Kapitel Tinadri

Tu Kownu de ini wan Strei

1, 2. Fu san ede wi musu abi belangstelling gi a profeititori di skrifi na ini Danièl kapitel 11?

TU KOWNU di de feanti fu makandra, de na ini wan faya strei di abi fu du nanga suma fu den abi moro makti. Te den yari e pasa, dan fosi a wán e kisi a makti fu tiri èn baka dati a trawan. Sontron wán kownu e tiri leki a moro bigi makti, ala di a trawan e kon de inaktief, èn yu abi pisi ten pe strei no de. Ma dan wantronso wan tra feti e broko, èn a strei e go doro. Den sma di de ini a tori disi ben de Kownu Seleikos I Nikator fu Siria, Kownu Ptolemeus Lagus fu Egipti, a Prinses fu Siria di ben tron Koningin Kleopatra I fu Egipti, Kèiser Augustus nanga Kèiser Tiberius fu Rome, nanga Koningin Senobia fu Palmira. Di a strei e doro en kaba, dan Nazi Doisrikondre, a communist grupu fu nâsi, na Anglo-Amerkan Grontapumakti, a Folkubontu nanga den Verenigde Nâsi de na ini a strei tu. A kaba pisi na wan sani di e feni presi èn di no wan fu den politiek grupu disi ben si na fesi. Na engel fu Yehovah ben fruklari a span profeititori disi na a profeiti Danièl so wan 2500 yari pasa kaba.​—Danièl, kapitel 11.

² ¡Danièl ben musu prisiri fu yere fa na engel e tyari a feantifasi na mindri den tu kownu di ben de fu kon, finifini kon na krin gi en! A tori prenspari gi wi tu, bika a strei fu kisi makti na mindri den tu kownu, e go te na ini a ten fu wi. Te wi e si fa a historia sori taki a fosi pisi fu a profeititori tru, dan dati sa tranga a bribi nanga a frutrow di wi abi na ini a seikerfasi fu a kontru fu a lasti pisi fu a profeititori. A poti di wi e poti prakseri na a profeititori disi sa meki wi si krin pe wi de na ini a ten. A sa tranga so srefi a bosroiti fu wi fu no teki no wan sei na ini a strei, ala di wi e wakti nanga pasensi fu Gado handri fu a bun fu wi (Psalm 146:3, 5). Fu dati ede, meki wi arki heri bun te na engel fu Yehovah e taki nanga Danièl.

 TEIGE A KOWNUKONDRE GRIKIKONDRE

3. Gi suma na engel ben horibaka „na ini a fosi yari fu Darius a Mediasma”?

³ „Fu mi sei,” na engel ben taki, „na ini a fosi yari fu Darius a Mediasma [539/538 b.G.T.], mi ben opo tanapu leki wan sma di e gi tranga èn leki wan fortresi gi en” (Danièl 11:1). Darius no ben de na libi moro, ma na engel ben sori go na a tiri fu en leki a bigin fu a profeiti boskopu. A ben de a kownu disi di ben gi a komando taki den ben musu puru Danièl na ini a lew-olo. Darius ben gi a komando so srefi taki ala den sma di ben de na en ondro, musu frede a Gado fu Danièl (Danièl 6:21-27). Ma a sma, di na engel ben opo tanapu fu gi yepi, no ben de Darius a Mediasma, ma a kompe fu na engel, Mikaèl — a prins fu a pipel fu Danièl. (Teki gersi Danièl 10:12-14.) Na engel fu Gado ben gi a yepi disi ala di Mikaèl ben strei nanga a prins fu Medo-Persia di ben de wan ogri yeye.

4, 5. Suma ben de den fo kownu fu Persia di den ben taki fu den na fesi?

⁴ Na engel fu Gado ben taki moro fara: „¡Luku! Ete dri kownu sa opo tanapu gi Persia, èn a di fu fo sa tyari moro gudu kon na makandra leki ala trawan. Èn so esi leki a kon tranga fu den gudu fu en, a sa tyari ala sani kon teige a kownukondre Grikikondre” (Danièl 11:2). Ma suma ben de den tiriman disi fu Persia?

⁵ Den fosi dri kownu ben de Sirus a Bigiwan, Kambises II nanga Darius I. Fu di Bardia (noso kande wan sma di ben taki dati en na kownu èn di ben nen Gaumata) ben tiri soso seibi mun nomo, dan a profeititori no ben poti prakseri na a tiri fu en, di no ben tan langa. Na ini 490 b.G.T., a di fu dri kownu, Darius I, ben pruberi fu go nanga tranga na ini Grikikondre fu a di fu tu tron. Ma den Persiasma ben lasi a strei na Maraton èn ben hari gowe go kibri na Pikin Asia. Ala di Darius ben sreka sani heri bun gi wan tra strei nanga Grikikondre, toku a no ben man strei a strei dati fosi a dede fu en fo yari baka dati. A strei dati ben libi gi a manpikin fu en èn a sma di ben sa tron Kownu baka en, a di fu „fo” kownu, Serkses I. En  ben de Kownu Ahasferos di ben trow nanga Ester.​—Ester 1:1; 2:15-17.

6, 7. (a) Fa a di fu fo kownu ben „tyari ala sani kon teige a kownukondre Grikikondre”? (b) San ben de a bakapisi fu a strei di Serkses ben strei nanga Grikikondre?

⁶ Fu tru, Serkses I ben „tyari ala sani kon teige a Grikikondre kownukondre”, dati wani taki, den srefidensi Griki distrikt leki wan grupu. „Fu di sma di ben de fu kownu oso èn di ben lobi makti srefisrefi ben gi Serkses tranga,” na so a buku The Medes and Persians​—Conquerors and Diplomats e taki, „meki a ben bigin wan strei na syoro èn na tapu se.” A Griki historia skrifiman Herodotus, fu a di fu feifi yarihondro b.G.T., e skrifi taki „no wan tra srudatiwaka kan bigi moro a strei disi di Serkses ben strei”. A tori fu Herodotus e taki dati a legre na tapu se „ben de ala nanga ala 517.610 man. A nomru fu srudati di ben waka nanga futu ben de 1.700.000; a nomru fu asi-tyariman ben de 80.000; èn wi musu poti a nomru tu fu den Arabiri di ben e rèi na tapu kameili, nanga den Libiasma di ben strei na ini fetiwagi, wan nomru di mi e denki de so wan 20.000 sma. Fu dati ede a heri nomru fu den legre na syoro èn na tapu se makandra ben de 2.317.610 man.”

⁷ Fu di a marki fu Serkses I ben de fu wini dorodoro, meki a ben tyari a kefalek bigi legre fu en kon teige Grikikondre na ini 480 b.G.T. Den Persiasma ben pori Ateine baka di den ben broko a taktik fu den Grikisma fu meki den lasi ten na Termopilei. Ma na Salamis den ben lasi hebihebi. Den Grikisma ben wini baka na Platea na ini 479 b.G.T. No wan fu den seibi kownu di ben kon na tapu a kownusturu fu a Gran Kownukondre Persia baka Serkses na ini den 143 yari baka dati, ben go nanga tranga na ini Grikikondre. Ma baka dati wan makti kownu ben opo kon na ini Grikikondre.

WAN BIGI KOWNUKONDRE PRATI NA INI FO PISI

8. Sortu „tranga kownu” ben opo tanapu, èn fa a du kon taki a ben „tiri nanga tumusi bigi tirimakti”?

⁸ „Wan tranga kownu trutru sa opo tanapu èn tiri nanga tumusi bigi tirimakti èn du soleki fa en wani”, na engel ben  taki (Danièl 11:3). Aleksander, di ben abi twenti yari, ben „opo tanapu” leki kownu fu Masedonia na ini 336 b.G.T. A ben tron „wan tranga kownu” trutru — Aleksander a Bigiwan. Fu di a ben abi a plan fu en papa, Filipus II, na prakseri, meki a ben teki den distrikt na a Mindri-Owstu abra di ben de fu Persia. Di a ben abra na Eufraatliba nanga a Tigrisliba, dan den 47.000 man fu en ben panya den 250.000 man fu Darius III na Gaugamela gowe na ala sei. Baka dati Darius ben lowe gowe èn den ben kiri en èn na so wan kaba ben kon na a lin fu kownu fu Persia. Grikikondre ben tron a grontapumakti now, èn Aleksander ’ben tiri nanga tumusi bigi tirimakti èn ben du soleki fa en wani’.

9, 10. Fa a profeititori ben sori fu de tru taki a kownukondre fu Aleksander no ben sa go na den bakapikin fu en?

⁹ Aleksander no ben sa tiri grontapu langa, bika na engel fu Gado ben taki moro fara: „Te a sa opo tanapu, dan en kownukondre sa broko èn sa prati go na den fo winti fu hemel, ma no gi den bakapikin fu en èn no akruderi en tirimakti di a ben tiri nanga dati; bika den sa hari en kownukondre puru nanga rutu, iya, srefi gi trawan leki den wan disi” (Danièl 11:4). Aleksander no ben abi 33 yari ete di a ben kon siki wantronso èn ben lasi libi na Babilon na ini 323 b.G.T.

¹⁰ A bigi gran kownukondre fu Aleksander no ben gi na „den bakapikin fu en”. En brada Filipus III Arideus ben tiri moro mendri leki seibi yari èn den ben kiri en na ini 317 b.G.T. fu di Olimpias, a mama fu Aleksander, ben aksi dati. A manpikin fu Aleksander, Aleksander IV, ben tiri te leki 311 b.G.T., di Kasander, wan fu den legre-edeman fu en papa, ben kiri en. Herakles, a manpikin fu Aleksander di a ben kisi nanga en dorosei-uma, ben suku fu tiri na ini a nen fu en papa, ma den ben kiri en na ini 309 b.G.T. Na so a famirilin fu Aleksander ben kon na wan kaba èn „en tirimakti” ben komoto na a famiri fu en.

11. Fa a kownukondre fu Aleksander ben „prati go na den fo winti fu hemel”?

¹¹ Baka a dede fu Aleksander, dan a kownukondre fu en ben  „prati go na den fo winti”. Den furu legre-edeman fu en ben e meki trobi nanga makandra ala di den ben e grabu kontren abra. Legre-edeman Antigonus I di ben abi wán ai, ben pruberi fu tyari a heri gran kownukondre fu Aleksander kon na ondro en makti. Ma den ben kiri en na ini wan strei na Ipsus na ini Frigia. Na wan sani fu a yari 301 b.G.T., fo fu den legre-edeman fu Aleksander ben tiri a bigi kontren di a komandanti fu den ben teki abra. Kasander ben tiri Masedonia nanga Grikikondre. Lisimakus ben kisi a makti tapu Pikin Asia nanga Trasia. Seleikos I Nikator ben kisi Mesopotamia nanga Siria. Èn Ptolemeus Lagus ben tiri Egipti nanga Palestina. Soleki fa a profeiti wortu ben taki, dan a bigi gran kownukondre fu Aleksander ben prati na ini fo Griki kownukondre.

TU KOWNU DI DE FEANTI FU MAKANDRA E OPO KON

12, 13. (a) Fa fo Griki kownukondre ben kon tron tu? (b) Sortu lin fu kownu Seleikos ben seti na ini Siria?

¹² Wan tu yari baka di Kasander ben kisi makti, a dede èn na ini 285 b.G.T., Lisimakus ben teki a pisi fu Europa di ben de fu a Gran Kownukondre Grikikondre. Na ini 281 b.G.T., Seleikos I Nikator ben kiri Lisimakus na ini wan strei èn dati ben gi Seleikos a makti tapu a moro bigi pisi fu den kontren fu Asia. Na ini 276 b.G.T., Antigonus II Gonatas, granpikin fu wan fu den legre-edeman fu Aleksander, ben kon na tapu a kownusturu fu Masedonia. Baka ten Masedonia ben kon na ondro a makti fu Rome èn te fu kaba ben tron wan distrikt fu Rome na ini 146 b.G.T.

¹³ Soso tu fu den fo Griki kownukondre ben tan prenspari now — wán na ondro Seleikos I Nikator èn a trawan na ondro Ptolemeus Lagus. Seleikos ben seti a lin fu kownu na ini Siria. Antiokia — a nyun mamafoto fu Siria — nanga a lanpresi fu Seleisia ben de wan tu fu den foto di a ben seti. Baka ten na  apostel Paulus ben gi leri na ini Antiokia, pe fu a fosi leisi den ben kari den bakaman fu Yesus, Kresten (Tori fu den Apostel 11:25, 26; 13:1-4). Den ben kiri Seleikos na ini 281 b.G.T., ma a lin fu kownu fu en ben tiri te leki 64 b.G.T. di Legre-edeman Kneus Pompeus fu Rome ben meki Siria tron wan distrikt fu Rome.

14. O ten a lin fu kownu fu Ptolemeus ben seti na ini Egipti?

¹⁴ Fu den fo Griki kownukondre, a kownukondre fu Ptolemeus Lagus, noso Ptolemeus I, di ben teki a titel fu kownu na  ini 305 b.G.T., ben tan moro langa. A lin fu kownu fu Ptolemeus di a ben seti, ben tan fu tiri Egipti te leki a ben fadon ini na anu fu Rome na ini 30 b.G.T.

15. Sortu tu tranga kownu ben opo kon fu den fo Griki kownukondre, èn sortu strei den ben bigin?

¹⁵ So bun, fu fo Griki kownukondre, tu tranga kownu ben opo kon — Seleikos I Nikator ben tiri Siria èn Ptolemeus I ben tiri Egipti. Nanga den tu kownu disi a langa strei ben bigin na mindri „a kownu fu noordsei” nanga „a kownu fu zuidsei”, di  den e taki fu dati na ini Danièl kapitel 11. Na engel fu Yehovah no ben kari den nen fu den kownu, bika na ini ala den yarihondro tra sma nanga tra kondre ben sa teki a ròl fu den tu kownu disi. Na engel no ben taki finifini fu sani di no ben de fanowdu, ma ben kari soso den tiriman nanga den sani di ben o feni presi èn di abi fu du nanga a strei.

A STREI E BIGIN

16. (a) Na noordsei èn na zuidsei fu suma den tu kownu ben de? (b) Sortu kownu ben teki a ròl fu „a kownu fu noordsei” èn fu „a kownu fu zuidsei” fosi?

¹⁶ ¡Arki! Te na engel fu Yehovah e taki fu a bigin fu a span strei disi, a e taki: „A kownu fu zuidsei sa kon tranga, iya, wan fu den prins fu en [Aleksander]; èn a [a kownu fu noordsei] sa wini en èn a sa tiri seiker nanga bigi makti, moro bigi leki a tirimakti fu a wan dati” (Danièl 11:5). Den nen „a kownu fu noordsei” nanga „a kownu fu zuidsei” e sori go na kownu di ben de na noordsei èn na zuidsei fu a pipel fu Danièl, di na a ten dati ben kon fri fu katibo na Babilon èn ben drai go baka na a kondre Yuda. A fosi „kownu fu zuidsei” ben de Ptolemeus I fu Egipti. Wan fu den legre-edeman fu Aleksander di ben wini Ptolemeus I èn ben tiri „nanga tumusi bigi makti”, ben de Kownu Seleikos I Nikator fu Siria. A ben teki a ròl fu „a kownu fu noordsei”.

17. Na ondro a tirimakti fu suma a kondre Yuda ben de na a bigin fu a strei na mindri a kownu fu noordsei nanga a kownu fu zuidsei?

¹⁷ Na a bigin fu a strei, a kondre Yuda ben de na ondro a makti fu a kownu fu zuidsei. Sensi wan sani fu 320 b.G.T., Ptolemeus I ben gi den Dyu deki-ati fu kon na Egipti leki koloniesma. Wan Dyu kolonie ben e drai bun na ini Aleksandria, pe Ptolemeus I ben meki wan barinen bibliotheek. Den Dyu na ini Yuda ben tan na ondro a makti fu a famirilin fu Ptolemeus di ben e tiri Egipti, a kownu fu zuidsei, te leki 198 b.G.T.

18, 19. Fa den tu kownu di de feanti fu makandra ben meki „wan reti kruderi” baka wan pisi ten?

 ¹⁸ Na engel ben taki na fesi fu den tu kownu: „Na a kaba fu wan tu yari den sa kon de wán èn srefi na umapikin fu a kownu fu zuidsei sa kon na a kownu fu noordsei fu meki wan reti kruderi. Ma na umapikin no sa hori a makti fu en anu; èn a no sa tan horidoro, noso na anu fu en; èn na umapikin den sa gi abra, ensrefi nanga den sma di ben tyari en kon, èn a man di ben meki a kon gebore, èn a sma di ben meki a kon tranga na ini den ten dati” (Danièl 11:6). Fa disi ben kon pasa?

¹⁹ A profeititori no ben taki fu a manpikin fu Seleikos I Nikator èn a sma di ben tron kownu baka en, Antiokus I, bika a no ben strei wan prenspari strei nanga a kownu fu zuidsei. Ma a sma di ben tron kownu baka en, Antiokus II, ben strei wan langa strei nanga Ptolemeus II, a manpikin fu Ptolemeus I. Antiokus II ben de a kownu fu noordsei èn Ptolemeus II ben de a kownu fu zuidsei. Antiokus II ben trow nanga Laodise èn den ben abi wan manpikin di ben nen Seleikos II, ala di Ptolemeus II ben abi wan umapikin di ben nen Berenise. Na ini 250 b.G.T., den tu kownu disi ben meki „wan reti kruderi”. Fu ben kan hori ensrefi na a kruderi disi, dan Antiokus II ben brokotrow nanga en wefi Laodise èn ben trow nanga Berenise, „na umapikin fu a kownu fu zuidsei”. A ben kisi wan manpikin nanga Berenise di ben tron erfgenaam fu a kownusturu fu Siria na presi fu den manpikin fu Laodise.

20. (a) Fa na „anu” fu Berenise no ben horidoro? (b) Fa Berenise, „den sma di ben tyari en kon” nanga „a sma di ben meki a kon tranga” ben gi abra? (c) Suma ben tron kownu fu Siria baka di Antiokus II ben lasi „na anu fu en” noso makti??

²⁰ Na „anu” fu Berenise noso a krakti di ben e horibaka gi en, ben de en papa, Ptolemeus II. Di en papa dede na ini 246 b.G.T., dan a no ben „hori a makti fu en anu” na a masra fu en. Antiokus II no ben wani en moro, ben trow nanga Laodise baka, èn ben poti a manpikin fu den leki a sma di ben o tron kownu baka en. Den ben kiri Berenise nanga en manpikin soleki fa Laodise ben abi dati na prakseri. Soleki fa buweisi  e sori, dan den dinari di ben tyari Berenise fu Egipti go na Siria — „den sma di ben tyari en kon” — ben ondrofeni a srefi sani. Laodise ben poti vergif srefi gi Antiokus II, èn na so „na anu fu en”, noso makti, no ben „tan horidoro” tu. So bun, a papa fu Berenise — „di ben meki a kon gebore” — nanga a masra fu en fu Siria — di ben meki a kon „tranga” fu wan pisi ten — ala tu dede. Disi ben meki taki Seleikos II, a manpikin fu Laodise, ben tan abra leki a kownu fu Siria. Fa a tra kownu na ini a famiri lin fu Ptolemeus ben sa handri na tapu ala den sani disi?

WAN KOWNU E TEKI REFENSI FU DI DEN KIRI EN SISA

21. (a) Suma ben de „wan fu a sproiti” fu den „rutu” fu Berenise, èn fa a ben „opo tanapu”? (b) Fa Ptolemeus III ben „kon . . . teige a fortresi fu a kownu fu noordsei” èn ben wini en?

²¹ „Wán fu a sproiti fu den rutu fu en sa opo tanapu trutru na ini en posisi,” na engel ben taki, „èn a sa kon na a srudatimakti èn teige a fortresi fu a kownu fu noordsei èn a sa strei trutru nanga den èn a sa wini” (Danièl 11:7). „Wan fu a sproiti” fu a papa nanga a mama fu Berenise, noso den „rutu”, ben de en brada. Na a dede fu en papa, a ben „opo tanapu” leki a kownu fu zuidsei, Farao Ptolemeus III fu Egipti. Wantewante a ben bigin teki refensi fu di den ben kiri en sisa. Di a ben hari go teige Kownu Seleikos II fu Siria, di Laodise ben gebroiki fu kiri Berenise nanga en manpikin, dan a ben kon teige „a fortresi fu a kownu fu noordsei”. Ptolemeus III ben teki a pisi fu Antiokia di ben meki kon tranga èn ben kiri Laodise. A ben go na owstusei pasa go na ini a kontren fu a kownu fu noordsei ala di a ben teki sani nanga tranga na ini Babilon èn ben hari go na India.

22. San Ptolemeus III ben tyari go baka na Egipti, èn fu san ede a ben „tan fara fu a kownu fu noordsei wan tu yari”?

²² San ben pasa baka dati? Na engel fu Gado e fruteri wi: „Èn so srefi nanga den gado fu den, nanga den popki fu den di den meki fu sani di den smèlter, nanga den warti sani fu den fu solfru èn fu gowtu èn nanga den katiboman a sa kon na Egipti. Èn ensrefi sa tan fara fu a kownu fu noordsei wan tu yari” (Danièl 11:8). Moro leki 200 yari na fesi, Kownu Kambises II  fu Persia ben wini Egipti èn ben tyari den gado fu Egipti go na oso, „den popki fu den di den meki fu sani di den smèlter”. Di Ptolemeus III ben e teki sani nanga tranga fu Susa, di ben de wan mamafoto fu kownu fosi, dan a ben teki den gado disi baka èn ben tyari den go ’na ini katibo’ na Egipti. A ben tyari so srefi bun furu „warti sani . . . fu solfru èn fu gowtu” leki sani di den ben teki nanga tranga na strei. Fu di Ptolemeus III ben musu drai go baka na Egipti fu go tapu wan opruru di ben feni presi na ini Egipti, meki a ’ben tan fara fu a kownu fu noordsei’, èn no ben du en moro ogri.

A KOWNU FU SIRIA E TEKI REFENSI

23. Fu san ede a kownu fu noordsei ben „drai go baka na en eigi doti” baka di a ben kon na ini a kownukondre fu a kownu fu zuidsei?

²³ San a kownu fu noordsei ben du na tapu a sani disi? Danièl ben kisi fu yere: „Trutru a sa kon na ini a kownukondre fu a kownu fu zuidsei èn drai go baka na en eigi doti” (Danièl 11:9). A kownu fu noordsei — Kownu Seleikos II fu Siria — ben strei baka. A ben go na ini „a kownukondre” noso kontren fu na Egipti kownu fu zuidsei, ma a ben lasi a strei. Nanga soso wan pikin fikapisi fu a legre fu en, Seleikos II ’ben drai go baka na en eigi doti’, èn ben hari gowe go kibri na Antiokia, a mamafoto fu Siria, na ini wan sani fu 242 b.G.T. Na a dede fu en, en manpikin Seleikos III ben teki en presi leki kownu.

24. (a) San ben pasa nanga Seleikos III? (b) Fa Kownu Antiokus III fu Siria ben „kon èn . . . sungu sani èn pasa go doro” a kontren fu a kownu fu zuidsei?

²⁴ San den ben taki na fesi fu den bakapikin fu Kownu Seleikos II fu Siria? Na engel ben taigi Danièl: „Èn fu a sei fu den manpikin fu en now, den sa sreka densrefi fu go strei èn trutru tyari wan ipi bigi srudatimakti kon na makandra. Èn te a e kon, dan a sa kon trutru èn sungu sani èn hari pasa go doro. Ma a sa drai go baka, èn a sa sreka ensrefi fu go strei èn doro te na a fortresi fu en” (Danièl 11:10). Na ini moro mendri leki dri yari, a tiri fu Seleikos III ben kon na wan kaba fu di den ben kiri en. En brada, Antiokus III, ben teki en presi na tapu a kownusturu fu Siria. A manpikin disi fu Seleikos II ben tyari  bigi legre kon na wán fu strei nanga a kownu fu zuidsei, di na a ten dati ben de Ptolemeus IV. A nyun Siria kownu fu noordsei ben strei nanga bun bakapisi nanga Egipti èn ben wini a lanpresi fu Seleisia baka, a distrikt Kule-Siria, den foto Tirus nanga Ptolemais, nanga foto di ben de krosibei. A ben wini wan legre fu Kownu Ptolemeus IV èn ben teki furu foto fu Yuda abra. Na ini a lente fu 217 b.G.T., Antiokus III ben gowe libi Ptolemais èn ben go na noordsei, „te na a fortresi fu en” na ini Siria. Ma wan kenki ben de fu kon.

A SITUWÂSI E KENKI

25. Pe Ptolemeus IV ben miti Antiokus III na ini strei, èn san ben „gi na ini na anu” fu na Egipti kownu fu zuidsei?

²⁵ Nanga fruwakti wi e arki neleki Danièl te na engel fu Yehovah e taki na fesi now: „A kownu fu zuidsei sa kon de nanga bita-ati èn sa musu hari go èn strei nanga en, dati wani taki nanga a kownu fu noordsei; èn trutru a sa meki wan bigi ipi sma opo kon, èn na ipi sma trutru sa gi na ini na anu fu a wan dati” (Danièl 11:11). Nanga wan grupu fu 75.000 srudati, a kownu fu zuidsei, Ptolemeus IV, ben go na noordsei teige a feanti. A Siria kownu fu noordsei, Antiokus III, ben tyari wan „bigi ipi sma” fu 68.000 man opo kon teige en. Ma „na ipi sma” ben „gi na ini na anu” fu a kownu fu zuidsei na ini wan strei na a foto Rafia, di de na syorosei, no fara fu a grens fu Egipti.

26. (a) Sortu „ipi sma” a kownu fu zuidsei ben tyari gowe na a strei na Rafia, èn san ben de den kondisi fu a vrede-kruderi di den ben meki drape? (b) Fa Ptolemeus IV „no [ben] gebroiki a tranga posisi fu en”? (c) Suma ben tron a tra kownu fu zuidsei?

²⁶ A profeititori e taki moro fara: „Èn den sa tyari na ipi sma gowe trutru. En ati sa opo ensrefi, èn trutru a sa meki furu tin dusun sma fadon; ma a no sa gebroiki a tranga posisi fu en” (Danièl 11:12). Ptolemeus IV, a kownu fu zuidsei, ben kiri 10.000 Siria srudati di ben e waka nanga futu, nanga 300 asi-tyariman èn ben „tyari” 4000 „gowe” leki strafuman. Baka dati den kownu ben meki wan kruderi èn na ini a kruderi dati Antiokus III ben tan hori en lanpresi fu Seleisia na ini Siria, ma a ben lasi Fenisia nanga Kule-Siria. A wini disi ben meki na ati  fu na Egipti kownu fu zuidsei „opo ensrefi”, spesrutu teige Yehovah. Yuda ben tan na ondro a makti fu Ptolemeus IV. Ma a no ben „gebroiki a tranga posisi fu en” fu go doro nanga a wini di a ben wini fu a Siria kownu fu noordsei. Na presi fu dati, Ptolemeus IV ben go libi wan yayolibi èn en manpikin fu feifi yari, Ptolemeus V, ben tron a tra kownu fu zuidsei, wan tu yari bifo a dede fu Antiokus III.

A BARINEN-MAN E KON BAKA

27. Fa a kownu fu noordsei ben drai kon baka „na a kaba fu den ten” fu teki kontren fu Egipti baka?

²⁷ Antiokus III ben kon kisi a nen Antiokus a Bigiwan fu ala den bigi sani di a ben du. Na engel ben taki fu en: „A kownu fu noordsei musu drai kon baka èn tyari wan ipi sma kon di moro bigi leki a fosiwan; èn na a kaba fu den ten, wan tu yari, a sa kon, èn a sa du dati nanga wan bigi srudatimakti èn nanga bun furu gudu” (Danièl 11:13). Den „ten” disi ben de 16 yari noso moro, baka di den Egiptisma ben wini den Siriasma na Rafia. Di a yongu Ptolemeus V ben tron a kownu fu zuidsei, dan Antiokus III ben go nanga „wan ipi sma . . . di moro bigi leki a fosiwan” fu teki den kontren baka di a ben lasi di a ben feti nanga na Egipti kownu fu zuidsei. Fu doro a marki dati, dan a ben wroko makandra nanga Kownu Filipus V fu Masedonia.

28. Sortu problema a yongu kownu fu zuidsei ben abi?

²⁸ A kownu fu zuidsei ben abi problema tu na ini en kownukondre. „Na a ten dati furu sma sa de di sa opo teige a kownu fu zuidsei”, na engel ben taki (Danièl 11:14a). Furu sma trutru ben „opo teige a kownu fu zuidsei”. Boiti taki a yongu kownu fu zuidsei ben kisi fu du nanga den srudatimakti fu Antiokus III nanga en patna fu Masedonia, a ben kisi fu du tu nanga problema na ini en kondre Egipti. Fu di Agatokles, a sma di ben e sorgu gi en èn di ben e tiri na ini en nen, ben handri na wan heimemre fasi nanga den Egiptisma, dan furu fu den sma ben opo densrefi teige en. Na engel ben taki moro fara: „Èn den manpikin fu den fufuruman di de fu a pipel fu yu, fu den  sei, sa tyari go so srefi fu pruberi fu meki wan fisyun kon tru; èn den musu naki futu” (Danièl 11:14b). Srefi wan tu sma fu a pipel fu Danièl ben tron ’manpikin fu fufuruman’ noso opruruman. Ma iniwan „fisyun” di den Dyu man disi ben abi, fu tyari wan kaba kon na a tiri di den heiden ben e tiri a mamakondre fu den, ben falsi èn den no ben sa doro a marki fu den, noso ben sa „naki futu”.

29, 30. (a) Fa „den legre fu zuidsei” ben broko kindi gi a strei fu noordsei? (b) Fa a kownu fu noordsei ben kon „tanapu na ini a kondre fu Tumusi Moi sani”?

²⁹ Na engel fu Yehovah ben taki na fesi moro fara: „A kownu fu noordsei sa kon èn sa opo wan fetiskotu èn trutru teki wan foto nanga den tranga fortresi abra. Èn fu a sei fu den legre fu zuidsei, den no sa kakafutu, srefi a pipel fu den sma di a ben frukisi no ben sa man; èn no wan krakti no sa de fu kakafutu gi en. Èn a sma di e opo kon teige en, sa du soleki fa en wani, èn no wan sma no sa kakafutu gi en. Èn a sa tanapu na ini a kondre fu Tumusi Moi sani, èn pori sa de na ini en anu.”​—Danièl 11:15, 16.

³⁰ Srudatimakti na ondro Ptolemeus V, noso „den legre fu zuidsei”, ben broko kindi gi a strei fu noordsei. Na Paneas (Caesarea Filipi), Antiokus III ben dwengi Skopas, a legre-edeman fu Egipti, nanga 10.000 man di a ben teki, noso „sma di a ben frukisi”, fu go na ini Sidon, „wan foto nanga den tranga fortresi”. Drape Antiokus III ’ben opo wan fetiskotu’ èn ben teki a lanpresi dati fu Fenisia abra na ini 198 b.G.T. A ben du „soleki fa en wani”, bika den srudatimakti fu na Egipti kownu fu zuidsei no ben man kakafutu gi en. Baka dati Antiokus III ben hari go teige Yerusalem, a mamafoto fu „a kondre fu Tumusi Moi sani”, Yuda. Na ini 198 b.G.T., Yerusalem nanga Yuda ben komoto na ondro a makti fu na Egipti kownu fu zuidsei èn ben kon na ondro a makti fu a Siria kownu fu noordsei. Èn Antiokus III, a kownu fu noordsei, ben bigin „tanapu na ini a kondre fu Tumusi Moi sani”. Èn „pori [ben] de na ini en anu” gi ala den Dyu nanga Egiptisma di ben e gens en. O langa a kownu disi fu noordsei ben sa man du soleki fa a ben wani?

 ROME E SKOTU A BARINEN MAN

31, 32. Fu san ede a kownu fu noordsei te fu kaba ben meki „regtfardiki kondisi” fu vrede nanga a kownu fu zuidsei?

³¹ Na engel fu Yehovah e gi wi a piki disi: „A [a kownu fu noordsei] sa poti en fesi fu go nanga a krakti fu en heri kownukondre, èn regtfardiki kondisi sa go nanga en; èn a sa handri nanga bun bakapisi. Èn ini a tori fu na umapikin fu den uma, a sa kisi primisi fu pori en. Èn na umapikin no sa horidoro, èn na umapikin no sa tan de fu en.”​—Danièl 11:17.

³² A kownu fu noordsei, Antiokus III, ben „poti en fesi” fu tiri Egipti „nanga a krakti fu en heri kownukondre”. Ma te fu kaba a ben meki „regtfardiki kondisi” fu vrede nanga Ptolemeus V, a kownu fu zuidsei. Den sani di Rome ben aksi fu Antiokus III ben meki taki a ben kenki a sani di a ben abi na prakseri. Di en nanga Kownu Filipus V fu Masedonia ben bondru kon na wán teige a yongu kownu fu Egipti fu teki den kontren fu en abra, dan den sma di ben e sorgu gi Ptolemeus V ben go na Rome fu kibri. Rome ben gebroiki na okasi fu bradi en makti nanga krakti èn ben sori o tranga a de.

33. (a) San ben de den kondisi fu meki vrede na mindri Antiokus III nanga Ptolemeus V? (b) San ben de a marki fu a trow na mindri Kleopatra I nanga Ptolemeus V, èn fu san ede a triki idea disi no ben wroko?

³³ Ondro druk fu Rome, Antiokus III ben go nanga kondisi fu meki vrede nanga a kownu fu zuidsei. Na presi fu gi den kontren abra di a ben wini, soleki fa Rome ben aksi, Antiokus III ben abi na prakseri fu du neleki a ben gi den kontren abra fu di a ben meki en umapikin Kleopatra — „na umapikin fu den uma” — trow nanga Ptolemeus V. Distrikt, di ben abi so srefi Yuda na ini, „a kondre fu Tumusi Moi sani”, ben sa gi leki a trowmisi gudu fu Kleopatra. Ma na a trow na ini 193 b.G.T., a kownu fu Siria no ben gi Ptolemeus V den distrikt disi. Disi ben de wan trow fu politiek reide, di ben seti fu meki Egipti saka ensrefi na ondro Siria. Ma a triki no ben wroko, fu di Kleopatra I no ben „tan de fu en”, bika baka ten a ben teki a sei fu en masra. Di strei ben broko na mindri Antiokus III nanga den Romesma, dan Egipti ben teki a sei fu Rome.

34, 35. (a) Na sortu „kondre di de na syorosei” a kownu fu noordsei ben drai en fesi go? (b) Fa Rome ben tyari wan kaba kon na „a syen” fu a kownu fu noordsei? (c) Fa Antiokus III dede, èn suma ben tron a tra kownu fu noordsei?

 ³⁴ Di na engel ben sori go na a lasi di a kownu fu noordsei ben o lasi, dan a ben taki moro fara: „Èn a [Antiokus III] sa drai en fesi go baka na den kondre di de na syorosei èn trutru a sa teki furu abra. Èn wan legre-edeman [Rome] sa musu tapu a syen fu en gi ensrefi [Rome], so taki a syen fu en [di fu Antiokus III] no sa de. A [Rome] sa meki dati drai kon baka na en tapu. Èn a [Antiokus III] sa drai en fesi go baka na den fortresi fu en eigi kondre, èn a sa naki futu trutru èn fadon, èn a no sa de fu feni.”​—Danièl 11:18, 19.

³⁵ Den „kondre di de na syorosei” ben de den wan fu Masedonia, Grikikondre nanga Pikin Asia. Wan strei ben broko na ini Grikikondre na ini 192 b.G.T., èn den ben meki Antiokus III kon na Grikikondre. Fu di Rome no ben feni en bun taki a kownu fu Siria ben du muiti fu teki moro kontren abra drape, meki Rome ben fruklari taki den de officieel na ini orloku nanga en. Na Termopilei a ben lasi fu den Romesma. Wan sani fu wan yari baka di a ben lasi a strei fu Magnesia na ini 190 b.G.T., a ben musu gi ala sani abra na ini Grikikondre, Pikin Asia èn na ini kontren na a westsei fu a Taurusbergi. Rome ben aksi furu belasting èn ben poti a tirimakti fu en na tapu a Siria kownu fu noordsei. Fu di den ben puru Antiokus III fu Grikikondre nanga Pikin Asia èn fu di a ben lasi pikinmoro ala den grupu fetisipi fu en, meki a ’ben drai en fesi go baka na den fortresi fu en eigi kondre’, Siria. Den Romesma ben ’drai a syen fu en kon baka na tapu den’. Antiokus III dede di a ben pruberi fu ròs wan tempel na Elimais na ini Persia, na ini 187 b.G.T. Na so a ben „fadon” na ini dede èn en manpikin Seleikos IV ben teki en presi leki kownu, a tra kownu fu noordsei.

A STREI E GO DORO

36. (a) Fa a kownu fu zuidsei ben pruberi fu go doro nanga strei, ma san ben pasa nanga en? (b) Fa Seleikos IV ben fadon, èn suma ben tron kownu baka en?

³⁶ Leki a kownu fu zuidsei, Ptolemeus V ben pruberi fu kisi  den distrikt di a ben musu kisi leki a trowmisi gudu fu Kleopatra, ma den ben kiri en nanga vergif. Ptolemeus  VI ben teki en presi leki kownu. Fa a de nanga Seleikos IV? Fu di a ben abi moni fanowdu fu pai a hebi belasting di a ben musu pai Rome, meki a ben seni na edeman fu den moni afersi fu en, Heliodorus, fu go teki den gudu di soleki fa sma ben taki ben kibri na ini a tempel fu Yerusalem. Fu di Heliodorus ben wani a kownusturu srefisrefi, meki a ben kiri Seleikos IV. Ma Kownu Eumenes fu Pergamum nanga en brada Atalus, ben meki den poti Antiokus IV, a brada fu a kownu di den ben kiri, na tapu a kownusturu.

37. (a) Fa Antiokus IV ben pruberi fu sori ensrefi moro makti leki Yehovah Gado? (b) San a pori di Antiokus IV ben pori a santafasi fu a tempel na ini Yerusalem ben abi leki bakapisi?

³⁷ A nyun kownu fu noordsei, Antiokus IV, ben suku fu sori ensrefi moro makti leki Gado, fu di a ben pruberi fu puru a sani di Yehovah ben seti fu anbegi. A ben tyalensi Yehovah fu di a ben gi a tempel fu Yerusalem abra na Zeus, noso Yupiter. Na ini december 167 b.G.T., den ben opo wan heiden altari na a ede fu a bigi altari na ini a fesidyari fu a tempel pe wan bron-ofrandi ben tyari ala dei gi Yehovah. Tin dei baka dati, den ben òfer wan ofrandi gi Zeus na tapu a heiden altari. A pori disi di den ben pori a santafasi fu a tempel, ben abi leki bakapisi taki wan Dyu opruru ben de na ondro den Makabeisma. Antiokus IV ben strei nanga den Dyu dri yari langa. Na ini 164 b.G.T., a dei di den ben memre a pori di a santafasi fu a tempel ben pori, dan Yudas Makabeus ben gi a tempel na Yehovah abra baka, èn a fesa fu gi sani abra — Hanuka — ben seti.​—Yohanes 10:22.

38. Fa a tiri fu den Makabeisma ben kon na wan kaba?

³⁸ Kande den Makabeisma ben meki wan kruderi nanga Rome na ini 161 b.G.T. èn ben seti wan kownukondre na ini 104 b.G.T. Ma a trobi na mindri den nanga a Siria kownu fu noordsei ben go doro. Te fu kaba, den ben kari Rome fu kon ini a tori. Legre-edeman Kneus Pompeus fu Rome ben teki Yerusalem abra na ini 63 b.G.T., baka di a ben lontu a foto dri mun langa. Na ini 39 b.G.T., a Moro Hei Asamblei fu Rome  ben poti Herodes — wan Edomsma — leki kownu fu Yudea. A ben tyari wan kaba kon na a tiri fu den Makabeisma èn ben teki Yerusalem abra na ini 37 b.G.T.

39. Fa yu kisi wini fu a poti di yu poti prakseri na Danièl 11:1-19?

³⁹ ¡A de trutru wan span sani fu si fa a fosi pisi fu a profeititori fu den tu kownu di de ini wan strei, kon tru finifini! ¡Iya, a de trutru wan prisiri sani fu luku go na ini a historia fu so wan 500 yari baka di a profeiti boskopu ben gi na Danièl èn fu kon sabi suma na den tiriman di e teki a posisi fu a kownu fu noordsei èn fu a kownu fu zuidsei! Ma a ròl di den tu kownu disi e teki na politiek sei e kenki te a strei na mindri den e go doro pasa a ten di Yesus Krestes ben waka na grontapu èn te go miti a ten fu wi. Te wi e agersi sani di pasa na ini a historia nanga den span bodoi di tyari kon na krin na ini a profeititori disi, dan wi sa man kon sabi suma na den tu kownu disi, di e strei nanga makandra.

SAN YU BEN KON FRUSTAN?

• Sortu tu famirilin fu tranga kownu ben opo kon fu Griki kownukondre, èn sortu strei den kownu ben bigin?

• Fa den tu kownu ben meki „wan reti kruderi”, soleki fa ben taki na fesi na ini Danièl 11:6?

• Fa a strei ben go doro na mindri

Seleikos II nanga Ptolemeus III (Danièl 11:7-9)?

Antiokus III nanga Ptolemeus IV (Danièl 11:10-12)?

Antiokus III nanga Ptolemeus V (Danièl 11:13-16)?

• San ben de a marki fu a trow fu Kleopatra I nanga Ptolemeus V, èn fu san ede a triki no ben wroko (Danièl 11:17-19)?

• Fa a poti di yu poti prakseri na Danièl 11:1-19 gi yu wini?

[Aksi fu a tori disi]

 [[Prenki/Schema na tapu bladzijde 228 di e tyari sani kon na krin]

DEN KOWNU NA INI DANIÈL 11:5-19

A Kownu fu Noordsei A Kownu fu Zuidsei

Danièl 11:5 Seleikos I Nikator Ptolemeus I

Danièl 11:6 Antiokus II Ptolemeus II

(wefi Laodise) (umapikin Berenise)

Danièl 11:7-9 Seleikos II Ptolemeus III

Danièl 11:10-12 Antiokus III Ptolemeus IV

Danièl 11:13-19 Antiokus III Ptolemeus V

(umapikin, Baka en:

Kleopatra I) Ptolemeus VI

Baka en:

Seleikos IV nanga

Antiokus IV

[Prenki]

Moni di e prenki Ptolemeus II nanga en wefi

[Prenki]

Seleikos I Nikator

[Prenki]

Antiokus III

[Prenki]

Ptolemeus VI

[Prenki]

Ptolemeus III nanga den kownu di ben kon baka en ben bow a tempel disi fu Horus na Idfu, Tapusei Egipti

[Karta/Prenki na tapu bladzijde 216, 217]

(Efu yu wani si pe den sani disi skrifi, luku a buku)

Den nen „a kownu fu noordsei” nanga „a kownu fu zuidsei” e sori go na kownu di ben de na noordsei èn na zuidsei fu a pipel fu Danièl

MASEDONIA

GRIKIKONDRE

PIKIN ASIA

ISRAÈL

LIBIA

EGIPTI

ETIOPIA

SIRIA

Babilon

ARABIA

[Prenki]

Ptolemeus II

[Prenki]

Antiokus a Bigiwan

[Prenki]

Wan plaat fu ston di abi den officieel komando na tapu di Antiokus a Bigiwan ben gi

[Prenki]

Moni di e prenki Ptolemeus V

[Prenki]

Portu fu Ptolemeus III na Karnak, Egipti

 [Prenki di e tapu heri bladzijde 210]

[Prenki na tapu bladzijde 215]

Seleikos I Nikator

[Prenki na tapu bladzijde 218]

Ptolemeus I