a froiti, a siter, a dri-uku harpu, a pokusani di abi titei, nanga a bigi froiti nanga ala sortu sani fu meki poku, unu e fadon na gron èn e anbegi a popki di mi meki, bun. Ma efu unu no e anbegi, dan na a srefi momenti dati unu sa trowe go na ini a bun faya onfu. Èn suma na a gado dati di kan frulusu unu komoto na mi anu?”​—Danièl 3:15.

¹⁶ Soleki fa a sori, dan a sani di Nebukadnesar ben leri fu a dren fu a popki (di skrifi na ini Danièl kapitel 2) no ben tan abi krakti tapu a prakseri nanga na ati fu en. Kande a ben frigiti kaba san ensrefi ben taigi Danièl: „A Gado fu unu na wan Gado fu den gado nanga wan Masra fu den kownu” (Danièl 2:47). Now a ben gersi leki Nebukadnesar ben e tyalensi Yehovah fu di a ben taki dati Yehovah srefi  no ben man kibri den Hebrewsma fu a strafu di den ben o kisi.

17. Fa Sadrak, Meisak nanga Abedneikow ben handri tapu a sani di a kownu ben pristeri den?

¹⁷ Sadrak, Meisak nanga Abedneikow no ben abi fu prakseri fu a tori. Wantewante den ben piki: „O Nebukadnesar, a no de fanowdu taki wi musu piki yu wan wortu baka ini a tori disi. Efu a musu de so, dan wi Gado di wi e dini, man frulusu wi. Fu a bun faya onfu èn fu yu anu, o kownu, a sa frulusu wi. Ma efu dati no de so, dan sabi, o kownu, taki den gado fu yu a no den wan di wi e dini, èn a gowtu popki di yu poti wi no sa anbegi.”​—Danièl 3:16-18.

¡NA INI A BUN FAYA ONFU!

18, 19. San ben pasa di den dri Hebrewsma ben trowe go na ini a bun faya onfu?

¹⁸ Na ini atibron, Nebukadnesar ben gi den futuboi fu en a komando fu faya na onfu seibi tron moro leki san den ben gwenti faya en. Baka dati a ben gi a komando na „wan tu man di gosontu èn tranga na skin fasi, èn di ben abi furu krakti” fu tai Sadrak, Meisak nanga Abedneikow èn fu trowe den go na ini a „bun faya onfu”. Den ben waka baka den komando fu kownu èn ben trowe den dri Hebrewsma go na ini a faya nanga ala den krosi di den ben weri ala di den ben tai den — kande so taki a faya ben sa bron den moro esi srefi. Ma den futuboi fu Nebukadnesar srefi ben de den sma di den flam fu a faya ben kiri.​—Danièl 3:19-22.

¹⁹ Ma wan tumusi aparti sani ben e pasa. Ala di Sadrak, Meisak nanga Abedneikow ben de na ini a mindri fu a bun faya onfu, toku den flam no ben e bron den. ¡Prakseri fa Nebukadnesar ben fruwondru fu dati! Den ben trowe den go na ini wan tumusi tranga faya, ben tai den steifi, ma den ben de na libi ete. ¡Iya, den ben e waka lontu fri na ini a faya! Ma Nebukadnesar ben si wan tra sani tu. ¿„A no dri man di gosontu èn tranga na skin fasi wi ben trowe  go na ini a mindri fu a faya ala di den ben tai?”, a ben aksi den hei tiriman fu en paleisi. „Iya, o kownu”, den ben piki. „¡Luku!”, Nebukadnesar ben taki, „Mi e si fo man di gosontu èn tranga na skin fasi e waka lontu fri na ini a mindri fu a faya, èn den no ben kisi mankeri, èn a fasi fa a di fu fo man de, gersi di fu wan manpikin fu den gado.”​—Danièl 3:23-25.

20, 21. (a) San Nebukadnesar ben si na Sadrak, Meisak nanga Abedneikow di den ben komoto na ini a bun faya onfu? (b) San Nebukadnesar ben musu erken?

²⁰ Nebukadnesar ben go krosibei na a doro fu a bun faya onfu. „¡Sadrak, Meisak nanga Abedneikow, un futuboi fu a Moro Hei Gado,” a ben bari taki, „kon na doro èn kon dyaso!” Den dri Hebrewsma ben waka komoto na ini a mindri fu a faya. A no de fu taki dati ala sma di ben si a wondru disi — den ondro-kownu, den ede-granman, den granman nanga den hei tiriman — ben fruwondru srefisrefi. ¡Bika a ben gersi leki den dri yonkuman disi no ben go noiti srefi na ini na onfu! A smeri fu a faya no ben kisi den skin, èn no wan wiwiri na tapu den ede ben bron.​—Danièl 3:26, 27.

²¹ Now Kownu Nebukadnesar ben musu erken taki Yehovah na a Moro Hei Gado. „Blesi fu a Gado fu Sadrak, Meisak nanga Abedneikow,” a ben fruklari, „di ben seni en engel èn ben frulusu den futuboi fu en di ben frutrow na en tapu èn di ben kenki a wortu fu a kownu srefi èn di ben gi den skin fu den abra, fu di den no ben wani dini no wan enkri gado èn no ben wani anbegi den, boiti den eigi Gado.” Baka dati a kownu ben gi a seryusu warskow disi tu: „Èn mi e gi wan komando taki awinsi sortu pipel, awinsi sortu nationaal grupu noso tongo, e taki wan sani fu a Gado fu Sadrak, Meisak nanga Abedneikow, di no bun, den sa koti en na pisipisi èn en oso sa meki kon tron wan publiki kumakoisi, fu di no wan tra gado de, di man fri sma leki a wan disi.” Baka dati, den dri Hebrewsma ben feni a bun-ati fu a kownu baka èn ’sani ben waka bun gi den na ini a heri kontren pe Babilon ben abi makti’.​—Danièl 3:28-30.

 BRIBI NANGA HEBI TESI NA INI A TEN DISI

22. Fa den futuboi fu Yehovah na ini a ten disi abi fu du nanga wan srefi sortu situwâsi leki di fu Sadrak, Meisak nanga Abedneikow?

²² Na ini a ten disi, den anbegiman fu Yehovah e kisi fu du nanga wan srefi sortu situwâsi leki di fu Sadrak, Meisak nanga Abedneikow. A tru taki a pipel fu Gado kande no de trutru na ini katibo. Toku Yesus ben taki dati den bakaman fu en „no [ben sa] de wan pisi fu grontapu” (Yohanes 17:14). Den na „freimdesma” fu di den no e teki den gwenti, den fasi nanga den du di no e kruderi nanga Bijbel, abra fu den sma di de lontu den. Soleki fa na apostel Paulus ben skrifi, dan Kresten musu „stòp fu kon de leki a seti fu sani disi”.​—Romesma 12:2.

23. Fa den dri Hebrewsma ben sori taki den ben tanapu kánkan, èn fa Kresten na ini a ten disi kan waka baka na eksempre fu den?

²³ Den dri Hebrewsma ben weigri fu kon de leki a seti fu Babilon. Srefi leri di ben gi finifini ini a koni fu den Kaldewsma no ben abi krakti na tapu den. Den no ben kenki a fasi fu denki fu den ini a tori fu anbegi, awinsi san sma ben sa taki, èn den ben sa de getrow na Yehovah. Kresten na ini a ten disi musu tanapu kánkan neleki den. Den no musu syen fu di den de tra fasi leki den sma fu grontapu. Iya, „grontapu e pasa gowe èn so srefi a lostu fu en” (1 Yohanes 2:17). So bun, a ben sa de wan don sani èn wan soso sani fu fiti wisrefi na a seti fu sani disi di de fu lasi gowe.

24. Fa a fasi fa tru Kresten e si sani e kruderi nanga di fu den dri Hebrewsma?

²⁴ Kresten musu luku bun nanga ala fasi fu anbegi kruktugado èn so srefi den triki fasi fu dati (1 Yohanes 5:21). * Sadrak, Meisak nanga Abedneikow ben gi yesi èn na wan lespeki fasi den ben tanapu na fesi a gowtu popki, ma den ben frustan taki fu boigi na fesi a popki ben de moro leki wan fasi fu sori lespeki nomo. A ben de wan fasi fu anbegi, èn efu  den ben abi prati na ini, dan dati ben sa wiki na atibron fu Yehovah (Deuteronomium 5:8-10). John F. Walvoord e skrifi: „A ben de, te yu luku en bun, a gi di wan sma e gi odi na a fraga, ala di kande a ben wani taki wan sani na relisi sei so srefi, fu di wan wrokomakandra ben de na mindri loyaalfasi ini a tori fu relisi èn ini a tori fu a kondre.” Na ini a ten disi, tru Kresten e kakafutu na a srefi fasi gi na anbegi fu kruktugado.

25. San yu leri fu a tru tori fu a libi fu Sadrak, Meisak nanga Abedneikow?

²⁵ A Bijbel tori fu Sadrak, Meisak nanga Abedneikow e leri wan heri moi sani na ala den sma di abi a fasti bosroiti fu gi densrefi na ini a dini fu Yehovah wawan. Soleki fa a de krin fu si, dan na apostel Paulus ben abi den dri Hebrewsma disi na prakseri di a ben taki fu den furu sma di ben sori bribi, so srefi den wan di „ben man tapu a krakti fu faya” (Hebrewsma 11:33, 34). Yehovah sa gi pai na ala den sma di e waka baka so wan bribi. A ben puru den dri Hebrewsma fu a bun faya onfu, ma wi kan de seiker taki a sa gi wan opobaka na ala den loyaal sma di lasi den libi leki sma di hori a soifri retifasi fu den èn A sa blesi den nanga têgo libi. Efu a no doro so fara srefi, dan Yehovah „e kibri a sili fu den loyaalwan fu en; fu na anu fu na ogriwan a e frulusu den”.​—Psalm 97:10.

[Futuwortu]

SAN YU BEN KON FRUSTAN?

• Fu san ede Sadrak, Meisak nanga Abedneikow ben weigri fu boigi na fesi a popki di Nebukadnesar ben meki?

• Fa Nebukadnesar ben handri tapu a bosroiti di den dri Hebrewsma ben teki?

• Fa Yehovah ben pai den dri Hebrewsma gi a bribi fu den?

• San yu leri fu di yu poti prakseri na a tru tori fu Sadrak, Meisak nanga Abedneikow?

[Aksi fu a tori disi]

 [Prenki di e tapu heri bladzijde 68]

 [Prenki na tapu bladzijde 70]

1. Tempel toren (ziggurat) na ini Babilon

2. Tempel fu Marduk

3. Wan brons monumenti di e sori Marduk (na kruktu-anusei) nanga Neibow (na reti-anusei) di e tanapu na tapu draak

4. Portreti fu Nebukadnesar, di ben pôpi fu den sani ede di a ben bow

 [Prenki di e tapu heri bladzijde 76]

 [Prenki di e tapu heri bladzijde 78]