Fa joe kan kon krosibei na Gado
Kapitel 16
Fa joe kan kon krosibei na Gado
1. Sortoe srefi sortoe sani de foe feni na ini foeroe relisi?
WAN toerist di ben go na wan Owstoesei kondre ben froewondroe di a ben si den relisi gwenti na wan tempel foe den Boedistsma. Ala di den popki no ben de di foe Maria noso Krestes, tokoe foeroe foe den gwenti ben gersi den wan foe a kerki foe en na a kondre pe a e libi. Foe eksempre, a ben si taki sma ben gebroiki rowsoekransi èn ben singi begi na wán fasi nomo. Tra sma toe ben teki den sani disi gersi di foe den. Efoe a de na Owstoesei noso na Westsei, den fasi fa anbegiman e proeberi foe kon krosibei na Gado noso na den sani di den e anbegi, de pikinmoro a srefi.
2. San den taki foe begi, èn foe san ede foeroe sma e begi?
2 Foeroe sma spesroetoe e proeberi foe kon krosibei na Gado foe di den e go na en na ini begi. Den e taki foe begi leki „wan fasi foe komunikâsi di libisma abi nanga a santawan — Gado, den gado, a kondre di no de foe grontapoe, noso krakti di no e kon foe libisma” (The New Encyclopædia Britannica). Ma te sma e go na Gado na ini begi, dan son wan e denki soso na sortoe fasi den kan kisi wini foe disi. Foe eksempre, wan leisi wan man ben aksi wan Kotoigi foe Jehovah: „Efoe joe begi gi mi, den problema di mi abi ini mi osofamiri, na wrokope, nanga mi gosontoe sa loesoe?” Soleki fa a sori, dan a man ben prakseri so, ma foeroe sma e begi èn e kon si taki den problema foe den e tan. Foe dati ede, wi ben sa kan aksi: ’Ma foe san ede wi moesoe kon krosibei na Gado?’
FOE SAN EDE WI MOESOE KON KROSIBEI NA GADO
3. Na soema wi moesoe seni den begi foe wi, èn foe san ede?
3 Begi a no wan gwenti di no wani taki wan sani, èn a no de so srefi wan fasi nomo foe kisi wan sani. Wan moro prenspari reide foe san ede wi moesoe go na Gado na ini begi, na foe abi wan krosibei matifasi nanga en. Foe dati ede wi moesoe seni den begi foe wi go na Jehovah Gado. „Jehovah de krosibei foe ala den wan di e kari en”, a psalm singiman David ben taki (Psalm 145:18). Jehovah e gi wi a kari foe kon ini wan vrede matifasi nanga en (Jesaja 1:18). Den wan di e teki a kari disi e agri nanga a psalm singiman di ben taki: „Foe mi sei, a kon di mi e kon krosibei na Gado, boen gi mi.” Foe san ede? Bika den wan di e kon krosibei na Jehovah Gado sa njan boen foe troetroe kolokoe nanga korostoe. — Psalm 73:28.
4, 5. (a) Foe san ede a de prenspari foe go na Gado na ini begi? (b) Sortoe matifasi wi kan bow nanga Gado nanga jepi foe begi?
4 Foe san ede wi moesoe aksi Gado na ini begi foe jepi wi, efoe a ’sabi san wi abi fanowdoe bifo wi e aksi en’? (Mateus 6:8; Psalm 139:4) Begi e sori taki wi abi bribi na ini Gado èn taki wi e si en leki a Fonten foe „ibri boen presenti nanga ibri volmaakti presenti” (Jakobus 1:17; Hebrewsma 11:6). Jehovah e prisiri nanga den begi foe wi (Odo 15:8). A breiti foe jere den wortoe di wi e taki foe sori a warderi foe wi èn foe prèise en, neleki fa wan papa e prisiri te a e jere a jongoe pikin foe en e taki opregti wortoe foe warderi (Psalm 119:108). Efoe wan boen matifasi de na mindri wan papa nanga en pikin, dan wan boen komunikâsi de toe. Wan pikin di e kisi lobi foe en papa, wani foe taki nanga en papa. Na so a de toe te wi e taki foe a matifasi di wi abi nanga Gado. Efoe wi e warderi troetroe san wi e leri foe Jehovah nanga a lobi di a sori gi wi, dan wi sa abi wan tranga angri foe taigi en dati na ini begi. — 1 Johanes 4:16-18.
5 Te wi e go na a Moro Hei Gado na ini begi, dan wi moesoe de nanga lespeki, ala di a no de fanowdoe foe broko wi ede toemoesi nanga den wortoe di wi e gebroiki efoe den joisti efoe no (Hebrewsma 4:16). Ala ten wi kan taki nanga Jehovah. Èn a de troetroe wan bigi grani taki wi kan ’poeroe wi ati kon na doro’ gi Gado na ini begi! (Psalm 62:8) Te wi abi warderi gi Jehovah, dan dati e meki taki wi e kisi wan boen matifasi nanga en, neleki a matifasi di a getrow man Abraham ben abi leki a mati foe Gado (Jakobus 2:23). Ma te wi e begi na a Soeverein Masra foe na universum, dan wi moesoe waka na baka den sani di de fanowdoe foe man go na en na ini begi.
DEN SANI DI DE FANOWDOE FOE KON KROSIBEI NA GADO
6, 7. San na wan sani di de fanowdoe èn di Gado e aksi foe wi te wi e begi, ala di a no e aksi moni foe jere den begi foe wi?
6 Moni de fanowdoe foe go na Gado na ini begi? Foeroe sma e pai den kerki tiriman foe begi gi den. Son sma e bribi srefi taki a jere di Gado sa jere den begi foe den, abi foe doe nanga omeni moni den e gi. Ma Gado Wortoe no e taki dati moni moesoe pai foe kan go na Jehovah na ini begi. Den sani di a seti na jejefasi nanga den blesi di wan sma e kisi foe di a abi wan matifasi nanga en na ini begi, de foe kisi sondro foe pai wan sani. — Jesaja 55:1, 2.
7 San de fanowdoe dan? Wan soifri ati na wan prenspari sani di de fanowdoe (2 Kroniki 6:29, 30; Odo 15:11). Na ini wi ati wi moesoe poti bribi na ini Jehovah Gado leki a „Sma di e jere begi” nanga „a sma di e pai den wan di e soekoe en na wan opregti fasi” (Psalm 65:2; Hebrewsma 11:6). Wi moesoe abi wan ati foe sakafasi toe (2 Kownoe 22:19; Psalm 51:17). Jesus Krestes ben sori na ini wan foe den agersitori foe en, taki di wan belastingman di ben abi sakafasi, ben go na Gado na ini begi nanga wan ati foe sakafasi, a ben sori taki a de moro regtfardiki leki wan heimemre Fariseiman (Lukas 18:10-14). Te wi e go na Gado na ini begi, meki wi hori na prakseri taki „ibriwan sma di abi heimemre foe ati, na wan tegoe sani gi Jehovah”. — Odo 16:5.
8. Foe sortoe sani wi moesoe krin wisrefi efoe wi wani taki Gado e gi piki tapoe den begi foe wi?
8 Efoe wi wani taki Gado piki den begi foe wi, dan wi moesoe krin wisrefi foe a sondoe fasi fa wi e tjari wisrefi. Di a disipel Jakobus ben gi trawan deki-ati foe kon krosibei na Gado, a ben taki moro fara: „Krin oen anoe, oen sondari, èn meki oen ati kon soifri, oenoe di no man teki bosroiti” (Jakobus 4:8). Srefi sma di doe ogridoe kan kon na ini wan vrede matifasi nanga Jehovah efoe den abi berow èn efoe den gowe libi a fasi fa den ben libi fosi (Odo 28:13). Wi no man froewakti taki Jehovah sa jere a begi foe wi efoe wi e meki nomo leki wi krin wisrefi na jejefasi. „Den ai foe Jehovah de na tapoe den regtfardikiwan, èn en jesi de na den tranga begi foe den; ma a fesi foe Jehovah de teige den wan di e doe ogri sani”, na so a Wortoe foe Gado e taki. — 1 Petrus 3:12.
9. Nanga jepi foe soema wi kan go na Jehovah na ini begi, èn foe san ede?
9 Bijbel e taki: „No wan regtfardiki sma de na grontapoe di e tan doe boen èn di no e sondoe” (Preikiman 7:20). Foe dati ede joe ben sa kan aksi: ’Dan fa wi kan go na Jehovah Gado na ini begi?’ Bijbel e piki: „Efoe wan sma e doe wan sondoe, dan wi abi wan jepiman na a Tata, Jesus Krestes, wan regtfardikiwan” (1 Johanes 2:1). Ala di wi na sondari, tokoe wi kan go na Gado na wan fri fasi foe taki, nanga jepi foe Jesus Krestes di dede leki wan loesoe-paiman gi wi (Mateus 20:28). En na a wan-enkri fasi nanga jepi foe soema wi kan go na Jehovah Gado na ini begi (Johanes 14:6). Wi no moesoe prakseri taki a waarde foe a froeloesoe-ofrandi foe Jesus sa poeroe ala sondoe foe wi foe ensrefi, efoe wi e doe sondoe foe espresi (Hebrewsma 10:26). Ma efoe wi e doe tranga moeiti foe no doe san takroe èn tokoe wi e misi son tron, dan wi kan abi berow èn aksi Gado pardon. Te wi e go na en na ini begi nanga wan ati foe sakafasi, a sa jere wi. — Lukas 11:4.
OKASI FOE TAKI NANGA GADO
10. Fa wi kan waka baka na eksempre foe Jesus ini a tori foe begi, èn san na wan toe okasi pe wi kan begi wi wawan?
10 Jesus Krestes ben warderi a matifasi foe en nanga Jehovah srefisrefi. Foe dati ede meki Jesus ben poti ten na wan sei foe taki nanga Gado na ini begi te a ben de en wawan (Markus 1:35; Lukas 22:40-46). A sa boen efoe wi e waka baka na eksempre foe Jesus èn begi na Gado doronomo (Romesma 12:12). A de wan boen sani foe bigin a dei nanga wan begi, èn bifo wi e go sribi a de joisti foe taki Jehovah tangi foe den sani di wi ben doe foe a dei. Na deiten wi moesoe teki a fasti bosroiti foe go na Gado na ini begi „na ibri okasi” (Efeisesma 6:18). Wi kan begi srefi na ini wi ati sondro tra sma jere wi, ala di wi sabi taki Jehovah kan jere wi. Te wi e taki nanga Gado te wi de wi wawan, dan disi e jepi wi foe meki a matifasi di wi abi nanga en kon moro tranga, èn a begi di wi e begi na Jehovah ala dei, e jepi wi foe kon moro krosibei na en.
11. (a) Foe san ede osofamiri moesoe begi makandra? (b) San a wani taki te joe e taki „Amen” na a kaba foe wan begi?
11 Jehovah e arki na begi toe di wi e taki foe groepoe sma ede (1 Kownoe 8:22-53). Wi kan kon krosibei na Gado leki wan osofamiri, nanga na edeman foe na osofamiri di e teki fesi na ini a begi. Disi e meki na osofamiri banti kon moro tranga èn Jehovah e tron wan troetroe sma gi jongoewan te den e jere den papa nanga mama foe den e begi na Gado nanga sakafasi. San de foe taki te wan sma e teki fesi gi wan groepoe sma na ini a begi, kande na wan konmakandra foe Jehovah Kotoigi? Efoe wi de na ini a poebliki, dan meki wi arki boen, so taki na a kaba foe a begi, wi kan taki „Amen” nanga wi heri ati, di wani taki „Na so a de”. — 1 Korentesma 14:16.
BEGI DI JEHOVAH E JERE
12. (a) Foe san ede Gado no e gi piki tapoe son begi? (b) Foe san ede wi no moesoe poti prakseri soso na tapoe den sani di wisrefi abi fanowdoe te wi e begi?
12 Kande son sma e feni taki Gado no e gi piki na tapoe den begi foe den ala di den e begi na en nanga jepi foe Krestes. Ma na apostel Johanes ben taki: „Awinsi san wi e aksi akroederi [Gado] wani, a e jere wi” (1 Johanes 5:14). So boen, den sani di wi e aksi, moesoe de akroederi a wani foe Gado. Foe di a abi belangstelling gi a gosontoe foe wi na jejefasi, dan ala sani di abi foe doe nanga wi jejefasi, na wan boen sani foe begi foe dati. Wi moesoe kakafoetoe gi a tesi foe poti prakseri soso na tapoe sani di wi abi fanowdoe na skinfasi. Foe eksempre, ala di a fiti foe begi foe kisi inzicht nanga deki-ati fa foe doe te siki kon, wi no moesoe broko wi ede pasa marki nanga wi gosontoe, so taki wi e frigiti den afersi na jejefasi (Psalm 41:1-3). Di wan kresten oema ben kon froestan taki a ben broko en ede toemoesi nanga en gosontoe, a ben aksi Jehovah foe jepi en foe abi a joisti fasi foe si a siki foe en. Leki wan bakapisi foe dati, a no ben broko en ede so foeroe moro nanga den problema di ben abi foe doe nanga en gosontoe, èn a ben firi taki a ben kisi „krakti di pasa san de normaal” (2 Korentesma 4:7). A wani di a ben wani foe de wan jepi gi trawan na jejefasi ben kon moro tranga, èn a ben tron wan foeroeten Kownoekondre preikiman.
13. San na wan toe sani di fiti foe begi foe den èn di wi kan poti na ini den begi foe wi, soleki fa Mateus 6:9-13 e sori?
13 San wi kan poti na ini den begi foe wi, so taki Jehovah sa prisiri foe jere den? Jesus Krestes ben leri den disipel foe en fa foe begi. Na ini a model begi di skrifi na Mateus 6:9-13, a ben kari wan toe sani di fiti foe wi kan begi foe den. San moesoe de den moro prenspari sani na ini den begi foe wi? A nen foe Jehovah Gado nanga en Kownoekondre moesoe de den moro prenspari sani. A fiti foe aksi foe den sani di wi abi fanowdoe na skinfasi. A de prenspari toe foe aksi pardon gi den sondoe foe wi èn foe aksi foe froeloesoe wi foe tesi èn foe na ogriwan, Satan Didibri. Jesus no ben wani foe wi singi a begi disi na wán fasi nomo noso foe taki en ibri tron baka èn e taki en sondro foe prakseri san a wani taki (Mateus 6:7). Sortoe matifasi ben sa de efoe wan pikin ben sa gebroiki den srefi wortoe ala ten baka te a ben taki nanga en papa?
14. Boiti den tranga begi, sortoe tra begi wi kan begi?
14 Boiti den tranga begi nanga opregti begi, wi moesoe taki begi foe prèise Gado en foe gi tangi (Psalm 34:1; 92:1; 1 Tesalonikasma 5:18). Wi kan begi gi tra sma toe. Den begi foe wi gi den brada nanga sisa foe wi na jejefasi di e pina noso e kisi froefolgoe, e sori a belangstelling di wi abi gi den, èn Jehovah e prisiri foe jere taki wi e broko wi ede nanga den (Lukas 22:32; Johanes 17:20; 1 Tesalonikasma 5:25). Te joe loekoe en boen, dan na apostel Paulus ben skrifi: „No broko oen ede foe noti, ma meki ini ala sani nanga jepi foe begi nanga tranga begi makandra nanga a taki foe tangi, den begi foe oenoe kon bekènti na Gado; èn a vrede foe Gado di e pasa ala prakseri sa kibri oen ati nanga a krakti foe oen froestan nanga jepi foe Jesus Krestes.” — Filipisma 4:6, 7.
HORIDORO NA INI BEGI
15. San wi moesoe hori na prakseri efoe a gersi taki den begi foe wi no e kisi piki?
15 Ala di joe e kisi sabi foe Gado, tokoe joe e feni kande taki son leisi joe no e kisi piki na tapoe den begi foe joe. Disi ben kan de so, bika kande a no de a ten gi Gado ete foe gi piki na tapoe wan spesroetoe begi (Preikiman 3:1-9). Kande Jehovah e gi pasi meki wan situwâsi tan go doro foe wan pisi ten, ma a e gi piki tapoe begi èn a sabi o ten na a moro boen ten foe doe dati. — 2 Korentesma 12:7-9.
16. Foe san ede wi moesoe horidoro na ini begi, èn sortoe krakti a kan abi tapoe a matifasi di wi abi nanga Gado te wi e doe disi?
16 Te wi e horidoro na ini begi, dan dati e tjari na opregti belangstelling foe wi kon na krin gi den sani di wi e taigi Gado (Lukas 18:1-8). Foe eksempre, wi kan aksi Jehovah foe jepi wi foe wini wan spesroetoe swakifasi. Foe di wi e horidoro na ini begi èn e handri akroederi den sani di wi e begi foe den, wi e sori na opregtifasi foe wi. Wi moesoe taki spesroetoe san wi wani, èn de eerlijk te wi e taki den begi foe wi. A de spesroetoe prenspari foe begi tranga te wi e ondrofeni wan tesi (Mateus 6:13). Te wi e tan begi, ala di wi e proeberi foe dwengi den sondoe firi foe wi, dan wi sa si fa Jehovah e jepi wi. Disi sa bow a bribi foe wi èn meki a matifasi di wi abi nanga en kon moro tranga. — 1 Korentesma 10:13; Filipisma 4:13.
17. Fa wi kan kisi wini te wi abi a gwenti foe begi ala di wi e dini Gado?
17 Wi sa kon froestan taki wi no e dini Jehovah Gado nanga wi eigi krakti, te wi abi a gwenti foe begi ala di wi e doe santa diniwroko gi en. Na Jehovah e gi wi a krakti foe doe diniwroko gi en (1 Korentesma 4:7). Te wi e erken disi, dan dati sa jepi wi foe abi sakafasi èn a sa jepi wi foe meki a matifasi di wi abi nanga en, kon moro boen (1 Petrus 5:5, 6). Ija, wi abi boen reide foe horidoro na ini begi. Den serjoesoe begi foe wi, nanga a sabi di wi sabi fa foe kon krosibei na wi lobi-ati Tata di de na hemel, di de so wan warti sani, sa meki a libi foe wi troetroe kolokoe.
KOMUNIKÂSI NANGA JEHOVAH NO E KON FOE WÁN SEI NOMO
18. Fa wi kan arki Gado?
18 Efoe wi wani taki Gado e jere den begi foe wi, dan wi moesoe arki na san a e taki (Sakaria 7:13). A no e seni den boskopoe foe en moro nanga jepi foe profeiti di ben taki nanga jepi foe Santa Jeje èn seiker a no e gebroiki afkodrei sani (Deuteronomium 18:10-12). Ma wi kan arki Gado te wi e studeri en Wortoe, bijbel (Romesma 15:4; 2 Timoteus 3:16, 17). Neleki fa wi moesoe kweki wan lostoe gi njanjan na skinfasi di de gosontoe gi wi, na so wi e kisi deki-ati foe „kweki wan lostoe gi a troe merki di de foe a wortoe”. Kweki wan lostoe gi njanjan na jejefasi foe di joe e leisi Gado Wortoe ala dei. — 1 Petrus 2:2, 3; Tori foe den Apostel 17:11.
19. Sortoe wini joe abi te joe e prakseri dipi foe den sani di joe leisi na ini bijbel?
19 Prakseri dipi foe den sani di joe e leisi na ini bijbel (Psalm 1:1-3; 77:11, 12). Dati wani taki foe prakseri boen foe a materiaal. Joe ben sa kan teki disi gersi a gebroiki di a skin foe wi e gebroiki a njanjan di wi e njan. Joe kan gebroiki a njanjan na jejefasi foe di joe e loekoe fa den sani di joe e leisi abi foe doe nanga den sani di joe sabi kaba. Loekoe fa den sani di joe leri abi krakti tapoe joe libi, noso san a e sori foe den eigifasi foe Jehovah nanga den fasi fa a e handri. So boen, nanga jepi foe persoonlijk studie, joe kan teki a njanjan na jejefasi na ini joe di Jehovah e gi. Disi sa meki taki joe kon moro krosibei na Gado èn sa jepi joe foe loesoe den problema foe na aladei libi.
20. Fa a e jepi wi foe kon krosibei na Gado te wi e go na den kresten konmakandra?
20 Joe kan kon krosibei na Gado toe, te joe e arki en Wortoe di den e taki foe en na den kresten konmakandra, neleki fa den Israèlsma ben arki nanga opo jesi di den ben kon makandra foe jere den e leisi a Wet foe Gado na poebliki. Den sma di ben gi leri na ini a ten dati, ben sori san a Wet di den ben leisi ben wani taki, èn na so wan fasi den ben jepi den arkiman foe den foe froestan san den ben jere èn ben kisi krakti foe doe dati toe. Disi ben tjari bigi prisiri kon (Nehemia 8:8, 12). So boen, meki a tron a gwenti foe joe foe go na den konmakandra foe Jehovah Kotoigi (Hebrewsma 10:24, 25). Disi sa jepi joe foe froestan a sabi foe Gado èn baka dati sa jepi joe foe gebroiki a sabi foe Gado na ini joe libi èn sa tjari kolokoe kon gi joe. Foe de wan pisi foe a kresten bradafasi na heri grontapoe sa jepi joe foe tan krosibei na Jehovah. Èn soleki fa wi sa si, dan joe kan kisi troetroe seikerfasi na mindri a pipel foe Gado.
ONDROSOEKOE A SABI FOE JOE
Foe san ede joe moesoe kon krosibei na Jehovah?
San na wan toe sani di de fanowdoe foe kon krosibei na Gado?
Sortoe sani joe kan poti na ini den begi foe joe?
Foe san ede joe moesoe horidoro na ini begi?
Fa joe kan arki Jehovah na ini a ten disi?
[Aksi foe a tori disi]
[Wan prenki di e tapoe heri bladzijde 157]
