San Gado doe foe froeloesoe a libisma famiri
Kapitel 7
San Gado doe foe froeloesoe a libisma famiri
1, 2. (a) Fa wan edeman foe a legre foe Rome ben kon froestan soema na a Manpikin foe Gado? (b) Foe san ede Jehovah ben gi pasi meki Jesus dede?
WAN lente bakadina so wan 2000 jari pasa kaba, wan edeman foe a legre foe Rome ben si dri man e dede safrisafri, ala di den ben abi foeroe skin-ati. A sroedati dati ben si spesroetoe wan foe den — Jesus Krestes. Den ben spikri Jesus na wan oedoe postoe. Na bakadina a loktoe ben kon doengroe di a momenti foe en dede ben kon moro krosibei. Di a dede, a gron ben seki hebi, èn a sroedati ben bari taki: „Foe troe, a man disi ben de Gado Manpikin.” — Markus 15:39.
2 Gado Manpikin! A sroedati dati ben abi leti. Didjonsro a ben si a moro prenspari sani di oiti ben pasa na grontapoe. Na tra okasi kaba, Gado srefi ben kari Jesus en lobi Manpikin (Mateus 3:17; 17:5). Foe san ede Jehovah ben gi pasi meki en Manpikin dede? Bika disi ben de a wrokosani di Gado ben sa gebroiki foe froeloesoe a libisma famiri foe sondoe nanga dede.
GADO BEN FROEKISI EN GI WAN SPESROETOE MARKI
3. Foe san ede a ben e fiti taki Gado ben froekisi a wan-enkri gebore Manpikin foe En gi wan spesroetoe marki di abi foe doe nanga a libisma famiri?
3 Soleki fa wi leri kaba ini a boekoe disi, dan Jesus ben de kaba bifo a ben de wan libisma. Den kari en a „wan-enkri gebore Manpikin” foe Gado bika Jehovah ben meki en sondro jepi foe wan tra sma. Baka dati Jehovah ben gebroiki Jesus foe meki ala tra sani (Johanes 3:18; Kolosesma 1:16). Jesus ben lobi spesroetoe a libisma famiri (Odo 8:30, 31). A no de foe froewondroe taki Jehovah ben froekisi en wan-enkri gebore Manpikin foe gebroiki en gi wan spesroetoe marki di a libisma famiri ben kisi a dedestrafoe!
4, 5. San bijbel ben tjari kon na krin ini a tori foe a Mesian Siri, bifo Jesus ben kon na grontapoe?
4 Di Gado ben meki a kroetoe bosroiti bekènti gi Adam, Eva nanga Satan na ini a djari foe Eden, dan Gado ben taki foe a Froeloesoeman di ben moesoe kon ete, leki wan „siri”. A Siri disi, noso bakapikin, ben sa kon foe poeroe den takroe problema di Satan Didibri, „a fosi sneki”, ben meki doe kon. Foe taki en leti, dan a pramisi Siri ben sa masi Satan nanga ala den wan di ben waka na en baka. — Genesis 3:15; 1 Johanes 3:8; Openbaring 12:9.
5 Na ini den foeroe jarihondro di pasa, safrisafri Gado ben tjari moro sani kon na krin ini a tori foe a Siri, di den ben kari a Mesias toe. Soleki fa a boksoe tapoe bladzijde 37 e sori, dan foeroe profeititori ben taki finifini foe den foeroe sani di abi foe doe nanga a libi foe en na grontapoe. Foe eksempre, a ben sa moesoe horidoro na ondro a takroe fasi fa den ben sa handri nanga en, so taki a ben kan doe san a ben moesoe doe ini a prakseri foe Gado. — Jesaja 53:3-5.
FOE SAN EDE A MESIAS BEN O DEDE
6. San a Mesias ben o doe soleki fa Danièl 9:24-26 e taki, èn fa?
6 A profeititori di skrifi na Danièl 9:24-26 ben taki na fesi dati a Mesias — a Salfoewan foe Gado — ben o meki wan bigi prakseri kon troe. A ben o kon na grontapoe „foe meki a fowtoe kon na wan kaba èn foe poeroe sondoe èn foe verzoen gi fowtoe èn foe meki regtfardikifasi kon” foe têgo. A Mesias ben sa poeroe a dedestrafoe gi a getrow libisma famiri. Ma fa a ben sa doe disi? A profeititori e tjari kon na krin taki a ben sa „koti [en] poeroe”, noso kiri en.
7. Foe san ede den djoe ben tjari meti-ofrandi, èn san den sani disi ben prenki?
7 Den Israèlsma foe owroeten ben sabi a prakseri foe verzoen gi fowtoe. Ini na anbegi foe den na ondro a Wet di Gado ben gi den nanga jepi foe Moses, den ben tjari meti-ofrandi doronomo. Disi ben memre a pipel foe Israèl taki libisma abi wan sani fanowdoe foe verzoen gi den sondoe foe den, noso foe tapoe den sondoe dati. Na apostel Paulus ben taki sjatoe foe a gronprakseri na a fasi disi: „Efoe broedoe no trowe, dan no wan pardon no de” (Hebrewsma 9:22). Kresten no de na ondro a Wet foe Moses nanga den markitiki foe en, soleki a tjari foe srakti-ofrandi (Romesma 10:4; Kolosesma 2:16, 17). Den sabi toe taki meti-ofrandi no man gi pardon foe sondoe dorodoro èn foe ala ten. Na presi foe dati, den srakti-ofrandi disi di den ben tjari, ben prenki wan ofrandi di warti moro foeroe — a di foe a Mesias, noso Krestes. (Hebrewsma 10:4, 10; teki gersi Galasiasma 3:24.) Tokoe joe sa aksi kande: ’A ben de troetroe fanowdoe taki a Mesias ben moesoe dede?’
8, 9. Sortoe sani di warti foeroe, Adam nanga Eva ben lasi, èn fa den sani di den ben doe ben abi krakti na tapoe den bakapikin foe den?
8 Ija, a Mesias ben moesoe dede efoe a libisma famiri ben moesoe kisi froeloesoe. Foe kan froestan foe san ede, dan wi moesoe prakseri a djari foe Eden baka èn proeberi foe froestan omeni Adam nanga Eva ben lasi troetroe di den ben opo densrefi teige Gado. Têgo libi ben de foe kisi gi den! Leki pikin foe Gado den ben njan boen toe foe wan krosibei matifasi nanga en. Ma di den no ben wani erken a tirimakti foe Jehovah, den ben lasi ala den sani dati èn den ben tjari sondoe nanga dede kon na tapoe a libisma famiri. — Romesma 5:12.
9 A ben de leki a fosi papa nanga mama foe wi ben lasi wan bigi goedoe èn ben poti densrefi na ini wan boen bigi paiman. Adam nanga Eva ben gi a paiman dati abra na den pikin foe den. Foe di wi no ben gebore volmaakti èn sondro sondoe, meki ibriwan foe wi abi sondoe èn e dede. Te wi siki, noso te wi e taki wan sani di hati wan sma èn di wi ben winsi taki wi ben kan teki den wortoe baka, dan wi e ondrofeni den bakapisi foe a paiman, di wi kisi foe a papa nanga a mama foe wi — libisma onvolmaaktifasi (Romesma 7:21-25). A wan-enkri howpoe foe wi na foe kisi baka san Adam ben lasi. Ma wi no kan froedini volmaakti libisma libi. Foe di ala onvolmaakti libisma e sondoe, meki no wan foe wi e froedini libi, ma na presi foe dati dede. — Romesma 6:23.
10. San ben de fanowdoe foe bai baka san Adam ben lasi?
10 Wan sani ben kan gi ete ini a presi foe a libi di Adam ben lasi? Gado en markitiki foe retidoe, e aksi taki a markitiki disi moesoe de ini balansi, „sili gi sili” (Exodus 21:23). So boen, wan libi ben moesoe òfer foe pai gi a libi di ben lasi. A no a libi foe iniwan sma ben sa de nofo. Psalm 49:7, 8 e taki foe onvolmaakti libisma: „No wan foe den kan froeloesoe srefi wan brada na a wán noso tra fasi, noso gi Gado wan loesoe-paiman gi en; (èn a loesoe-paiman foe a sili foe den warti someni taki a tapoe te ten di no abi skotoe).” Wi de sondro howpoe foe dati ede? Kwetikweti.
11. (a) San a wortoe „loesoe-paiman” wani taki ini a Hebrewtongo? (b) Soema wawan ben kan froeloesoe a libisma famiri, èn foe san ede?
11 Ini a Hebrewtongo, a wortoe „loesoe-paiman” wani taki a moni di pai foe froeloesoe wan sma di den kisi hori èn a wani taki so srefi a srefi waarde. Soso wan sma nanga wan volmaakti libisma libi ben kan òfer a srefi foe san Adam ben lasi. A wan-enkri volmaakti sma di gebore na grontapoe baka Adam, ben de Jesus Krestes. Foe dati ede bijbel e kari Jesus „a lasti Adam” èn e gi wi a djaranti taki Krestes „ben gi ensrefi leki wan srefi sortoe loesoe-paiman gi ala sma” (1 Korentesma 15:45; 1 Timoteus 2:5, 6). Ala di Adam ben gi dede abra na den pikin foe en, Jesus ben gi têgo libi. Wán Korentesma 15:22 e taki: „Soleki na ini Adam den alamala e dede, na so na ini Krestes toe den alamala sa libi baka.” Foe dati ede a e fiti, taki den e kari Jesus „Têgo Tata”. — Jesaja 9:6, 7.
FA A LOESOE-PAIMAN BEN PAI
12. O ten Jesus ben tron a Mesias, èn nanga sortoe fasi foe libi a ben go doro baka dati?
12 Na ini a herfst foe 29 G.T., Jesus ben go na Johanes di de wan famiri foe en, foe Johanes dopoe en, èn nanga dati a pristeri ensrefi foe doe a wani foe Gado. Na a okasi dati Jehovah ben salfoe Jesus nanga santa jeje. Na so fasi Jesus ben tron a Mesias, noso Krestes, a Sma di kisi salfoe foe Gado (Mateus 3:16, 17). Dan Jesus ben bigin nanga en diniwroko di ben teki dri nanga afoe jari. A ben teki waka go na a heri kondre pe a ben libi, èn ben e preiki foe a Kownoekondre foe Gado èn a ben e tjari den getrow bakaman kon na wán. Ma soleki fa ben taki na fesi kaba, dan no langa baka dati, sma ben bigin gens en. — Psalm 118:22; Tori foe den Apostel 4:8-11.
13. Sortoe sani di ben pasa a wan baka a trawan, ben tjari a dede kon foe Jesus di ben hori en soifri retifasi?
13 Sondro foe frede Jesus ben tjari a hoigri fasi foe den relisi fesiman kon na krin, èn den ben proeberi foe kiri en. Te foe kaba den ben meki wan takroe plan di ben abi na ini a tori di den ben o tori en, a kisi di den ben o kisi en foe go sroto na wan fasi di no boen, wan kroetoe di no ben de akroederi wet, nanga wan falsi kragi taki a meki sma opo densrefi teige makti. Den ben naki Jesus, ben spiti na en tapoe, den ben spotoe nanga en, èn den ben wipi en nanga wan wipi di den ben meki foe priti en skin. Baka dati, Pontius Pilatus di ben de wan tiriman foe Rome, ben gi en a dedestrafoe na wan pina-oedoe. Den ben spikri en na wan oedoe postoe èn ben anga en leti-opoe drape. Ibri bro di a ben teki ben gi en pen di a no ben man tjari moro, èn a ben teki foeroe joeroe fosi a dede. Na ini ala den tesi dati, Jesus ben tan hori en volmaakti soifri retifasi na Gado.
14. Foe san ede Gado ben gi pasi meki en Manpikin pina èn dede?
14 So boen, a ben de tapoe 14 Nisan, 33 G.T., taki Jesus ben gi en libi leki „wan loesoe-paiman ini a presi foe foeroe sma” (Markus 10:45; 1 Timoteus 2:5, 6). Komoto na hemel, Jehovah ben kan si fa en lobi Manpikin ben pina èn fa a dede. Foe san ede Gado ben gi pasi meki so wan takroe sani pasa? A ben doe so, foe di a ben lobi a libisma famiri. Jesus ben taki: „Gado ben lobi grontapoe sote taki a ben gi en wan-enkri gebore Manpikin, so taki ibri sma di e sori bribi na ini en, no ben sa kisi pori, ma abi têgo libi” (Johanes 3:16). A dede foe Jesus e leri wi toe, taki Jehovah na wan Gado foe volmaakti retidoe (Deuteronomium 32:4). Son sma ben sa kan aksi densrefi foe san ede Gado no ben poti den gronprakseri na wan sei ini a tori foe retidoe di e aksi sili gi sili èn poti a paiman na wan sei, di ben moesoe pai foe a sondoe fasi fa Adam ben tjari ensrefi. A reide na foe di Jehovah e hori ensrefi ala ten na den wet foe en èn a e hori den hei, srefi efoe a e aksi foeroe foe en.
15. Foe di a no ben sa de wan reti sani foe gi pasi meki a libi foe Jesus kaba foe ala ten, san Jehovah ben doe?
15 A retidoe foe Jehovah ben aksi toe taki a dede foe Jesus abi wan kolokoe bakapisi. Te joe loekoe en boen, dan a ben sa wani taki retidoe foe gi pasi meki Jesus, di de getrow, sribi na ini dede foe ala ten? Kwetikweti! Den Hebrew Boekoe foe bijbel ben taki na fesi dati a loyaalwan foe Gado no ben sa tan na ini a grebi (Psalm 16:10; Tori foe den Apostel 13:35). Jesus ben sribi na ini dede pisi foe dri dei, èn baka dati Jehovah Gado ben opo en baka foe libi leki wan makti jeje sma. — 1 Petrus 3:18.
16. San Jesus ben doe di a ben drai go baka na hemel?
16 Di Jesus dede, a ben gi en libisma libi foe ala ten. Di a ben opo baka foe kisi libi na hemel, a ben tron wan jeje di e gi libi. Boiti dati, di Jesus ben opo go na a moro santa presi na ini na universum, dan a ben de baka nanga en lobi Tata èn na wan spesroetoe fasi a ben pristeri a waarde foe en volmaakti libisma libi na en Tata (Hebrewsma 9:23-28). Baka dati, a waarde foe a diri libi dati ben kan gebroiki gi a libisma famiri di gi jesi. San dati wani taki gi joe?
A LOESOE-PAIMAN FOE KRESTES NANGA JOE
17. Fa wi kan gi wisrefi wini, foe di wi man kisi pardon tapoe a fondamenti foe a froeloesoe-ofrandi foe Krestes?
17 Loekoe dri fasi fa joe kisi wini foe Krestes froeloesoe-ofrandi srefi now kaba. Na a fosi presi, a e meki sma kisi pardon foe sondoe. Te wi e bribi na ini a broedoe foe Jesus di trowe gi wi, dan wi kisi „a froeloesoe nanga jepi foe a loesoe-paiman”, ija „a pardon foe den sondoe foe wi” (Efeisesma 1:7). So boen, srefi efoe wi ben doe wan kefalek bigi sondoe, tokoe wi kan aksi Gado pardon na ini a nen foe Jesus. Efoe wi abi berow troetroe, dan Jehovah e gebroiki a waarde foe a froeloesoe-ofrandi foe en Manpikin gi wi. Gado e gi wi pardon èn e gi wi a blesi foe wan boen konsensi, na presi foe a wani nomonomo taki wi moesoe kisi a dedestrafoe di wi froedini foe di wi sondoe. — Tori foe den Apostel 3:19; 1 Petrus 3:21.
18. Na sortoe fasi na ofrandi foe Jesus e gi wi howpoe?
18 Na a di foe toe presi, a froeloesoe-ofrandi foe Krestes e gi a fondamenti foe a howpoe foe wi gi a ten di e kon. Ini wan fisjoen, na apostel Johanes ben si taki „wan bigi ipi, di no wan sma ben man teri” ben sa tan na libi te a rampoe e kon na tapoe a seti foe sani disi. Foe san ede den sa tan na libi ala di Gado e pori someni tra sma? Wan engel ben taigi Johanes taki a bigi ipi ben „wasi den langa krosi foe den èn ben meki den kon weti na ini a broedoe foe a Pikin Skapoe”, Jesus Krestes (Openbaring 7:9, 14). So langa wi e sori bribi na ini a broedoe foe Jesus Krestes di trowe gi wi èn e libi akroederi den markitiki foe Gado, dan wi sa de krin na ini Gado ai èn sa abi a howpoe foe têgo libi.
19. Fa na ofrandi foe Krestes e boeweisi taki en nanga en Tata lobi joe?
19 Na a di foe dri presi, a froeloesoe-ofrandi na a moro bigi boeweisi foe a lobi foe Jehovah. A dede foe Krestes ben sori krin den toe moro bigi fasi foe sori lobi na ini a historia foe na universum: (1) A lobi foe Gado foe di a seni en Manpikin foe dede gi wi; (2) A lobi foe Jesus foe di a ben de klariklari foe òfer ensrefi leki wan loesoe-paiman (Johanes 15:13; Romesma 5:8). Efoe wi e sori bribi troetroe, dan a lobi disi e fiti ibriwan foe wi. Na apostel Paulus ben taki: „A Manpikin foe Gado . . . lobi mi èn a ben gi ensrefi abra foe mi ede.” — Galasiasma 2:20; Hebrewsma 2:9; 1 Johanes 4:9, 10.
20. Foe san ede wi moesoe sori bribi na ini a froeloesoe-ofrandi foe Jesus?
20 Foe dati ede, meki wi sori a warderi di wi abi gi a lobi di Gado nanga Krestes ben sori gi wi, foe di wi e sori bribi na ini a froeloesoe-ofrandi foe Jesus. Efoe wi e doe disi, dan dati sa tjari wi go na têgo libi (Johanes 3:36). Tokoe a froeloesoe foe wi no de a moro prenspari reide foe san ede Jesus libi èn dede na grontapoe. Nôno, a moro prenspari sani di a ben broko en ede nanga dati ben de wan moro bigi strei srefi, wan universeelwan. Soleki fa wi sa si ini a tra kapitel, dan a strei dati abi foe doe nanga wi alamala, foe di a e sori foe san ede Gado gi pasi meki ogridoe nanga pina tan so langa na ini a grontapoe disi.
ONDROSOEKOE A SABI FOE JOE
Foe san ede Jesus ben moesoe dede foe froeloesoe a libisma famiri?
Fa a loesoe-paiman ben pai?
Na sortoe fasi joe abi wini foe a loesoe-paiman?
[Aksi foe a tori disi]
[Wan prenki di e tapoe heri bladzijde 67]
