Foe san ede wi e kon owroe èn dede?
Kapitel 6
Foe san ede wi e kon owroe èn dede?
1. San sabidensiman no ben man froeklari foe a libisma libi?
SABIDENSIMAN no sabi foe san ede libisma e kon owroe èn dede. A gersi leki njoen cel ben sa moesoe tan kon ini a presi foe den owroe cel foe wi, èn dati wi ben sa moesoe libi foe têgo. A boekoe Hyojun Soshikigaku (Standaard Histologie) e taki: „Sma no man froestan fa na owroe di den cel e kon owroe, abi foe doe nanga na owroe di wan sma e kon owroe èn nanga a dede foe en.” Foeroe sabidensiman e bribi taki wan sani de „di a natoeroe poti na ini a skin èn di de dipi na ini en”, èn di e meki taki sma no man libi langa. Joe denki taki den abi leti?
2. San son sma doe foe di a libi de so sjatoe?
2 Ala ten libisma angri foe libi langa èn den proeberi srefi foe kisi libi sondro foe kan dede. Sensi a di foe fo jarihondro b.G.T., dresi di, soleki fa sma ben denki, ben meki foe meki a kan taki sma libi sondro foe kan dede, ben hari a prakseri foe Sneisi heiheiman. Son Sneisi kèiser di ben libi baka ten, dede foe di den ben proeberi den so-kari dringi — di ben meki foe kwik — èn di ben meki foe dresi ala siki. Na ala presi na grontapoe, sma e bribi taki dede a no a kaba foe a de di den de na libi. Boedistsma, Hindoesma, Moslimsma, nanga tra sma, den alamala abi toemoesi moi howpoe foe libi baka a dede. Foeroe sma na ini krestenhèit e froewakti foe kisi libi na hemel baka a dede, pe den sa kisi blesi nanga prisiri pasa marki.
3. (a) Foe san ede libisma e angri foe libi foe têgo? (b) Sortoe aksi ini a tori foe dede moesoe kisi piki?
3 A prakseri di sma e prakseri taki kolokoe de baka a dede, e sori taki den e angri foe libi foe têgo. „Srefi ten di no skotoe a poti na ini na ati foe den”, bijbel e taki foe a prakseri foe ten di no abi kaba èn di Gado ben poti na ini wi (Preikiman 3:11). A ben meki den fosi libisma nanga a froewakti taki den ben kan libi foe têgo na grontapoe (Genesis 2:16, 17). Foe san ede libisma e dede dan? Fa dede ben doe kon na grontapoe? A sabi di Gado e gi, e trowe leti na tapoe den aksi disi. — Psalm 119:105.
WAN TAKROE PLAN
4. Fa Jesus ben meki sma kon sabi na ogriman di de frantiwortoe gi a dede foe libisma?
4 Wan ogriman e proeberi foe kibri den boeweisi di e sori taki en na wan ogriman. Disi de so toe nanga a sma di de frantiwortoe gi wan ogri di abi a dede foe miljardmiljard sma leki bakapisi. Na wan triki fasi a seti sani na so wan fasi so taki sma no kan froestan a dede di libisma e dede. Jesus Krestes ben meki sma kon sabi na ogriman disi di A ben taigi den sma di ben e soekoe foe kiri Jesus: „Oenoe kon foe oen tata Didibri, èn oenoe wani doe den lostoe foe oen tata. En ben de wan kiriman di a ben bigin, èn a no ben tanapoe steifi na ini waarheid, bika waarheid no de na en ini.” — Johanes 8:31, 40, 44.
5. (a) San ben de a bigin foe a sma di ben tron Satan Didibri? (b) San den wortoe „Satan” nanga „Didibri” wani taki?
5 Ija, Didibri na wan takroe „kiriman”. Bijbel e tjari kon na krin taki en na wan troetroe sma, no soso na ogri na ini na ati foe wan sma (Mateus 4:1-11). Ala di a ben meki leki wan regtfardiki engel, tokoe „a no ben tanapoe steifi na ini waarheid”. A fiti srefisrefi taki a nen Satan Didibri! (Openbaring 12:9) Den e kari en „Satan”, noso „gensman”, bika a opo ensrefi teige Jehovah èn a gens En. Den e kari na ogriman disi „Didibri” toe, san wani taki „leiman di e pori sma nen”, foe di a ben afrontoe Gado di a ben froeteri sani foe Gado di no ben de troe.
6. Foe san ede Satan ben opo ensrefi teige Gado?
6 San ben meki Satan opo ensrefi teige Gado? Bigi-ai. Na wan bigi-ai fasi a ben angri foe na anbegi di Jehovah ben kisi foe libisma. Didibri no ben trowe na angri foe kisi so wan anbegi, di soso a Mekiman abi a reti foe kisi. (Teki gersi Esekièl 28:12-19.) Na presi foe dati, na engel di ben tron Satan ben meki a bigi-ai disi gro, te leki a kon so fara taki a sondoe. — Jakobus 1:14, 15.
7. (a) San e meki libisma e dede? (b) San na sondoe?
7 Wi kon sabi now soema na a ogriman, di den ogridoe foe en ben meki taki libisma e dede. Ma san na a spesroetoe sani di e meki taki libisma e dede? Bijbel e taki: „A maka di e meki dede kon, na sondoe” (1 Korentesma 15:56). Èn san na sondoe? Foe froestan a wortoe disi, dan meki wi go loekoe san a ben wani taki na ini den tongo di bijbel ben skrifi na ini a bigin. A Hebrew werkwortoe nanga a Griki werkwortoe di den ben vertaal moro foeroe nanga „sondoe” wani taki „misi”, na a fasi foe misi noso foe no doro wan marki. Sortoe marki wi alamala e misi foe doro? A marki foe gi jesi na Gado na wan volmaakti fasi. Ma fa sondoe ben doe kon na grontapoe?
FA A BEN MEKI A TAKROE PLAN FOE EN WROKO
8. Fa Satan ben proeberi foe kisi na anbegi foe libisma?
8 Satan teki en ten foe denki finifini foe wan takroe plan di, soleki fa en ben prakseri, ben sa meki en tiri ala libisma èn kisi na anbegi foe den. A ben teki a bosroiti foe meki a fosi libisma paar, Adam nanga Eva, sondoe teige Gado. Jehovah ben gi wi fosi papa nanga mama sabi di ben sa tajri den go na têgo libi. Den ben sabi taki a Mekiman foe den ben boen, bika a ben poti den na ini a moi djari foe Eden. Spesroetoe Adam ben firi a boenfasi foe en hemel Tata, di Gado ben gi en wan moi wefi di ben sa jepi en (Genesis 1:26, 29; 2:7-9, 18-23). Efoe a fosi libisma paar ben wani libi go doro, dan dati ben anga foe a gi di den ben o gi jesi na Gado.
9. Sortoe komando Gado ben gi a fosi libisma, èn foe san ede disi ben de reidelek?
9 Gado ben gi Adam a komando: „Foe ibri bon foe a djari joe mag njan te joe bere foeroe. Ma foe a bon foe sabi boen nanga ogri, foe dati joe no moesoe njan, bika na a dei di joe sa njan foe dati, joe sa dede nomonomo” (Genesis 2:16, 17). Leki a Mekiman, Jehovah Gado ben abi a reti foe poti moreel markitiki èn foe bosroiti gi den mekisani foe en san ben boen èn san ben ogri. A komando foe en ben de reidelek, bika Adam nanga Eva ben de fri foe njan froktoe foe ala den tra bon na ini a djari. Te den ben o gi jesi na a wet disi, na presi foe meki den eigi moreel markitiki na wan heimemre fasi, dan den ben kan sori den warderi gi a reti di Jehovah abi foe tiri.
10. (a) Fa Satan ben kon na libisma foe hari den kon na en sei? (b) Sortoe reide foe doe sani, Satan ben taki dati Jehovah abi? (c) Fa joe e prakseri foe a feti di Satan opo go feti nanga Gado?
10 Didibri ben meki a plan foe hari den fosi libisma poeroe foe Gado. Satan ben lei foe hari den kon na en sei. Neleki fa wan sma di e taki sondro foe boeweigi en mofoboeba, e gebroiki wan popki foe meki a gersi leki a popki e taki, na so Didibri ben gebroiki wan sneki èn a ben aksi Eva: „A de troetroe so taki Gado taki dati joe no mag njan foe ala bon foe a djari?” Di Eva ben taki san ben de a komando foe Gado, dan Satan ben taki: „Oenoe no sa dede kwetikweti.” Ne Satan ben taki dati Jehovah no ben abi boen reide, di a ben taki: „Gado sabi taki na a dei ete di oenoe sa njan foe en, seiker oen ai sa kon opo èn seiker oenoe sa de leki Gado, sabi boen nanga ogri” (Genesis 3:1-5). Na a fasi dati Didibri ben wani meki a gersi leki Gado ben hori wan boen sani na baka. Dati ben de wan takroe ogri-ati lei foe di Satan ben pori a nen foe Jehovah, di de wan lobi-ati hemel Tata di e taki waarheid!
11. Fa Adam nanga Eva ben kon tron sma di ben wroko makandra nanga Satan?
11 Eva ben loekoe na a bon baka, èn now a froktoe foe a bon ben gersi spesroetoe wan sani di a ben wani srefisrefi. So boen, a ben teki a froktoe èn a ben njan foe en. Baka ten, foe espresi en masra ben teki prati nanga en ini a sondoe disi foe trangajesi Gado (Genesis 3:6). Ala di na Eva den ben kori, tokoe na en nanga Adam ben horibaka gi a plan foe Satan foe tiri a libisma ras. Te joe loekoe en boen, dan den ben tron sma di ben wroko makandra nanga en. — Romesma 6:16; 1 Timoteus 2:14.
12. San ben de a bakapisi foe na opo di libisma opo densrefi teige Gado?
12 Adam nanga Eva ben moesoe ondrofeni den bakapisi foe san den ben doe. Den no ben tron leki Gado, nanga spesroetoe sabi. Na presi foe dati, den ben firi sjen èn den go kibri densrefi. Jehovah ben aksi Adam frantiwortoe, èn a ben taki a strafoe disi: „Na ini a sweti foe joe fesi joe sa njan brede te leki joe drai go baka na a gron, bika na drape Gado ben teki joe poeroe. Bika doti joe de èn na doti joe sa drai go baka” (Genesis 3:19). „Na a dei” di wi fosi papa nanga mama ben njan foe a bon foe sabi boen nanga ogri, Gado ben strafoe den èn foe a sei foe Gado, den ben dede kaba. Baka dati den ben jagi poeroe foe a Paradijs èn den ben bigin go na baka te leki den dede.
FA SONDOE NANGA DEDE PANJA
13. Fa sondoe ben panja go na a heri libisma famiri?
13 Soleki fa a sori, dan Satan ben abi boen bakapisi nanga a plan foe en foe kisi a grani foe libisma. Ma tokoe a no ben man hori den anbegiman foe en na libi. Di a sondoe ben bigin abi krakti na tapoe a fosi libisma paar, dan den no ben kan gi volmaaktifasi abra moro na den bakapikin foe den. Neleki fa wan sani kraboe skrifi na ini wan ston, na so sondoe ben de wan dipi marki na ini den genen foe a fosi papa nanga mama foe wi. So boen, den ben kan meki soso onvolmaakti bakapikin. Foe di Adam nanga Eva ben kisi ala den pikin foe den baka di den ben sondoe, meki den bakapikin foe den ben kisi sondoe nanga dede. — Psalm 51:5; Romesma 5:12.
14. (a) Nanga soema wi ben sa kan agersi den sma di e taki dati den no e doe sondoe? (b) Fa den Israèlsma ben kon sabi a sondoefasi foe den?
14 Ma na ini a ten disi, foeroe sma no e bribi taki den na sondari. Na son presi na grontapoe, foeroe sma no sabi a prakseri taki wi kisi sondoe foe wi papa nanga mama. Ma dati no de wan boeweisi taki sondoe no de. Wan boi nanga wan doti fesi kan taki dati a krin, èn a kan abi na overtoigi taki a doti soso baka te a loekoe na ini wan spikri. Den Israèlsma foe owroeten ben de leki so wan boi, di den ben kisi a Wet foe Gado nanga jepi foe En profeiti Moses. A Wet ben sori krin taki sondoe ben de. „Foe troe, mi no ben sa kon sabi san na sondoe efoe a no ben de nanga a Wet”, na so na apostel Paulus e froeklari (Romesma 7:7-12). Efoe den Israèlsma ben e gebroiki a Wet foe loekoe na densrefi, neleki a boi di e loekoe na ini wan spikri, dan den ben kan si taki den no ben krin na ini Jehovah ai.
15. San e kon na krin te wan sma e loekoe na ini a spikri foe a Wortoe foe Gado?
15 Efoe wi e loekoe na ini a spikri foe a Wortoe foe Gado èn e poti prakseri na tapoe den markitiki foe en, dan wi kan si taki wi de onvolmaakti (Jakobus 1:23-25). Foe eksempre, loekoe san Jesus Krestes ben taigi den disipel foe en ini a tori foe a lobi di den moesoe lobi Gado nanga a sma na den sei, soleki fa a skrifi na ini Mateus 22:37-40. Foeroe tron libisma e misi a marki na ini den afersi disi! Foeroe sma no firi pikinso konsensi fonfon srefi foe a sori di den no e sori lobi gi Gado noso gi den sma na den sei. — Lukas 10:29-37.
LOEKOE BOEN NANGA DEN TAKTIK FOE SATAN!
16. San wi kan doe foe no meki Satan kisi wi nanga den taktik foe en, èn foe san ede disi na wan moeilek sani?
16 Satan e soekoe foe meki wi doe sondoe foe espresi (1 Johanes 3:8). Wan fasi de foe no tron wan sma di a kisi nanga den taktik foe en? Ija, ma disi e aksi foe wi taki wi moesoe feti nanga den firi di wi abi foe sondoe foe espresi. Disi no makriki, bika a firi foe doe sondoe, di wi kisi foe wi papa nanga mama, tranga srefisrefi (Efeisesma 2:3). Paulus ben moesoe feti troetroe. Foe san ede? Bika sondoe ben de na en ini. Efoe wi wani taki Gado feni wi boen, dan wi toe moesoe feti nanga den sondoe firi di de na wi ini. — Romesma 7:14-24; 2 Korentesma 5:10.
17. San e meki a feti di wi e feti nanga den sondoe firi foe wi kon moro moeilek?
17 Foe di doronomo Satan e soekoe okasi foe kori wi foe pasa den wet foe Gado, meki a feti di wi e feti nanga sondoe no makriki (1 Petrus 5:8). Paulus ben sori taki a ben broko en ede nanga kompe kresten di a ben taki: „Mi frede taki na a wan noso tra fasi, neleki fa a sneki ben kori Eva foe di a ben bedrigi en, taki a denki foe oenoe ben sa kan kon pori èn taki oenoe no e tan ini na opregtifasi nanga a soifrifasi foe a Krestes” (2 Korentesma 11:3). Satan e gebroiki den srefi taktik na ini a ten disi. A e proeberi foe sai siri foe meki sma tweifri na a boenfasi foe Jehovah èn na den wini di wi e kisi te wi e gi jesi na den komando foe Gado. Na wan fowtoe fasi Didibri e proeberi foe gebroiki den sondoe firi di wi kisi foe wi papa nanga mama, èn foe meki wi feti na baka wan libi foe heimemre, bigi-ai, a si di wi no wani si sma na ai, nanga a desko di wi e desko tra sma.
18. Fa Satan e gebroiki grontapoe foe horibaka gi sondoe?
18 Wán foe den wrokosani di Didibri e gebroiki teige wi, na grontapoe, di e didon na ini en makti (1 Johanes 5:19). Efoe wi no e loekoe boen, dan pori èn oneerlijk sma na ini a grontapoe di de lontoe wi, sa poti druk na wi tapoe foe libi wan sondoe libi di de teige den moreel markitiki foe Gado (1 Petrus 4:3-5). Foeroe sma no wani sabi den wet foe Gado èn den no wani poti prakseri srefi na tapoe a naki di a konsensi foe den e naki den, èn te foe kaba den e meki taki a konsensi no e taki moro (Romesma 2:14, 15; 1 Timoteus 4:1, 2). Son sma safrisafri e teki wan fasi foe libi abra di srefi na onvolmaakti konsensi foe den, fosi no ben gi den pasi foe libi. — Romesma 1:24-32; Efeisesma 4:17-19.
19. Foe san ede a no nofo foe libi wan krin libi nomo?
19 Foe libi wan krin libi na wan sani di wan sma man doe nanga foeroe moeiti na ini a grontapoe disi. Ma moro de fanowdoe foe plisi wi Mekiman. Wi moesoe abi bribi toe na ini Gado èn abi wan firi foe frantiwortoe na en (Hebrewsma 11:6). „Efoe wan sma sabi fa foe doe san boen èn tokoe a no e doe dati, dan dati na wan sondoe gi en”, a disipel Jakobus ben skrifi (Jakobus 4:17). Ija, efoe foe espresi wi no wani sabi Gado nanga den komando foe en, dan dati na wan fasi foe sondoe kaba.
20. Fa Satan ben sa kan proeberi foe tapoe joe foe doe san boen, ma san sa jepi joe foe kakafoetoe gi den sortoe druk dati?
20 Soleki fa a sori, dan Satan sa meki sma gens joe ini a soekoe di joe e soekoe a sabi foe Gado nanga jepi foe joe studie foe bijbel. Wi e howpoe foe troe, taki joe no sa meki den sortoe druk dati e tapoe joe foe doe san boen (Johanes 16:2). Ala di foeroe tiriman ben poti bribi na ini Jesus na a ten foe en diniwroko, tokoe den no ben taki na poebliki foe en, bika den ben frede taki sma na ini a libimakandra foe den ben sa koti pasi gi den (Johanes 12:42, 43). Satan e proeberi na wan ogri-ati fasi foe frede ala sma di e soekoe a sabi foe Gado. Ma ala ten joe moesoe memre den toemoesi moi sani di Jehovah doe èn abi warderi gi den. Kande joe man jepi gensman srefi foe kisi a srefi warderi.
21. Fa wi kan wini grontapoe èn den eigi sondoe firi foe wi?
21 So langa wi de onvolmaakti, wi sa doe sondoe (1 Johanes 1:8). Ma tokoe, wi abi jepi foe wini a feti disi. Ija, wi kan wini a feti di wi e feti nanga na ogriwan, Satan Didibri (Romesma 5:21). Na a kaba foe Jesus diniwroko na grontapoe, a ben gi den bakaman foe en deki-ati nanga den wortoe disi: „Na ini grontapoe oenoe abi banawtoe, ma abi deki-ati! Mi wini grontapoe” (Johanes 16:33). A kan srefi gi onvolmaakti libisma foe wini grontapoe nanga a jepi foe Gado. Satan no abi makti na tapoe den sma di e kakafoetoe gi en èn ’di e saka densrefi na Gado ondro’ (Jakobus 4:7; 1 Johanes 5:18). Soleki fa wi sa si, dan Gado gi wan fasi foe kon fri foe katibo na sondoe nanga dede.
ONDROSOEKOE A SABI FOE JOE
Soema na Satan Didibri?
Foe san ede libisma e kon owroe èn dede?
San na sondoe?
Fa Satan e meki sma sondoe teige Gado foe espresi?
[Aksi foe a tori disi]
[Wan prenki di e tapoe heri bladzijde 54]
