Foe san ede Gado e gi pasi meki pina de?
Kapitel 8
Foe san ede Gado e gi pasi meki pina de?
1, 2. Fa sma e handri nofo tron na tapoe a pina di libisma e pina?
TE RAMPOE e kon èn e pori sma goedoe èn e teki sma libi, dan foeroe sma no kan froestan foe san ede den sortoe kefalek ogri sani dati e pasa. Trawan e broko den ede nanga takroedoe èn nanga ogri di doe nanga tranga, di de so foeroe èn di doe na so wan ogri-ati fasi èn di sma no man hori na ondro moro. Kande joe toe aksi joesrefi: ’Foe san ede Gado e gi pasi meki pina de?’
2 Foeroe sma lasi bribi na ini Gado, bika den no feni wan piki di e satisferi den. Den feni taki Gado no abi belangstelling gi a libisma famiri. Trawan di e teki pina leki fa a de, e kon atibron èn e gi Gado a fowtoe foe ala ogri na ini a libisma libimakandra. Efoe joe ben abi den sortoe firi dati, dan sondro tweifri joe sa abi foeroe belangstelling gi den froeklari di bijbel e gi tapoe den afersi disi.
A NO GADO MEKI PINA KON
3, 4. Foe san ede wi kan de seiker taki ogri nanga pina no e kon foe Jehovah?
3 Bijbel e gi wi a djaranti taki a pina di wi e si lontoe wi, a no Jehovah Gado meki a kon. Foe eksempre, a kresten disipel Jakobus ben skrifi: „No meki no wan sma, te a kisi tesi, taki: ’Na Gado e tesi mi.’ Bika sma no kan tesi Gado nanga ogri, èn en no e tesi no wan sma toe” (Jakobus 1:13). Foe di dati de so, dan Gado no ben kan meki den heri ipi problema kon di e trobi a libisma famiri. A no e tjari tesi kon na tapoe sma foe meki den warti foe libi na hemel, èn a no e meki sma pina toe foe den ogridoe foe den ede, di sma denki taki den ben doe na ini wan tra libi kaba. — Romesma 6:7.
4 Boiti dati, ala di foeroe kefalek ogri sani doe na ini a nen foe Gado noso foe Krestes, tokoe no wan sani na ini bijbel e sori taki oiti wan foe den feni den sortoe sani dati di sma doe, boen. Gado nanga Krestes no abi noti foe doe nanga den sma di e taki dati den e dini den, ma di e bedrigi sma, e kiri èn e foefoeroe sma, èn e doe foeroe tra sani di e meki libisma e pina. Foe taki en leti, „a pasi foe na ogriwan na wan tegoe sani gi Jehovah”. Gado „de farawe foe den ogri sma”. — Odo 15:9, 29.
5. San na wan toe eigifasi foe Jehovah, èn fa a e firi gi den mekisani foe en?
5 Bijbel e taki foe Jehovah leki wan sma di „safoe srefisrefi ini firi foe lobi nanga sari-atifasi” (Jakobus 5:11). Bijbel e froeklari taki „Jehovah na wan sma di lobi retidoe” (Psalm 37:28; Jesaja 61:8). A no lobi foe teki refensi. A e sorgoe gi den mekisani foe en na wan sari-ati fasi èn a e gi den alamala san moro boen gi den (Tori foe den Apostel 14:16, 17). Jehovah ben doe dati foe sensi a libi ben bigin na grontapoe.
WAN VOLMAAKTI BIGIN
6. Fa son anansitori e sori na a wan noso tra fasi, fa sani ben de na a fositen historia foe libisma?
6 Wi alamala gwenti foe si èn foe firi pen nanga pina. Foe dati ede a kan de wan moeilek sani foe tjari wan ten sondro pina kon na wi prakseri, ma dati na fa sani ben de na a bigin foe a libisma historia. Srefi den anansitori foe son nâsi e sori na a wan noso tra fasi na so wan kolokoe bigin. Ini a Griki mythologie den ben kari a fosiwan foe den „Feifi jarihondro foe libisma”, a „Gowtoe Pisi Ten”. Na ini a ten dati, libisma ben libi wan kolokoe libi, fri foe tranga wroko, pen nanga den takroe bakapisi foe na owroedei. Den Sneisi e taki dati na ini a ten foe a tiri foe a Geri Kèiser (Huang-Ti), sma ben libi ini vrede, den ben njan boen foe a wánfasi srefi di ben de na a fasi fa a weer ben de èn nanga den werdri meti. Den Persiasma, Egiptisma, den Tibetsma, den Perusma nanga den Meksikowsma, den alamala abi anansitori foe wan ten foe kolokoe nanga volmaaktifasi na a bigin foe libisma historia.
7. Foe san ede Gado ben meki grontapoe nanga a libisma famiri?
7 Den anansitori foe den nâsi e taki nomo san bijbel, a moro owroe tori di skrifi foe libisma historia, e taki. A e meki wi kon sabi taki Gado ben poti a fosi libisma paar, Adam nanga Eva, na ini wan paradijs di den kari a djari foe Eden èn a ben gi den a komando: „Oen meki pikin èn kon foeroe èn foeroe grontapoe èn poti en na oen ondro” (Genesis 1:28). Wi fosi papa nanga mama ben njan boen foe volmaaktifasi èn ben abi a froewakti foe si fa a heri grontapoe kon tron wan paradijs, pe wan volmaakti libisma famiri ben o libi na ini, ini vrede nanga kolokoe di e tan. Dati na san Gado ben abi na prakseri di a ben meki grontapoe nanga a libisma famiri. — Jesaja 45:18.
WAN OGRI-ATI TJALENSI
8. Na sortoe komando Adam nanga Eva ben moesoe gi jesi, ma san ben pasa?
8 Efoe Adam nanga Eva ben wani tan abi a boen-ati foe Gado, dan den no ben moesoe njan foe „a bon foe sabi boen nanga ogri” (Genesis 2:16, 17). Efoe den ben gi jesi na a wet foe Jehovah, dan pina no ben sa de foe pori a libisma libi. Efoe den ben gi jesi na a komando foe Gado, dan den ben sa sori taki den ben lobi Jehovah èn taki den ben de loyaal na en (1 Johanes 5:3). Ma soleki fa wi ben leri na ini kapitel 6, dan sani no ben waka na a fasi dati. Eva ben njan a froktoe foe a bon dati, foe di Satan ben gi en a tranga foe doe dati. Baka ten, so srefi Adam ben njan foe a froktoe di den no ben mag njan.
9. Sortoe strei di abi foe doe nanga Jehovah, Satan ben tjari kon na fesi?
9 Joe e si a serjoesoefasi foe san ben pasa? Satan ben gens a posisi foe Jehovah leki a Moro Heiwan. Di a ben taki: „Oenoe no sa dede kwetikweti”, dan Didibri ben taki wan heri tra sani leki san Gado ben taki: „Joe sa dede nomonomo.” Den wortoe di Satan ben taki moro fara, ben sori taki Jehovah ben hori Adam nanga Eva ini don, taki den ben kan tron leki Gado, èn foe dati ede den no abi En fanowdoe foe bosroiti san ben boen èn san ben ogri. Foe dati ede a tjalensi di Satan ben tjalensi Jehovah ben meki sma tweifri na a reti foe a posisi di Jehovah abi leki na Universeel Soeverein. — Genesis 2:17; 3:1-6.
10. Sortoe prakseri Satan ben poti ini a tori foe libisma?
10 Satan Didibri ben poti a prakseri toe taki sma ben sa tan gi jesi na Jehovah soso te disi ben tjari wini gi den. Nanga tra wortoe, a ben poti tweifri na a soifri retifasi foe libisma. Satan ben kon nanga a kragi taki no wan enkri libisma ben sa tan loyaal na Gado nanga en fri wani. Na ogri-ati sani disi di Satan ben taki, tjari kon na krin na wan krin fasi na ini a bijbel tori foe Job, wan getrow foetoeboi foe Jehovah di ben ondrofeni wan bigi tesi na ini wan pisi ten bifo 1600 b.G.T. Te joe e leisi den fosi toe kapitel foe a boekoe Job, dan joe kan froestan a reide foe san ede libisma e pina èn foe san ede Gado e gi pasi meki dati de.
11. Sortoe sma Job ben de, ma nanga sortoe kragi Satan ben kon?
11 Satan ben bigin soekoe fowtoe na Job, „wan man sondro fowtoe èn opregti”. Ini a fosi presi, Satan ben taki dati Job no ben abi wan joisti boeweigi foe ati di Satan ben poti na aksi: „Na foe soso taki Job frede Gado?” Baka dati Didibri ben gi Gado nanga Job porinen na wan triki fasi, foe di a ben kon nanga a kragi taki Jehovah ben bai a loyaliteit foe Job foe di A ben kibri en èn ben blesi en. „Ma leki wan kenki,” na so Satan ben tjalensi Jehovah, „langa joe anoe grantangi, èn fasi ala sani san a abi èn loekoe efoe a no sa floekoe joe leti na ini joe fesi.” — Job 1:8-11.
12. (a) Sortoe aksi ben kan kisi piki soso te Gado ben gi Satan pasi foe tesi Job? (b) San ben de a bakapisi foe a tesi di Job ben kisi?
12 A ben de so, taki Job ben e dini Gado soso foe ala den boen sani ede di a ben kisi foe Gado? Job ben kan tan hori en soifri retifasi na ondro tesi? Èn foe a sei foe Jehovah, a ben de so, taki A ben abi nofo froetrow na ini en foetoeboi foe gi pasi meki a kisi tesi? Den aksi disi ben kan kisi piki efoe Jehovah ben sa gi Satan pasi foe tjari wan boen hebi tesi kon na tapoe Job. A getrowfasi fa Job tjari ensrefi na ondro a tesi di Gado ben gi pasi foe dati, soleki fa den froeteri na ini a boekoe Job, ben sori foe de wan finifini fasi foe regtfardiki a regtfardikifasi foe Jehovah èn a soifri retifasi foe libisma. — Job 42:1, 2, 12.
13. San wi abi foe doe nanga a tori di ben pasa na Eden èn nanga Job?
13 Ma san ben pasa na a djari foe Eden èn nanga a man Job, wani taki wan sani di de moro prenspari. Den strei di Satan ben tjari kon na fesi, abi foe doe nanga a heri libisma famiri, so srefi wi na ini a ten disi. Gado ben kisi porinen, èn den ben meki sma tweifri na a soevereiniteit foe en. Den ben meki sma tweifri na a opregtifasi foe Gado en mekisani, libisma. Den strei disi ben moesoe kisi wan loesoe.
FA FOE LOESOE DEN STREI
14. San wan sma, di sma taki leitori foe en, ben sa kan doe te a tanapoe na fesi wan ogri-ati tjalensi?
14 Foe eksempre, kon meki wi taki dati joe na wan lobi-ati papa noso mama di abi wan toe pikin ini wan kolokoe osofamiri. Kon meki wi taki dati wan foe joe birtisma e panja leitori foe joe, èn e taki dati joe na wan takroe papa noso mama. Ma efoe a birtisma e taki dati den pikin foe joe no lobi joe, taki den e tan na joe soso foe di den no sabi tra fasi, èn dati den ben sa gowe libi na oso efoe wan sma ben sa gi den na okasi. ’Dati na wan law sani!’, joe ben sa kan taki. Ija, ma fa joe ben sa boeweisi dati? Son papa nanga mama ben sa kan handri ini atibron. Boiti taki so wan ogri fasi foe handri ben sa tjari moro problema kon, a ben sa gi boeweisi na den leitori. Wan boen fasi foe handri so wan problema, ben sa de foe gi a sma di taki den sani dati foe joe, na okasi foe boeweisi san a taki èn foe meki den pikin foe joe sori taki den lobi joe troetroe.
15. Fa Jehovah ben froekisi foe handri nanga a tjalensi foe Satan?
15 Jehovah de leki a lobi-ati papa. Wi kan teki Adam nanga Eva gersi den pikin, èn a ròl foe a birtisma di e taki lei, e fiti Satan. A ben de wan koni sani foe Gado foe no pori Satan, Adam nanga Eva wantewante, ma taki a ben gi den ogri sma disi pasi foe tan na libi foe wan pisi ten. Disi ben gi wi fosi papa nanga mama pasi foe meki pikin èn nanga dati bigin nanga a libisma famiri, èn a gi Didibri wan okasi foe boeweisi efoe san a taki ben troe, so taki den strei ben kan loesoe. Ma Gado ben sabi foe sensi a bigin, taki son sma ben sa de loyaal na en èn na so fasi ben sa boeweisi taki Satan na wan leiman. Wi de troetroe nanga tangi dati Jehovah go doro foe blesi den wan di lobi en èn foe jepi den! — 2 Kroniki 16:9; Odo 15:3.
SORTOE BOEWEISI BEN GI?
16. Fa grontapoe kon de na ini a makti foe Satan?
16 Na ini pikinmoro a heri libisma historia, Satan ben kisi ala okasi foe doe den plan foe en foe tiri a libisma famiri. Wan foe den sani ben de taki a gebroiki en krakti na tapoe den politiek makti èn a horibaka gi relisi di na wan triki fasi e meki sma anbegi en na presi foe Jehovah. Na so Didibri kon tron „a gado foe a seti foe sani disi”, èn den e kari en „a tiriman foe a grontapoe disi” (2 Korentesma 4:4; Johanes 12:31). Ija, „heri grontapoe e didon na ini a makti foe na ogriwan” (1 Johanes 5:19). Disi wani taki dati Satan boeweisi san a taki, dati a ben kan poeroe ala libisma foe Jehovah Gado? Kwetikweti! Ala di Jehovah e gi Satan pasi meki a tan na libi, A go doro foe meki en eigi prakseri kon troe. San bijbel e tjari kon na krin dan, ini a tori foe a gi di Gado e gi pasi meki ogridoe de?
17. San wi moesoe hori na prakseri ini a tori foe san meki ogridoe nanga pina kon?
17 A no Jehovah meki ogridoe nanga pina kon. Foe di Satan na a tiriman foe a grontapoe disi nanga a gado foe a seti foe sani disi, meki en nanga den wan di de na en sei, de frantiwortoe gi a fasi fa sani de nanga a libisma libimakandra na ini a ten disi èn gi ala den pina di a libisma famiri pina. No wan sma kan taki nanga reti dati na Gado meki so wan problema kon. — Romesma 9:14.
18. Sortoe boeweisi gi ini a tori foe a prakseri taki libisma no abi foe gi frantiwortoe na Gado, foe di Jehovah ben gi pasi meki ogridoe nanga pina de?
18 A gi di Jehovah e gi pasi meki ogridoe nanga pina de, boeweisi taki a gi di libisma no e gi frantiwortoe na Gado, no tjari wan moro boen grontapoe kon. No wan sma no kan taki dati a wan rampoe baka a trawan no ben de wan marki foe a historia. Disi de foe di libisma teki a bosroiti foe waka èn libi akroederi san den wani sondro foe gi frantiwortoe èn den no sori troetroe lespeki gi Gado Wortoe nanga gi en wani. Di Jehovah en pipel foe owroeten nanga den fesiman foe den no ben de getrow èn ben feti baka „a pôpi fasi foe libi” èn ben weigri foe teki a wortoe foe Gado, a ben abi rampoe leki bakapisi. Gado ben taigi den, nanga jepi foe en profeiti Jeremia: „Dem koniman kisi sjem, dem skreki, dem go na doengroehoso: loekoe, dem ben trowei da woortoe vo Masra [Jehovah], soortoe koni dem sa habi dan?” (Jeremia 8:5, 6, 9, Da boekoe vo dem Profetie) Foe di a libisma famiri no ben waka na baka den markitiki foe Jehovah, meki a tron leki wan sipi sondro wan stiri di wan krasi se e meki a kanti go kanti kon.
19. Sortoe boeweisi de taki Satan no kan meki ala libisma drai den baka gi Gado?
19 A gi di Gado e gi pasi meki ogridoe nanga pina de, boeweisi toe taki Satan no ben man meki a heri libisma famiri drai en baka gi Jehovah. Historia e sori taki ala ten sma ben de di tan getrow na Gado, awinsi sortoe tesi noso pina sma ben tjari kon na den tapoe. Na ini den jarihondro di pasa, Jehovah ben sori en makti gi a boen foe den foetoeboi foe en, èn a nen foe en meki bekènti na heri grontapoe (Exodus 9:16; 1 Samuèl 12:22). Hebrewsma kapitel 11 e froeteri wi foe foeroe getrow sma pe joe abi Abel, Heinok, Noa, Abraham, nanga Moses na ini toe. Hebrewsma 12:1 e kari den ’wan bigi wolkoe foe kotoigi’. Den ben de eksempre foe sma di ben abi wan tranga bribi na ini Jehovah. Na ini a ten disi toe, foeroe sma gi a libi foe den sondro foe broko a soifri retifasi foe den na Gado. Den sortoe sma disi e boeweisi krin nanga a bribi èn a lobi foe den, taki Satan no kan meki ala libisma drai den baka gi Gado.
20. Sortoe boeweisi gi ini a tori foe Gado nanga a libisma famiri, foe di Jehovah e gi pasi meki ogridoe nanga pina e tan go doro?
20 Te foe kaba, a gi di Jehovah e gi pasi meki ogridoe nanga pina e tan go doro, gi a boeweisi taki soso Jehovah, a Mekiman, wawan man èn abi a reti foe tiri a libisma famiri foe a têgo blesi èn kolokoe foe den. Foeroe jarihondro kaba, libisma proeberi foeroe fasi foe tiri. Ma san ben de a bakapisi? Den foeroe problema nanga moeilek situwâsi di den nâsi e ondrofeni na ini a ten disi, na nofo boeweisi di e sori taki troetroe, soleki fa bijbel e taki foe en, „a wan libisma tiri a tra libisma nanga ogri bakapisi gi en” (Preikiman 8:9). Soso Jehovah kan doe wan sani foe froeloesoe wi èn meki a prakseri foe en kon troe di a ben abi biginbigin. Fa a sa doe disi èn o ten?
21. San o pasa nanga Satan, èn soema den sa gebroiki foe doe disi?
21 Wantewante baka di Adam nanga Eva broko kindi gi a plan foe Satan, Gado ben meki En prakseri bekènti di abi foe doe nanga a wrokosani di Gado gebroiki foe tjari froeloesoe kon. Disi na san Jehovah ben meki bekènti ini a tori foe Satan: „Mi sa poti feantifasi na mindri joe nanga na oema èn na mindri joe siri nanga en siri. A sa masi joe na a ede èn joe sa masi en na a bakafoetoe” (Genesis 3:15). A sani dati di Jehovah ben meki bekènti ben gi a djaranti taki Didibri no ben sa kisi pasi foe doe den ogridoe foe en foe têgo. Leki a Kownoe foe a Mesian Kownoekondre, a pramisi Siri, Jesus Krestes, sa ’masi Satan na a ede’. Ija, „heri esi”, Jesus sa masi Satan, a sma di opo enrefi teige Gado! — Romesma 16:20.
SAN JOE SA DOE?
22. (a) Na tapoe sortoe aksi joe moesoe poti prakseri? (b) Foe sortoe sani den wan di de getrow na Gado kan de seiker, ala di Satan e poeroe en atibron na den tapoe?
22 Now di joe kon sabi den strei di de ini a tori, dan na a sei foe soema joe sa tanapoe? Joe sa sori nanga den sani di joe e doe taki joe na wan loyaal bakaman foe Jehovah? Foe di Satan sabi taki a ten foe en kon sjatoe, meki a sa doe ala san a man foe poeroe en atibron na tapoe den sma di wani hori a soifri retifasi foe den na Gado (Openbaring 12:12). Ma joe kan loekoe go na Gado foe kisi jepi, bika „Jehovah sabi foe froeloesoe sma di gi densrefi na ini a dini foe en, komoto na ini tesi” (2 Petrus 2:9). A no sa gi pasi meki joe kisi tesi moro leki joe kan tjari, èn a sa sorgoe gi wan fasi foe komoto so taki joe kan horidoro na ondro tesi. — 1 Korentesma 10:13.
23. Na san wi kan loekoe nanga froetrow go na fesi?
23 Meki wi loekoe nanga froetrow go na fesi na a ten te a Kownoe Jesus Krestes sa doe wan sani teige Satan nanga ala den bakaman foe en (Openbaring 20:1-3). Jesus sa pori ala den sma di de frantiwortoe gi den heloe nanga a broeja di a libisma famiri pina foe dati ede. Te leki a ten dati, wan fasi foe pina de, di e hati spesroetoe, èn dati na a lasi di wi e lasi den lobiwan foe wi na ini dede. Leisi a kapitel di e kon now, foe kon sabi san e pasa nanga den.
ONDROSOEKOE A SABI FOE JOE
Fa wi doe sabi taki Jehovah no e meki libisma pina?
Sortoe strei Satan ben tjari kon na fesi na ini Eden èn di ben tjari kon na krin na ini a ten foe Job?
San a gi di Gado gi pasi meki pina de, e boeweisi?
[Aksi foe a tori disi]
