Soema na a troe Gado?
Kapitel 3
Soema na a troe Gado?
1. Foe san ede foeroe sma e agri nanga den bigin wortoe foe bijbel?
TE JOE loekoe na loktoe na wan krin neti, dan joe no e froewondroe foe si someni stari? Fa joe denki taki den doe kon? Èn san de foe taki foe den sani di e libi na grontapoe — den bromki nanga difrenti moi kloroe, den fowroe di e singi moi, den tranga walvis di e djompo na ini se? A lijst e go nanga langa. Ala den sani disi no ben kan kon foe densrefi. A no de foe froewondroe, taki foeroe sma e agri nanga den bigin wortoe foe bijbel: „Na ini a bigin Gado ben meki hemel nanga grontapoe”! — Genesis 1:1.
2. San bijbel e taki foe Gado, èn sortoe deki-ati a e gi wi foe doe?
2 Libisma e difrenti foeroe ini a fasi fa den e prakseri foe Gado. Son sma e denki taki Gado na wan krakti di no de wan sma. Miljoenmiljoen sma e anbegi den dede afo foe den, foe di den e bribi taki Gado de toemoesi fara foe man kon krosibei na en. Ma bijbel e tjari kon na krin taki a troe Gado na wan troetroe sma di e sori waran belangstelling gi ibriwan foe wi aparti. Dati meki bijbel e gi wi deki-ati foe „soekoe Gado”, èn a e taki: „ A no de fara foe ibriwan foe wi.” — Tori foe den Apostel 17:27.
3. Foe san ede sma no man meki wan prenki foe Gado?
3 San Gado gersi? Wan toe foe en foetoeboi si fisjoen foe en glori denoja. Ini den fisjoen disi a agersi ensrefi nanga wan sma di sidon na tapoe wan kownoestoeroe, èn wan krin leti di e gi lespeki frede e komoto na en. Ma den sma di ben si den sortoe fisjoen disi, noiti ben taki foe wan fesi di den man si krin (Danièl 7:9, 10; Openbaring 4:2, 3). Dati doe kon foe di „Gado na wan Jeje”; a no abi wan natoeroe skin (Johanes 4:24). Foe taki en leti, joe no man meki wan soifri prenki foe a skin foe wi Mekiman, foe di „noiti wan sma no si Gado” (Johanes 1:18; Exodus 33:20). Tokoe bijbel e leri wi foeroe sani foe Gado.
A TROE GADO ABI WAN NEN
4. San na wan toe titel di wani taki wan sani èn di bijbel e gebroiki gi Gado?
4 Na ini bijbel den e taki foe a troe Gado nanga den wortoe leki „Gado na Almaktiwan”, „a Moro Heiwan”, „a Bigi Mekiman”, „a Bigi Leriman”, „Soeverein Masra”, nanga „Kownoe foe ten di no abi kaba” (Genesis 17:1; Psalm 50:14; Preikiman 12:1; Jesaja 30:20; Tori foe den Apostel 4:24; 1 Timoteus 1:17). Te wi e prakseri dipi foe den sortoe titel disi, dan a kan jepi wi foe gro na ini a sabi foe Gado.
5. San na a nen foe Gado, èn omeni tron a de foe feni na ini den Hebrew Boekoe foe bijbel?
5 Ma Gado abi wan spesroetoe nen di de foe feni na ini den Hebrew Boekoe foe bijbel pikinmoro 7000 tron — moro foeroe tron leki iniwan foe den titel foe en. So wan 1900 jari pasa kaba, den djoe no ben kari a nen foe Gado moro foe wan kroektoe bribi ede. A Hebrewtongo foe bijbel ben skrifi sondro krinsten. Foe dati ede no wan fasi de di e sori soifri fa Moses, David noso tra sma foe owroeten ben kari den fo tapoesten (יהוה) di e meki a nen foe Gado. Son sabiman e taki, dati kande den kari a nen foe Gado, „Jahweh”, ma den no man de seiker. Na Ingrisi fasi foe kari „Jehovah” gebroiki foeroe jarihondro kaba èn na heri grontapoe sma e kari a nen na ini foeroe tongo na wan srefi sortoe fasi na ini a ten disi. — Loekoe Psalm 81:11 nanga Markus 12:29, 39 na ini a Njoe Testament Nanga dem Psalm.
FOE SAN EDE JOE MOESOE GEBROIKI A NEN FOE GADO
6. San Psalm 83:18 e taki foe Jehovah, èn foe san ede wi moesoe gebroiki en nen?
6 A spesroetoe nen foe Gado, Jehovah, abi leki marki foe kon sabi en foe ala den tra gado. Foe dati ede a nen de foe feni so foeroe tron na ini bijbel, spesroetoe na ini a Hebrew tekst foe en. Foeroe sma di e vertaal, no e gebroiki a nen foe Gado, ma Psalm 83:18 e taki krin, taki: „Joe di nen Jehovah, joe wawan na a Moro Heiwan foe heri grontapoe.” So boen, a fiti foe wi gebroiki a persoonlijk nen foe Gado te wi e taki foe en.
7. San wi e leri foe Gado, te wi e loekoe san a nen Jehovah wani taki?
7 A nen Jehovah na wan fasi foe wan Hebrew werkwortoe di wani taki „kon de”. Foe dati ede, a nen foe Gado wani taki „A e meki kon de”. Na so Jehovah Gado e meki sma kon sabi en leki a Sma nanga a Bigi Prakseri. Ala ten a e meki kon troe san a abi na prakseri. Soso a troe Gado kan abi a nen disi na wan retifasi, foe di libisma noiti kan de seiker taki a sa waka boen nanga den sani di den poti na den ede foe doe (Jakobus 4:13, 14). Jehovah wawan kan taki: „Na so mi wortoe di e komoto na mi mofo, sa sori foe de. . . . Foe troe a sa abi boen bakapisi na ini san mi ben seni en go.” — Jesaja 55:11.
8. Sortoe prakseri Jehovah ben meki bekènti nanga jepi foe Moses?
8 Ibriwan foe den Hebrew famiri-edeman Abraham, Isak, nanga Jakob, „ben kari a nen foe Jehovah”, ma den no ben sabi san a nen foe Gado ben wani taki troetroe (Genesis 21:33; 26:25; 32:9; Exodus 6:3). Di Jehovah ben tjari a prakseri foe en kon na krin baka ten, taki a ben o froeloesoe den Israèlsma, den bakapikin foe den Hebrew famiri-edeman, poeroe foe katibo na Egipti èn gi den „wan kondre pe merki nanga oniki e lon”, dan kande disi ben sori leki wan sani di no kan (Exodus 3:17). Tokoe Gado ben poti krakti na tapoe san a nen foe en wani taki foe têgo, di a ben taigi en profeiti Moses: „Disi na san joe moesoe taigi den manpikin foe Israèl: ’Jehovah a Gado foe oen fositen tata, a Gado foe Abraham, a Gado foe Isak nanga a Gado foe Jakob, seni mi kon na oenoe.’ Disi na mi nen te ten di no skotoe, èn disi na a sani foe memre mi, foe geslakti te go miti geslakti.” — Exodus 3:15.
9. Fa Farao ben prakseri foe Jehovah?
9 Moses ben aksi Farao, a kownoe foe Egipti, foe meki den Israèlsma go foe anbegi Jehovah na ini a gran sabana. Ma Farao, di sma ben si leki wan gado èn di ben anbegi tra gado foe Egipti, ben piki: „Soema na Jehovah, so taki mi moesoe gi jesi na en sten foe seni Israèl gowe? Mi no sabi Jehovah kwetikweti èn, boiti dati, mi no o seni Israèl gowe.” — Exodus 5:1, 2.
10. San Jehovah ben doe na Egipti foe owroeten, foe meki a prakseri foe en kon troe di ben abi foe doe nanga den Israèlsma?
10 Baka dati, Jehovah ben bigin doe sani safrisafri foe meki a prakseri foe en kon troe, èn ben handri akroederi san a nen foe en wani taki. A ben tjari tin plaag kon na tapoe den Egiptisma foe owroeten. A lasti plaag ben kiri ala den fosi geborewan foe Egipti, so srefi a manpikin foe a heimemre Farao. Baka dati den Egiptisma ben wani srefisrefi foe meki Israèl go. Ma a makti foe Jehovah ben naki na ati foe son Egiptisma na so wan fasi, taki den ben go makandra nanga den Israèlsma foe gowe libi Egipti. — Exodus 12:35-38.
11. Sortoe wondroe Jehovah ben doe na a Redi Se, èn san den feanti foe en ben moesoe erken?
11 A tranga-ede Farao nanga a legre foe en nanga hondrohondro fetiwagi, ben bigin nanga wan waka foe teki den srafoe foe en baka. Di den Egiptisma ben kon krosibei, dan Gado ben prati a Redi Se na wan froewondroe fasi, so taki den Israèlsma ben kan abra go na a tra sei na tapoe dreigron. Di den sma di ben soekoe foe kisi den Israèlsma, ben kon na tapoe a gron foe a se, dan Jehovah „ben tan teki den wiel poeroe foe den fetiwagi foe den, so taki den ben abi moeiti foe tjari den”. Den sroedati foe Egipti ben bari: „Meki wi lowe gowe foe no abi no wan sani foe doe nanga Israèl, bika foe troe Jehovah e feti gi den teige den Egiptisma.” Ma a ben lati kaba. Den bigi skotoe foe watra ben fadon kon èn „ben tapoe den fetiwagi nanga den asi rèiman di alamala ben de foe den sroedati legre foe Farao” (Exodus 14:22-25, 28). Na so fasi Jehovah ben meki wan bigi nen gi ensrefi, èn te na ini a ten disi no wan sma no frigiti a sani dati di pasa. — Josua 2:9-11.
12, 13. (a) San a nen foe Gado wani taki gi wi na ini a ten disi? (b) San de tranga fanowdoe foe sma kon sabi, èn foe san ede?
12 A nen di Gado meki gi ensrefi wani taki foeroe gi wi na ini a ten disi. A nen foe en, Jehovah, de leki wan djaranti taki ala sani di a abi na prakseri a sa meki kon troe. Dati abi na ini toe foe meki a prakseri kon troe di a ben abi biginbigin foe meki a grontapoe foe wi tron wan paradijs (Genesis 1:28; 2:8). Gado sa poeroe ala gensman foe en soevereiniteit na pasi na ini a ten disi, foe di a taki: „Den sa moesoe sabi taki mi na Jehovah” (Esekièl 38:23). Dan Gado sa meki a pramisi foe en kon troe, foe froeloesoe den anbegiman foe en foe go na ini wan njoen grontapoe foe regtfardikifasi. — 2 Petrus 3:13.
13 Ala sma di wani a boen-ati foe Gado moesoe leri foe kari a nen foe en na ini bribi. Bijbel e pramisi: „Ibriwan sma di e kari a nen foe Jehovah, sa kisi kibri” (Romesma 10:13). Ija, a nen Jehovah troetroe wani taki foeroe. Efoe joe e kari Jehovah leki joe Gado èn joe Froeloesoeman, dan dati kan tjari joe go na têgo kolokoe.
DEN EIGIFASI FOE A TROE GADO
14. Na tapoe sortoe fondamenti eigifasi foe Gado bijbel e poti krakti?
14 Wan studie foe a froeloesoe di Israèl ben froeloesoe poeroe na Egipti, e poti krakti na tapoe fo fondamenti eigifasi di Gado abi ini volmaakti balansi. A fasi fa a ben handri nanga Farao, ben tjari a makti foe en di e gi lespeki frede, kon na krin (Exodus 9:16). A toemoesi boen fasi fa Gado ben handri nanga a kefalek moeilek situwâsi dati ben sori a koni foe en di no wan sma man doro (Romesma 11:33). A ben tjari en retidoe kon na krin di a ben e gi strafoe na den tranga-ede gensman nanga den sma di ben kwinsi a pipel foe en (Deuteronomium 32:4). Wan toemoesi prenspari eigifasi foe Gado na lobi. Jehovah ben sori toemoesi aparti lobi, foe di a ben meki a pramisi kon troe di ben abi foe doe nanga den bakapikin foe Abraham (Deuteronomium 7:8). A ben sori lobi toe, foe di a ben gi wan toe Egiptisma pasi foe drai den baka gi den falsi gado èn meki den abi foeroe wini, foe di den teki a sei foe a wan-enkri troe Gado.
15, 16. Na sortoe fasi Gado sori lobi?
15 Te joe leisi bijbel, dan joe sa si taki lobi na a moro prenspari eigifasi foe Gado, èn a e sori disi na foeroe fasi. Foe eksempre, na lobi ben boeweigi en taki a ben kon tron wan Mekiman èn ben prati a prisiri di libi e gi, nanga jeje mekisani fosi. Den hondrohondro miljoen engel dati lobi Gado èn e prèise en (Job 38:4, 7; Danièl 7:10). Gado ben sori lobi toe foe di a meki grontapoe èn sreka en so, taki libisma ben kan libi kolokoe na en tapoe. — Genesis 1:1, 26-28; Psalm 115:16.
16 Wi e kisi wini foe a lobi foe Gado na someni fasi di foeroe toemoesi foe kari. Na a fosi presi, na wan lobi fasi Gado meki a skin foe wi na so wan toemoesi boen fasi taki wi kan njan boen foe a libi (Psalm 139:14). A lobi foe en e kon na krin na ini a gi di a e gi „alen foe hemel nanga pisi ten di e gi njanjan, e foeroe [wi] ati pasa marki nanga njanjan èn nanga prisiri” (Tori foe den Apostel 14:17). Gado „e meki en son opo gi den ogri sma èn gi den boen sma èn e meki alen fadon gi regtfardiki sma nanga onregtfardikisma” srefi (Mateus 5:45). Lobi e boeweigi wi Mekiman so srefi, foe jepi wi foe kisi a sabi foe Gado èn dini en nanga kolokoe leki en anbegiman. Foe troe, „Gado na lobi” (1 Johanes 4:8). Ma a persoonlijkheid foe en abi moro fasi ete.
„WAN GADO FOE SARI-ATIFASI NANGA BOEN FASI”
17. San wi e leri foe Gado na Exodus 34:6, 7?
17 Baka di den Israèlsma abra a Redi Se, a ben de fanowdoe ete foe den kon sabi Gado moro boen. Moses ben firi taki a ben abi a sabi disi fanowdoe èn a ben begi: „Grantangi, efoe mi feni boen na ini joe ai, grantangi meki mi kon sabi den pasi foe joe, foe mi kan kon sabi joe, so taki mi kan feni boen na ini joe ai” (Exodus 33:13). Moses ben kon leri sabi Gado moro boen di a ben e jere a froeklari foe Gado srefi: „Jehovah, Jehovah, wan Gado di abi sari-atifasi nanga boen fasi, di no e atibron esi èn di abi lobi boen-atifasi nanga waarheid pasa marki, di e kibri lobi boen-atifasi gi doesoendoesoen, di e gi pardon foe fowtoe èn foe a pasa foe wet èn foe sondoe, ma di no sa gi fri foe strafoe kwetikweti” (Exodus 34:6, 7). Gado e poti en lobi ini balansi nanga retidoe, a no e kibri sma di e sondoe foe espresi, foe den bakapisi foe na ogridoe foe den.
18. Fa Jehovah boeweisi foe abi sari-atifasi?
18 Soleki fa Moses ben leri, dan Jehovah e sori sari-ati. Wan sma di abi sari-atifasi, e sari foe den wan di e pina èn a e proeberi foe gi den froelekti. So boen, Gado sori sari-atifasi gi a libisma famiri, foe di a seti sani foe den kisi froelekti foe ala ten foe pina, siki, nanga dede (Openbaring 21:3-5). Sma di e anbegi Gado kan ondrofeni rampoe foe a situwâsi na ini na ogri grontapoe disi ede, noso kande den no e handri na wan koni fasi èn e kisi problema. Ma efoe den e drai go na Jehovah na wan sakafasi foe kisi jepi, dan a sa trowstoe den èn jepi den. Foe san ede? Bika na wan sari-ati fasi a e hori den anbegiman foe en na prakseri na wan switi fasi. — Psalm 86:15; 1 Petrus 5:6, 7.
19. Foe san ede wi kan taki dati Gado abi boen fasi?
19 Foeroe sma di abi makti, e handri na wan grofoe fasi nanga tra sma. Na a tra sei, Jehovah troetroe abi boen fasi gi den foetoeboi foe en di abi sakafasi! Ala di a de a moro hei makti na ini na universum, tokoe a e sori wan aparti switifasi gi ala sma foe a heri libisma famiri (Psalm 8:3, 4; Lukas 6:35). Jehovah abi boen fasi toe gi ibriwan sma aparti, èn e gi piki na tapoe den spesroetoe tranga begi foe den foe kisi en boen-ati (Exodus 22:26, 27; Lukas 18:13, 14). A no de foe taki, dati Gado no de froeplekti foe sori boen-ati noso sari-ati gi iniwan sma (Exodus 33:19). Foe dati ede, wi moesoe sori dipi warderi gi a sari-ati foe Gado nanga en boen fasi. — Psalm 145:1, 8.
A NO E ATIBRON ESI, A NO E TEKI SMA PARTÈI, ÈN A DE REGTFARDIKI
20. San e sori taki Jehovah no e atibron esi èn taki a no e teki sma partèi?
20 Jehovah no e atibron esi. Tokoe disi no wani taki, dati a no e doe wan sani, bika a ben doe so di a ben pori a tranga-ede Farao nanga en legre na ini a Redi Se. Jehovah no e teki sma partèi toe. Foe dati ede a pipel foe en, den Israèlsma, di ben feni a boen foe en, te foe kaba lasi a boen dati, foe di den ben tan doe ogri. Gado e teki pipel foe ala nâsi foe de anbegiman foe en, ma a e teki soso den wan di e tjari densrefi akroederi den regtfardiki pasi foe en. — Tori foe den Apostel 10:34, 35.
21. (a) San Openbaring 15:2-4 e leri wi foe Gado? (b) San sa meki en moro makriki gi wi foe doe san Gado e taki san boen?
21 A bijbel boekoe Openbaring e poti krakti na tapoe o prenspari a de foe leri foe den „regtfardiki bosroiti” foe Gado. A e taigi wi taki mekisani na hemel e singi: „Bigi èn toemoesi moi den wroko foe joe de, Jehovah Gado, na Almaktiwan. Regtfardiki èn troe den pasi foe joe de, Kownoe foe ten di no abi kaba. Soema no sa frede joe troetroe, Jehovah, èn gi joe nen glori, bika joe wawan de loyaal? Bika ala den nâsi sa kon èn anbegi na joe fesi, bika den regtfardiki bosroiti foe joe ben kon de foe si” (Openbaring 15:2-4). Wi e sori gosontoe frede gi Jehovah, noso lespeki frede gi en, foe di wi e tjari wisrefi akroederi san en e taki san boen. Disi e kon moro makriki te wi e memre wisrefi foe a koni nanga a lobi foe Gado. Ala den komando foe en na foe a boen foe wi ede. — Jesaja 48:17, 18.
„JEHOVAH, WI GADO, NA WÁN”
22. Foe san ede den wan di e teki bijbel no e anbegi wan Dri-wánfasi?
22 Den Egiptisma foe owroeten ben anbegi foeroe gado, ma Jehovah na „wan Gado di e aksi foe sma gi densrefi na ini a dini foe en wawan” (Exodus 20:5). Moses ben memre den Israèlsma taki „Jehovah, wi Gado, na wán Jehovah” (Deuteronomium 6:4). Jesus Krestes ben taki den wortoe disi ete wan tron (Markus 12:28, 29). Foe dati ede, den sma di e teki bijbel leki a Wortoe foe Gado no e anbegi wan Dri-wánfasi di abi na ini, dri sma na ini wán noso dri gado na ini wán. Foe taki en leti, a wortoe „Dri-wánfasi” no de na ini bijbel srefisrefi. A troe Gado na wán Sma, di de aparti foe Jesus Krestes (Johanes 14:28; 1 Korentesma 15:28). A santa jeje foe Gado a no wan sma. Na a wroko krakti foe Jehovah, di na Almaktiwan e gebroiki foe meki den prakseri foe en kon troe. — Genesis 1:2; Tori foe den Apostel 2:1-4, 32, 33; 2 Petrus 1:20, 21.
23. (a) Fa a lobi di joe abi gi Gado sa gro? (b) San Jesus ben taki foe a lobi di wan sma moesoe lobi Gado, èn san wi moesoe leri foe Krestes?
23 Te joe e prakseri o kefalek Jehovah de, dan joe no e agri taki a warti foe joe anbegi en? Te joe e studeri en Wortoe, bijbel, dan joe sa kon sabi en moro boen èn joe sa leri san a e aksi foe joe foe joe kisi têgo boen nanga kolokoe (Mateus 5:3, 6). Moro fara, a lobi di joe abi gi Gado sa gro. Dati na wan sani di e fiti, bika Jesus ben taki: „Joe moesoe lobi Jehovah, joe Gado, nanga joe heri ati èn nanga joe heri sili èn nanga joe heri froestan èn nanga joe heri krakti” (Markus 12:30). A de krin, taki Jesus ben abi so wan lobi gi Gado. Ma san bijbel e tjari kon na krin foe Jesus Krestes? San na a prati di a abi na ini a prakseri foe Jehovah?
ONDROSOEKOE A SABI FOE JOE
San na a nen foe Gado, èn omeni tron a nen e gebroiki na ini den Hebrew Boekoe foe bijbel?
Foe san ede joe moesoe gebroiki a nen foe Gado?
Sortoe eigifasi foe Jehovah Gado spesroetoe e hari joe prakseri?
[Aksi foe a tori disi]
[Prenki na tapoe bladzijde 29]
O boen joe sabi a Mekiman foe ala sani?
