Kapitel 12

Kakafoetoe gi ogri jeje krakti

1. Fa Jesus ben doe di a ben kisi foe doe nanga ogri jeje?

SJATOE baka di Jesus Krestes teki dopoe, a ben go na a gran sabana foe Judea foe begi èn foe prakseri dipi foe sani. Drape Satan Didibri ben proeberi foe meki en pasa Gado wet. Ma Jesus ben weigri foe meki Didibri tesi en èn a no ben fadon go na ini en trapoe. Jesus ben kisi foe doe nanga tra ogri jeje na ini a ten foe en diniwroko na grontapoe. Tokoe, ibri tron baka a ben piri-ai gi den èn ben kakafoetoe gi den. — Lukas 4:1-13; 8:26-34; 9:37-43.

2. Tapoe sortoe aksi wi sa poti prakseri?

² Bijbel tori di e taki foe den ondrofeni dati, moesoe overtoigi wi taki ogri jeje krakti de. Den e proeberi foe kori sma. Ma wi kan kakafoetoe gi den ogri jeje disi. Ma foe pe den ogri jeje komoto? Foe san ede den e proeberi foe kori libisma? Èn sortoe sani den e gebroiki foe man doe den sani di den abi na prakseri? Te joe kisi den piki na tapoe den sortoe aksi dati, dan a sa jepi joe foe kakafoetoe gi den ogri jeje krakti.

OGRI JEJE — FA DEN DOE KON ÈN A SANI DI DEN ABI NA PRAKSERI

3. Fa Satan Didibri ben kon de?

³ Jehovah Gado ben meki foeroe jeje mekisani langa ten bifo a ben meki libisma (Job 38:4, 7). Soleki fa ben tjari kon na krin kaba ini kapitel 6, dan wan foe den engel disi ben kon kisi wan lostoe foe meki libisma anbegi en na presi foe den e anbegi Jehovah. Foe di na ogri engel  disi ben e doe moeiti foe meki a prakseri foe en kon troe, meki a ben kakafoetoe gi a Mekiman èn ben pori en nen, èn a ben gi a fosi oema srefi a prakseri taki Gado ben de wan leiman. A e fiti foe dati ede, taki a jeje mekisani disi di opo ensrefi teige Gado, ben kon de bekènti leki Satan (gensman) Didibri (leiman di e pori sma nen). — Genesis 3:1-5; Job 1:6.

4. Fa son engel ben sondoe na ini a ten foe Noa?

⁴ Baka ten, tra engel ben teki a sei foe Satan Didibri. Na ini den dei foe a regtfardiki man Noa, son wan foe den engel disi ben gowe libi a diniwroko foe den na hemel èn ben teki libisma skin foe satisferi a lostoe foe den foe abi seks nanga den oema na grontapoe. Sondro tweifri, Satan ben abi krakti na tapoe den engel dati foe teki a pasi dati foe trangajesi Gado. A ben abi leki bakapisi taki den ben tron papa foe den basra pikin di den ben kari Nefilim, èn di ben kon tron fetiman di ben doe ogri nanga tranga. Di Jehovah ben meki a bigi Froedoe kon, a Froedoe ben kiri a pori libisma famiri nanga den pikin disi foe den trangajesi engel di no ben meki foe kisi pikin. Den engel di ben opo densrefi teige Gado no ben kisi pori, foe di den ben poeroe a libisma skin foe den èn ben drai go baka na a jejekondre. Ma Gado ben skotoe den ogri jeje disi, foe di a ben handri nanga den leki sma di a ben trowe go na ini doengroe na jejefasi (Genesis 6:1-7, 17; Judas 6). Ma tokoe Satan, „a tiriman foe den ogri jeje”, nanga den ogri engel foe en, go doro nanga na opo di den opo densrefi teige Gado (Lukas 11:15). San den abi na prakseri?

5. San Satan nanga den ogri jeje foe en abi na prakseri, èn san den e gebroiki foe kisi sma?

⁵ Na ogri prakseri foe Satan nanga den ogri jeje na foe meki sma drai den baka gi Jehovah Gado. Foe dati ede, na ini a heri libisma historia, den ogriwan disi ben kori sma, ben meki sma frede, èn ben pramisi foe doe den ogri (Openbaring 12:9). Disiten eksempre e sori taki na atibron di den ogri jeje e atibron, de moro takroe now leki oiti. Nofo tron den ogri jeje e gebroiki afkodrei na ini ala  den difrenti fasi, so taki den kan kisi sma. Fa den ogri jeje e gebroiki afkodrei leki beti, èn fa joe kan kibri joesrefi?

FA OGRI JEJE E PROEBERI FOE KORI JOE

6. San na afkodrei, èn san na wan toe fasi foe afkodrei?

⁶ San na afkodrei? Na te wan sma e taki nanga ogri jeje èn e wroko makandra nanga den, efoe na ensrefi e doe disi noso nanga jepi foe wan sma di de leki wan asi foe den jeje. Gi den ogri jeje afkodrei e doe a srefi leki san beti e doe gi wan ontiman: a beti e hari a sani kon di na ontiman wani kisi. Èn neleki fa wan ontiman e gebroiki difrenti beti foe kori meti meki den kon na ini en trapoe, na so ogri jeje e gi sma deki-ati foe doe den difrenti fasi foe afkodrei, so taki den sma kan kon na ondro a makti foe den. (Teki gersi Psalm 119:110.) Wan toe foe den fasi disi na loekoeman-wroko, obia, a loekoe di sma e loekoe marki foe san o kon, towfroewroko, a wisi di sma e wisi trawan, a soekoe di sma e soekoe rai na wan sma di de leki wan asi foe den jeje, nanga a taki di sma e taki nanga den dedewan.

7. Omeni afkodrei de foe feni na grontapoe, èn foe san ede foeroe sma di e libi na den sokari kresten kondre e doe afkodrei?

⁷ Den abi boen bakapisi nanga a beti, foe di na heri grontapoe afkodrei e hari sma. Den wan di e libi na boesikondre, e go na den bonoeman, èn sma di e wroko na kantoro na den foto, e go na den astroloog. Srefi na den sokari kresten kondre, foeroe sma e doe afkodrei. Na Amerkankondre wawan, so wan 30 tijdschrift di makandra den e seri moro leki 10 miljoen eksemplaar, e taki spesroetoe foe difrenti fasi foe afkodrei. Brasjonsma e pai moro leki 500 miljoen dala gi afkodrei sani ibri jari. Tokoe na a kondre dati 80 procent foe den sma di e go na den presi pe den e doe afkodrei, na dopoe katolieksma di e go na den mis toe. Foe di wan toe tiriman foe krestenhèit e doe afkodrei, meki foeroe kerki sma e prakseri taki te wan sma e doe afkodrei, dan Gado e feni en boen. Ma disi troe?

 FOE SAN EDE BIJBEL E KROETOE AFKODREI

8. San bijbel e taki foe afkodrei?

⁸ Efoe joe ben leri taki wan toe fasi foe afkodrei na fasi foe kon ini kontakti nanga boen jeje, dan kande joe sa froewondroe foe leri san bijbel e taki foe afkodrei. A pipel foe Jehovah ben kisi a warskow: „No go na den sma di de leki wan asi foe den jeje, èn no go na den sma di abi leki wroko foe taki sani na fesi, so taki den meki oenoe no kon de krin” (Lefitikus 19:31; 20:6, 27). A bijbel boekoe Openbaring e warskow taki „den sma di e doe afkodrei” te foe kaba sa kon na ini „a se di e bron nanga faja èn nanga swarfoe. Disi wani taki a di foe toe [têgo] dede” (Openbaring 21:8; 22:15). No wan enkri fasi foe afkodrei Jehovah Gado e feni boen (Deuteronomium 18:10-12). Foe san ede?

9. Foe san ede wi kan taki dati den boskopoe foe disiten foe a jejekondre no komoto na Jehovah?

⁹ Bifo bijbel ben kaba skrifi, Jehovah ben seni boen jeje, noso regtfardiki engel kon foe taki nanga wan toe libisma. Sensi a ten di bijbel ben kaba skrifi, a Wortoe foe Gado gi a tiri di libisma abi fanowdoe foe dini Jehovah na a fasi di en feni boen (2 Timoteus 3:16, 17; Hebrewsma 1:1, 2). A no e poti en santa Wortoe na wan sei foe di a e gi boskopoe na sma di de leki wan asi foe den jeje. Ala den sortoe boskopoe dati foe disiten di komoto na a jejekondre, e kon foe ogri jeje. Afkodrei kan meki taki ogri jeje e pina wan sma noso kan meki srefi taki den ogri jeje e kon na a sma tapoe. Foe dati ede, Gado e warskow wi na wan lobi fasi foe no kon abi foe doe nanga no wan afkodrei wroko (Deuteronomium 18:14; Galasiasma 5:19-21). Boiti dati, efoe wi tan doe afkodrei, baka di wi kon sabi fa Jehovah e prakseri foe disi, dan wi ben sa teki a sei foe den ogri jeje di opo densrefi teige Gado èn wi ben sa de feanti foe Gado. — 1 Samuèl 15:23; 1 Kroniki 10:13, 14; Psalm 5:4.

10. San na loekoeman-wroko, èn foe san ede wi moesoe tan farawe foe dati?

¹⁰ Wan pôpi fasi foe afkodrei na loekoeman-wroko — a  proeberi di wan sma e proeberi nanga jepi foe den jeje foe kon sabi san o pasa na ini a ten di e kon noso foe kon sabi sani di no de bekènti. Wan toe fasi foe loekoeman-wroko na astrologie, a loekoe di wan sma e loekoe go na ini wan kristal bol, a froeklari di sma e froeklari dren, a leisi di wan sma e leisi den lin foe sma anoe, nanga loekoeman-wroko foe di a sma e gebroiki tarok karta. Foeroe sma e si loekoeman-wroko leki wan prisiri sani di no e doe ogri. Ma bijbel e sori taki loekoeman nanga ogri jeje na tara nanga janki. Foe eksempre, Tori foe den Apostel 16:16-19 e taki foe „wan ogri jeje foe loekoeman-wroko” di ben meki wan seiker oemapikin doe „a wroko foe taki sani na fesi”. Ma a no ben man taki sani na fesi moro di na ogri jeje ben poeroe na en tapoe. A de krin, taki loekoeman-wroko na wan beti di ogri jeje e gebroiki foe hari sma kon na ini a trapoe foe den.

11. Fa a proeberi di wan sma e proeberi foe taki nanga den dedewan e meki a sma fadon go na ini wan trapoe?

¹¹ Efoe joe e sari foe di wan lobi famiriman noso wan krosibei mati foe joe dede, dan wan tra beti ben kan kori joe makriki. Wan sma di de leki wan asi foe den jeje kande e taigi joe spesroetoe sani noso e taki kande nanga wan sten di gersi a sten foe a dede sma. Loekoe boen! A proeberi di wan sma e proeberi foe taki nanga den dedewan, e meki a sma fadon go na ini wan trapoe. Foe san ede? Bika den dedewan no man taki. Kande joe memre ete, taki Gado Wortoe e taki krin taki te wan sma dede, a „e go baka na en gron; na a dei dati den prakseri foe en e lasi gowe”. Den dedewan „no sabi noti moro” (Psalm 146:4; Preikiman 9:5, 10). Boiti dati, te joe loekoe en boen, dan sma sabi taki a de troetroe den ogri jeje di teki a sten foe a sma di dede èn e taigi wan sma di de leki wan asi foe den jeje, sani di abi foe doe nanga a sma di dede (1 Samuèl 28:3-19). So boen, „iniwan sma di e taki nanga den dedewan”, e kon na ini a trapoe foe den ogri jeje èn e handri kontrari a wani foe Jehovah Gado. — Deuteronomium 18:11, 12; Jesaja 8:19.

 FOE WAN SANI DI E HARI SMA, A E KENKI KON TRON WAN SANI FOE DOE SMA OGRI

12, 13. Sortoe boeweisi de taki den ogri jeje e go doro foe tesi èn trobi sma?

¹² Te joe e gi jesi na a rai foe Gado Wortoe ini a tori foe afkodrei, dan joe e wai a beti foe den ogri jeje poti na wan sei. (Teki gersi Psalm 141:9, 10; Romesma 12:9.) Disi wani taki dati ogri jeje no sa proeberi moro foe kisi joe? Kwetikweti! Baka di Satan tesi Jesus dri tron, a „gowe libi en foe wan tra leisi di e fiti” (Lukas 4:13). Na a srefi fasi den tranga-ede jeje no e hari sma wawan, ma e kon toe foe doe den ogri.

¹³ Memre san wi ben loekoe kaba foe na ogri di Satan ben doe Job, a foetoeboi foe Gado. Didibri ben meki a lasi den meti foe en, èn ben meki pikinmoro ala foetoeboi foe en dede. Satan ben kiri den pikin foe Job srefi. Baka dati, Didibri ben naki Job nanga wan siki di ben gi foeroe skin-ati. Ma Job ben tan hori en soifri retifasi na Gado èn a ben kisi foeroe blesi (Job 1:7-19; 2:7, 8; 42:12). Sensi a ten dati, den ogri jeje meki wan toe sma kon babaw noso breni èn den tan abi prisiri srefisrefi ini a pina di libisma e pina (Mateus 9:32, 33; 12:22; Markus 5:2-5). Na ini a ten disi, njoensoe e sori taki ogri jeje e trobi son sma na seks-sei èn e meki trawan kon law. Den e gi trawan deki-ati foe kiri sma èn foe kiri densrefi, di de sondoe teige Gado (Deuteronomium 5:17; 1 Johanes 3:15). Tokoe, doesoendoesoen sma di wan leisi ben fadon go na ini a trapoe foe den ogri jeje disi, ben kon fri. Fa den ben man doe disi? Den ben man doe disi foe di den doe prenspari sani.

FA JOE KAN KAKAFOETOE GI OGRI JEJE

14. Fa joe kan kakafoetoe gi den ogri jeje akroederi na eksempre foe den fosi jarihondro kresten foe Efeise?

¹⁴ San na wán fasi fa joe kan kakafoetoe gi ogri jeje èn kibri joesrefi nanga joe osofamiri gi den trapoe foe den? Den fosi jarihondro kresten na Efeise di ben doe afkodrei bifo den ben tron bribiman, ben doe positief sani. Wi  e leisi taki „boen foeroe foe den di ben doe obiawroko, ben tjari den boekoe foe den kon makandra èn ben bron den na fesi foe ala sma” (Tori foe den Apostel 19:19). Srefi efoe joe no doe afkodrei, trowe ala sani di sma e gebroiki gi afkodrei noso di gersi wan afkodrei sani. Disi abi boekoe na ini toe, tijdschrift, video, prenki, pokoe, nanga sani di sma gebroiki foe doe afkodrei. So srefi popki, tapoe èn tra sani di sma e weri foe kisi kibri, nanga presenti di joe kisi foe sma di e doe afkodrei (Deuteronomium 7:25, 26; 1 Korentesma 10:21). Foe gi wan eksempre: Wan langa pisi ten kaba ogri jeje ben trobi wan trowpaar na Tailand. Baka dati den ben trowe ala den sani di ben abi foe doe nanga afkodrei. San ben de a bakapisi? Den ben kon fri foe den ogri di den ogri jeje ben doe den, èn baka dati den ben go na fesi troetroe na jejefasi.

15. San na wan tra sani di de fanowdoe foe kakafoetoe gi ogri jeje krakti?

¹⁵ Wan tra sani di de fanowdoe foe kakafoetoe gi den ogri jeje, na foe gebroiki a rai foe na apostel Paulus foe weri a heri fetisani na jejefasi di Gado gi (Efeisesma 6:11-17). Kresten moesoe meki den fetisani foe den kon tranga foe feti nanga den ogri jeje. San a sani disi abi na ini toe? „Leki a moro prenspari sani,” na so Paulus ben taki, „teki a bigi skilt foe bribi, nanga san oenoe kan kiri ala den peiri di abi faja foe na ogriwan.” Foe troe, o moro joe bribi tranga, o moro boen joe sa man kakafoetoe gi den ogri jeje krakti. — Mateus 17:14-20.

16. Fa joe kan meki joe bribi kon tranga?

¹⁶ Fa joe kan meki joe bribi kon tranga? Foe di joe e go doro foe studeri bijbel èn gebroiki a rai foe en na ini joe libi. A tranga di wan sma bribi tranga, e anga moro foeroe foe o steifi a fondamenti foe a bribi de — a sabi foe Gado. Joe no e agri taki a soifri sabi di joe kisi èn di joe prakseri serjoesoe foe en ala di joe studeri bijbel, bow a bribi foe joe? (Romesma 10:10, 17) Foe dati ede, tweifri no de taki, te joe e go doro nanga a studie disi èn e meki a tron joe gwenti foe go na den konmakandra foe den Kotoigi foe  Jehovah, dan joe bribi sa kon moro tranga srefi (Romesma 1:11, 12; Kolosesma 2:6, 7). A sa de wan tranga fortresi gi joe teige na ogri di ogri jeje e doe sma. — 1 Johanes 5:5.

17. Sortoe tra sani kan de fanowdoe foe kakafoetoe gi den ogri jeje krakti?

¹⁷ Sortoe tra sani wan sma ben sa kan doe di abi a fasti bosroiti foe kakafoetoe gi ogri jeje krakti? Den kresten foe Efeise ben abi kibri fanowdoe, bika den ben libi na ini wan foto di ben lai srefisrefi nanga na anbegi di sma ben anbegi ogri jeje. Foe dati ede, Paulus ben taigi den: „Tan begi ini jeje na ibri okasi” (Efeisesma 6:18). Foe di wi e libi na ini wan grontapoe di lai srefisrefi nanga ogri jeje, dan tranga begi foe kisi kibri foe Gado de tranga fanowdoe foe man kakafoetoe gi den ogri jeje (Mateus 6:13). Wan jepi ini a tori disi, na a jepi na jejefasi nanga den begi foe den owroeman di den poti na wroko na ini a kresten gemeente. — Jakobus 5:13-15.

GO DORO FOE FETI NANGA DEN OGRI JEJE

18, 19. San wan sma kan doe efoe den ogri jeje e trobi a sma agen?

¹⁸ Ma srefi baka di wan toe sma doe den fondamenti sani disi kaba, tokoe ogri jeje trobi den ete. Foe eksempre, wan man na Ivoorkust ben studeri bijbel nanga den Kotoigi foe Jehovah èn a ben pori ala den tapoe foe en. Baka dati a ben go moi na fesi, a ben gi en libi abra na Jehovah, èn a ben teki dopoe. Ma wan wiki baka di a dopoe, den ogri jeje ben bigin trobi en agen, èn sten ben taigi en foe libi a njoen bribi foe en. Efoe a sani disi ben pasa nanga joe, dan disi ben sa wani taki dati joe ben lasi a kibri di Jehovah e kibri joe? A no abi foe de so.

¹⁹ Ala di a volmaakti man Jesus Krestes ben abi a kibri foe Gado, tokoe a ben jere a sten foe na ogri jeje mekisani, Satan Didibri. Jesus ben sori san foe doe ini so wan kefal. A ben taigi Didibri: „Komoto gowe, Satan!” (Mateus 4:3-10) Na a srefi fasi joe moesoe weigri foe arki na sten di e kon foe a jejekondre. Kakafoetoe gi ogri jeje foe  di joe e kari Jehovah foe a jepi joe. Ija, begi nanga tranga sten ala di joe e gebroiki a nen foe Gado. Odo 18:10 e taki: „A nen foe Jehovah na wan tranga fortresi. Na ini en a regtfardikiwan e lon èn e kisi kibri.” A kresten man na Ivoorkust ben doe disi, èn den ogri jeje ben tapoe foe trobi en. — Psalm 124:8; 145:18.

20. Foe taki en sjatoe baka, san joe kan doe foe kakafoetoe gi ogri jeje?

²⁰ Jehovah gi pasi taki den ogri jeje tan na libi, ma Jehovah e sori en krakti spesroetoe gi a boen foe en pipel, èn en nen e meki bekènti na heri grontapoe (Exodus 9:16). Efoe joe e tan krosibei na Gado, dan joe no abi foe frede ogri jeje (Numeri 23:21, 23; Jakobus 4:7, 8; 2 Petrus 2:9). A krakti foe den skotoe. Den ben kisi strafoe na ini a ten foe Noa, den ben trowe komoto na hemel no so langa pasa kaba, èn now den e wakti a lasti kroetoe (Judas 6; Openbaring 12:9; 20:1-3, 7-10, 14). Foe taki en leti, den e frede a pori foe den di e kon (Jakobus 2:19). So boen, awinsi ogri jeje e proeberi foe hari joe nanga wan sortoe beti noso e doe joe ogri na iniwan fasi, joe kan kakafoetoe gi den (2 Korentesma 2:11). Wai pasi gi ibri fasi foe afkodrei, gebroiki a rai foe Gado Wortoe, èn soekoe foe Jehovah feni joe boen. Doe disi sondro draidrai, bika joe libi e anga foe a fasi fa joe e kakafoetoe gi ogri jeje krakti!

ONDROSOEKOE A SABI FOE JOE

Fa ogri jeje e proeberi foe kori sma?

Foe san ede bijbel e kroetoe afkodrei?

Fa wan sma kan kon fri foe ogri jeje krakti?

Foe san ede joe moesoe tan kakafoetoe gi den ogri jeje?

[Aksi foe a tori disi]

 [Prenki na tapoe bladzijde 110]

Fa joe e si afkodrei ini den someni fasi di de?