Kapitel 15

Bow wan osofamiri di e gi Gado grani

1-3. Foe san ede son sma no man loesoe problema di e kon na ini a trowlibi èn te sma e tron papa nanga mama, ma foe san ede bijbel kan gi jepi?

KON MEKI wi taki dati joe abi na prakseri foe bow joe eigi oso. Joe e bai a gron fosi. Nanga fajafaja froewakti joe si joe njoen oso ini joe prakseri kaba. Ma fa a de dan efoe joe no abi den wrokosani nanga a koni foe bow oso? Den moeiti foe joe troetroe ben sa meki joe lasi-ati!

² Foeroe paar e trow nanga a prakseri foe wan kolokoe osofamiri, ma den no abi den wrokosani noso a koni di de fanowdoe foe bow wan kolokoe osofamiri. Sjatoe baka a trowdei, negatief eigifasi e opo ede kon. Feti nanga trobi e kon tron wan aladei sani. Te den pikin gebore, dan a njoen papa nanga mama e kon si taki den no abi a koni toe foe de wan papa noso mama.

³ Ma kolokoe taki bijbel kan gi jepi. Den gronprakseri foe bijbel de leki wrokosani di e meki taki joe kan bow wan kolokoe osofamiri (Odo 24:3). Meki wi go loekoe fa joe kan doe disi.

WROKOSANI FOE BOW WAN KOLOKOE TROWLIBI

4. Foe san ede wi kan froewakti problema na ini a trowlibi, èn sortoe markitiki gi na ini bijbel?

⁴ Awansi fa a gersi taki wan trowpaar e fiti makandra boen, tokoe den de difrenti ini a fasi fa den meki na emotioneelsei, ini den sani di den ben ondrofeni di den ben de wan pikin-nengre, èn ini a fasi fa na osofamiri pe den gro, ben  de. Foe dati ede, den kan froewakti wan toe problema baka a trow. Fa den o doe te problema kon? We, te den bowman e bow wan oso, dan den e loekoe den bow plan. Den disi na tirilin di den moesoe waka na baka. Bijbel e gi den markitiki foe Gado foe bow wan kolokoe osofamiri. Meki wi go ondrosoekoe wan toe foe den now.

5. Fa bijbel e poti krakti na tapoe o prenspari a de foe de loyaal na ini a trowlibi?

⁵ Loyaalfasi. Jesus ben taki: „San Gado tjari kon na wán, no meki no wan sma prati dati foe makandra” (Mateus 19:6). * Na apostel Paulus ben skrifi: „A trowlibi moesoe de krin na ala sma, èn a trowbedi sondro flaka, bika Gado sa kroetoe hoeroeman nanga soetaman” (Hebrewsma 13:4). Foe dati ede, sma di trow moesoe firi taki den abi wan froeplekti na Jehovah foe tan getrow na a trowpatna foe den. — Genesis 39:7-9.

6. Fa loyaalfasi sa jepi foe meki wan trowlibi tan?

⁶ Loyaalfasi e gi a trowlibi wartifasi nanga seikerfasi. Trowpatna di de loyaal sabi taki awansi san e pasa, den sa horibaka gi makandra (Preikiman 4:9-12). Disi de heri tra fasi foe den sma di gowe libi a trowlibi foe den na a fosi pikin problema di kon! Den sortoe sma disi esi-esi e kon na a bosroiti taki den ’no ben teki a joisti trowpatna’, taki den ’no lobi makandra moro’, èn taki wan njoen patna na a loesoe foe a problema. Ma a bosroiti disi no e gi no wan foe den trowpatna na okasi foe gro. Na presi foe dati, den sortoe sma disi di no de loyaal, kan tjari a srefi problema go na den njoen patna. Te wan sma abi wan moi oso, ma a e kon si taki a dak e leki, dan wi kan de seiker taki a e proeberi foe meki a dak baka. A no e froisi gowe nomo. So srefi toe, foe teki wan tra patna a no a fasi foe loesoe den problema di e meki taki trobi de na ini a trowlibi. Te problema e kon, no proeberi foe broko a trow, ma wroko boen tranga foe meki  a trowlibi tan. So wan loyaalfasi e meki a trowlibi de leki wan sani di warti foe kibri, foe hori en boen, èn foe si en leki wan warti sani.

7. Foe san ede foeroe tron komunikâsi de wan moeilek sani gi sma di trow, ma fa a e jepi te wan sma e weri „a njoen persoonlijkheid”?

⁷ Komunikâsi. „Te sma no e taki na wan froetrow fasi nanga makandra, dan a no sa waka boen nanga den plan”, na so wan odo foe bijbel e taki (Odo 15:22). Ma komunikâsi na wan moeilek sani gi son trowpaar. Foe san ede disi de so? Bika sma abi difrenti fasi foe abi komunikâsi. Disi na wan troe tori di nofo tron e meki sma no froestan makandra boen èn e tjari broeja kon. A fasi fa den gro kon bigi kan de wan foe den sani di e meki taki disi e pasa. Foe eksempre, son sma kweki kande na ini wan oso pe a papa nanga mama ben meki trobi ala ten. Now di den kon tron bigi sma di trow, den no sabi kande fa foe taki nanga a patna foe den na wan switi fasi èn na wan lobi fasi. Tokoe joe oso no abi foe tron ’wan oso di foeroe nanga trobi’ (Odo 17:1). Bijbel  e poti krakti na tapoe foe weri „a njoen persoonlijkheid”, èn no e feni en wan boen sani taki sma abi takroe bita-atifasi, taki den e bari, èn e taki doti-taki. — Efeisesma 4:22-24, 31.

8. San kan de wan jepi te joe no e agri nanga joe patna?

⁸ San joe kan doe te oenoe no e agri nanga makandra? Efoe joe nanga joe patna lasi oensrefi èn kisi atibron, dan a de wan boen sani foe waka baka a rai foe Odo 17:14: „Fosi trobi kon, gowe foe drape.” Ija, joe ben sa kan poti a takimakandra na wan tra ten, te joe nanga joe patna kon kisi oensrefi baka (Preikiman 3:1, 7). Awansi san e pasa, proeberi foe „de esi foe jere, no de esi foe taki, no de esi foe kisi atibron” (Jakobus 1:19). A marki foe joe moesoe de foe meki a situwâsi kon boen baka, no foe wini a haritaki (Genesis 13:8, 9). Soekoe den wortoe èn wan fasi foe taki di sa meki joe nanga joe patna kisi oensrefi baka (Odo 12:18; 15:1, 4; 29:11). A moro prenspari sani na taki joe no moesoe tan nanga atibron, ma soekoe jepi foe di oenoe e taki nanga Gado makandra ini begi na wan sakafasi. — Efeisesma 4:26, 27; 6:18.

9. Foe san ede wi kan taki dati komunikâsi e bigin na ini na ati?

⁹ Wan odo foe bijbel e taki: „Na ati foe a koniwan e meki dati en mofo e sori taki a abi inzicht, èn na en mofoboeba a e poti a krakti foe overtoigi sma” (Odo 16:23). Foe troe, a sroto foe abi boen komunikâsi e kon foe na ati, no foe di wan sma e taki nomo. Na sortoe fasi joe e handri nanga joe patna? Bijbel e gi kresten deki-ati foe sori „firi gi sma” (1 Petrus 3:8). Joe kan doe disi te joe trowpatna e ondrofeni broko-ede di e banawtoe en? Efoe dati de so, dan a sa jepi joe foe sabi fa foe piki. — Jesaja 50:4.

10, 11. Fa wan masra kan gebroiki a rai foe 1 Petrus 3:7?

¹⁰ Gi grani nanga lespeki. Kresten masra e kisi foe jere taki den moesoe tan nanga a wefi foe den, „akroederi sabi, foe di [den] e gi den grani leki na wan moro swaki prapi, na oemasma fasi” (1 Petrus 3:7). Efoe wan sma e gi en wefi grani, dan dati wani taki toe dati a e erken a waarde foe en. Wan  masra di e tan nanga en wefi „akroederi sabi”, abi dipi lespeki gi den firi foe en, a krakti foe en, a koni foe en, nanga a wartifasi foe en. A moesoe wani kon sabi toe fa Jehovah e si oemasma èn fa a wani taki sma moesoe handri nanga den.

¹¹ Kon meki wi taki dati na ini na oso foe joe, joe abi wan vaas di joe kan gebroiki heri boen èn di kan broko makriki. Joe no ben sa handri nanga a vaas na so wan fasi taki a no e broko? We, Petrus ben gebroiki den wortoe „moro swaki prapi” nanga wan srefi sortoe prakseri, èn disi moesoe boeweigi wan kresten masra foe hori en lobi wefi na prakseri na wan switi fasi.

12. Fa wan wefi kan sori taki a abi dipi lespeki gi en masra?

¹² Ma sortoe rai bijbel e gi wan wefi? Paulus ben skrifi: „A wefi moesoe abi dipi lespeki gi en masra” (Efeisesma 5:33). Neleki fa wan wefi moesoe firi taki en patna e gi en grani èn taki a patna lobi en troetroe, na so wan masra moesoe firi toe taki en wefi e lespeki en. Wan wefi di abi lespeki gi en masra no ben sa de so don foe froeteri na ala sma foe den fowtoe di en masra e meki, awinsi a masra de wan kresten efoe no. A no ben sa meki a masra lasi en wartifasi foe di a e kroetoekroetoe na en tapoe èn e lagi en te den wawan de noso na poebliki. — 1 Timoteus 3:11; 5:13.

13. Fa wi kan taki foe a fasi fa wi e si sani, sondro taki wi e meki trobi?

¹³ Disi no wani taki dati wan wefi no kan tjari en prakseri kon na fesi. Efoe wan sani e trobi en, dan a kan tjari a sani dati kon na fesi na wan lespeki fasi (Genesis 21:9-12). Te a e taki nanga en masra foe wan prakseri, dan joe ben sa kan teki dati gersi nanga na iti di a e iti wan bal go na en. A kan iti a bal safri, so taki a masra kan fanga a bal makriki, noso a kan fringi a bal nanga so wan krakti taki a e gi a masra mankeri. O moro boen a de te ala toe patna e wai pasi foe gi makandra a fowtoe, ma na presi foe dati, e taki na wan switi fasi èn na wan safoe fasi! — Mateus 7:12; Kolosesma 4:6; 1 Petrus 3:3, 4.

14. San joe moesoe doe efoe joe patna no abi foeroe belangstelling foe gebroiki bijbel gronprakseri na ini a trowlibi?

 ¹⁴ Soleki fa wi si kaba, dan bijbel gronprakseri kan jepi joe foe bow wan kolokoe trowlibi. Ma fa a de efoe joe patna no abi foeroe belangstelling gi san bijbel abi foe taki? Tokoe foeroe kan doe efoe joe gebroiki a sabi foe Gado ini a ròl di joe abi. Petrus ben skrifi: „Oen wefi, saka oensrefi na a masra foe oenoe ondro, so taki efoe son wan foe den no e gi jesi na a wortoe, den [wefi] kan wini den nanga a fasi fa den e tjari densrefi, foe di den si fa oenoe ben tjari oensrefi na wan boen fasi makandra nanga dipi lespeki” (1 Petrus 3:1, 2). A no de foe taki, dati a srefi sani ben sa fiti gi wan masra di en wefi abi wan mi-no-ke fasi gi bijbel. Awansi san joe patna wani doe, meki bijbel gronprakseri meki joe tron wan moro boen trowpatna. A sabi foe Gado kan meki joe tron wan moro boen papa noso mama toe.

KWEKI PIKIN AKROEDERI A SABI FOE GADO

15. Fa fowtoe fasi foe kweki pikin son tron e gi abra foe a wan geslakti na a trawan, ma fa wi ben sa kan kenki a fasi disi?

¹⁵ Soso foe di wan sma abi wan sa noso wan amra no e meki a sma dati de wan boen temreman. Na so a de toe, taki soso foe di wan sma abi pikin, no e meki a sma dati de wan boen papa noso mama. Nofo tron papa nanga mama, efoe den sabi dati efoe no, e kweki den pikin foe den na a fasi fa densrefi ben kweki. Dati meki fowtoe fasi foe kweki pikin son tron e gi abra foe a wan geslakti na a trawan. Wan Hebrew odo foe owroeten e taki: „Na den papa di e njan droifi di no lepi ete, ma na den tifi foe den manpikin di e kon swa.” Ma den Boekoe foe bijbel e sori taki wan sma no abi foe waka na baka a fasi fa den papa nanga mama kweki den. A kan teki wan tra pasi, wan di den markitiki foe Jehovah abi krakti na tapoe. — Esekièl 18:2, 14, 17.

16. Foe san ede a de prenspari foe sorgoe gi joe osofamiri, èn san disi wani taki toe?

¹⁶ Jehovah e froewakti foe kresten papa nanga mama  taki den e gi den pikin foe den a joisti tiri nanga sorgoe. Paulus ben skrifi: „Ija, efoe wan sma no e sorgoe gi den sma foe en, èn spesroetoe gi den wan di de memre foe en osofamiri, dan a drai en baka gi a bribi èn a moro takroe leki wan sma di no abi bribi” (1 Timoteus 5:8). Krakti wortoe foe troe! Te joe e doe a ròl foe joe leki wan sma di e sorgoe gi sani, san wani taki toe dati joe e sorgoe gi den sani di den pikin foe joe abi fanowdoe na skinfasi, na jejefasi èn na emotioneelsei, dan dati na wan grani èn wan frantiwortoe foe wan sma di e dini Gado. Bijbel e gi markitiki di kan jepi papa nanga mama foe bow wan kolokoe osofamiri libi gi den pikin foe den. Prakseri pikinso foe wan toe foe den.

17. San de fanowdoe efoe den pikin foe joe moesoe abi a wet foe Gado na ini na ati foe den?

¹⁷ De wan boen eksempre. Papa nanga mama foe Israèl ben kisi a komando: „Joe moesoe poti den na ini a manpikin foe joe èn taki foe den te joe e sidon ini joe oso èn te joe e waka na pasi èn te joe e go didon èn te joe e opo.” Papa nanga mama ben moesoe leri den pikin foe den den markitiki foe Gado. Ma a froemane disi ben kon baka a froeklari: „Den wortoe disi di mi e komanderi joe tide, moesoe sori foe de na tapoe joe ati” (Deuteronomium 6:6, 7). Ija, papa nanga mama no kan gi san den no abi. Den wet foe Gado moesoe skrifi fosi na tapoe oen eigi ati efoe oenoe wani taki den moesoe skrifi na tapoe na ati foe oen pikin. — Odo 20:7; teki gersi Lukas 6:40.

18. Fa Jehovah de wan toemoesi boen eksempre gi papa nanga mama ini a sori di a e sori lobi?

¹⁸ Gi den a djaranti taki oenoe lobi den. Di Jesus dopoe, Jehovah ben meki bekènti: „Joe na mi Manpikin, a lobiwan; mi feni joe boen” (Lukas 3:22). Na so fasi Jehovah ben erken en Manpikin èn ben taki na wan fri fasi taki a feni en boen èn ben gi en a djaranti taki A lobi en. Baka ten Jesus ben taigi en Tata: „Joe ben lobi mi bifo grontapoe seti” (Johanes 17:24). Foe dati ede, leki papa nanga mama di e dini Gado, oenoe moesoe sori lobi gi den pikin foe oenoe nanga  den wortoe di oenoe e taki èn nanga den sani di oenoe e doe — èn doe disi foeroe tron. Ala ten hori na prakseri taki „lobi e bow wan sma”. — 1 Korentesma 8:1.

19, 20. San de ini a tori foe gi tranga leri na wan joisti fasi na den pikin, èn fa papa nanga mama kan abi wini foe na eksempre foe Jehovah?

¹⁹ Tranga leri. Bijbel e poti krakti na tapoe o prenspari a de foe gi tranga leri na wan lobi fasi (Odo 1:8). Papa nanga mama di e poeroe a frantiwortoe na den tapoe foe gi den pikin foe den tiri nownow, pikinmoro kan de seiker taki den sa ondrofeni sari bakapisi baka ten. Ma papa nanga mama e kisi a warskow toe foe no de onreidelek. „Oen papa,” Paulus ben skrifi, „no tanteri den pikin foe oenoe, so taki den no lasi-ati” (Kolosesma 3:21). Papa nanga mama no moesoe piri-ai gi den pikin foe den pasa marki, noso taki ala leisi den e weri den ede nanga den fowtoe di den e meki èn e kroetoekroetoe na tapoe den moeiti di den e doe.

²⁰ Jehovah Gado, wi hemel Tata, de na eksempre foe wan sma di e gi tranga leri. A piri-ai di a e gi noiti no de onreidelek. „Mi sa moesoe strafoe joe na a joisti fasi”, Gado ben taigi en pipel (Jeremia 46:28). Papa nanga mama moesoe waka na baka Jehovah ini a fasi disi. Tranga leri di e go toemoesi fara noso di e pasa a marki di den abi na prakseri foe gi piri-ai èn foe gi leri, seiker e tanteri den pikin.

21. Fa papa nanga mama kan kon sabi efoe a tranga leri di den e gi, boen?

²¹ Fa papa nanga mama kan kon sabi efoe a tranga leri di den e gi, boen? Den ben sa kan aksi densrefi: ’Sortoe bakapisi a tranga leri foe mi abi?’ A tranga leri moesoe abi leki marki foe leri den wan sani. A pikin foe oenoe moesoe froestan foe san ede a e kisi tranga leri. Papa nanga mama moesoe broko den ede toe nanga den bakapisi foe a piri-ai di den e piri-ai gi den. A troe, taki pikinmoro ala pikin sa atibron na ini a bigin te den e kisi tranga leri (Hebrewsma 12:11). Ma tranga leri noiti no moesoe meki wan pikin frede noso gi en a firi taki a papa nanga mama libi en noso abi a prakseri taki a takroe dorodoro. Bifo Jehovah ben gi en pipel piri-ai, a ben taki: „No frede, . . . bika mi de nanga joe” (Jeremia 46:28). Ija, piri-ai moesoe gi na so wan fasi taki joe  pikin e firi taki joe de nanga en leki wan lobi-ati papa nanga mama di e horibaka gi en.

KISI „KONI TIRI”

22, 23. Fa joe kan kisi a tiri di de fanowdoe foe bow wan kolokoe osofamiri?

²² Wi kan de nanga tangi taki Jehovah gi wi den wrokosani di wi abi fanowdoe foe bow wan kolokoe osofamiri. Ma a no nofo taki wi abi den wrokosani nomo. Wi moesoe oefen foe gebroiki den na wan joisti fasi. Foe eksempre, wan sma di e bow oso kande no e kweki boen gwenti na ini a fasi fa a e wroko nanga den wrokosani foe en. Kande a e gebroiki wan toe wrokosani gi wan heri tra sani. Te sani de so, dan wi kan de seiker taki a fasi fa a e wroko, no sa abi leki bakapisi taki a e meki wan boen sani. Na a srefi fasi joe sabi now kande, taki gwenti di no boen, safrisafri kon na ini joe oso sondro foe joe sabi. Wan toe gwenti sidon dipi na ini joe kande èn den tranga foe kenki. Ma doe san bijbel gi leki rai: „Wan koni sma sa arki èn teki moro leri na ini en, èn wan sma di abi froestan na a sma di kisi koni tiri.” — Odo 1:5.

²³ Joe kan kisi koni tiri te joe e tan teki a sabi foe Gado na ini joe. Tan na ai gi bijbel gronprakseri di abi foe doe nanga na osofamiri libi, èn tjari kenki kon pe dati de fanowdoe. Loekoe na lepi kresten, di de wan boen eksempre leki trowpatna èn leki papa nanga mama. Taki nanga den. San de moro, tjari den broko-ede foe joe na Jehovah ini begi (Psalm 55:22; Filipisma 4:6, 7). A kan jepi joe foe njan boen foe wan kolokoe osofamiri libi di e gi grani na en.

[Foetoewortoe]

ONDROSOEKOE A SABI FOE JOE

Fa loyaalfasi, komunikâsi, gi grani, nanga lespeki e meki wan kolokoe trowlibi kon?

Na sortoe fasi papa nanga mama kan gi den pikin foe den a djaranti taki den lobi den?

Sortoe sani de ini a tori foe a gi di papa nanga mama e gi tranga leri na a joisti fasi?

[Aksi foe a tori disi]

 [Wan prenki di e tapoe heri bladzijde 147]