Lès 1

Fa joe kan kon sabi san Gado e aksi foe joe

Sortoe prenspari tori de na ini bijbel? (1)

Soema na a skrifiman foe bijbel? (2)

Foe san ede joe moesoe studeri bijbel? (3)

1. Bijbel na wan diri presenti foe Gado. A de leki wan brifi foe wan lobi-ati papa gi den pikin foe en. A e froeteri wi a waarheid di abi foe doe nanga Gado — soema na en èn san na den markitiki foe en. A e tjari kon na krin fa foe kakafoetoe gi problema èn fa foe feni troetroe kolokoe. Bijbel wawan e froeteri wi san wi moesoe doe foe plisi Gado. — Psalm 1:1-3; Jesaja 48:17, 18.

2. So wan 40 difrenti man ben skrifi bijbel na ini wan pisi ten foe 1600 jari, èn den ben bigin skrifi na ini 1513 b.G.T. A abi 66 pikin boekoe. Na Gado ben meki den sma skrifi bijbel. Den ben skrifi den prakseri foe Gado, no di foe densrefi. So boen, Gado na hemel na a Skrifiman foe bijbel, èn no wan libisma na grontapoe. — 2 Timoteus 3:16, 17; 2 Petrus 1:20, 21.

3. Gado ben sorgoe taki bijbel ben skrifi abra na wan soifri fasi èn taki a ben kibri boen meki noti pasa nanga en. Moro bijbel druk leki iniwan tra boekoe. A no ala sma sa breiti foe si taki joe e studeri bijbel, ma no meki dati tapoe joe. A têgo tamara foe joe e anga foe a sabi di joe o kon sabi Gado èn a doe di joe o doe en wani, awansi sortoe gens e kon. — Mateus 5:10-12; Johanes 17:3.