Kapitel 18

Meki a de a marki foe joe foe dini Gado foe têgo

1, 2. San de fanowdoe boiti a sabi di wan sma abi foe Gado?

KON meki wi taki dati joe e tanapoe na fesi wan doro di sroto èn a doro disi e tjari joe go na ini wan kamra di lai nanga foeroe goedoe. Kon meki wi taki dati wan sma di abi a reti, gi joe a sroto èn taigi joe taki joesrefi kan teki foe den warti sani disi. Soso efoe joe e gebroiki a sroto dati, a sa tjari wini kon gi joe. Na a srefi fasi joe moesoe gebroiki sabi efoe joe wani kisi wini foe en.

² Disi de spesroetoe so nanga a sabi foe Gado. Foe troe, soifri sabi foe Jehovah Gado nanga Jesus Krestes wani taki têgo libi (Johanes 17:3). Tokoe a froewakti dati no man kon troe soso nanga a sabi di joe abi. Neleki fa joe ben sa gebroiki wan sroto di de wan warti sani, na so joe moesoe gebroiki a sabi foe Gado na ini joe libi. Jesus ben taki dati den wan di e doe a wani foe Gado ben sa „go na ini a kownoekondre”. Den sortoe sma disi ben sa kisi a grani foe dini Gado foe têgo! — Mateus 7:21; 1 Johanes 2:17.

3. San na a wani foe Gado gi wi?

³ Baka te wan sma kon sabi san na a wani foe Gado, dan a de toemoesi prenspari foe doe a wani. San joe e denki na a wani foe Gado gi joe? Wi ben sa kan taki en sjatoe nanga den wortoe disi: Waka na baka Jesus. Wán Petrus 2:21 e taigi wi: „Oenoe ben kisi a kari foe waka èn libi na a fasi disi, bikasi srefi Krestes ben pina foe oenoe ede, èn a libi wan model gi oenoe foe waka soifri na ini en foetoemarki.” Foe  dati ede, efoe joe wani doe Gado wani, dan a de fanowdoe foe waka someni leki joe kan soifri na baka na eksempre foe Jesus. Dati na fa joe e gebroiki a sabi foe Gado.

FA JESUS BEN GEBROIKI A SABI FOE GADO

4. Foe san ede Jesus sabi so foeroe foe Jehovah, èn fa a gebroiki a sabi disi?

⁴ Jesus Krestes sabi Gado moro boen leki iniwan tra sma. A ben libi èn wroko nanga Jehovah Gado na hemel doesoendoesoen jari kaba bifo a kon na grontapoe (Kolosesma 1:15, 16). Èn san Jesus ben doe nanga ala a sabi dati? A no ben de tevrede foe abi a sabi disi nomo. Jesus ben libi akroederi a sabi dati. Dati meki a ben abi someni switifasi, pasensi nanga lobi te a ben handri nanga kompe libisma. Na so Jesus ben e waka baka en hemel Tata, èn ben handri akroederi a sabi di a ben abi foe den pasi foe Jehovah nanga en persoonlijkheid. — Johanes 8:23, 28, 29, 38; 1 Johanes 4:8.

5. Foe san ede Jesus ben teki dopoe, èn fa a ben libi akroederi san a dopoe foe en wani taki?

⁵ A sabi di Jesus ben abi, ben boeweigi en toe foe doe wan toemoesi prenspari sani. A ben kon foe Galilea go na Jordan Liba, pe Johanes ben dopoe en (Mateus 3:13-15). San a dopoe foe Jesus ben prenki? Leki wan djoe a ben gebore ini wan nâsi di ben gi ensrefi abra na Gado. So boen, Jesus ben gi ensrefi abra foe sensi a ben gebore (Exodus 19:5, 6). Foe di a ben teki dopoe, a ben pristeri ensrefi na Jehovah foe doe san Gado ben wani taki a ben moesoe doe na ini a ten dati (Hebrewsma 10:5, 7). Èn Jesus ben libi akroederi san a dopoe foe en ben wani taki. A ben span ensrefi na ini a diniwroko foe Jehovah èn ben e prati a sabi foe Gado na sma na ibri okasi. Jesus ben prisiri foe doe a wani foe Gado èn a ben taki srefi dati a ben de leki njanjan gi en. — Johanes 4:34.

6. Na sortoe fasi Jesus ben drai en baka gi ensrefi?

⁶ Jesus ben sabi heri boen taki a doe di a ben moesoe doe a wani foe Gado, ben o de wan toemoesi diri sani — taki a ben sa moesoe gi en libi srefi. Tokoe Jesus ben drai en baka gi ensrefi èn a ben poti den sani di ensrefi ben abi fanowdoe na a di foe toe presi. A doe foe Gado wani ala ten ben kon  na a fosi presi. Fa wi kan waka baka a volmaakti eksempre foe Jesus ini a tori disi?

SANI DI WI MOESOE DOE DI E TJARI WI GO NA TÊGO LIBI

7. San na wan toe sani di wan sma moesoe doe, so taki a sma doro a markitiki foe kan teki dopoe?

⁷ Wi no de volmaakti soleki fa Jesus ben de volmaakti, èn wi kan doro a heimarki foe teki dopoe soso baka te wi doe tra prenspari sani. Disi e bigin te wi e teki a soifri sabi foe Jehovah Gado nanga Jesus Krestes na ini wi ati. Te wi e doe disi, dan a e meki wi sori bribi èn abi dipi lobi gi Gado (Mateus 22:37-40; Romesma 10:17; Hebrewsma 11:6). Te wi e gi jesi na den wet foe Gado, den gronprakseri foe en, nanga den markitiki foe en, dan disi moesoe meki wi kisi berow, èn e sori taki wi e sari na a fasi fa Gado wani, foe den sondoe di wi ben doe fositen. Disi e meki taki wi e drai wi libi, dati wani taki dati wi e drai baka gi iniwan fowtoe fasi foe libi di wi ben abi di wi no ben abi a sabi foe Gado ete, èn wi e libi a fasi foe libi dati (Tori foe den Apostel 3:19). A no de foe taki, dati efoe wi e doe sondoe ete na kibrifasi na presi foe doe san regtfardiki, dan wi no drai baka troetroe, èn wi no kori Gado toe. Jehovah e si ala hoigrifasi. — Lukas 12:2, 3.

8. San joe moesoe doe te joe wani teki prati na a Kownoekondre preikiwroko?

⁸ Now di joe teki a sabi foe Gado na ini joe, a no e fiti foe loekoe jeje afersi na wan toemoesi persoonlijk fasi? Kande joe de fajafaja foe froeteri joe famiri, joe mati, nanga tra sma san joe e leri. Te joe loekoe en boen, dan kande joe e doe disi kaba neleki fa Jesus ben prati a boen njoensoe nanga trawan te na okasi ben de (Lukas 10:38, 39; Johanes 4:6-15). Kande joe wani doe moro now. Den kresten owroeman sa breiti foe taki nanga joe, so taki den kan sabi efoe joe doro a markitiki èn efoe joe kan teki prati na a Kownoekondre preikiwroko foe Jehovah Kotoigi di den e doe doronomo. Efoe joe doro a markitiki èn kan doe en, dan den owroeman sa seti sani gi joe foe meki joe go makandra  nanga wan Kotoigi na ini a diniwroko. Den disipel foe Jesus ben waka na baka den leri foe Jesus, so taki den ben kan doe a diniwroko foe den na wan fasi di ben seti boen (Markus 6:7, 30; Lukas 10:1). Joe sa kisi wini foe a srefi sortoe jepi disi te joe e teki prati ini a panja di den e panja a Kownoekondre boskopoe oso foe oso èn na tra fasi. — Tori foe den Apostel 20:20, 21.

9. Fa wan sma e gi ensrefi abra na Gado, èn fa a gi di a sma e gi ensrefi abra abi krakti na tapoe en libi?

⁹ Foe preiki a boen njoensoe gi ala sortoe sma na ini a gebied foe a gemeente, na wan fasi foe feni den wan di wani de regtfardiki èn disi na wan foe den toemoesi boen wroko di e sori taki joe abi bribi (Tori foe den Apostel 10:34, 35; Jakobus 2:17, 18, 26). Foe go na den kresten konmakandra doronomo èn foe abi wan prati na a preikiwroko di wani taki wan sani, na fasi toe foe sori taki joe abi berow èn drai joe libi èn taki joe teki a bosroiti foe libi akroederi a sabi foe Gado. San na a tra logis sani foe doe? Na foe gi joesrefi abra na Jehovah Gado. Disi wani taki dati na ini wan opregti begi, joe e froeteri Gado taki nanga joe heri ati joe e gi joe libi na en foe doe en wani. Disi na a fasi fa joe e gi joesrefi abra na Jehovah èn teki a safoe tjatjari foe Jesus Krestes. — Mateus 11:29, 30.

SAN A DOPOE WANI TAKI GI JOE

10. Foe san ede joe moesoe teki dopoe baka te joe gi joesrefi abra na Jehovah?

¹⁰ Soleki fa Jesus taki, dan ala den sma di e tron den disipel foe en moesoe teki dopoe (Mateus 28:19, 20). Foe san ede disi de fanowdoe baka te joe gi joesrefi abra na Gado? Foe di joe gi joesrefi abra na Jehovah, a sabi taki joe lobi en. Tweifri no de taki joe sa wani doe moro sani so taki tra sma e kon sabi taki joe lobi Gado. We, a dopoe e gi joe wan okasi foe meki sma kon sabi na poebliki taki joe gi joesrefi abra na Jehovah Gado. — Romesma 10:9, 10.

11. San a dopoe wani taki?

¹¹ A dopoe wani taki foeroe na agersifasi. Te den doekroen joe go na ondro, noso e „beri” joe na ondro watra, dan a de leki joe dede nanga a fasi fa joe ben libi fosi. Te joe  e opo komoto na watra, dan a de leki joe kon na ini wan njoen libi, wan libi di a wani foe Gado e tiri èn no joe eigi wani. Ma dati no wani taki dati joe no sa meki fowtoe moro, bika wi alamala de onvolmaakti èn foe dati ede wi e sondoe ala dei. Ma leki wan foetoeboi foe Jehovah di gi ensrefi abra na en èn di teki dopoe, joe kon na ini wan spesroetoe matifasi nanga en. Foe di joe abi berow èn saka joesrefi foe teki dopoe, meki Jehovah de klariklari foe gi joe pardon foe sondoe tapoe a gron foe a froeloesoe-ofrandi foe Jesus. So boen, a dopoe e meki joe kisi wan krin konsensi na fesi foe Gado. — 1 Petrus 3:21.

12. San a wani taki foe teki dopoe (a) „na ini a nen foe a Tata”? (b) ’na ini a nen foe a Manpikin’? (c) ’na ini a nen foe a santa jeje’?

¹² Jesus ben komanderi den bakaman foe en foe dopoe njoen disipel „na ini a nen foe a Tata èn foe a Manpikin èn foe a santa jeje” (Mateus 28:19). San Jesus ben wani taki? A dopoe di wan sma e dopoe „na ini a nen foe a Tata” wani taki dati a sma di e teki dopoe, nanga en heri ati e teki Jehovah Gado leki a Mekiman nanga a sma di abi a reti foe de Soeverein foe na universum (Psalm 36:9; 83:18; Preikiman 12:1). Foe teki dopoe ’na ini a nen foe a Manpikin’ wani taki dati a sma e erken Jesus Krestes — èn spesroetoe a froeloesoe-ofrandi foe En — leki a wan-enkri wrokosani di Gado gi foe kisi froeloesoe (Tori foe den Apostel 4:12). A dopoe di wan sma e dopoe ’na ini a nen foe a santa jeje’ wani taki dati a sma di e teki dopoe e erken a santa jeje foe Jehovah, noso a wroko krakti, leki a sani di Jehovah e gebroiki foe meki den prakseri foe En kon troe èn foe gi den foetoeboi foe En krakti foe doe a regtfardiki wani foe En makandra nanga na organisâsi foe En di e kisi tiri foe a santa jeje. — Genesis 1:2; Psalm 104:30; Johanes 14:26; 2 Petrus 1:21.

JOE DE KLARIKLARI FOE TEKI DOPOE?

13, 14. Foe san ede wi no moesoe frede foe teki a bosroiti foe dini Jehovah Gado?

¹³ A de so, taki foe di dopoe wani taki so foeroe èn a de a moro prenspari heimarki ini a libi foe wan sma, meki a de wan sani di joe moesoe frede? Kwetikweti! Ala di joe no moesoe si a bosroiti foe teki dopoe leki wan pikin sani, tokoe  a no de foe taki dati a de a moro koni bosroiti di joe kan teki.

¹⁴ A teki di joe e teki dopoe na wan boeweisi foe a bosroiti di joe teki foe dini Jehovah Gado. Prakseri den sma di joe sabi. A no ibriwan foe den e dini wan masra na a wán noso tra fasi? Son sma de srafoe foe goedoe (Mateus 6:24). Trawan e feti fajafaja na baka a libiwroko foe den noso den e wroko gi densrefi foe di den e meki den eigi wani tron a moro prenspari sani na ini den libi. Tra sma e dini falsi gado. Ma joe bosroiti foe dini a troe Gado Jehovah. No wan tra sma no e sori someni switifasi, sari-atifasi nanga lobi leki en. Gado gi libisma a grani foe doe wroko di wani taki wan sani èn di e meki den kisi froeloesoe. A e gi den foetoeboi foe en a pai foe têgo libi. Foe troe, a waka di joe e waka baka na eksempre foe Jesus èn a gi di joe e gi joe libi abra na Jehovah no de wan sani foe frede. Te joe loekoe en boen, dan a de a wan-enkri sani di e plisi Gado èn di de troetroe reidelek. — 1 Kownoe 18:21.

15. San na wan toe sani di e tanapoe na pasi èn di e tapoe sma foe teki dopoe?

¹⁵ Tokoe a dopoe no de wan sani di joe moesoe doe foe di tra sma dwengi joe. Na wan persoonlijk sani na mindri joe nanga Jehovah (Galasiasma 6:4). Ala di joe go na fesi na jejefasi, joe aksi joesrefi kande: „San e tapoe mi foe teki dopoe?” (Tori foe den Apostel 8:35, 36) Joe ben sa kan aksi joesrefi: ’A gens di famiri e gens mi e tapoe mi? Te now ete mi de ini wan situwâsi di bijbel no feni boen noso mi e doe wan sondoe sani? A ben kan de taki mi frede taki sma na ini a libimakandra no sa lobi mi moro?’ Disi na wan toe sani foe hori na prakseri, ma loekoe den leki fa den de.

16. Fa joe sa kisi wini te joe e dini Jehovah?

¹⁶ Joe ben sa hori joesrefi na spotoe foe loekoe den negatief sani nomo sondro foe loekoe den wini di joe e kisi te joe e dini Jehovah. Foe eksempre, prakseri na afersi foe a gens di famiri e gens joe. Jesus ben pramisi taki srefi efoe den disipel foe en ben lasi den famiri foe den foe di den e waka na en baka, den ben o kisi wan moro bigi famiri na jejefasi (Markus 10:29, 30). Den kompe bribiman disi sa sori brada  lobi gi joe, den sa jepi joe foe horidoro ala di joe e kisi froefolgoe, èn den sa horibaka gi joe na tapoe a pasi foe libi (1 Petrus 5:9). Den gemeente owroeman spesroetoe kan jepi joe foe kakafoetoe gi den problema èn taki joe man komoto na ini tra moeilek situwâsi nanga boen bakapisi (Jakobus 5:14-16). Ini a tori foe a lobi di a grontapoe disi no sa lobi joe moro, a ben sa de wan boen sani foe aksi joesrefi: ’Sortoe sani mi kan teki gersi nanga a feni di a Mekiman foe na universum e feni mi boen èn taki en e prisiri taki mi teki a pasi foe libi?’ — Odo 27:11.

LIBI AKROEDERI A GI DI JOE GI JOESREFI ABRA ÈN AKROEDERI A DOPOE FOE JOE

17. Foe san ede joe moesoe si a dopoe leki wan bigin na presi leki wan kaba?

¹⁷ A de prenspari foe hori na prakseri taki a dopoe no de a kaba foe a go di joe e go na fesi na jejefasi. A de a bigin foe a dini di joe sa dini Gado joe heri libi langa, leki wan bedinari di den poti èn leki wan foe den Kotoigi foe Jehovah. Ala di a dopoe de wan toemoesi prenspari sani, tokoe a no de wan djaranti foe kisi froeloesoe. Jesus no ben taki: ’Ala sma di dopoe sa kisi froeloesoe.’ Na presi foe dati, a ben taki: „A sma di horidoro te na a kaba, na en sa kisi froeloesoe” (Mateus 24:13). Foe dati ede, a de toemoesi prenspari taki joe e soekoe Gado Kownoekondre fosi, foe di joe e meki a de a moro prenspari sani na ini joe libi. — Mateus 6:25-34.

18. San na wan toe marki di joe kan meki moeiti foe doro den, baka te joe teki dopoe?

¹⁸ Efoe joe wani horidoro na ini a dini foe Jehovah, dan joe sa wani foe poti marki gi joesrefi na jejefasi. Wan marki di warti, na foe meki a sabi foe joe foe Gado kon moro foeroe nanga jepi foe a studeri di joe e studeri en Wortoe doronomo. Meki plan foe leisi bijbel ala dei (Psalm 1:1, 2). Go na den kresten konmakandra doronomo, foe di a demakandra di joe e feni drape sa jepi joe foe kisi krakti na jejefasi. Foe san ede joe no e poti en leki wan marki gi joesrefi foe gi piki na den gemeente konmakandra èn prèise Jehovah  na a fasi dati èn e soekoe foe bow trawan? (Romesma 1:11, 12) Wan tra marki ben sa kan de foe meki a fasi fa den begi foe joe de, kon moro boen. — Lukas 11:2-4.

19. Sortoe eigifasi joe kan sori na ini joe libi nanga jepi foe a santa jeje?

¹⁹ Efoe joe wani libi akroederi san a dopoe foe joe wani taki, dan joe moesoe poti prakseri doronomo na tapoe san joe e doe, èn meki a santa jeje foe Gado tjari eigifasi kon na ini joe soleki lobi, prisiri, vrede, langa pasensi, switifasi, boenfasi, bribi, safri-atifasi, nanga a dwengi di joe man dwengi joesrefi (Galasiasma 5:22, 23; 2 Petrus 3:11). No frigiti taki Jehovah e gi en santa jeje na ala sma di e begi foe en èn di e gi jesi na en leki en getrow foetoeboi (Lukas 11:13; Tori foe den Apostel 5:32). So boen, begi Gado foe en jeje èn aksi en foe jepi joe foe sori eigifasi di e plisi en. Den sortoe eigifasi disi sa kon de moro krin foe si ini a fasi fa joe e taki èn a fasi fa joe e tjari joesrefi, foe di joe e doe wan sani na tapoe a krakti di a jeje foe Gado abi na joe tapoe. A no de foe taki, dati ibri sma na ini a kresten gemeente e meki tranga moeiti foe kweki „a njoen persoonlijkheid” so taki a kan kon gersi Krestes moro (Kolosesma 3:9-14). Ibriwan foe wi e miti difrenti tjalensi te wi e doe disi, foe di ibriwan foe wi de na ini wan tra situwâsi ini a gro di wi e gro na jejefasi. Foe di joe de onvolmaakti, meki joe moesoe wroko tranga foe abi wan persoonlijkheid leki di foe Krestes. Ma no lasi-ati noiti ini a tori disi, bika joe man doro disi nanga a jepi foe Gado.

20. Na sortoe fasi joe kan waka baka Jesus ini a diniwroko?

²⁰ Wan foe den marki na jejefasi di joe poti, moesoe de a waka di joe e waka moro soifri baka Jesus eksempre di ben de nanga prisiri (Hebrewsma 12:1-3). Jesus ben lobi a diniwroko. Efoe joe abi a grani foe teki prati na a Kownoekondre preikiwroko, dan no meki a tron wan sani di joe e doe nomo leki wan gwenti. Proeberi foe feni en wan prisiri sani foe leri tra sma foe a Kownoekondre foe Gado neleki fa Jesus ben doe. Gebroiki den sani di a gemeente e leri foe jepi joe foe go na fesi leki wan sma di e gi leri. Èn joe kan de seiker taki Jehovah kan gi joe a krakti foe doe joe diniwroko. — 1 Korentesma 9:19-23.

21. (a) Fa wi doe sabi taki Jehovah e warderi sma di de getrow èn di dopoe? (b) San e sori taki dopoe de prenspari foe tan na libi te Gado e tjari en kroetoe kon na tapoe na ogri seti foe sani disi?

 ²¹ Wan sma di e gi ensrefi abra èn di teki dopoe èn di na wan getrow fasi e meki moeiti foe waka baka Jesus, warti spesroetoe na ini Gado ai. Jehovah e ondrosoekoe ala den miljardmiljard ati foe sma èn a sabi taki ibriwan foe den sma disi abi den eigi fasi. A e si den leki goedoe, „sani di sma wani srefisrefi” (Hagai 2:7). Bijbel profeititori e sori taki Gado e si den sortoe sma disi leki sma di kisi a marki foe pasa a kroetoe, di heri esi a sa tjari kon na tapoe na ogri seti foe sani disi (Esekièl 9:1-6; Maleaki 3:16, 18). Joe abi a „joisti jejefasi foe kisi a têgo libi”? (Tori foe den Apostel 13:48) A de troetroe na opregti wani foe joe foe kisi a marki leki wan sma di e dini Gado? A gi di wan sma e gi ensrefi abra èn e teki dopoe, na wan pisi foe a marki dati èn den de toemoesi prenspari foe tan na libi.

22. Sortoe sani a „bigi ipi” kan froewakti na ini a ten di de na den fesi?

²² Baka a Froedoe di ben kon na heri grontapoe, Noa nanga en osofamiri ben komoto na a ark kon na wan grontapoe di kon krin. Na so a de toe na ini a ten disi, taki „wan bigi ipi” di e gebroiki a sabi foe Gado na ini den libi èn di Jehovah e feni boen, abi a froewakti foe pasa a kaba foe na ogri seti foe sani disi libilibi èn foe njan boen foe têgo libi na wan grontapoe di kon krin foe ala ten (Openbaring 7:9, 14). Fa a libi dati sa de?

ONDROSOEKOE A SABI FOE JOE

Fa Jehovah wani, taki joe e gebroiki a sabi di joe abi foe en?

San na wan toe sani di e jepi joe foe kan teki dopoe?

Foe san ede a dopoe na wan bigin èn no wan kaba?

Fa wi kan libi akroederi a gi di wi gi wisrefi abra èn akroederi a teki di wi teki dopoe?

[Aksi foe a tori disi]

 [Prenki na tapoe bladzijde 172]

Joe gi joesrefi abra na Gado na ini begi?

 [Prenki na tapoe bladzijde 174]

San e tapoe joe foe teki dopoe?