Jesus Krestes — A sroto foe feni a sabi foe Gado
Kapitel 4
Jesus Krestes — A sroto foe feni a sabi foe Gado
1, 2. Fa den relisi foe grontapoe fingafinga na a sroto foe feni a sabi foe Gado?
JOE e tanapoe na a doro foe joe oso èn e feti nanga joe sroto. A kowroe èn a doengroe, èn joe wani foe go na inisei nomonomo — ma a sroto no e fiti. A gersi leki joe abi a joisti sroto, tokoe a sroto no wani drai ini a mama foe a sroto. Disi na troetroe wan froeferi sani! Joe e loekoe den sroto foe joe baka. Joe e gebroiki a joistiwan? Wan sma doe wan sani nanga a sroto?
2 Disi na wan boen agersitori foe sori san a broeja na relisi sei foe a grontapoe disi, doe nanga a sabi foe Gado. Foe taki en leti, foeroe sma fingafinga na a sroto, Jesus Krestes, di e opo a doro foe a froestan di wi e froestan a sabi foe Gado. Son relisi poeroe a sroto, èn den no wani sabi Jesus srefisrefi. Tra relisi meki sma kisi wan fowtoe fasi foe denki foe a ròl di Jesus abi, foe di den e anbegi en leki na Almakti Gado. Awinsi fa a no fa, sondro wan soifri sabi foe a prenspari sma disi, Jesus Krestes, a sabi foe Gado sroto gi wi.
3. Foe san ede wi ben sa kan kari Jesus a sroto foe feni a sabi foe Gado?
3 Kande joe memre ete taki Jesus ben taki: „Disi wani taki têgo libi, foe den teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes” (Johanes 17:3). Di Jesus ben e taki dati, a no ben djaf. Doronomo den Boekoe foe bijbel e poti krakti na tapoe a de di a de fanowdoe foe teki soifri sabi foe Krestes (Efeisesma 4:13; Kolosesma 2:2; 2 Petrus 1:8; 2:20). „Foe [Jesus Krestes] ala den profeiti e gi kotoigi”, na so na apostel Petrus ben skrifi (Tori foe den Apostel 10:43). Èn na apostel Paulus ben skrifi: „Na [Jesus] ini, ala den goedoe foe koni èn foe sabi kibri boen” (Kolosesma 2:3). Paulus ben taki srefi dati ala den pramisi foe Jehovah e kon troe na ini Jesus (2 Korentesma 1:20). So boen, na Jesus Krestes na a troetroe sroto foe feni a sabi foe Gado. A sabi di wi abi foe Jesus moesoe de fri foe ala fowtoe fasi foe denki di sma abi foe a fasi fa Jesus de èn foe a ròl di a abi ini a seti foe Gado. Ma foe san ede den bakaman foe Jesus e si en leki a moro prenspari sma ini den prakseri foe Gado?
A PRAMISI MESIAS
4, 5. Sortoe howpoe ben poti prakseri na tapoe a Mesias, èn fa den disipel foe Jesus ben denki foe en?
4 Sensi den dei foe a getrow man Abel, den foetoeboi foe Gado ben froewakti fajafaja a Siri di Jehovah Gado ensrefi ben taki foe en na fesi (Genesis 3:15; 4:1-8; Hebrewsma 11:4). Den ben tjari kon na krin taki a Siri ben sa horibaka gi a prakseri foe Gado leki a Mesias, san wani taki, „Salfoewan”. A ben o „tjari sondoe kon na wan kaba”, èn na ini den psalm den ben taki na fesi foe den glori foe en Kownoekondre (Danièl 9:24-26; Psalm 72:1-20). Soema ben o boeweisi foe de a Mesias?
5 Prakseri a bigi prisiri di wan jongoe djoe, di ben nen Andreas, ben abi, di a ben arki den wortoe foe Jesus foe Nasaret. Andreas ben lon go na en brada Simon Petrus èn ben taigi en: „Wi feni a Mesias” (Johanes 1:41). Den disipel foe Jesus ben abi na overtoigi taki en ben de a pramisi Mesias (Mateus 16:16). Èn troe kresten ben de klariklari foe dede gi a bribi di den e bribi taki Jesus ben de foe troe a Mesias, noso Krestes, di den ben taki foe en na fesi. Sortoe boeweisi den ben abi? Meki wi poti prakseri na tapoe dri sani di e boeweisi dati.
BOEWEISI TAKI JESUS BEN DE A MESIAS
6. (a) Foe sortoe famirilin a pramisi Siri ben o kon, èn fa wi doe sabi taki Jesus ben kon foe a famirilin dati? (b) Foe san ede no wan sma di ben e libi baka 70 G.T., ben sa kan taki foe ensrefi dati en na a Mesias?
6 A famirilin foe Jesus e poti a fosi fondamenti foe meki sma kon sabi en leki a pramisi Mesias. Jehovah ben taigi En foetoeboi Abraham, taki a pramisi Siri ben sa kon foe en famiri. Abraham manpikin Isak, Isak manpikin Jakob, nanga Jakob manpikin Juda, ibriwan foe den ben kisi wan srefi sortoe pramisi (Genesis 22:18; 26:2-5; 28:12-15; 49:10). Foeroe jarihondro na baka, a famirilin foe di a Mesias ben o kon, ben meki kon moro smara di den ben taigi kownoe David, taki na en famirilin ben sa meki a Sma disi ben doe kon (Psalm 132:11; Jesaja 11:1, 10). Den Evangelie tori foe Mateus nanga Lukas e taki dati Jesus troetroe ben kon foe a famirilin dati (Mateus 1:1-16; Lukas 3:23-38). Ala di Jesus ben abi foeroe ogri feanti, tokoe no wan foe den ben tjalensi a famirilin foe pe a kon èn di ben de bekènti srefisrefi (Mateus 21:9, 15). A de krin, taki a famirilin foe en na wan sani di no wan sma no kan tweifri na dati. Ma den tori di skrifi foe den djoe famiri ben lasi gowe di den Romesma ben pori Jerusalem na ini 70 G.T. Baka ten, noiti moro wan sma ben kan taki foe ensrefi dati en na a pramisi Mesias.
7. (a) San na a di foe toe boeweisi taki Jesus ben de a Mesias? (b) Fa Mika 5:2 ben kon troe ini a tori foe Jesus?
7 Profeititori di kon troe na wan di foe toe boeweisi. Foeroe profeititori foe den Hebrew Boekoe foe bijbel e taki foe difrenti sani foe a waka nanga libi foe a Mesias. Na ini a di foe aiti jarihondro b.G.T., a profeiti Mika ben taki na fesi dati a bigi tiriman disi, ben o gebore na a pikin foto Betlehem. Toe foto na Israèl ben abi a nen Betlehem, ma a profeititori disi ben taki spesroetoe sortoe wan foe den: Betlehem Efrata, pe kownoe David ben gebore (Mika 5:2). Josef nanga Maria, a papa nanga mama foe Jesus, ben libi na Nasaret, so wan 150 kilometer na a noordsei foe Betlehem. Ma di Maria ben de nanga bere, dan a tiriman foe Rome, Caesar Augustus, ben gi a komando taki ala sma foe Israèl ben moesoe poti den nen skrifi na ini lantiboekoe, na a foto pe den ben gebore. * So boen, Josef ben moesoe tjari en wefi di ben de nanga bere, go na Jerusalem, pe Jesus ben gebore. — Lukas 2:1-7.
8. (a) O ten den 69 „wiki” ben bigin èn nanga sortoe sani di ben pasa? (b) O langa den 69 „wiki” ben de, èn san ben pasa di den ben kon na wan kaba?
8 Na ini a di foe siksi jarihondro b.G.T., a profeiti Danièl ben taki na fesi dati „Mesias a Fesiman” ben sa kon 69 „wiki” baka a komando ben gi foe meki Jerusalem kon boen baka èn foe bow en baka (Danièl 9:24, 25). Ibriwan foe den „wiki” disi ben de seibi jari. * Akroederi bijbel nanga a historia foe grontapoe, a komando foe bow Jerusalem baka ben gi na ini 455 b.G.T. (Nehemia 2:1-8). So boen, a Mesias ben moesoe kon 483 (69 tron 7) jari baka 455 b.G.T. Dati e tjari wi kon na ini 29 G.T., a srefi jari di Jehovah ben salfoe Jesus nanga santa jeje. So boen, Jesus ben tron „a Krestes” (san wani taki „Salfoewan”), noso Mesias. — Lukas 3:15, 16, 21, 22.
9. (a) Fa Psalm 2:2 ben kon troe? (b) San na wan toe tra profeititori di ben kon troe na ini Jesus? (Loekoe a boksoe.)
9 A no de foe taki, dati a no ala sma ben teki Jesus leki a pramisi Mesias, èn den Boekoe foe bijbel ben taki disi na fesi. Soleki fa skrifi na Psalm 2:2, dan Gado ben meki kownoe David taki na fesi: „Den kownoe foe grontapoe seti densrefi èn den heihei man srefi ben kon makandra leki wán man teige Jehovah èn teige a salfoewan foe en.” A profeititori disi ben sori taki fesiman foe moro leki wan kondre ben sa bondroe kon na wán, so taki den ben kan feti nanga a Salfoewan foe Jehovah, noso Mesias. Èn na so a ben pasa toe. Den djoe relisi fesiman, kownoe Herodes, nanga a tiriman Pontius Pilatus, di ben de wan Romesma, den alamala ben abi wan prati na a kiri di den ben kiri Jesus. Foe sensi a ten dati, Herodes nanga Pilatus di ben de feanti fosi, ben kon tron boen mati (Mateus 27:1, 2; Lukas 23:10-12; Tori foe den Apostel 4:25-28). Foe moro boeweisi taki Jesus ben de a Mesias, grantangi loekoe tapoe a boksoe di poti na ini a kapitel disi èn di nen „Wan toe toemoesi aparti profeititori foe a Mesias”.
10. Na sortoe fasi Jehovah ben froeklari taki Jesus ben de en pramisi Salfoewan?
10 A froeklari foe Jehovah Gado na wan di foe dri boeweisi di e horibaka gi a de di Jesus de a Mesias. Jehovah ben seni engel kon foe meki sma kon sabi taki Jesus ben de a pramisi Mesias (Lukas 2:10-14). Te joe loekoe en boen, dan na ini a ten foe Jesus libi na grontapoe, Jehovah srefi ben taki komoto na hemel di a ben e taki dati a feni Jesus boen (Mateus 3:16, 17; 17:1-5). Jehovah Gado ben gi Jesus a krakti foe doe wondroe. Ibriwan foe den wondroe disi ben de moro boeweisi di Gado ben gi, taki Jesus ben de a Mesias, foe di noiti Gado ben sa gi wan bedrigiman a krakti foe doe wondroe. Jehovah ben gebroiki en santa jeje toe foe meki den skrifi den Evangelie tori, so taki a boeweisi taki Jesus na a Mesias, ben kon tron wan pisi foe bijbel, a boekoe di vertaal èn panja moro leki iniwan tra boekoe ini historia. — Johanes 4:25, 26.
11. Omeni boeweisi de taki Jesus ben de a Mesias?
11 Ala den sortoe boeweisi disi makandra, abi hondrohondro troe tori na ini toe di e meki sma kon sabi Jesus leki a pramisi Mesias. Foe dati ede a de krin, taki troe kresten ben si en na a joisti fasi, leki ’a sma di ala den profeiti ben gi kotoigi foe en’ èn den si en leki a sroto foe feni a sabi foe Gado (Tori foe den Apostel 10:43). Ma moro sani de foe leri foe Jesus Krestes boiti a troe tori taki en ben de a Mesias. Foe pe a ben komoto? Fa a ben de?
A TEN BIFO JESUS BEN DE WAN LIBISMA
12, 13. (a) Fa wi doe sabi taki Jesus ben de na hemel bifo a ben kon na grontapoe? (b) Soema na „a Wortoe”, èn san a ben doe bifo a ben tron wan libisma?
12 Wi ben sa kan prati a waka nanga libi foe Jesus na ini dri pisi ten. A fosi pisi ten ben bigin langa ten bifo a ben gebore na grontapoe. Mika 5:2 ben taki dati a bigin foe a Mesias ben de „foe owroeten, foe den dei foe ten di no skotoe”. Èn Jesus ben taki krin taki a ben kon foe „den kondre na tapoesei”, dati na hemel (Johanes 8:23; 16:28). O langa a ben de kaba na hemel bifo a ben e kon na grontapoe?
13 Den ben kari Jesus a „wan-enkri gebore Manpikin” foe Gado, foe di Jehovah srefi ben meki en sondro jepi foe wan tra sma (Johanes 3:16). Baka dati, Gado ben gebroiki Jesus leki „a fosi geborewan foe ala mekisani”, foe meki ala tra sani (Kolosesma 1:15; Openbaring 3:14). Johanes 1:1 e taki dati „a Wortoe” (Jesus na ini a ten bifo a ben de wan libisma) ben de nanga Gado „na ini a bigin”. So boen, a Wortoe ben de nanga Jehovah na a ten di „hemel nanga grontapoe” ben meki. Gado ben e taki nanga a Wortoe di a ben taki: „Meki wi meki libisma leki a prenki foe wi” (Genesis 1:1, 26). So srefi, a Wortoe ben moesoe de a lobi „meester wrokoman” foe Gado di Odo 8:22-31 e taki foe en leki koni di de leki wan sma, èn di e wroko na a sei foe Jehovah ini a meki di den ben meki ala sani. Baka di Jehovah meki a Wortoe, a de omeni jarihondro nanga Gado na hemel bifo a tron wan libisma na grontapoe.
14. Foe san ede den e kari Jesus „a prenki foe a Gado di wi no kan si”?
14 Foe dati ede, a no moesoe froewondroe wi taki Kolosesma 1:15 e kari Jesus „a prenki foe a Gado di wi no kan si”! Na ini den jari di bijbel no e taki omeni den de, di den ben abi krosibei demakandra, a Manpikin di ben e gi jesi, ben kon tron soifri leki en Tata Jehovah. Disi na wan tra reide foe san ede Jesus na a sroto foe feni a sabi foe Gado, di e gi libi. Ala sani di Jesus ben doe di a ben de na grontapoe, na soifri san Jehovah ben sa doe. Foe dati ede, efoe wi e kon sabi Jesus, a wani taki toe, dati wi e kon sabi moro foeroe foe Jehovah (Johanes 8:28; 14:8-10). A de krin, taki a de toemoesi prenspari foe leri moro foe Jesus Krestes.
A WAKA NANGA LIBI FOE JESUS NA GRONTAPOE
15. Fa Jesus ben kon gebore leki wan volmaakti beibi?
15 A di foe toe pisi ten foe Jesus waka nanga libi ben de djaso na grontapoe. A ben de klariklari foe saka ensrefi na Gado ondro di A ben tjari a libi foe Jesus komoto na hemel go na a moeroe foe wan getrow djoe njoenwenke di ben nen Maria. A makti santa jeje, noso wroko krakti, foe Jehovah ’ben kon tapoe’ Maria, di meki a kon kisi bere èn te foe kaba a kisi wan volmaakti pikin (Lukas 1:34, 35). Jesus no ben kisi no wan onvolmaaktifasi, foe di en libi ben kon foe wan volmaakti Fonten. A ben kweki ini wan eenvoudig osofamiri leki a kweki manpikin foe a temreman Josef èn ben de a fosiwan foe den tra pikin ini na osofamiri. — Jesaja 7:14; Mateus 1:22, 23; Markus 6:3.
16, 17. (a) Foe pe Jesus ben kisi a krakti foe doe wondroe, èn san ben de wan toe foe den? (b) San na wan toe eigifasi di Jesus ben sori?
16 A gi di Jesus ben e gi ensrefi troetroe na Jehovah Gado ben de foe si kaba di a ben abi 12 jari (Lukas 2:41-49). Baka di Jesus gro kon bigi èn bigin nanga en diniwroko di a ben abi 30 jari, a ben sori toe taki a abi dipi lobi gi den kompe libisma foe en. Di a santa jeje foe Gado ben gi en krakti foe doe wondroe, dan na wan sari-atifasi a ben dresi den sikisma, den malengriwan, den sma di lasi wan pisi foe den skin, den breniwan, den dofoewan, den gwasiman (Mateus 8:2-4; 15:30). Jesus ben gi njanjan na doesoendoesoen sma di ben de nanga angri (Mateus 15:35-38). A ben bedari wan bigi winti di ben tjari den mati foe en kon ini kefar (Markus 4:37-39). Te joe loekoe en boen, dan a ben wiki dedewan srefi (Johanes 11:43, 44). Den wondroe disi na troe tori foe historia di sma ondrosoekoe den boeweisi foe den finifini. Srefi den feanti foe Jesus ben erken taki a ’ben doe foeroe marki’. — Johanes 11:47, 48.
17 Jesus ben teki waka go na ini a heri kondre pe a ben gro, èn ben e leri sma foe a Kownoekondre foe Gado (Mateus 4:17). A ben poti so srefi wan moro boen eksempre fa sma moesoe de nanga pasensi èn nanga reidelekfasi. Srefi di den disipel foe en no ben doe san a ben froewakti foe den, a ben taki na wan fasi di ben sori taki a ben froestan fa den ben firi: „A no de foe taki, dati a jeje wani, ma a skin swaki” (Markus 14:37, 38). Tokoe, Jesus ben abi deki-ati èn a no ben kibri no wan sani te a ben taki nanga den wan di ben wisiwasi a waarheid èn di ben kwinsi den wan di no ben man jepi densrefi (Mateus 23:27-33). Ma a moro prenspari sani ben de taki a ben waka na wan volmaakti fasi na baka na eksempre foe en Tata foe sori lobi. Jesus ben de klariklari srefi foe dede, so taki na onvolmaakti libisma famiri ben sa abi wan howpoe gi a ten di o kon. Foe dati ede, a no de foe froewondroe, taki wi kan sori na wan boen fasi go na Jesus leki a sroto foe feni a sabi foe Gado! Ija, en na a sroto di e libi! Ma foe san ede wi e taki wan sroto di e libi? Disi e tjari wi go na a di foe dri pisi ten foe en waka nanga libi.
JESUS NA INI A TEN DISI
18. Fa wi moesoe denki foe Jesus Krestes na ini a ten disi?
18 Ala di bijbel e taki foe Jesus en dede, tokoe a de na libi now! Te joe loekoe en boen, dan hondrohondro sma di ben e libi na ini a fosi jarihondro G.T. ben si taki a ben kisi wan opobaka (1 Korentesma 15:3-8). Soleki fa a profeiti ben taki na fesi, dan baka dati a ben go sidon na a reti-anoesei foe en Tata èn ben wakti foe kisi kownoe makti na hemel (Psalm 110:1; Hebrewsma 10:12, 13). So boen, fa wi moesoe denki foe Jesus na ini a ten disi? Wi moesoe denki foe en leki wan beibi di no man doe noti èn di e didon na ini wan njanjan baki? Noso wi moesoe denki foe Jesus leki wan man di abi hebi skin-ati èn di den ben kiri? Kwetikweti. En na wan makti Kownoe di e tiri! Èn heri esi a sa sori en tirimakti tapoe a heri grontapoe foe wi di lai nanga problema.
19. San Jesus o doe na ini a ten di no de so fara moro?
19 Na wan libilibi fasi Openbaring 19:11-15 e taki foe a Kownoe Jesus Krestes, di e kon nanga bigi makti foe pori den ogriwan. A lobi-ati hemel Tiriman disi moesoe angri srefisrefi foe tjari wan kaba kon na a pina di miljoenmiljoen sma e pina na ini a ten disi! Èn na so a e angri toe foe jepi den sma di e doe foeroe moeiti foe waka na baka a volmaakti eksempre di a ben gi di a ben de na grontapoe (1 Petrus 2:21). A wani kibri den foe den no kisi pori na ini a „feti foe a bigi dei foe Gado na Almaktiwan”, di foeroe tron den e kari Armagedon, èn di e kon krosibei esi-esi, so taki den kan libi foe têgo na grontapoe leki borgoe foe en hemel Kownoekondre. — Openbaring 7:9, 14; 16:14, 16.
20. San Jesus o doe gi a libisma famiri na ini a ten foe en Doesoen Jari Tiri?
20 Na ini a ten foe en Doesoen Jari Tiri foe vrede di ben taki na fesi kaba, Jesus sa doe wondroe gi a boen foe a heri libisma famiri (Jesaja 9:6, 7; 11:1-10; Openbaring 20:6). Jesus sa dresi ala siki èn a sa tjari wan kaba kon na dede. A sa gi doesoendoesoen miljoen sma wan opobaka, so taki so srefi den kan kisi wan okasi foe libi foe têgo na grontapoe (Johanes 5:28, 29). Wi sabi seiker taki joe sa prisiri foe kon sabi moro foe a Mesian Kownoekondre foe en na ini wan tra kapitel. De seiker foe disi: Wi no kan prakseri srefi o switi a libi foe wi sa de na ondro a tiri foe a Kownoekondre. A de troetroe wan prenspari sani foe kon sabi Jesus Krestes moro boen! Ija, a de prenspari taki noiti wi no e frigiti Jesus, a libi sroto foe feni a sabi foe Gado di e tjari wi go na têgo libi.
[Foetoewortoe]
^ paragraaf 7 A poti disi di sma ben moesoe poti den nen skrifi na ini lantiboekoe, ben meki taki a ben de moro makriki gi a Tirimakti foe Rome foe aksi belasting. Foe dati ede, sondro foe Augustus ben sabi, a ben jepi meki wan profeititori kon troe, di e taki foe wan tiriman di ben sa ’meki wan sma di ben o poeroe moni na sma skin pasa na ini a kownoekondre’. A srefi profeititori ben taki na fesi dati „a Fesiman foe a froebontoe”, noso Mesias, ben sa „broko” na ini a ten foe a tiriman di ben o kon baka a tiriman disi. Den ben kiri Jesus na ini a ten foe Tiberius, a sma di ben tiri baka Augustus. — Danièl 11:20-22.
^ paragraaf 8 Den djoe foe owroeten ben abi a gwenti foe denki ini jariwiki. Foe eksempre, neleki fa ibri di foe seibi dei ben de wan Sabadei, na so ibri di foe seibi jari ben de wan Sabajari. — Exodus 20:8-11; 23:10, 11.
ONDROSOEKOE A SABI FOE JOE
Fa a famirilin foe Jesus e boeweisi taki a ben de a Mesias?
San na wan toe profeititori foe a Mesias, di e kon troe na ini Jesus?
Fa Gado ben sori langalanga taki Jesus ben de en Salfoewan?
Foe san ede Jesus na a sroto di e libi, foe feni a sabi foe Gado?
[Aksi foe a tori disi]
[Tabel na tapoe bladzijde 37]
WAN TOE TOEMOESI APARTI PROFEITITORI FOE A MESIAS
PROFEITITORI SANI DI BEN PASA A KONTROE
DEN JONGOE JARI FOE EN
Jesaja 7:14 Wan njoenwenke ben Mateus 1:18-23
meki en
Jeremia 31:15 Den ben kiri beibi Mateus 2:16-18
baka di a gebore
EN DINIWROKO
Jesaja 61:1, 2 A wroko di a ben Lukas 4:18-21
kisi foe Gado
Jesaja 9:1, 2 En diniwroko ben meki Mateus 4:13-16
sma si wan bigi leti
Psalm 69:9 A ben abi faja gi Johanes 2:13-17
na oso foe Jehovah
Jesaja 53:1 Sma no ben bribi na Johanes 12:37, 38
ini en
Sakaria 9:9; A ben kon na ini Mateus 21:1-9
Psalm 118:26 Jerusalem na tapoe
wan pikin foe wan
oemaboeriki; den ben
prèise en leki kownoe
èn leki a sma di ben
kon na ini a nen foe
Jehovah
A TORI DI DEN BEN TORI EN ÈN A DEDE FOE EN
Psalm 41:9; 109:8 Wan apostel no ben de Tori foe den Apostel 1:15-20
getrow; a e tori Jesus
èn wan trawan poti na
ini en presi
Sakaria 11:12 Den ben tori en foe Mateus 26:14, 15
30 pisi solfroe moni
Psalm 27:12 Den ben gebroiki falsi Mateus 26:59-61
kotoigi teige en
Psalm 22:18 Den ben trowe lot gi Johanes 19:23, 24
den krosi foe en
Jesaja 53:12 Den ben teri en Mateus 27:38
nanga sondari
Psalm 22:7, 8 Den ben skempi en, ala Markus 15:29-32
di a ben de foe dede
Psalm 69:21 Den ben gi en asin Markus 15:23, 36
Jesaja 53:5; Den ben boro en Johanes 19:34, 37
Jesaja 53:9 Den ben beri en na Mateus 27:57-60
den goedoewan
Psalm 16:8-11, A ben kisi wan opobaka Tori foe den Apostel 2:25-32;
foetoewortoe. bifo en skin ben pori 13:34-37
[Prenki na tapoe bladzijde 35]
Gado ben gi Jesus a krakti foe dresi den sikisma
