San e pasa nanga den lobiwan foe wi di dede?
Kapitel 9
San e pasa nanga den lobiwan foe wi di dede?
1. Fa sma e firi te wan lobiwan foe den dede?
„WAN sma e pina te wan lobiwan foe en dede, bika dede na wan lasi di e tjari wan leigi firi kon di e pasa ala froestan.” Dati na san wan manpikin ben taki di en papa èn sjatoe baka dati en mama, dede. A pen foe en nanga a bigi lasi, ben gi en wan firi di ben „moro en na emotioneel sei”. Kande joe pina toe na wan srefi fasi. Kande joe aksi joesrefi pe den lobiwan foe joe de èn efoe oiti joe sa si den baka.
2. Sortoe aksi di e broeja sma e kon ini a tori foe dede?
2 Sma taigi son papa nanga mama di e sari: „Gado e piki den moro moi bromki foe kan de nanga en na hemel.” Disi de troetroe so? Den lobiwan foe wi di dede go na wan jejekondre? A de wan presi di son sma e kari Nirfana, di den e taki foe en leki wan presi pe kolokoe de srefisrefi èn pe sma no abi no wan pen nanga no wan lostoe? Den wan di wi lobi, pasa go na ini wan doro di e tjari den go na wan libi ini wan paradijs sondro foe kan dede? Noso soleki fa trawan e taki, dede na wan fadon di den wan di afrontoe Gado e fadon go na ini wan situwâsi pe den e kisi skin-ati di noiti no e kaba? Den dedewan kan abi krakti na tapoe wi libi? Foe kisi piki di de troe na tapoe den sortoe aksi disi, wi moesoe loekoe san bijbel, a Wortoe foe Gado, e taki.
SAN NA A „JEJE” NA INI LIBISMA?
3. Sortoe denki Sokrates nanga Plato ben abi ini a tori foe den dedewan, èn sortoe krakti disi abi na tapoe sma na ini a ten disi?
3 Den owroeten Griki filosoofman Sokrates nanga Plato ben abi a prakseri taki wan sani moesoe de na inisei foe wan man nanga wan oema di den gebore nanga en èn di no man dede — wan sili di e tan na libi baka te a sma dede èn di noiti e dede troetroe. Miljoenmiljoen sma na heri grontapoe, e bribi a sani disi na ini a ten disi. Foeroe tron a bribi disi e meki sma frede den dedewan neleki fa den e broko den ede nanga a tanboen foe den dedewan. Bijbel e leri wi wan heri tra sani foe den dedewan.
4. (a) San Genesis e taigi wi foe a sili? (b) San Gado ben poti na ini Adam so taki a kon na libi?
4 Te wi e prakseri a fasi pe den dedewan de na ini, dan wi moesoe hori na prakseri taki wi fosi papa, Adam, no ben abi wan sili. A ben de wan sili. Na wan toemoesi froewondroe fasi fa Gado ben meki sani, A ben meki libisma — a sili — foe den fondamenti elementi foe grontapoe èn baka dati a ben bro a „libibro” na ini en. Genesis 2:7 e froeteri wi: „Jehovah Gado ben go moro fara foe teki doti foe a gron foe meki libisma èn foe bro a libibro na ini en noso-olo, èn libisma ben tron wan libi sili.” A hari di Adam ben hari bro ben meki a libi foe en tan. Ma moro leki a bro nomo foe loktoe na ini den fokofoko foe libisma ben de ini a tori, di Gado ben poti a libibro na ini Adam. Bijbel e taki foe „a krakti foe libi” di e wroko na ini libi mekisani na grontapoe. — Genesis 7:22.
5, 6. (a) San na „a krakti foe libi”? (b) San e pasa te a „jeje” di Psalm 146:4 e kari, e tapoe foe gi libi na a skin?
5 San na „a krakti foe libi”? Na a sani di e gi libi na wan libi mekisani di Gado ben poti na ini Adam skin di ben de sondro libi. Baka dati, a krakti disi ben tan nanga jepi foe a hari di wan sma e hari bro. San na a „jeje” di Psalm 146:4 e taki foe en? A tekst dati e taki foe wan sma di dede: „En jeje e komoto gowe, a e go baka na en gron; na a dei dati den prakseri foe en e lasi gowe.” Te den bijbel skrifiman ben gebroiki a wortoe „jeje” na a fasi disi, dan den no ben abi na prakseri wan sili sondro wan skin di e tan libi baka te a skin dede.
6 A „jeje” di e gowe libi libisma te den dede, na a krakti foe libi di ben komoto na wi Mekiman (Psalm 36:9; Tori foe den Apostel 17:28). A krakti foe libi disi no abi no wan foe den eigifasi foe a mekisani di a e meki de na libi, neleki fa stroom no e teki den sani abra di na apparaat kan doe di a e gi stroom. Te wan sma dede, dan a jeje (krakti foe libi) e tapoe foe gi libi na den cel foe a skin, neleki fa wan lampoe e dede te den tapoe a stroom. Te a krakti foe libi no e gi moro san a libisma skin abi fanowdoe, dan a sma, a sili, dede. — Psalm 104:29; Preikiman 12:1, 7.
„NA DOTI JOE SA DRAI GO BAKA”
7. San ben sa pasa nanga Adam efoe a ben trangajesi Gado?
7 Jehovah ben froeklari krin san dede ben sa wani taki gi a sondari Adam. Gado ben taki: „Na ini a sweti foe joe fesi joe sa njan brede te leki joe drai go baka na a gron, bika na drape Gado ben teki joe poeroe. Bika foe doti joe de èn na doti joe sa drai go baka” (Genesis 3:19). Pe Adam ben sa drai go baka? Na a gron, na a doti foe san Gado ben meki en. Te Adam ben dede, dan dati ben sa wani taki nomo dati a no ben sa de moro!
8. Na sortoe fasi libisma no moro hei leki meti, foe di ala toe na sili?
8 Ini a tori disi, a dede foe libisma no de tra fasi leki a dede foe meti. So srefi den na sili, èn a srefi jeje, noso krakti foe libi, e gi den a krakti (Genesis 1:24). A koni man Salomo e taigi wi na Preikiman 3:19, 20: „Soleki fa a wán e dede, na so a trawan e dede, èn den alamala abi soso wán jeje, so taki [ini dede] libisma no moro hei leki meti . . . Den alamala komoto na doti, èn den alamala e drai go baka na doti.” Libisma ben hei moro den meti, foe di Gado ben meki libisma na a prenki foe En, èn den ben e sori den eigifasi foe Jehovah (Genesis 1:26, 27). Tokoe, te libisma nanga meti e dede, dan na a srefi fasi den e drai go baka na a doti.
9. San na a fasi pe den dedewan de na ini, èn pe den e go?
9 Salomo ben froeklari moro fara san dede wani taki, di a ben taki: „Den libiwan sabi taki den sa dede; ma den dedewan, den no sabi noti kwetikweti.” Ija, den dedewan no sabi noti kwetikweti. Nanga disi na ini prakseri, Salomo ben gi deki-ati: „Ala san joe anoe feni foe doe, doe dati nanga joe krakti, bika no wan wroko noso prakseri noso sabi noso koni no de na ini Sjeol, a presi pe joe e go” (Preikiman 9:5, 10). Pe den dedewan e go? Na Sjeol (Hebrew, sheʼohlʹ), a grebi foe a libisma famiri. Den lobiwan foe wi di dede no sabi noti moro. Den no e pina èn den no kan abi krakti tapoe wi na no wan fasi.
10. Foe san ede wi kan taki dati dede no wani taki dati howpoe no de?
10 Wi alamala nanga den lobiwan foe wi moesoe libi wan toe jari nomo èn baka dati no de moro foe ala ten? No soleki fa bijbel e taki. Di Adam ben opo ensrefi teige Gado, dan wantewante Jehovah Gado ben seti sani foe kenki den takroe bakapisi foe a sondoe foe libisma. Dede no ben de wan pisi foe a prakseri di Gado ben abi nanga a libisma famiri (Esekièl 33:11; 2 Petrus 3:9). Foe dati ede, dede no wani taki dati howpoe no de gi wi noso gi den lobiwan foe wi.
A „GO ROSTOE”
11. San Jesus ben taki foe a fasi pe en mati Lasarus di ben dede, ben de na ini?
11 A de a prakseri foe Jehovah foe froeloesoe wi nanga den lobiwan foe wi di dede, foe a dede foe Adam. Foe dati ede, a Wortoe foe Gado e taki foe den dedewan leki sma di e sribi. Foe eksempre, di Jesus Krestes kon sabi taki en mati Lasarus ben dede, a ben taigi den disipel foe En: „Lasarus, wi mati, go rostoe, ma mi e go drape foe wiki en na sribi.” Foe di den disipel no ben froestan wantewante san A ben wani taki nanga den wortoe disi, meki Jesus ben taigi den krin: „Lasarus dede” (Johanes 11:11, 14). Baka dati Jesus ben go na a foto Betania, pe Marta nanga Maria, den sisa foe Lasarus, ben e row foe di a brada foe den ben dede. Di Jesus ben taigi Marta: „Joe brada sa opo baka”, Marta ben taki foe a bribi foe en ini a prakseri foe Gado foe kenki den bakapisi di dede abi tapoe a libisma famiri. Marta ben taki: „Mi sabi taki a sa opo baka na a opobaka na a lasti dei.” — Johanes 11:23, 24.
12. Sortoe howpoe Marta, di ben lasi wan lobiwan na dede, ben abi ini a tori foe den dedewan?
12 Marta no ben taki noti foe wan sili di no kan dede èn di e tan libi na wan tra presi baka te wan sma dede. A no ben bribi taki Lasarus ben go kaba na wan jejekondre foe libi go doro. Marta ben abi bribi ini a toemoesi moi howpoe foe wan opobaka na dede. A ben froestan taki a dede brada foe en no ben de moro èn taki no wan sili di no kan dede ben gowe libi a skin foe Lasarus. A loesoe ben sa de na opobaka foe en brada.
13. Sortoe makti Jesus abi di a ben kisi foe Gado, èn fa a ben sori a makti disi?
13 Jesus Krestes na a sma di kisi makti foe Jehovah Gado foe froeloesoe a libisma famiri (Hosea 13:14). Foe gi wan piki na tapoe san Marta ben taki, Jesus ben taki foe dati ede: „Mi na a opobaka nanga a libi. A sma di e sori bribi ini mi, sa kon na libi, awinsi a dede” (Johanes 11:25). Jesus ben sori a makti di a ben kisi foe Gado na ini a tori disi, di a ben go na a grebi foe Lasarus di ben dede fo dei kaba, èn ben gi Lasarus libi baka (Johanes 11:38-44). Prakseri pikinso foe a prisiri foe den wan di ben si na opobaka disi noso den tra opobaka di Jesus Krestes ben doe! — Markus 5:35-42; Lukas 7:12-16.
14. Foe san ede na opobaka nanga a prakseri foe wan sili di no kan dede, no e fiti na makandra?
14 Prakseri pikinso foe disi: A no ben sa de fanowdoe taki wan sma ben sa kisi wan opobaka, noso ben sa tjari kon na libi baka, efoe wan sili di no kan dede ben tan na libi baka te wan sma dede. Foe taki en leti, a no ben sa de switifasi foe opo wan sma leki Lasarus baka foe kisi onvolmaakti libi na grontapoe efoe a ben kisi wan toemoesi moi pai na hemel kaba. Te joe loekoe en boen, dan bijbel noiti e gebroiki den wortoe „wan sili di no kan dede”. Na presi foe dati den Boekoe foe bijbel e taki dati a libisma sili di e sondoe, e dede (Esekièl 18:4, 20). So boen, bijbel e sori na tapoe a seti foe na opobaka leki a troetroe loesoe foe dede.
„ALA SMA DI DE NA INI DEN MEMRE-GREBI”
15. (a) San a wortoe „opobaka” wani taki? (b) Foe san ede na opobaka foe ibri sma aparti no sa de wan problema gi Jehovah Gado?
15 Den wortoe di den disipel foe Jesus ben gebroiki gi „opobaka” wani taki troetroe „kon opo” noso „opo tanapoe”. Disi na wan opo di sma e opo kon foe wan fasi pe den dedewan de na ini èn pe den no de na libi — foe taki en so, wan opo tanapoe komoto na a grebi foe a libisma famiri. Na wan makriki sani gi Jehovah Gado foe gi wan sma wan opobaka. Foe san ede? Foe di Jehovah na a Sma pe a libi e bigin. Na ini a ten disi, libisma kan poti den sten nanga den prenki foe man nanga oema na tapoe video èn den kan drai den lolo disi baka, baka te den sma dede. Foe dati ede wi kan de seiker taki na almakti Mekiman foe wi kan hori den finifini tori foe ibriwan sma aparti èn gi a srefi sma wan opobaka nanga wan njoen skin.
16. (a) Sortoe pramisi Jesus ben gi foe ala den sma di de na ini den memre-grebi? (b) San o sori sortoe opobaka a sa kon tron?
16 Jesus Krestes ben taki: „A joeroe e kon pe ala sma di de na ini den memre-grebi, sa jere en [Jesus] sten èn sa kon na doro, den wan di ben doe boen sani, foe go ini wan opobaka foe kisi libi, den wan di ben doe tegoe sani, foe go ini wan opobaka foe kisi kroetoe” (Johanes 5:28, 29). Ala den sma di de ini a prakseri foe Jehovah, sa kisi wan opobaka èn den sa kisi leri ini den pasi foe en. Gi den sma di e handri akroederi a sabi foe Gado, disi sa kon tron wan opobaka foe kisi libi. Ma a sa kon tron wan opobaka foe kisi kroetoe gi den sma di e weigri foe teki a leri foe Gado nanga en tirimakti.
17. Soema sa kisi wan opobaka?
17 A no de foe taki, dati den wan di doe moeiti foe waka èn libi na wan regtfardiki fasi leki foetoeboi foe Jehovah, sa kisi wan opobaka. Te joe loekoe en boen, dan na opobaka howpoe ben gi foeroe sma krakti foe tanapoe na fesi dede, srefi te den ben kisi hebi froefolgoe. Den ben sabi taki Gado ben kan gi den libi baka (Mateus 10:28). Ma miljoenmiljoen sma dede sondro foe sori efoe den ben sa gi jesi na den regtfardiki markitiki foe Gado efoe no. So srefi den sa kisi wan opobaka. Na apostel Paulus ben abi froetrow na ini a prakseri foe Jehovah ini a tori disi, èn a ben taki: „Mi abi a howpoe na Gado . . . taki wan opobaka sa de foe den regtfardikiwan nanga den onregtfardikiwan.” — Tori foe den Apostel 24:15.
18. (a) Sortoe fisjoen na apostel Johanes ben kisi foe na opobaka? (b) San e kisi pori na ini „a se foe faja”, èn san a „se” disi e agersi?
18 Na apostel Johanes ben kisi wan kefalek moi fisjoen pe sma di ben kisi wan opobaka ben e tanapoe na fesi a kownoestoeroe foe Gado. Baka dati Johanes ben skrifi: „A se ben gi den dedewan abra di ben de na en ini, èn dede nanga Hades ben gi den dedewan abra di de na den ini, èn den ben kroetoe ibriwan foe den aparti, akroederi den sani di den ben doe. Èn dede nanga Hades ben fringi go na ini a se foe faja. Disi wani taki a di foe toe dede: a se foe faja” (Openbaring 20:12-14). Prakseri foe dati! Ala den dedewan di ben de ini Gado prakseri abi a howpoe foe kon fri foe Hades (Grikitongo, haiʹdes), noso Sjeol, a grebi foe a libisma famiri (Psalm 16:10; Tori foe den Apostel 2:31). Den sa abi wan okasi foe sori nanga den doe foe den, efoe den sa dini Gado efoe no. Baka dati „dede nanga Hades” sa fringi go na ini san den e kari „a se foe faja”, di e agersi krinkrin pori, neleki san a wortoe „Gehèna” e agersi toe (Lukas 12:5). A grebi foe a libisma famiri srefi sa kon leigi èn a no sa de moro te na opobaka kon na wan kaba. A e trowstoe wi troetroe foe leri foe bijbel taki Gado no e pina sma nanga skin-ati! — Jeremia 7:30, 31.
WAN OPOBAKA FOE GO PE?
19. Foe san ede son sma foe a libisma famiri sa kisi wan opobaka foe go na hemel, èn sortoe skin Gado sa gi den?
19 Wan pikin nomroe mansma nanga oemasma sa kisi wan opobaka foe kisi libi na hemel. Leki kownoe nanga priester makandra nanga Jesus, den sa teki prati ini a poeroe di den sa poeroe ala den bakapisi foe dede di libisma kisi foe a fosi man Adam (Romesma 5:12; Openbaring 5:9, 10). Omeni sma Gado sa teki go na hemel foe tiri nanga Krestes? Soleki fa bijbel e taki, dan na soso 144.000 sma (Openbaring 7:4; 14:1). Jehovah sa gi ibriwan foe den sma disi di kisi wan opobaka wan jeje skin so taki den kan libi na hemel. — 1 Korentesma 15:35, 38, 42-45; 1 Petrus 3:18.
20. San den sma di e gi jesi na Gado sa ondrofeni, so srefi den wan di kisi wan opobaka?
20 A moro bigi pisi foe den wan di dede sa kisi wan opobaka na wan paradijs grontapoe (Psalm 37:11, 29; Mateus 6:10). Wan foe den reide foe san ede son wan e kisi wan opobaka foe go na hemel, na foe tjari a prakseri di Gado abi nanga grontapoe kon na wan kaba. Jesus Krestes nanga den 144.000 sma na hemel, sa tjari libisma di e gi jesi, safrisafri kon na a volmaaktifasi baka, di wi fosi papa nanga mama ben trowe. Disi sa abi na ini toe den wan di o kisi wan opobaka, soleki fa Jesus ben sori di a ben taigi a man di ben de foe dede èn di den ben anga na wan postoe leti na en sei: „Joe sa de nanga mi na ini a Paradijs.” — Lukas 23:42, 43.
21. San o pasa nanga dede soleki fa a profeiti Jesaja nanga na apostel Johanes e taki?
21 Na a Paradijs grontapoe, dede, di e meki someni sma na ini a ten disi libi sondro wan marki na ini den libi, sa komoto na pasi (Romesma 8:19-21). A profeiti Jesaja ben froeklari taki Jehovah Gado „seiker sa swari dede foe têgo” (Jesaja 25:8). Na apostel Johanes ben kisi wan fisjoen foe a ten te a libisma famiri di e gi jesi sa kon fri foe pen nanga dede. Ija, „Gado srefi sa de nanga den. Èn a sa figi poeroe ala watra-ai na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” — Openbaring 21:1-4.
22. Sortoe krakti a sabi di joe abi foe na opobaka abi na joe tapoe?
22 Den krin leri foe bijbel e poeroe a broeja ini a tori foe san e pasa nanga den dedewan. Den Boekoe foe bijbel e taki krin taki dede na „a lasti feanti” di sa kisi pori (1 Korentesma 15:26). Wi kan kisi troetroe tranga nanga trowstoe foe a sabi di wi abi foe na opobaka howpoe! Èn o prisiri wi kan de taki den lobiwan foe wi di dede èn di de ini Gado prakseri, sa wiki foe a sribi di den e sribi ini dede, so taki den kan njan boen foe ala den boen sani di Gado abi na prakseri gi den wan di lobi en! (Psalm 145:16) Den sortoe blesi disi sa kon troe nanga jepi foe Gado Kownoekondre. Ma o ten a tiri foe a Kownoekondre ben moesoe bigin? Meki wi go loekoe.
ONDROSOEKOE A SABI FOE JOE
San na a jeje na ini libisma?
San joe ben sa taki foe a fasi pe den dedewan de na ini?
Soema sa kisi wan opobaka?
[Aksi foe a tori disi]
[Prenki na tapoe bladzijde 85]
Neleki fa Jesus ben kari Lasarus komoto na a grebi, na so miljoenmiljoen sma sa kisi wan opobaka
[Prenki na tapoe bladzijde 86]
Prisiri sa de te ’Gado sa swari dede foe têgo’
