Joe kan abi wan kolokoe tamara!
Kapitel 1
Joe kan abi wan kolokoe tamara!
1, 2. San a Mekiman foe joe wani foe joe abi?
WAN waran brasa foe wan sma di joe lobi. A switi lafoe di joe e lafoe, ala di joe e njan wan boen njanjan nanga mati di joe lobi. A prisiri di joe e prisiri foe si fa joe pikin breiti ala di den e prei. Momenti leki disi na prisiri momenti na ini a libi. Ma gi foeroe sma, a gersi leki a libi e tjari a wan serjoesoe problema baka a trawan kon. Efoe na dati joe e ondrofeni, dan hori deki-ati.
2 A de a wani foe Gado taki joe e njan boen foe têgo kolokoe na ini den moro boen situwâsi ini kefalek moi kontren. Disi a no soso wan dren, bika te joe loekoe en boen, dan Gado e gi joe a sroto foe kisi so wan kolokoe tamara. A sroto dati na sabi.
3. Sortoe sabi na a sroto foe de kolokoe, èn foe san ede wi kan de seiker taki Gado kan gi a sabi dati?
3 Wi e taki foe wan spesroetoe sortoe sabi di bigi moro leki libisma koni. Na „a sabi foe Gado” (Odo 2:5). Pikinmoro 2000 jari pasa kaba, wan bijbel skrifiman ben taki: „Ibri oso abi wan sma di meki en, ma a sma di meki ala sani, na Gado” (Hebrewsma 3:4). Prakseri foe a sabi di a Mekiman foe ala sani moesoe abi! Bijbel e taki dati Gado e teri ala den stari èn e gi den nen. A de troetroe wan prakseri di e froewondroe sma, foe di hondrohondro miljard stari de na ini a stari sistema foe wi, èn den sabiman tapoe a kontren foe astronomia e taki dati so wan wán hondro miljard tra stari sistema de ete! (Psalm 147:4) Gado sabi so srefi ala sani foe wi, so boen, soema boiti en kan gi moro boen piki na tapoe den prenspari aksi foe a libi? — Mateus 10:30.
4. Foe san ede wi moesoe froewakti foe Gado taki a sa gi leri foe tiri wi, èn sortoe boekoe e gi a leri disi?
4 Teki leki eksempre, toe man di e proeberi foe meki den oto foe den di broko. A wan man di e froeferi foe a wroko, e tapoe nanga a wroko foe meki na oto. A tra man e loesoe a problema safrisafri, e drai a sroto foe na oto, èn a e lafoe te a motor e start èn e drai boen. A no ben sa de wan moeilek sani gi joe foe taki sortoe wan foe den toe man ben abi wan boekoe nanga bodoi foe a fabriek di meki den oto. A no de reidelek dan, taki Gado ben sa gi wi wan boekoe nanga leri foe tiri wi na ini a libi? Soleki fa joe sabi kande, dan bijbel e taki dati a de soifri a boekoe dati — wan boekoe di abi a leri nanga a tiri foe wi Mekiman na ini, di meki foe gi wi a sabi foe Gado. — 2 Timoteus 3:16.
5. O warti a sabi de di de na ini bijbel?
5 Efoe san bijbel e taki troe, dan prakseri pikinso sortoe goedoe foe sabi a boekoe dati moesoe abi na ini! Na Odo 2:1-5, a e gi wi tranga foe soekoe koni, foe diki foe feni en, soleki fa wi ben sa diki foe feni wan goedoe di kibri — no na ini a gron foe libisma prakseri, ma na ini Gado en eigi Wortoe. Efoe wi e soekoe drape, dan wi sa „feni a sabi foe Gado”. Foe di Gado e froestan den sani di wi no man doe, èn e froestan den nowtoe foe wi, meki a e gi wi leri di sa jepi wi foe libi ini vrede nanga kolokoe (Psalm 103:14; Jesaja 48:17). Moro fara, a sabi foe Gado e gi wi span boen njoensoe.
TÊGO LIBI!
6. Sortoe djaranti Jesus Krestes ben gi di abi foe doe nanga a sabi foe Gado?
6 A historia sma Jesus Krestes di sma sabi heri boen, ben taki na wan krin fasi foe a spesroetoe tori disi foe a sabi foe Gado. A ben taki: „Disi wani taki têgo libi, foe den teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes” (Johanes 17:3). Prakseri pikinso — sabi di e tjari joe go na têgo libi!
7. Fa wi sabi taki Gado no ben wani taki wi moesoe dede?
7 No de so esi foe taki dati têgo libi na soso wan dren. Na presi foe dati, loekoe na a fasi fa a skin foe libisma meki. A meki kefalek moi foe tesi sani, foe jere, foe smeri, foe si nanga foe firi. Someni sani de na grontapoe di e meki den sortoe sani foe wi leki si, jere, smeri, firi, nanga tesi de wan prisiri sani — switi njanjan, moi singi foe pikin fowroe, bromki di e smeri switi, wan moi presi foe si, prisiri matifasi! Èn a froewondroe edetonton foe wi de moro leki wan bigi computer, bika a e meki taki wi kan warderi èn njan boen foe ala den sortoe sani dati. Joe denki taki wi Mekiman ben wani, taki wi moesoe dede èn lasi ala den sani disi? A no ben sa de moro reidelek foe kon na a bosroiti taki a wani foe wi libi kolokoe èn taki wi e njan boen foe a libi foe têgo? We, dati na san a sabi foe Gado kan wani taki gi joe.
A LIBI NA INI A PARADIJS
8. San bijbel e taki foe a tamara foe a libisma famiri?
8 San bijbel e taki foe a tamara foe grontapoe nanga a libisma famiri, joe ben kan taki nanga toe wortoe: — a Paradijs! Jesus Krestes ben taki foe disi di a ben taigi wan man di ben o dede: „Joe sa de nanga mi na ini a Paradijs” (Lukas 23:43). Sondro tweifri a taki di Jesus ben taki foe a Paradijs, ben tjari a kolokoe ten di wi fosi papa nanga mama, Adam nanga Eva, ben abi, kon na a prakseri foe a man dati. Di Gado ben meki den, den ben de volmaakti èn den ben libi na ini wan park di ben gersi wan moi djari di a Mekiman ben meki èn ben prani. A ben fiti, taki a ben kari a djari, a djari foe Eden, di a nen foe en wani taki prisiri.
9. Fa a ben de foe libi na ini a Paradijs di ben de biginbigin?
9 Fa a djari dati ben de wan prisiri presi! A ben de wan troetroe paradijs. Na mindri den moi bon di ben de na ini a djari, wan toe bon ben de, di ben e meki switi froktoe. Di Adam nanga Eva ben ondrosoekoe a presi pe den ben e tan, ben dringi foe krin èn gosontoe watra, ben piki froktoe foe den bon, den no ben abi no wan enkri reide foe abi broko-ede noso foe frede. Den no ben abi foe frede srefi den meti, bika Gado ben poti a man nanga en wefi foe basi den alamala na wan lobi fasi. Boiti dati, a fosi libisma paar ben abi wan toemoesi boen gosontoe. So langa den ben tan gi jesi na Gado, wan têgo, kolokoe tamara ben wakti den. Den ben kisi a prisiri wroko foe sorgoe gi a toemoesi moi Paradijs oso foe den. Moro fara, Gado ben gi Adam nanga Eva a komando foe ’foeroe grontapoe èn poti en na den ondro’. Den nanga den pikin foe den ben moesoe bradi den skotoe foe a Paradijs te leki a heri planeet foe wi ben kon tron wan moi èn prisiri presi. — Genesis 1:28.
10. San Jesus ben wani taki, di a ben taki foe a Paradijs?
10 Ma di Jesus ben taki foe a Paradijs, a no ben aksi wan man di ben o dede, foe prakseri foe a ten di pasa langa ten kaba. Nôno, Jesus ben e taki foe a ten di ben o kon! A ben sabi taki heri grontapoe di de leki na oso foe wi, ben sa kon tron wan paradijs. So boen, Gado ben sa meki a prakseri kon troe di a ben abi biginbigin nanga a libisma famiri èn nanga a grontapoe foe wi (Jesaja 55:10, 11). Ija, a Paradijs sa meki kon boen baka! Èn fa a sa de? Meki a Wortoe foe Gado, bijbel, gi a piki.
A LIBI NA INI A PARADIJS DI MEKI KON BOEN BAKA
11. San o pasa nanga siki, owroe dei, nanga dede, na ini a Paradijs di meki kon boen baka?
11 Siki, owroe dei, nanga dede no sa de moro. „Na ini a ten dati den ai foe den breniwan sa kon opo, èn srefi den jesi foe den dofoewan sa kon opo. Na ini a ten dati a malengriwan sa kren neleki wan dia, èn a tongo foe a babaw-wan sa bari wan prisiri babari” (Jesaja 35:5, 6). „Gado srefi sa de nanga [libisma]. Èn a sa figi poeroe ala watra-ai na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” — Openbaring 21:3, 4.
12. Foe san ede wi kan de seiker taki no wan takroedoe, ogri di doe nanga tranga, nanga ogridoe no sa de moro na ini a Paradijs di e kon?
12 Takroedoe, ogri di doe nanga tranga, nanga ogridoe no sa de noiti moro. „Den sa koti ogri sma poeroe . . . Ete wan sjatoe ten èn na ogriwan no sa de moro . . . A no sa de moro. Ma den safri-ati sma sa abi grontapoe” (Psalm 37:9-11). „Foe taki foe den ogri sma, den sa koti den poeroe foe grontapoe srefi; èn foe taki foe den wan di e tori trawan, den sa hari den poeroe foe en.” — Odo 2:22.
13. Fa Gado sa tjari vrede kon?
13 Vrede sa de na ala sei foe grontapoe. „A [Gado] e meki feti kon na wan kaba te na a moro farawe presi foe grontapoe. A e broko a bo krinkrin èn a e koti a lansri na pisipisi” (Psalm 46:9). „A regtfardikiwan sa sproiti, èn vrede pasa marki [sa de], te leki moen no de moro.” — Psalm 72:7.
14, 15. San bijbel e taki foe oso, wroko, nanga njanjan na ini a Paradijs di meki kon boen baka?
14 Oso sa de seiker èn wroko sa gi prisiri. „Den sa bow oso troetroe èn go libi na ini . . . Den no sa bow èn wan tra sma go libi na ini; den no sa prani èn wan tra sma go njan foe en. Bika den dei foe a pipel foe mi sa de leki den dei foe wan bon; èn den sma di mi ben teki, sa gebroiki a wroko foe den eigi anoe krinkrin. Den no sa wroko tranga foe soso, noso kisi pikin nanga problema.” — Jesaja 65:21-23.
15 Gosontoe njanjan sa de foe feni pasa marki. „Karoe sa de foeroe na grontapoe; na tapoe na ede foe den bergi sani sa de pasa marki” (Psalm 72:16). „Grontapoe srefi sa gi troetroe en njanjan; Gado, wi Gado, sa blesi wi.” — Psalm 67:6.
16. Foe san ede a libi na ini a Paradijs sa de wan prisiri sani?
16 Têgo libi na ini wan paradijs na grontapoe sa de wan prisiri sani. „Na den regtfardikiwan sa abi grontapoe, èn den sa libi na tapoe foe têgo” (Psalm 37:29). „A gran sabana nanga a presi sondro watra sa breiti pasa marki, èn a drei kontren sa de nanga prisiri èn a sa gi bromki leki a safraan.” — Jesaja 35:1.
SABI NANGA A TAMARA FOE JOE
17. (a) San joe moesoe doe efoe joe firi taki joe lobi a libi na ini a Paradijs? (b) Fa wi sabi taki Gado sa tjari bigi kenki kon na grontapoe?
17 Efoe joe firi taki joe lobi a libi na ini a Paradijs, dan no meki noti tapoe joe foe kisi a sabi foe Gado. Gado lobi a libisma famiri èn a sa tjari den kenki kon di de fanowdoe foe meki grontapoe kon tron wan paradijs. Prakseri pikinso, efoe joe ben abi a makti foe tjari wan kaba kon na pina nanga onregtfardikifasi di de so foeroe na grontapoe, dan joe no ben sa doe dati? Wi ben sa froewakti moro mendri foe Gado? Foe taki en leti, bijbel e taki na wan krin fasi foe wan ten te Gado sa poeroe a seti disi di foeroe nanga strei, èn te a sa poti wan volmaakti, regtfardiki tiri na ini en presi (Danièl 2:44). Ma bijbel e doe moro leki foe froeteri wi ala den sani disi nomo. A e sori wi fa wi kan pasa go libilibi na ini a njoen grontapoe di Gado pramisi. — 2 Petrus 3:13; 1 Johanes 2:17.
18. San a sabi foe Gado kan gi joe nownow kaba?
18 So srefi nownow kaba a sabi foe Gado kan gi joe wini toe. Bijbel abi den piki na tapoe den moro moeilek aksi di e gi moro broko-ede na ini a libi. Te joe e teki a tiri foe bijbel, dan dati sa jepi joe foe kweki wan matifasi nanga Gado. Dati na troetroe wan bigi grani! Èn disi sa meki taki joe kan njan boen foe a vrede di Gado wawan kan gi (Romesma 15:13, 33). Te joe e bigin teki a prenspari sabi disi na ini joe, dan joe e bigin nanga a moro prenspari moeiti di joe doe na ini joe libi èn di abi a moro boen bakapisi. Noiti joe sa sari taki joe ben kisi a sabi foe Gado di e tjari joe go na têgo libi.
19. Na tapoe sortoe aksi wi sa poti prakseri na ini a tra kapitel?
19 Wi sori na tapoe bijbel leki a boekoe di abi a sabi foe Gado na ini. Ma fa wi doe sabi taki a no de wan boekoe foe libisma koni, ma wan sani di bigi moro srefisrefi? Na ini a tra kapitel wi sa poti prakseri na tapoe na aksi disi.
ONDROSOEKOE A SABI FOE JOE
Foe san ede a sabi foe Gado kan tjari joe go na têgo kolokoe?
Fa a libi sa de na ini a Paradijs grontapoe di e kon?
Foe san ede joe sa abi wini te joe e teki a sabi foe Gado na ini joe nownow?
[Aksi foe a tori disi]
