A makti foe soema joe moesoe erken?
Kapitel 14
A makti foe soema joe moesoe erken?
1, 2. A de so taki ala fasi foe makti e doe ogri? Froeklari disi.
„MAKTI” na wan wortoe di foeroe sma no lobi srefisrefi. Wi kan froestan disi heri boen, bika foeroe tron sma e gebroiki makti na wan fowtoe fasi — na wrokope, ini na osofamiri, èn den tirimakti e gebroiki makti na wan fowtoe fasi. Na wan troetroe sani te bijbel e taki: „A wan libisma tiri a tra libisma nanga ogri bakapisi gi en” (Preikiman 8:9). Ija, foeroe sma tiri trawan foe di den handri na wan ogri-ati fasi èn foe di den ben doe sani gi densrefi nomo.
2 Ma no ala makti e doe sma ogri. Foe eksempre, kande den taki dati a skin foe wi abi makti na wi tapoe. A e „komanderi” wi foe blo, foe njan, foe dringi, èn foe sribi. Disi na wan hebi gi wi? Nôno. Foe gi jesi na den sani disi na gi a boen foe wi. Ala di wi e saka wisrefi na den sani disi ondro di wi skin abi fanowdoe, kande sondro foe wi man doe wan sani na dati, tokoe tra fasi foe makti de di e aksi foe wi taki wi saka wisrefi na den ondro foe di wi wani. Loekoe wan toe eksempre.
A MORO HEI MAKTI
3. Foe san ede den e kari Jehovah „Soeverein Masra” nanga reti?
3 Na ini bijbel den e kari Jehovah „Soeverein Masra” moro leki 300 tron. Wan soeverein na wan sma di abi a moro hei makti. San e meki taki Jehovah abi a reti foe abi a posisi disi? Openbaring 4:11 e piki: „Joe, Jehovah, ija wi Gado, de warti foe kisi a glori nanga a grani nanga a krakti, bika joe meki ala sani èn foe joe ede meki den de èn den ben doe kon.”
4. Fa Jehovah wani gebroiki en makti?
4 Leki a Mekiman foe wi, Jehovah abi a reti foe gebroiki en makti leki fa en wani. Kande disi gersi wan sani foe frede, spesroetoe te wi e prakseri taki Gado abi „dinamis krakti pasa marki”. Den e kari en „Gado na Almaktiwan” — wortoe di na ini a Hebrewtongo abi a prakseri na ini foe krakti di e moro wi (Jesaja 40:26; Genesis 17:1). Tokoe Jehovah e sori a krakti foe en na wan switi fasi, foe di lobi na a moro prenspari eigifasi foe en. — 1 Johanes 4:16.
5. Foe san ede a no moeilek foe saka wisrefi na ondro a makti foe Jehovah?
5 Ala di Jehovah ben warskow taki a ben sa strafoe den sma di e doe ogri èn di no abi berow, tokoe Moses ben sabi en moro foeroe leki „a troe Gado, a getrow Gado, wan Gado di e hori ensrefi na a froebontoe èn na a lobi boen-atifasi ini a tori foe den wan di lobi en èn den wan di e hori den komando foe en” (Deuteronomium 7:9). Prakseri foe disi pikinso! A Moro Hei Makti foe na universum no e dwengi wi foe dini en. Na presi foe dati, a lobi foe en hari wi go moro krosibei na en (Romesma 2:4; 5:8). A de srefi wan prisiri sani foe saka wisrefi na ondro a makti foe Jehovah, bika ala ten den wet foe en e tjari wini gi wi leki bakapisi te foe kaba. — Psalm 19:7, 8.
6. Fa a strei foe tirimakti ben kon na fesi ini a djari foe Eden, èn nanga sortoe bakapisi?
6 Wi fosi papa nanga mama ben weigri foe erken a soevereiniteit foe Gado. Den ben wani bosroiti gi densrefi san ben boen èn san ben ogri (Genesis 3:4-6). Leki bakapisi, Gado ben jagi den poeroe foe a Paradijs oso foe den. Baka dati Jehovah ben gi libisma pasi foe seti makti di orga na bepaalde fasi èn di ben sa meki dati den ben man libi na ini wan libimakandra di orga, ala di a ben sa de onvolmaakti. San na wan toe foe den makti disi, èn te o fara Gado e froewakti foe wi taki wi saka wisrefi na den ondro?
„DEN HEI TIRIMAKTI”
7. Soema na „den hei tirimakti”, èn fa a posisi foe den abi foe doe nanga a tirimakti foe Gado?
7 Na apostel Paulus ben skrifi: „Meki ibri sili saka ensrefi na ondro den hei tirimakti, bika no wan tirimakti de noso a kon foe Gado.” Soema na den „hei tirimakti”? Den wortoe foe Paulus na ini den tra vers e sori taki den na libisma tirimakti foe lanti (Romesma 13:1-7; Titus 3:1). A no Jehovah ben poti den libisma tirimakti foe lanti, ma a gi pasi meki den de. Foe dati ede Paulus ben kan skrifi: „Gado ben poti den tirimakti di de ini a posisi foe den di skotoe.” San disi e sori foe so wan tirimakti na grontapoe? A wani taki dati a tirimakti disi abi wan moro lagi posisi leki a tirimakti foe Gado noso a de moro lagi leki a makti foe Gado (Johanes 19:10, 11). Foe dati ede, te wan strei e kon na mindri a wet foe libisma nanga a wet foe Gado, dan a konsensi di kresten e oefen nanga jepi foe bijbel, moesoe tiri den. Den „moesoe gi jesi na Gado leki tiriman moro leki libisma”. — Tori foe den Apostel 5:29.
8. Fa joe e kisi wini foe den hei tirimakti, èn fa joe kan sori taki joe e saka joesrefi na den ondro?
8 Ma ini foeroe kefal, den hei tirimakti foe lanti e handri leki ’dinari foe Gado gi a boen foe wi’ (Romesma 13:4). Na sortoe fasi? We, prakseri den foeroe sani di den hei tirimakti e sorgoe foe den, soleki a postkantoro, skowtoe nanga brandweer, a sorgoe di den e sorgoe taki presi e tan krin, èn taki leri e gi na skoro. „Na foe dati ede oenoe e pai belasting toe”, Paulus ben skrifi, „bika den na den poebliki foetoeboi foe Gado di doronomo e dini a marki disi” (Romesma 13:6). Ini a tori foe belasting noso iniwan tra froeplekti di wet e poti na sma tapoe, wi moesoe „tjari wisrefi na wan eerlijk fasi”. — Hebrewsma 13:18.
9, 10. (a) Fa den hei tirimakti e fiti na ini a seti foe Gado? (b) Foe san ede a ben sa de wan fowtoe sani èn wan don sani foe kakafoetoe gi den hei tirimakti?
9 Son leisi den hei tirimakti e gebroiki a makti foe den na wan fowtoe fasi. Disi e poeroe wi foe a frantiwortoe di wi abi foe saka wisrefi na den ondro? Nôno, dati no de so. Jehovah e si den takroe sani di den tirimakti disi e doe (Odo 15:3). Taki a e gi libisma pasi foe tiri, no wani taki dati a no e si a kroekafasi foe den; èn a no e froewakti foe wi taki wi e doe so toe. Foe troe, heri esi Gado sa „broko ala den kownoekondre disi na pisipisi èn tjari den kon na wan kaba”, èn poti a tiri foe en eigi regtfardiki tiri ini a presi foe den (Danièl 2:44). Ma so langa disi no pasa ete, den hei tirimakti e dini wan boen marki.
10 Paulus ben froeklari: „A sma di e kakafoetoe gi tirimakti, opo ensrefi teige a seti foe Gado” (Romesma 13:2). Den hei tirimakti na a „seti” foe Gado na a fasi disi taki den e sorgoe taki ala sani seti boen, foe di efoe den no ben doe disi, dan broeja ben o de nanga wan situwâsi pe sma no ben o hori densrefi na wet moro. Te wi e kakafoetoe gi den hei tirimakti, dan dati no ben o de akroederi bijbel èn ben o de wan don sani. Teki leki eksempre: Kon meki wi taki dati joe ben teki wan oparâsi èn den ben nai a soro so taki a no opo. Ala di den hechting no moesoe de na a skin, tokoe wan reide de foe san ede den de na a skin foe wan pisi ten. Efoe joe ben sa poeroe den hechting fosi a ten doro, dan joe ben kan kisi mankeri. Na so a de toe, taki den libisma tirimakti foe lanti no ben de wan pisi foe a prakseri foe Gado na ini a bigin. Ma so langa en Kownoekondre no e tiri heri grontapoe ete, libisma tiri e hori a libimakandra na wan èn e doe wan wroko di e fiti a wani foe Gado na ini a ten disi. Foe dati ede wi moesoe tan saka wisrefi na ondro den hei tirimakti, ala di wi e poti a wet foe Gado nanga a tirimakti foe en na a fosi presi.
MAKTI NA INI NA OSOFAMIRI
11. Fa joe ben sa froeklari a gronprakseri foe a makti foe na edeman?
11 Na osofamiri na a moro pikin groepoe foe a libisma libimakandra. Na ini na osofamiri wan masra nanga wan wefi kan feni matifasi di e gi foeroe wini, èn pikin kan kisi kibri èn kisi leri foe tron bigi sma (Odo 5:15-21; Efeisesma 6:1-4). So wan boen seti moesoe orga na wan fasi di kan meki den memre ini na osofamiri e libi ini vrede èn ini wánfasi. A fasi fa Jehovah e doe disi, de nanga jepi foe a gronprakseri foe a makti foe na edeman, di taki nanga den wortoe disi di de foe feni na 1 Korentesma 11:3: „Na edeman foe ibri man na Krestes; a man foe en sei na a edeman foe na oema; Gado foe en sei na a edeman foe Krestes.”
12, 13. Soema na a edeman foe na osofamiri, èn san den kan leri foe a fasi fa Jesus ben gebroiki a posisi foe en leki edeman?
12 A masra na a edeman foe na osofamiri. Ma a abi wan edeman na en tapoe — Jesus Krestes. Paulus ben skrifi: „Masra, tan lobi a wefi foe joe, neleki fa Krestes ben lobi a gemeente toe èn ben gi ensrefi abra gi en” (Efeisesma 5:25). Wan masra e sori taki a e saka ensrefi na Krestes ondro, te a e handri nanga en wefi na a fasi fa Jesus handri nanga a gemeente ala ten (1 Johanes 2:6). Jesus kisi foeroe makti, ma na a moro boen fasi a e sori a makti disi ini a tori foe safoefasi, lobi, nanga reidelekfasi (Mateus 20:25-28). Leki wan man, noiti Jesus ben gebroiki en posisi foe makti na wan fowtoe fasi. A ben abi „safrifasi èn sakafasi foe ati” èn a ben kari den bakaman foe en „mati” na presi foe kari den „srafoe”. „Mi sa gi oenoe kowroe-ati”, a ben pramisi den, èn dati na san a ben doe toe. — Mateus 11:28, 29; Johanes 15:15.
13 Na eksempre foe Jesus e leri trowmasra taki foe abi a makti foe edeman leki wan kresten, a no wan posisi foe basi trawan na wan ogri-ati fasi. Na presi foe dati, a de wan posisi pe a e sori lespeki nanga lobi foe òfer ensrefi dorodoro. A de krin, taki disi no ben sa gi okasi foe meshandri wan patna na skinfasi noso nanga wortoe (Efeisesma 4:29, 31, 32; 5:28, 29; Kolosesma 3:19). Efoe wan kresten man ben sa meshandri en wefi na so wan fasi, dan den tra boen wroko foe en no ben sa warti notinoti, èn a ben o tapoe pasi gi den begi foe en. — 1 Korentesma 13:1-3; 1 Petrus 3:7.
14, 15. Fa a sabi foe Gado e jepi wan wefi foe saka ensrefi na en masra ondro?
14 Te wan masra e waka na baka na eksempre foe Krestes, dan a de moro makriki gi en wefi foe gi jesi na den wortoe foe Efeisesma 5:22, 23: „Meki den wefi saka densrefi na den masra foe den ondro, bika wan masra na a edeman foe en wefi, neleki fa Krestes na a edeman foe a gemeente toe.” Neleki fa wan masra moesoe saka ensrefi na Krestes ondro, na so wan wefi moesoe saka ensrefi na en masra ondro. Bijbel e sori krin toe, taki bekwaam wefi warti foe kisi grani nanga prèise foe a koni foe den ede di den kisi foe Gado èn foe a wroko di den e wroko tranga. — Odo 31:10-31.
15 A saka di wan kresten wefi e saka ensrefi na en masra ondro, na wan sani di skotoe. Efoe wi moesoe saka wisrefi ini wan afersi pe wi ben sa pasa a wet foe Gado, dan disi wani taki dati wi moesoe gi jesi na Gado na presi na libisma. Srefi ini a kefal dati, a fasti bosroiti di wan wefi teki moesoe kon safoe nanga wan „jeje di tiri èn di abi safoefasi”. A moesoe de foe si taki a sabi foe Gado meki a tron wan moro boen wefi (1 Petrus 3:1-4). A srefi sani de so gi wan kresten man di en wefi no de na bribi. A hori di a e hori ensrefi na bijbel gronprakseri moesoe meki a tron wan moro boen masra.
16. Fa pikin kan waka baka na eksempre di Jesus ben gi di a ben de jongoe ete?
16 Efeisesma 6:1 e froeklari a ròl foe den pikin, taki: „Gi jesi na oen papa nanga mama ini wánfasi nanga Masra, bikasi disi de regtfardiki.” Kresten pikin e waka baka na eksempre foe Jesus, di ben tan saka ensrefi na ondro en papa nanga mama ala di a ben gro kon bigi. Leki wan boi di e gi jesi, a „ben tan kisi moro koni èn en skin ben gro kon bigi, èn Gado nanga libisma ben lobi en”. — Lukas 2:51, 52.
17. Sortoe krakti a fasi fa papa nanga mama e gebroiki makti kan abi na tapoe den pikin foe den?
17 A fasi fa papa nanga mama e doe den frantiwortoe foe den, kan abi krakti na tapoe a tori efoe den pikin foe den sa abi lespeki gi makti noso sa opo densrefi teige dati (Odo 22:6). So boen, a fiti taki papa nanga mama aksi densrefi: ’Mi e gebroiki a makti foe mi na wan lobi fasi noso na wan ogri-ati fasi? Mi no e loekoe sani so fini?’ Sma e froewakti foe wan papa noso wan mama di e dini Gado, taki a de nanga lobi-ati èn e hori trawan na prakseri, ma tokoe a moesoe tan hori ensrefi na den gronprakseri foe Gado. A fiti di Paulus ben skrifi: „Oen papa, no tanteri oen pikin [san wani taki troetroe: ’tanteri den foe kisi atibron’], ma tan kweki den na ini a tranga leri nanga makti rai foe Jehovah.” — Efeisesma 6:4; Kolosesma 3:21.
18. Fa papa nanga mama moesoe gi tranga leri?
18 Papa nanga mama moesoe go ondrosoekoe finifini den fasi fa den e gi leri, spesroetoe efoe den wani taki den pikin foe den e gi jesi èn na so fasi e gi den prisiri (Odo 23:24, 25). Na ini bijbel, tranga leri na spesroetoe wan fasi foe gi leri (Odo 4:1; 8:33). A abi foe doe nanga lobi èn nanga safrifasi, no nanga atibron èn nanga ogri-atifasi. Foe dati ede, kresten papa nanga mama moesoe handri nanga koni èn hori densrefi te den e gi den pikin foe den tranga leri. — Odo 1:7.
MAKTI NA INI A GEMEENTE
19. Fa Gado sorgoe taki sani seti boen na ini a kresten gemeente?
19 Foe di Jehovah na wan Gado di lobi taki sani seti boen, dan a de wan reidelek sani taki a ben sa gi en pipel wan tiri di e sori makti èn di orga boen. Na so a poti Jesus leki na Edeman foe a kresten gemeente (1 Korentesma 14:33, 40; Efeisesma 1:20-23). Na ondro Krestes tiri di wi no kan si, Gado gi primisi foe wan seti pe owroeman di poti na wroko na ini ibri gemeente, e wei na ipi nanga faja foe di den wani èn na wan lobi fasi (1 Petrus 5:2, 3). Dinari ini a diniwroko e jepi den na difrenti fasi èn e gi toemoesi boen jepi na ini a gemeente. — Filipisma 1:1.
20. Foe san ede wi moesoe saka wisrefi na kresten owroeman ondro di poti na wroko, èn foe san ede disi abi winimarki?
20 Ini a tori foe kresten owroeman, Paulus ben skrifi: „Gi jesi na den wan di e teki fesi na oen mindri èn saka oensrefi na den ondro, bika den e loekoe oen sili leki sma di sa gi frantiwortoe, so taki den kan doe disi nanga prisiri èn no nanga soktoe, bika disi ben sa doe oenoe ogri” (Hebrewsma 13:17). A ben de wan koni sani foe Gado foe gi kresten opziener a frantiwortoe foe sorgoe gi den sani na jejefasi di den wan di de ini a gemeente abi fanowdoe. Den owroeman disi no de wan groepoe foe kerki tiriman. Den na foetoeboi nanga srafoe foe Gado, di e sorgoe taki den kompe anbegiman foe den abi ala sani di den abi fanowdoe, neleki fa wi Masra Jesus Krestes, ben doe (Johanes 10:14, 15). Foe di wi sabi taki man di de bekwaam akroederi fa bijbel e sori, abi belangstelling taki wi e go na fesi èn taki wi e gro na jejefasi, meki a e gi wi deki-ati foe wroko makandra nanga den èn foe saka wisrefi na den ondro. — 1 Korentesma 16:16.
21. Fa owroeman di poti na wroko e soekoe foe jepi kompe kresten na jejefasi?
21 Wanwan leisi den skapoe kan lasi pasi noso kon ini kefar nanga sani foe grontapoe di kan doe den ogri. Na ondro a tiri foe a moro Prenspari Skapoeman, den owroeman leki ondro-skapoeman hori na ai sortoe sani den wan di de na ondro a sorgoe foe den abi fanowdoe èn fajafaja den e gi jepi na ibriwan foe den persoonlijk (1 Petrus 5:4). Den e go loekoe den memre foe a gemeente èn e taki wortoe di e gi deki-ati. Foe di den owroeman sabi taki Didibri e soekoe foe pori a vrede foe a pipel foe Gado, meki den e gebroiki a koni di komoto na tapoesei foe loesoe awansi sortoe problema (Jakobus 3:17, 18). Den e wroko tranga foe tan abi wánfasi na den mindri èn wánfasi foe bribi, wan sani di Jesus srefi ben begi gi dati. — Johanes 17:20-22; 1 Korentesma 1:10.
22. Sortoe jepi den owroeman e gi te wan sma doe ogri?
22 Fa a de te wan kresten e pina foe wan ogridoe ede noso e kon lasi-ati foe di a sondoe? A bijbel rai di a e kisi na wan switi fasi nanga den opregti begi foe den owroeman gi en, kan jepi en foe kon gosontoe baka na jejefasi (Jakobus 5:13-15). Den man disi, di poti na wroko nanga jepi foe a santa jeje, abi a makti toe foe gi tranga leri èn piri-ai gi iniwan sma di e waka na wan fowtoe fasi noso di de wan kefar gi a krinfasi foe a gemeente, na jejefasi èn na moreelsei (Tori foe den Apostel 20:28; Titus 1:9; 2:15). A kan de fanowdoe taki sma e taigi den owroeman foe wan serjoesoe sondoe, so taki wi kan hori a gemeente krin (Lefitikus 5:1). Efoe wan kresten di doe wan serjoesoe sondoe, e teki a tranga leri di komoto na bijbel, nanga a piri-ai di a e kisi èn a e sori troetroe berow, dan a sa kisi jepi. A no de foe taki, dati den e sluit den sma uit di e tan pasa a wet foe Gado èn no abi berow. — 1 Korentesma 5:9-13.
23. San den kresten opziener e gi foe a boen foe a gemeente?
23 Bijbel ben taki na fesi dati na ondro Jesus Krestes leki Kownoe, mansma di lepi na jejefasi ben sa poti na wroko foe gi trowstoe, kibri, nanga kowroe-ati na a pipel foe Gado (Jesaja 32:1, 2). Den ben sa teki fesi leki evangelie preikiman, skapoeman nanga leriman, so taki den kan meki sma gro na jejefasi (Efeisesma 4:11, 12, 16). Ala di kresten opziener wanwan leisi kan gi piri-ai, gi froemane, nanga deki-ati na kompe bribiman, tokoe a e jepi foe hori wi alamala na tapoe a pasi foe libi te wi e gebroiki a gosontoe leri di den owroeman e gi tapoe a gron foe bijbel. — Odo 3:11, 12; 6:23; Titus 2:1.
TEKI A FASI FA JEHOVAH E SI MAKTI
24. Ini a tori foe sortoe sani wi e kisi tesi ala dei?
24 A fosi man nanga oema ben kisi tesi ini a tori foe a saka di wan sma moesoe saka ensrefi na ondro makti. A no de foe froewondroe, taki ala dei wi e tanapoe na fesi wan srefi sortoe tesi. Satan Didibri poesoe a libisma famiri foe meki den opo densrefi teige makti (Efeisesma 2:2). Na wan fasi di e kori sma, a e meki en gersi leki a fasi fa wan sma e tjari ensrefi sondro foe gi frantiwortoe na tra sma, de moro boen leki te wan sma e saka ensrefi na trawan ondro.
25. San na den winimarki te wi e weigri foe handri èn foe denki soleki fa grontapoe e doe ini na opo di a e opo ensrefi teige makti èn te wi e saka wisrefi na a makti ondro di Gado e sori noso di a e gi pasi foe dati de?
25 Ma wi moesoe weigri foe handri èn foe denki soleki fa grontapoe e doe ini na opo di a e opo ensrefi teige makti. Te wi e doe disi, dan wi sa feni taki a e tjari boen foeroe blesi kon te wi e saka wisrefi na Gado ondro. Foe eksempre, wi sa tan farawe foe den broko-ede nanga den broeja di ala den sma abi di e soekoe trobi, nanga den grontapoe tirimakti. Wi sa sorgoe taki wi no e meki someni trobi soleki fa dati e pasa na ini foeroe osofamiri. Èn wi sa njan boen foe den winimarki foe waran èn lobi demakandra nanga den kresten kompe bribiman foe wi. San de moro na taki te wi e saka wisrefi na Gado ondro, dan dati sa abi wan boen matifasi nanga Jehovah, a Moro Hei Makti, leki bakapisi.
ONDROSOEKOE A SABI FOE JOE
Fa Jehovah e gebroiki en makti?
Soema na „den hei tirimakti”, èn fa wi e tan saka wisrefi na den ondro?
Sortoe frantiwortoe a gronprakseri foe a makti foe na edeman, e poti na tapoe ibri memre foe na osofamiri?
Fa wi kan sori na ini a kresten gemeente taki wi e saka wisrefi?
[Aksi foe a tori disi]
[Faki na tapoe bladzijde 134]
DEN E SAKA DENSREFI NA MAKTI ONDRO, DEN NO E SOEKOE FOE TROWE DEN
Nanga jepi foe a poebliki preikiwroko foe den, Jehovah Kotoigi e sori go na Gado Kownoekondre leki a wan-enkri howpoe foe libisma foe kisi troetroe vrede nanga seikerfasi. Ma den fajafaja preikiman disi foe Gado Kownoekondre no e opo densrefi kwetikweti teige den tirimakti pe den e libi na ondro. Kontrari foe dati, den Kotoigi na den moro lespeki borgoe di e hori densrefi na wet. „Efoe ala den relisi groepoe ben de leki Jehovah Kotoigi,” na so wan lantiman ini wan Afrikan kondre ben taki, „dan wi no ben sa abi kiriman, foefoeroeman, jongoesma di e doe ogri, strafoeman nanga atoombom. Den doro no ben sa sroto ala ten.”
Foe di lantiman na foeroe kondre erken disi, meki den e gi pasi foe den Kotoigi kan tan doe a preikiwroko foe den sondro foe wan sani tapoe den. Di den tirimakti ini tra kondre ben kon froestan taki Jehovah Kotoigi abi wan boen krakti na tapoe sma, den no ben tapoe noso skotoe a wroko moro. A de soleki fa na apostel Paulus ben skrifi ini a tori foe a gi di wi moesoe gi jesi na den hei tirimakti: „Tan doe san boen, èn joe sa kisi prèise foe dati.” — Romesma 13:1, 3.
