Kapitel Tinafo

Tra Kondre E Teki a Ròl fu den Tu Kownu Abra

1, 2. (a) San ben meki taki Antiokus IV ben agri nanga den sani di Rome ben aksi? (b) O ten Siria ben tron wan distrikt fu Rome?

KOWNU Antiokus IV fu Siria e go nanga tranga na ini Egipti èn e poti ensrefi leki kownu fu a kondre dati. Rome e seni Ambasadoro Kayus Popilius Leinas go na Egipti fu di a kownu fu Egipti, Ptolemeus VI, e aksi dati. A abi nanga en kefalek bigi grupu fetisipi nanga ordru fu a Moro Hei Asamblei fu Rome taki Antiokus IV musu gi en kownuwroko fu Egipti abra èn musu gowe fu a kondre. Na Eleisis, wan presi na ini a birti fu Aleksandria, a kownu fu Siria nanga na ambasadoro fu Rome e miti makandra fesi nanga fesi. Antiokus IV e aksi ten fu taki nanga den raiman fu en, ma Leinas e hari wan lin lontu a kownu èn e taigi en taki a musu piki bifo a abra a lin. Fu di Leinas ben lagi Antiokus IV, meki a e agri nanga den sani di Rome aksi èn e drai go baka na Siria na ini a yari 168 b.G.T. Na so a feti na mindri a Siria kownu fu noordsei nanga na Egipti kownu fu zuidsei e kon na wan kaba.

² Rome e go doro fu abi makti tapu Siria ala di a e plèi wan prenspari ròl na ini den afersi fu a Mindri-Owstu. Fu dati ede, ala di tra kownu na ini a lin fu kownu fu Seleikos e tiri Siria baka di Antiokus IV dede na ini a yari 163 b.G.T., toku den no e teki a posisi fu „a kownu fu noordsei” (Danièl 11:15). Te fu kaba Siria e tron wan distrikt fu Rome na ini a yari 64 b.G.T.

3. O ten èn fa Rome ben kisi makti tapu Egipti?

³ A lin fu kownu fu Ptolemeus na ini Egipti e tan hori a posisi fu „kownu fu zuidsei” fu pikinso moro leki 130 yari baka a dede fu Antiokus IV (Danièl 11:14). Na a ten fu a feti fu Aktium na ini a yari 31 b.G.T., a tiriman fu Rome, Oktafianus, e wini a legre fu a lasti koningin na ini a lin fu Ptolemeus — Kleopatra VII — nanga a legre fu a freiri fu en di ben de wan Romesma, Markus  Antonius, di ben bondru kon na wán. Baka di Kleopatra ben kiri ensrefi a yari na baka, dan Egipti e tron wan distrikt fu Rome tu èn no e plèi a ròl fu a kownu fu zuidsei moro. Pikinmoro na ini a yari 30 b.G.T., Rome abi makti na tapu Siria nanga Egipti. ¿Wi musu fruwakti now taki tra tirimakti e teki a ròl fu a kownu fu noordsei èn fu a kownu fu zuidsei?

WAN NYUN KOWNU E SENI „WAN SMA [GO] DI E PURU GUDU NA SMA SKIN”

4. Fu san ede wi musu fruwakti taki wan tra tirimakti ben o teki a ròl fu a kownu fu noordsei?

⁴ Na ini a lente fu a yari 33 G.T., Yesus Krestes ben taigi den disipel fu en: „Te unu e si a tegu sani di e tyari pori kon, di a profeiti Danièl ben fruteri fu dati, e tanapu na ini wan santa presi, . . . dan meki den wan di de na ini Yudea bigin lowe go na den bergi” (Mateus 24:15, 16). Di Yesus ben gebroiki den wortu fu Danièl 11:31, dan a ben warskow den bakaman fu en gi wan „tegu sani di e tyari pori kon” èn di ben musu kon ete. A profeititori disi di abi fu du nanga a kownu fu noordsei, ben gi so wan 195 yari baka a dede fu Antiokus IV, a lasti kownu fu Siria na ini a ròl dati. A no de fu taki dati wan tra tirimakti ben sa teki a ròl fu a kownu fu noordsei. Sortu tirimakti ben sa de dati?

5. Suma ben opo tanapu leki a kownu fu noordsei èn ben teki a posisi di Antiokus IV ben abi fosi?

⁵ Na engel fu Yehovah Gado ben taki na fesi: „Na ini en posisi [di fu Antiokus IV] wan musu opo tanapu di e meki wan sma di e puru gudu na sma skin, pasa na ini a tumusi moi kownukondre, èn na ini wan tu dei den sa broko en, ma no na ini atibron èn no na ini orloku” (Danièl 11:20). A wan di ’ben opo tanapu’ na a fasi disi ben sori fu de a fosi kèiser fu Rome, Oktafianus, di sma ben sabi leki Caesar Augustus.​—Luku „Den Ben Gi a wan Kèiser Grani, ma Den Ben Fru-akti a Trawan”, na tapu bladzijde 248.

6. (a) O ten den ben meki „wan sma di e puru gudu na sma skin” pasa na ini „a tumusi moi kownukondre”, èn san ben de prenspari na a sani disi? (b) Fu san ede wi kan taki dati Augustus „no [dede] na ini atibron èn no na ini orloku”? (c) Suma ben teki a ròl fu a kownu fu noordsei abra?

⁶ „A tumusi moi kownukondre” fu Augustus ben abi na ini  tu „a kondre fu Tumusi Moi sani” — a distrikt Yudea fu Rome (Danièl 11:16). Na ini a yari 2 b.G.T., Augustus ben seni „wan sma [go] di e puru gudu na sma skin”, fu di a ben gi a komando taki sma ben musu meki den skrifi den nen poti na lantibuku, noso ben musu teri a pipel, kande so taki a ben kan sabi omeni sma e libi na ini a kondre, fu den ben kan pai belasting èn ben kan du srudatiwroko. Na fu a komando disi ede, meki Yosef nanga Maria ben teki waka go na Betlehem fu meki den skrifi den nen poti na lantibuku èn disi ben abi leki bakapisi taki Yesus ben gebore na a presi di den ben taki na fesi fu dati (Mika 5:2; Mateus 2:1-12). Na ini augustus fu a yari 14 G.T. — „na ini wan tu dei”, noso no langa baka di a ben gi a komando taki sma ben musu meki den skrifi den nen poti na lantibuku — Augustus dede na a libimarki fu 76 yari, „no na ini atibron” fu di wan sma ben kiri en èn no „na ini orloku”, ma leki wan bakapisi fu siki. ¡Fu tru, wan tra kondre ben teki a ròl fu a kownu fu noordsei abra! A kownu disi ben tron a Gran Kownukondre Rome now nanga yepi fu den kèiser fu en.

’A WAN DI SMA BEN FRU-AKTI E OPO TANAPU’

7, 8. (a) Suma ben opo tanapu na ini a posisi fu Augustus leki a kownu fu noordsei? (b) Fu san ede „a wartifasi fu a kownukondre” no ben gi nanga tranga na a sma di ben tron kèiser baka Caesar Augustus?

⁷ Na engel e go doro nanga a profeititori èn ben taki: „Èn na ini en [Augustus] posisi, wan musu opo tanapu di sma ben o fru-akti, èn trutru den no sa gi en a wartifasi fu a kownukondre; èn a sa kon na inisei trutru na wan ten pe broko-ede no de èn a sa teki a kownukondre abra nanga yepi fu grati fasi fu  taki. Èn ini a tori fu den anu fu a frudu, den sa frudu fu en ede, èn den sa broko; èn so srefi a Fesiman fu a frubontu.”​—Danièl 11:21, 22.

⁸ A ’wan di sma ben o fru-akti’ ben de Tiberius Caesar, a manpikin fu Lifia, a di fu dri wefi fu Augustus. (Luku „Den Ben Gi a wan Kèiser Grani, ma Den Ben Fru-akti a Trawan’, na tapu bladzijde 248.) Augustus no ben man si a stiefpikin disi fu en na ai fu den takru eigifasi fu en, èn a no ben wani taki a tron Caesar baka en. „A wartifasi fu a kownukondre” ben gi na en sondro a ben wani dati, soso baka di ala den sma dede di ben kan tron Caesar. Augustus ben teki Tiberius leki stiefpikin na ini a yari 4 G.T. èn ben meki a tron na erfgenaam fu a kownusturu. Baka a dede fu Augustus, Tiberius di ben abi 54 yari — a wan di sma ben fru-akti — ’ben opo tanapu’ èn ben teki a makti leki a kèiser fu Rome èn leki a kownu fu noordsei.

9. Fa Tiberius ben „teki a kownukondre abra nanga yepi fu grati fasi fu taki”?

⁹ „Tiberius”, na so The New Encyclopædia Britannica e taki, „ben e plèi politiek nanga a Moro Hei Asamblei èn a no ben gi den pasi fu poti en leki kèiser fu pikinmoro wan mun [baka di Augustus dede].” A ben taigi a Moro Hei Asamblei taki no wan sma boiti Augustus ben man tyari a frantiwortu fu tiri a Gran Kownukondre Rome èn ben aksi den asambleiman fu meki a kondre tron wan republiek baka, fu di den ben sa gi so wan makti na wan grupu sma na presi na wán man nomo. „Fu di den no ben wani teki san a ben taki,” na so historia skrifiman Will Durant ben skrifi, „meki a Moro Hei Asamblei ben boigi  gi en te leki te fu kaba a ben agri fu teki a makti.” Durant ben taki moro fara: „Na ala tu sei den sma ben plèi a sani heri bun. Tiberius ben wani a posisi pe en wawan ben e tiri, noso a ben sa feni wan fasi fu komoto na en ondro; a Moro Hei Asamblei ben e frede en èn no ben wani si en na ai, ma den no ben abi a deki-ati fu seti wan republiek baka, di ben de leki a republiek di ben de kaba, wan di ben abi a nen nomo taki den Asamblei ben e bepaal gi densrefi. Na so Tiberius ’ben teki a kownukondre abra nanga yepi fu grati fasi fu taki’.

10. Fa ’den anu fu a frudu [ben] broko’?

¹⁰ „Ini a tori fu den anu fu a frudu” — den srudatilegre fu den kownukondre di ben de lontu Rome — na engel ben taki: ’Den sa frudu èn den sa broko.’ Di Tiberius ben tron a kownu fu noordsei, dan en neef Kermanikus Caesar ben de komandanti fu den srudati fu Rome na a Rijnliba. Na ini a yari 15 G.T., Kermanikus ben tyari den legre fu en go feti nanga a Doisri barinen-man Arminius èn ben wini wan tu feti. Ma ala di den ben wini wan tu feti, toku den ben lasi hebi, èn baka dati Tiberius ben tapu den feti na Doisrikondre. Na presi fu dati, a ben pruberi fu tapu den lo fu Doisrikondre fu bondru kon na wán fu di a ben e sutu faya gi borgufeti. Moro furu Tiberius ben wani wan sistema pe a e kakafutu noso e tapu feti di tra kondre bigin nanga a kondre fu en èn ben e poti prakseri fu meki den grens kon tranga. A sistema disi ben abi wan tu bun bakapisi. Na so wan fasi a ben abi makti tapu „den anu fu a frudu” èn a ben „broko” den.

11. Fa den ben ’broko a Fesiman fu a frubontu’?

¹¹ Den ben ’broko [so srefi] a Fesiman fu a frubontu’ di Yehovah Gado ben meki nanga Abraham fu blesi ala den famiri fu grontapu. Yesus Krestes ben de a Siri fu Abraham di Gado ben pramisi na ini a frubontu dati (Genesis 22:18; Galasiasma 3:16). Na tapu 14 Nisan fu a yari 33 G.T., Yesus ben tanapu na fesi Pontius Pilatus na ini a paleisi fu a granman fu Rome na ini Yerusalem. Den Dyu priester ben kragi Yesus taki a ben tori a kèiser. Ma Yesus ben taigi Pilatus: „Mi kownukondre no de wan  pisi fu a grontapu disi. . . . Mi kownukondre no de fu a fonten disi.” Fu no meki taki a granman fu Rome ben fri Yesus di ben de sondro fowtu, dan den Dyu ben bari taki: „Efu yu fri a man disi, dan yu no de wan mati fu Caesar. Ibriwan sma di e taki dati a de wan kownu, e opo ensrefi teige Caesar.” Baka di den ben aksi taki den kiri Yesus, den ben taki: „Wi no abi no wan kownu boiti Caesar.” Akruderi a wet fu „na afrontu fu tiriman” di Tiberius ben meki kon bradi èn ben abi pikinmoro ala fasi na ini di wan sma ben sa kan afrontu Caesar, Pilatus ben gi Yesus abra fu den ben „broko” en, noso spikri en na wan pina-udu.​—Yohanes 18:36; 19:12-16; Markus 15:14-20.

WAN OGRI-ATI TIRIMAN ’E MEKI DEN BEDRIGI PLAN FU EN’

12. (a) Suma ben abi wan kruderi nanga Tiberius? (b) Fa Tiberius ben „kon abi makti nanga yepi fu wan pikin nâsi”?

¹² Ala di na engel ben e taki na fesi ete fu Tiberius, a ben taki: „Fu di den ben kon de wán nanga makandra, meki a sa tan bedrigi sma èn trutru opo kon èn kon abi makti nanga yepi fu wan pikin nâsi” (Danièl 11:23). Memre fu a Moro Hei Asamblei fu Rome ben ’abi wan kruderi’ nanga Tiberius akruderi a mamawet èn tapu papira Tiberius ben e tiri, fu di den Asambleiman ben gi primisi fu dati. Ma a ben bedrigi den èn fu taki en leti, a ben kon „abi makti nanga yepi fu wan pikin nâsi”. A pikin nâsi dati ben de den Pretoria Srudati-waktiman fu Rome, di ben abi den kampu krosibei fu den skotu fu Rome. A de di den ben de so krosibei ben e tapu skreki gi a Moro Hei Asamblei fu Rome èn ben yepi Tiberius fu tapu iniwan opruru teige a tirimakti fu en, na mindri a pipel. Fu dati ede nanga yepi fu so wan 10.000 srudati-waktiman Tiberius ben tan abi makti.

13. Na sortu fasi Tiberius ben pasa den afo fu en?

¹³ Na engel ben taki moro fara na wan profeiti fasi: „Na wan ten pe broko-ede no de, a sa kon na inisei srefi na ini a fatu fu a distrikt èn trutru du san den papa fu en nanga den papa fu den papa fu en, no ben du. Sani di den fufuru nanga sani di den wini ini feti nanga gudu a sa panya na den mindri; èn teige presi di meki kon tranga a sa meki den bedrigi plan fu en, ma  te leki wan pisi ten nomo” (Danièl 11:24). Tiberius no ben e frutrow sma srefisrefi èn a tiri fu en ben furu pasa marki nanga a kiri di den ben e kiri sma tapu a komando fu en. Moro furu fu di Seyanus, komandanti fu den Pretoria Srudati-waktiman, ben abi krakti tapu en, meki taki a lasti pisi fu a tiri fu en ben lai nanga bigi frede. Te fu kaba Tiberius no ben frutrow Seyanus èn ben meki den kiri en. Tiberius ben pasa den afo fu en ini a kwinsi di a ben e kwinsi a pipel.

14. (a) Fa Tiberius ben panya „sani di den fufuru nanga sani di den wini ini feti nanga gudu” na ini ala den distrikt fu Rome? (b) Na sortu fasi sma ben si Tiberius na a ten di a dede?

¹⁴ Ma Tiberius ben panya „sani di den fufuru nanga sani di den wini nanga gudu” na ini ala den distrikt fu Rome. Na a ten di a dede, ala den sma di ben de na en ondro ben abi bun libi. Belasting no ben hebi èn Tiberius ben kan gi furu sani na den wan di ben de na ini kontren di ben e ondrofeni tranga ten. Efu srudati noso lantiman ben kwinsi iniwan sma noso ben sa gi sma deki-ati fu handri afersi na wan fasi di no de eerlijk, dan den ben kan fruwakti strafu fu a kèiser. Fu di Tiberius ben hori a makti steifi srefisrefi, meki ala sma ben tan abi seikerfasi èn wan komunikâsi sistema di ben meki kon moro bun, ben sorgu taki bisnis ben e go na fesi. Tiberius ben e sorgu taki sani ben e tiri na wan reti fasi èn sondro problema, na ini Rome èn dorosei fu Rome. Den wet ben kon moro bun èn markitiki na sociaal sei èn na a sei fu bun gwenti nanga wet ben kon moro bun fu di den ben horibaka gi den kenki di Caesar Augustus ben tyari kon. Toku Tiberius ’ben meki den bedrigi plan fu en’, so taki a historia skrifiman Tasitus fu Rome ben taki fu en leki wan hoigriman di sabi fa fu bedrigi sma. Di Tiberius dede na ini maart fu a yari 37 G.T., sma ben e si en leki wan ogri-ati tiriman.

15. Fa a ben waka nanga Rome na a lasti pisi fu a fosi yarihondro èn na a bigin fu a di fu tu yarihondro G.T.?

¹⁵ Den sma di ben tron Caesar baka Tiberius èn di ben teki a ròl fu a kownu fu noordsei tu, ben de Gayus Caesar (Kaligula), Klaudius I, Nero, Fespasianus, Titus, Domitianus, Nerfa, Trayanus nanga Hadrianus. „Moro furu”, The New Encyclopædia Britannica e taki, „den sma di ben tron Caesar baka  Augustus ben go doro nanga en sistema fu tiri èn nanga en bowprograma, ala di den no ben abi so furu nyun fasi fu bow sani moro èn ben e bow nanga moro pranpran.” A srefi buku e taki moro fara: „Na a lasti pisi fu a fosi yarihondro èn na a bigin fu a di fu tu yarihondro, Rome ben de na a heimarki fu en glori èn fu a nomru sma di ben e libi drape.” Ala di Rome ben abi wan tu problema na den grens fu a gran kownukondre na a pisi ten dati, toku a fosi feti di a ben o feti nanga a kownu fu zuidsei èn di den ben taki na fesi fu dati, no ben feni presi te leki a di fu dri yarihondro G.T.

A BEN OPO KON TEIGE A KOWNU FU ZUIDSEI

16, 17. (a) Suma ben teki a ròl abra fu a kownu fu noordsei di den ben taki fu dati na Danièl 11:25? (b) Suma ben kon teki a posisi fu a kownu fu zuidsei, èn fa disi ben feni presi?

¹⁶ Na engel fu Gado ben go doro nanga a profeititori èn e taki: „A [a kownu fu noordsei] sa opo en krakti nanga en ati kon teige a kownu fu zuidsei nanga wan bigi srudatilegre; èn a kownu fu zuidsei, fu en sei, sa gi ensrefi deki-ati fu go feti nanga wan kefalek tranga srudatilegre. Èn a [a kownu fu noordsei] no sa man kakafutu, bika den sa meki bedrigi plan teige en. Èn den srefi wan di e nyan den switisani fu en, sa meki en fadon. Èn fu a sei fu a srudatilegre fu en, a sa wasi gowe èn furu sma sa fadon seiker.”​—Danièl 11:25, 26.

¹⁷ So wan 300 yari baka di Oktafianus ben meki Egipti tron wan distrikt fu Rome, Kèiser Aurelianus fu Rome ben teki a ròl fu a kownu fu noordsei. Na a srefi ten dati, Koningin Septimia Senobia fu Palmira, fu a kolonie fu Rome, ben teki a posisi fu a kownu fu zuidsei. * (Luku „Senobia — A Fetiman-koningin fu Palmira”, na tapu bladzijde 252.) A legre fu Palmira ben teki Egipti abra na ini a yari 269 G.T. nanga a falsi reide taki a e hori en kibri gi Rome. Senobia ben wani meki Palmira tron a moro  makti foto na owstusei èn ben wani tiri den owstusei distrikt fu Rome. Fu di Aurelianus ben kon frede na ambisi di Senobia ben abi, meki a ben opo „en krakti nanga en ati” fu go feti nanga Senobia.

18. San ben de a bakapisi fu a feti na mindri Kèiser Aurelianus, a kownu fu noordsei, nanga Koningin Senobia, a kownu fu zuidsei?

¹⁸ Leki a tirimakti di Senobia ben de edeman fu dati, a kownu fu zuidsei ’ben gi ensrefi deki-ati’ fu go feti nanga a kownu fu noordsei „nanga wan kefalek tranga srudatilegre” na ondro tu legre-edeman, Sabdas nanga Sabai. Ma Aurelianus ben teki Egipti abra èn ben bigin wan srudatiwaka go na ini Pikin Asia nanga Siria. Senobia ben lasi a feti na Emesa (now Homs), èn baka dati a ben hari gowe go kibri na Palmira. Di Aurelianus ben lontu a foto dati, dan Senobia ben feti nanga deki-ati fu hori a foto, ma a ben lasi a feti. En nanga en manpikin ben lowe go na a sei fu Persia, ma toku den Romesma ben kisi den na a Eufraatliba. Den Palmirasma ben gi a foto fu den abra na ini a yari 272 G.T. Aurelianus no ben kiri Senobia, èn ben meki a tron wan sani di ben hari furu belangstelling na ini a fektoriwaka fu en na ini Rome na ini a yari 274 G.T. Baka ten Senobia ben libi leki wan hei trowmisi fu Rome.

19. Fa Aurelianus ben fadon ’fu den bedrigi plan di den ben meki teige en’?

¹⁹ Aurelianus srefi ’no ben man kakafutu fu den bedrigi plan ede di den ben meki teige en’. Na ini a yari 275 G.T., a ben bigin wan srudatiwaka fu go feti nanga den Persiasma. Di a ben e wakti na okasi na ini Trasia fu abra a se pasi go na Pikin Asia, dan den wan di ’ben nyan en nyanyan’ ben meki bedrigi plan teige en èn ben meki a „fadon”. A ben o strafu Eros, a sekretarsi fu en, fu sani di no ben pasa na wan eerlijk fasi. Ma Eros ben meki wan falsi lijst nanga nen fu wan tu ofsiri na tapu di ben musu dede. A si di den ofsiri ben si a lijst disi ben meki taki den ben span anu makandra fu kiri Aurelianus.

20. Fa a „srudatilegre” fu a kownu fu noordsei ben „wasi gowe”?

²⁰ A wroko fu a kownu fu noordsei no ben kon na wan kaba nanga a dede fu Kèiser Aurelianus. Tra tiriman fu Rome ben kon baka en. Wan pisi ten, wan kèiser ben de fu westsei èn wán  fu owstusei. Na ondro a tiri fu den man disi, a „srudatilegre” fu a kownu fu noordsei ben „wasi gowe” noso ben „panya” * èn furu sma ’ben fadon’ fu di den Doisri lo fu noordsei ben go na ini nanga tranga. Den Gotsma ben pasa den grens fu Rome na ini a di fu fo yarihondro G.T. A go di den ben e go nanga tranga na ini Rome ben e go doro baka makandra. Na ini a yari 476 G.T., a Doisri fesiman Odoaser ben puru a lasti kèiser di ben e tiri, fu Rome. Pikinmoro na a bigin fu a di fu siksi yarihondro, a Gran Kownukondre Rome na westsei ben panya èn Doisri kownu ben e tiri na ini Ingrisikondre, Fransikondre, Italiakondre, Noord-Afrika nanga Spanyorokondre. Na owstusei pisi fu a gran kownukondre ben tan te leki a di fu 15 yarihondro.

WAN BIGI GRAN KOWNUKONDRE E PRATI

21, 22. Sortu kenki Konstantijn ben tyari kon na ini a di fu fo yarihondro G.T.?

²¹ Sondro fu taki fu den finifini tori di no de fanowdu fu a fadon fu a Gran Kownukondre Rome di ben feni presi furu yarihondro langa, na engel fu Yehovah ben go doro fu fruteri na fesi fu moro sani di a kownu fu noordsei nanga a kownu fu zuidsei ben o du. Ma te wi e go luku syatu wan tu sani di ben feni presi na ini a Gran Kownukondre Rome, dan dati sa yepi wi fu kon sabi suma na den tu kownu di de feanti fu makandra baka ten.

²² Na ini a di fu fo yarihondro Kèiser Konstantijn ben meki Lanti fu Rome erken Krestendom di ben fadon komoto na bribi. A ben kari wan konmakandra fu a kerki kon na wan na Niseya, Pikin Asia, na ini 325 G.T. èn ensrefi ben de fesiman fu a konmakandra dati. Baka ten Konstantijn ben puru a tanpresi fu a kèiser fu Rome go na Bisantium, noso Konstantinopel, èn ben meki a foto dati tron a nyun mamafoto fu en. A Gran Kownukondre Rome ben tan na ondro a tirimakti fu  wán kèiser nomo te leki a dede fu Kèiser Teodosius I, 17 yanuari 395 G.T.

23. (a) Fa a Gran Kownukondre Rome ben kon prati baka a dede fu Teodosius? (b) O ten na owstusei pisi fu a Gran Kownukondre ben kon na wan kaba? (c) Suma ben tiri Egipti na ini wan sani fu a yari 1517?

²³ Baka a dede fu Teodosius, a Gran Kownukondre Rome ben prati na mindri den manpikin fu en. Honorius ben kisi a westsei pisi èn Arkadius na owstusei pisi, nanga Konstantinopel leki a mamafoto fu en. Ingrisikondre, Fransikondre, Italiakondre, Spanyorokondre nanga Noord-Afrika ben de na mindri den distrikt fu a westsei pisi. Masedonia, Trasia, Pikin Asia, Siria nanga Egipti ben de den distrikt fu na owstusei pisi. Na ini a yari 642 G.T., a mamafoto fu Egipti, Aleksandria, ben fadon ini na anu fu den Sarakensma (Arabiri), èn Egipti ben tron wan distrikt fu den kalief. Na ini yanuari fu a yari 1449, Konstantijn XI ben tron a lasti kèiser fu owstusei. Den Torku fu Otoman na ondro a tiri fu Sultan Memed II ben teki Konstantinopel abra, na tapu 29 mei fu a yari 1453, èn ben tyari wan kaba kon na a owstusei pisi fu a Gran Kownukondre Rome. Egipti ben tron wan distrikt fu Torkukondre na ini a yari 1517. Ma baka wan pisi ten, a kondre disi fu a kownu fu zuidsei fu owruten ben sa kon na ondro a makti fu wan tra gran kownukondre fu a westsei pisi.

24, 25. (a) San ben marki a bigin fu a Santa Gran Kownukondre Rome, soleki fa son historia skrifiman e taki? (b) San ben pasa te fu kaba nanga a titel „kèiser” fu a Santa Gran Kownukondre Rome?

²⁴ Na ini a westsei pisi fu a Gran Kownukondre Rome, a Katolik beskopu fu Rome, spesrutu Paus Leo I, di sma ben sabi leki a man di ben seti a tiri fu paus na ini a di fu feifi yarihondro G.T., ben opo kon. Baka ten a paus ben teki a reti fu poti a kèiser fu a westsei pisi. Disi ben pasa na ini Rome na a Kresnetidei fu a yari 800 G.T., di Paus Leo III ben poti Kownu Karel fu den Franksma (Karel a Bigiwan) leki kèiser fu a westsei pisi fu a nyun Gran Kownukondre Rome. A poti disi di den ben poti wan kèiser ben meki a kèisermakti kisi libi baka na ini Rome èn soleki fa son historia skrifiman e taki, dan dati ben marki a bigin fu a Santa Gran Kownukondre Rome. Sensi a ten dati  yu ben abi a Gran Kownukondre di de na owstusei èn a Santa Gran Kownukondre Rome di de na westsei, èn ala den tu ben taki dati den na Kresten.

²⁵ Baka ten, den sma di ben tron kèiser baka Karel a Bigiwan no ben sori fu de bun tiriman. Wan pisi ten no wan sma ben teki a posisi fu a kèiser srefi. Na a srefi ten, Kownu Oto I fu Doisrikondre ben kisi makti tapu a moro bigi pisi fu noordsei nanga a mindri pisi fu Italiakondre. A ben kari ensrefi kownu fu Italiakondre. Na tapu 2 februari fu a yari 962 G.T., Paus Yohanes XII ben poti Oto I leki kèiser fu a Santa Gran Kownukondre Rome. A mamafoto fu dati ben de na ini Doisrikondre èn den kèiser ben de Doisri soleki fa a moro bigi pisi fu den sma di ben de na den ondro ben de Doisri. Baka feifi yarihondro a famiri Hapsburg fu Oostenrijk ben kisi a titel „kèiser” èn ben hori a titel dati fu a moro bigi pisi fu den tra yari fu a Santa Gran Kownukondre Rome.

DEN E TAKI KRIN SUMA NA DEN TU KOWNU

26. (a) San wi kan taki fu a kaba fu a Santa Gran Kownukondre Rome? (b) Suma ben opo kon leki a kownu fu noordsei?

²⁶ Napoleon I ben tyari wan kaba kon na a Santa Gran Kownukondre Rome di a ben weigri fu erken a tirimakti dati leki wan gran kownukondre, baka a wini di a ben wini den feti na ini Doisrikondre na ini a yari 1805. Fu di Kèiser Frans II no ben man feti gi a kownusturu fu en, meki a ben saka en posisi leki kèiser fu Rome na tapu 6 augustus fu a yari 1806 èn ben hari gowe fu tiri en kondre leki kèiser fu Oostenrijk. Baka 1006 yari, a Santa Gran Kownukondre Rome — di Leo III, wan Lomsu paus, nanga Karel a Bigiwan, wan kownu fu den Franksma, ben seti — ben kon na wan kaba. Na ini a yari 1870, Rome ben tron a mamafoto fu a kownukondre Italiakondre, di no ben de na ondro a tiri fu a Vatikan. A yari na baka, wan Gran Kownukondre Doisrikondre ben bigin nanga Wilhelm I di den ben gi a titel caesar noso kèiser. So bun, a kownu fu noordsei na ini a ten disi — Doisrikondre — ben de fu si na grontapu.

27. (a) Fa Egipti ben tron wan kondre di ben de na ondro a makti fu Ingrisikondre? (b) Suma ben kon kisi a posisi fu a kownu fu zuidsei?

 ²⁷ Ma suma ben de a kownu fu zuidsei na ini a ten disi? Historia e sori taki Ingrisikondre ben teki a gran kownukondre na ini a di fu 17 yarihondro. Fu di Napoleon I ben wani tapu den pasi di den Ingrisiman ben e gebroiki fu du den bisnis fu den, meki a ben teki Egipti abra na ini a yari 1798. Feti ben broko baka dati, èn wan Ingrisi-Otoman frubontu ben dwengi den Fransiman fu komoto na Egipti, di wi ben kon sabi leki a kownu fu zuidsei na a bigin fu a strei. Na ini a yarihondro baka dati, a makti di Ingrisikondre ben abi na ini Egipti ben kon moro bigi. Baka a yari 1882, dan Egipti ben de, fu taki en leti, na ondro a makti fu Ingrisikondre. Di a Fosi Grontapufeti ben broko na ini a yari 1914, Egipti ben de fu Torkukondre èn wan kedief noso granman di ben teki presi gi a kownu, ben e tiri en. Ma baka di Torkukondre ben teki a sei fu Doisrikondre na ini a feti dati, dan Ingrisikondre ben puru a kedief èn ben fruklari taki Egipti ben de na ondro a makti fu Ingrisikondre. Safrisafri a banti fu Ingrisikondre nanga Amerkankondre ben kon moro tranga èn den ben kon tron na Anglo-Amerkan Grontapumakti. Makandra den ben kon abi a posisi fu a kownu fu zuidsei.

[Futuwortu]

SAN YU BEN KON FRUSTAN?

• Sortu kèiser fu Rome ben opo fosi leki a kownu fu noordsei, èn o ten a ben seni „wan sma [go] di e puru gudu na sma skin”?

• Suma ben teki a posisi fu a kownu fu noordsei baka Augustus, èn fa den ben ’broko a Fesiman fu a frubontu’?

• San ben de a bakapisi fu a feti na mindri Aurelianus leki a kownu fu noordsei nanga Senobia leki a kownu fu zuidsei?

• San ben kon pasa nanga a Gran Kownukondre Rome, èn sortu makti ben teki a posisi fu den tu kownu na a kaba fu a di fu 19 yarihondro?

[Aksi fu a tori disi]

 [Faki/​Prenki na tapu bladzijde 248-251]

DEN BEN GI A WAN KÈISER GRANI, MA DEN BEN FRU-AKTI A TRAWAN

A WAN ben kenki wan republiek, di ben lai nanga feti, kon tron wan gran kownukondre. A trawan ben meki a gudu fu a gran kownukondre kon twenti tron moro furu na ini 23 yari. Den ben gi a wan grani di a dede, ma den ben fru-akti a trawan di a dede. Den tu kèiser disi fu Rome ben tiri na ini a ten fu a libi nanga a diniwroko fu Yesus. Suma den ben de? Èn fu san ede den ben gi a wan grani ala di a trawan no ben kisi dati?

A „BEN KON FENI ROME LEKI WAN FOTO FU STON ÈN BEN GOWE LIBI EN LEKI WAN FOTO FU MARMER”

Na ini a yari 44 b.G.T., di den ben kiri Yulius Caesar, dan a granpikin fu en sisa, Gayus Oktafianus, ben abi 18 yari nomo. Fu di a yongu Oktafianus ben de a manpikin di Yulius Caesar ben teki kweki èn ben de a moro prenspari erfgenaam fu en, meki a ben bigin go na Rome wantewante fu taki dati en abi reti fu kisi na erfenis fu Yulius Caesar. Drape a ben miti wan bigi feanti — a moro prenspari luitenant fu Caesar, Markus Antonius, di ben e fruwakti fu de a moro prenspari erfgenaam. A doti politiek èn a strei fu kisi makti di ben kon baka dati, ben tan 13 yari.

Oktafianus ben opo kon leki a wan-enkri tiriman fu a Gran Kownukondre Rome soso baka di a ben wini den legre di ben bondru kon na wan fu Koningin Kleopatra fu Egipti èn fu a freiri fu en, Markus Antonius (na ini a yari 31 b.G.T.). A yari baka dati, Antonius nanga Kleopatra ben kiri densrefi èn Oktafianus ben meki Egipti tron wan pisi fu en kondre. Na so a lasti pisi fu a Gran Kownukondre Grikikondre ben puru èn Rome ben tron a grontapumakti.

Fu di Oktafianus ben memre taki a tiri di Yulius Caesar ben tiri na wan ogri-ati fasi ben meki taki den ben kiri en, meki a ben luku bun fu no meki a srefi fowtu. Na so a ben meki a sori leki na wan republiek ben e tiri. Fu no hati den firi fu sma di ben wani taki Rome de wan republiek. A no ben wani tyari den titel „kownu” nanga „diktator”. Moro fara, a ben meki a prakseri fu en bekènti fu  gi a makti abra di a ben abi na ini ala den distrikt, na a Moro Hei Asamblei fu Rome èn ben taki dati a no wani du den wroko fu en moro. A taktik disi ben wroko. A Moro Hei Asamblei di ben lobi dati srefisrefi, ben gi Oktafianus tranga fu hori den posisi fu en èn fu tan tiri wan tu fu den distrikt.

Boiti dati, na tapu 16 yanuari 27 b.G.T., a Moro Hei Asamblei fu Rome ben gi Oktafianus a titel „Augustus”, di wani taki „A wan di meki kon hei, Santawan”. Oktafianus no ben teki a titel wawan, ma a ben gi wan mun a nen fu en èn ben leni wan dei fu februari so taki augustus ben sa abi someni dei leki yuli, a mun di ben kisi a nen fu Yulius Caesar. Na so Oktafianus ben tron a fosi kèiser fu Rome èn den ben kon sabi en baka ten leki Caesar Augustus noso „Augustus a Fosiwan”. Baka ten a ben teki a titel „pontifex maximus” (granpriester), èn na ini a yari 2 b.G.T. — a yari di Yesus mama meki en — a Moro Hei Asamblei ben gi en a titel Pater Patriae, „Papa fu en kondre”.

Na ini a srefi yari dati „wan wet ben go na doro fu Caesar Augustus, taki ala sma di ben libi na heri grontapu ben musu meki den skrifi den nen poti na lantibuku; . . . èn ala sma ben teki waka fu meki den skrifi den nen poti na lantibuku, ibriwan na en eigi foto” (Lukas 2:1-3). A bakapisi fu a wet disi ben de taki Yesus ben gebore na Betlehem leki wan kontru fu Bijbel profeititori.​—Danièl 11:20; Mika 5:2.

Na ondro a tiri fu Augustus, sma moro furu ben de eerlijk èn a waarde fu a moni no ben e kenkikenki furu. Augustus ben seti so srefi wan heri bun post sistema èn ben meki pasi nanga broki. A ben orga a legre baka, ben poti wan legre fu wroko spesrutu na tapu se wawan èn ben seti wan grupu fu spesrutu srudati-waktiman fu kèiser di sma sabi leki den Pretoria Srudati-waktiman (Filipisma 1:13). Nanga a yepi fu en, skrifiman soleki Virgil nanga Horace ben abi bun bakapisi èn sma di ben meki temre nanga popki sani ben meki moi sani na ini wan fasi di sma e kari klassiek now. Augustus ben klari den oso di Yulius Caesar no ben kaba bow èn ben meki furu tempel kon bun baka. A Pax Romana („Vrede fu  Rome”) di a ben seti, ben tan moro leki 200 yari. Na tapu 19 augustus fu a yari 14 G.T., Augustus dede na a libimarki fu 76 yari èn baka dati den ben meki a tron wan gado.

Augustus ben meki bigi taki a ben „kon feni Rome leki wan foto fu ston èn ben gowe libi en leki wan foto fu marmer”. Fu di a no ben wani taki Rome ben musu drai go baka na a ten pe feti ben lai na ini a republiek fu fosi, meki a ben abi na prakseri fu sreka a kèiser di ben kon na en baka. Ma a no ben abi furu sma fu teki en presi leki kèiser. A neef fu en, tu granpikin, wan masra fu na umapikin fu en èn wan stiefpikin fu en, den alamala ben dede kaba èn soso a kwekipikin fu en, Tiberius, ben tan abra fu teki en presi.

A ’WAN DI SMA BEN O FRU-AKTI’

Wan mun no ben kisi baka a dede fu Augustus di a Moro Hei Asamblei fu Rome ben poti Tiberius, di ben abi 54 yari, leki kèiser. Tiberius ben libi èn ben tiri te leki maart fu a yari 37 G.T. So bun, a ben de a kèiser fu Rome na ini a pisi ten fu a publiki diniwroko fu Yesus.

Leki wan kèiser, Tiberius ben abi bun eigifasi nanga takru eigifasi. Wan fu den bun eigifasi fu en ben de a weigri di a ben weigri fu gebroiki moni gi diri sani. A bakapisi ben de, taki a gran kownukondre ben e drai bun èn Tiberius ben abi moni fu yepi meki kontren kon bun baka di ben kisi fu du nanga rampu èn nanga takru ten. Wan sani di wi musu gi Tiberius grani fu dati, na taki a ben e si ensrefi leki wan libisma nomo èn no ben wani den furu titel di e gi sma grani, èn moro furu ben gi na anbegi fu kèiser na Augustus, na presi na ensrefi. A no ben gi wan mun tapu a kalender a nen fu en, soleki Augustus nanga Yulius Caesar ben du gi densrefi èn a no ben meki trawan gi en grani na so wan fasi.

Ma den takru eigifasi fu Tiberius ben lai moro leki den bun eigifasi fu en. A no ben e frutrow sma srefisrefi èn a ben hoigri ini a fasi fa a ben handri nanga trawan èn a tiri fu en ben furu pasa marki nanga a kiri di den ben kiri sma tapu a komando fu en — èn furu sma di ben de mati fu en fosi, ben de na mindri den  sma di den ben kiri. A ben bradi a wet fu laesa mayestas (na afrontu fu tiriman), so taki boiti na opo di wan sma e opo ensrefi teige tirimakti, a ben kan abi na ini tu a taki di wan sma ben sa taki wan takru sani nomo teige en. Kande na tapu a gron fu a wet disi den Dyu ben poti Granman Pontius Pilatus fu Rome, na ondro druk fu meki den kiri Yesus.​—Yohanes 19:12-16.

Tiberius ben poti den Pretoria Srudati-waktiman krosibei fu Rome èn a ben bow steifi srudati kampu na noordsei fu den skotu fu a foto. A de di den Srudati-waktiman ben de drape ben e tapu skreki gi a Moro Hei Asamblei fu Rome, di ben de wan kefar gi a makti fu en èn ben e tapu ala opruru fu a pipel. Tiberius ben e horibaka so srefi gi a sistema pe wan sma ben e konkru trawan di ben pasa a wet, èn na a kaba pisi fu a tiri fu en, sma ben frede srefisrefi.

Na a ten fu a dede fu en, sma ben si Tiberius leki wan ogri-ati tiriman. Di a dede, dan den Romesma ben prisiri èn a Moro Hei Asamblei ben weigri fu meki a tron wan gado. Fu den reide disi nanga trawan, meki wi e si na ini Tiberius a kontru fu a profeititori di e taki dati ’wan di sma ben o fru-akti’ ben sa opo kon leki „a kownu fu noordsei”.​—Danièl 11:15, 21.

SAN YU BEN KON FRUSTAN?

• Fa Oktafianus ben tron a fosi kèiser fu Rome?

• San wi kan taki fu den sani di a tiri fu Augustus ben doro?

• San ben de den bun fasi nanga den takru fasi fu Tiberius?

• Fa a profeititori fu a ’wan di sma ben o fru-akti’ ben kon tru na ini Tiberius?

[Prenki]

Tiberius

 [Faki/​Prenki na tapu bladzijde 252-255]

SENOBIA — A FETIMAN-KONINGIN FU PALMIRA

„EN SKIN ben dungru . . . En tifi ben weti leki peri, èn den bigi blaka ai fu en ben brenki na wan aparti fasi, ma a switifasi fu en di e hari sma srefisrefi ben e safu dati. A sten fu en ben tranga èn ben krin. A stuka di a ben stuka ben meki a fasi fa a ben krutu sani leki wan man-nengre kon de moro krin fu si èn kon de moi. A ben sabi Latijntongo, ma a ben sabi Grikitongo, Siriatongo nanga Egiptitongo heri bun tu.” Disi ben de den moi wortu di historia skrifiman Edward Gibbon ben taki fu Senobia — a fetiman-koningin fu a foto Palmira fu Siria.

A masra fu Senobia ben de a prenspari man fu Palmira, Odeinatus, di ben kisi a posisi leki consul fu Rome na ini 258 G.T., bika a ben feti nanga Persia gi a Gran Kownukondre Rome èn ben wini. Tu yari baka dati, Kèiser Galinus fu Rome ben gi Odeinatus a titel corrector totius Orientis (granman fu a heri Owstusei). Disi ben de fu sori warderi taki a ben wini Kownu Shāpūr I fu Persia. Te fu kaba, Odeinatus ben gi ensrefi a titel „kownu fu den kownu”. A kan taki moro furu fu a deki-ati nanga koni fu Senobia ede, meki Odeinatus ben abi den bun bakapisi disi.

SENOBIA E SUKU FU MEKI WAN GRAN KOWNUKONDRE

Na ini 267 G.T., na a heimarki fu en libiwroko, den ben kiri Odeinatus nanga na erfgenaam fu en. Senobia ben teki a posisi fu en masra abra, fu di a manpikin fu en ben de tumusi yongu fu du dati. Fu di a ben moi, ben abi ambisi, ben de bekwaam leki tiriman, ben gwenti fu go na feti nanga en masra èn ben man taki difrenti tongo grati, meki a ben man fu dwengi a lespeki fu den sma di ben de na en ondro èn fu den ben horibaka gi en. Senobia ben lobi fu leri sani èn ben sorgu taki furu sabiman ben de ala ten krosibei fu en. Wán fu den raiman fu en ben de a filosofiaman nanga bun takiman Kasius Longinus  — di sma ben taki fu en dati a ben de „wan maksin fu sabi”. Na ini a buku Palmyra and Its Empire​—Zenobia’s Revolt Against Rome, skrifiman Richard Stoneman e taki: „Na ini den feifi yari baka a dede fu Odeinatus . . . , Senobia ben seti ensrefi na ini a prakseri fu a pipel fu en leki a bigi misi fu Owstusei.”

Persia ben de na wán sei fu a kontren fu Senobia, di en nanga a masra fu en ben meki kon swaki, èn Rome di ben e go na baka ben de na a tra sei fu a kontren fu en. Historia skrifiman J. M. Roberts e taki fu a situwâsi na ini a Gran Kownukondre Rome na a ten dati: „A di fu dri yarihondro ben de . . . wan takru ten gi Rome na a owstusei grens èn so srefi na a westsei grens, ala di na ini a kondre wan nyun pisi ten fu borgufeti nanga kesekese ben kon di ben abi fu du nanga suma ben abi a reti fu kon na tapu a kownusturu. Twenti na tu kèiser  (boiti den wan di ben taki nomo taki den na kèiser) ben tiri baka makandra.” Na a tra sei, a bigi misi fu Siria ben de a wan-enkri tranga koningin na ini en kontren. „Fu di a ben man hori tu gran kownukondre [di fu Persia nanga di fu Rome] na ini balansi,” Stoneman e taki, „dan a ben kan suku fu meki wan di fu dri di ben o abi makti na tapu den tu.”

Wan okasi gi Senobia fu bradi a kownumakti fu en ben kon na ini 269 G.T. di wan man, di ben taki dati a ben abi reti na tapu a kownusturu, ben kon na Egipti, èn ben taki dati a tirimakti na Rome no ben abi a reti fu tiri. A legre fu Senobia ben hari go esi-esi na ini Egipti, ben wini na opruruman krinkrin èn ben teki a kondre abra. Di a ben kari ensrefi koningin fu Egipti, dan a ben meki moni nanga en eigi nen na tapu. Now a kownukondre fu en ben de fu a Nijl-liba te go miti na Eufraatliba. A ben de na a momenti disi na ini en libi taki Senobia ben kon teki a posisi fu „a kownu fu zuidsei”.​—Danièl 11:25, 26.

A MAMAFOTO FU SENOBIA

Senobia ben meki a mamafoto fu en, Palmira, kon so tranga èn so moi taki den ben e si en a srefi leki den moro bigi foto fu a kownukondre Rome. Sma e denki taki moro leki 150.000 sma ben e libi na ini a foto. Kefalek moi oso fu lanti, tempel, dyari, pilari nanga monumenti ben furu Palmira, wan foto nanga skotu lontu en, di, soleki fa sma ben taki, ben de 21 kilometer langa. Wan rèi fu furu pilari di tyari komoto na Korente èn di ben  hei moro leki 15 meter — so wan 1500 pilari — ben de na ala tu sei fu a moro prenspari strati. Stonpopki nanga afu stonpopki fu deki-ati man nanga guduman di ben du bun gi trawan, ben de furu na ini a foto. Na ini 271 G.T., Senobia ben meki stonpopki fu ensrefi èn fu en masra di dede.

A Son Tempel ben de wan fu den moro moi oso na ini Palmira èn seiker dati ben abi krakti tapu a relisi situwâsi na ini a foto. A kan taki Senobia srefi ben anbegi wan gado di ben abi fu du nanga a songado. Ma Siria fu a di fu dri yarihondro ben de wan kondre di ben abi furu relisi. Na ini a kondre fu Senobia yu ben abi sma di e taki, dati den na Kresten, Dyu nanga anbegiman fu a son nanga a mun. Fa a ben denki fu den difrenti fasi disi fu anbegi? Skrifiman Stoneman e taki: „Wan koni tiriman no sa weigri fu erken iniwan gwenti di sori leki a bun gi en pipel. . . . Den gado, na so den ben howpu, ben tyari kon na makandra na a sei fu Palmira.” Soleki fa a sori, dan Senobia ben e frudrage sani ini a tori fu relisi.

Nanga en kefalek aparti eigifasi, Senobia ben kisi a lespeki fu furu sma. A moro prenspari sani ben de a ròl fu en leki wan sma na ini politiek di den ben taki fu en na fesi na ini a profeititori fu Danièl. Ma en tiri no ben tan moro langa leki feifi yari. Kèiser Aurelianus fu Rome ben wini Senobia na ini 272 G.T. èn baka dati a ben teki sani nanga tranga na ini Palmira, so taki a foto no ben man meki kon bun moro. Senobia ben kisi pardon. Sma taki dati a ben trow nanga wan asambleiman fu Rome èn kande ben libi baka ten sondro fu teki wan posisi baka.

SAN YU BEN KON FRUSTAN?

• San sma taki fu a fasi fa Senobia ben de?

• San ben de wan tu sani di Senobia ben du?

• Fa Senobia ben e denki fu relisi?

[Prenki]

Koningin Senobia e taki nanga den srudati fu en

 [[Prenki/Schema/Faki na tapu bladzijde 246 di e tyari sani kon na krin]

DEN KOWNU NA INI DANIÈL 11:20-26

A Kownu fu Noordsei A Kownu fu Zuidsei

Danièl 11:20 Augustus

Danièl 11:21-24 Tiberius

Danièl 11:25, 26 Aurelianus Koningin Senobia

A fadon fu a A Gran Kownukondre Ingrisikondre,

Gran Kownukondre Doisrikondre èn baka dati na

Rome di den ben Anglo-Amerkan

taki na fesi fu Grontapumakti

dati abi leki

bakapisi a seti fu

[Prenki]

Tiberius

[Prenki]

Aurelianus

[Prenki]

Pikin stonpopki fu Karel a Bigiwan

[Prenki]

Augustus

[Prenki]

Fetiboto fu Ingrisikondre fu a di fu 17 yarihondro

 [Prenki di e tapu heri bladzijde 230]

[Prenki na tapu bladzijde 233]

Augustus

[Prenki na tapu bladzijde 234]

Tiberius

 [Prenki na tapu bladzijde 235]

Na fu a komando ede di Augustus ben gi, meki Yosef nanga Maria ben teki waka go na Betlehem

 [Prenki na tapu bladzijde 237]

Yesus ben „broko” na ini dede, soleki fa ben taki na fesi kaba

 [Prenki na tapu bladzijde 245]

1. Karel a Bigiwan 2. Napoleon I 3. Wilhelm I 4. Doisri srudati, Fosi Grontapufeti