Lès 7

Kon krosibei na Gado ini begi

Foe san ede a prenspari foe begi ala ten baka? (1)

Na soema wi moesoe begi, èn fa? (2, 3)

Foe sortoe afersi a fiti foe begi foe den? (4)

O ten joe moesoe begi? (5, 6)

Gado e arki ala begi? (7)

1. Begi na a taki di wi e taki nanga Gado na wan sakafasi. Joe moesoe begi na Gado ala ten baka. Na so joe kan firi taki joe de krosibei na en leki na wan lobi mati. Jehovah de so bigi èn so makti, tokoe a e arki den begi foe wi! Joe e begi na Gado ala ten baka? — Psalm 65:2; 1 Tesalonikasma 5:17.

2. Begi na wan pisi foe wi anbegi. Foe dati ede, wi moesoe begi na Gado, Jehovah, wawan. Di Jesus ben de na grontapoe,  ala ten a ben begi na en Tata, no na wan tra sma. Wi moesoe doe a srefi (Mateus 4:10; 6:9). Ma, wi moesoe taki ala den begi foe wi na ini a nen foe Jesus. Disi e sori taki wi e lespeki a posisi foe Jesus èn taki wi abi bribi na ini en froeloesoe-ofrandi. — Johanes 14:6; 1 Johanes 2:1, 2.

3. Te wi e begi, dan wi moesoe taki nanga Gado komoto na wi ati. Wi no moesoe taki den begi foe wi na ede noso leisi den foe wan boekoe nanga begi (Mateus 6:7, 8). Wi kan begi ini iniwan lespeki posisi, na iniwan ten, èn na iniwan presi. Gado kan jere srefi den begi di wi ben taki na ini wi ati (1 Samuèl 1:12, 13). A boen foe soekoe wan tiri presi, aparti foe tra sma, foe taki den begi foe wisrefi. — Markus 1:35.

4. Foe sortoe afersi joe kan begi? Ala sani di ben sa kan abi krakti na tapoe joe matifasi nanga en (Filipisma 4:6, 7). A model begi e sori taki wi moesoe begi foe a nen nanga prakseri foe Jehovah. Wi kan aksi toe foe sorgoe gi den sani di wi abi fanowdoe na skinfasi, foe gi wi pardon foe den sondoe foe wi, èn foe jepi wi foe kakafoetoe gi tesi (Mateus 6:9-13). Den begi foe wi no moesoe de foe wi eigi wini nomo. Wi moesoe begi soso foe sani di e kroederi nanga a wani foe Gado. — 1 Johanes 5:14.

5. Joe kan begi awansi o ten joe ati e poesoe joe foe taki Gado tangi noso foe prèise en (1 Kroniki 29:10-13). Joe moesoe begi te joe abi problema èn a bribi foe joe e kisi tesi (Psalm 55:22; 120:1). A fiti foe begi bifo joe njan (Mateus 14:19). Jehovah e gi wi a kari foe begi „na ibri okasi”. — Efeisesma 6:18.

6. Wi moesoe begi spesroetoe efoe wi doe wan serjoesoe sondoe. Na den ten dati wi moesoe begi foe kisi a sari-ati nanga pardon foe Jehovah. Efoe wi e froeteri en den sondoe foe wi èn e doe ala san wi man foe no doe den agen, dan Gado de „klariklari foe gi pardon”. — Psalm 86:5; Odo 28:13.

7. Jehovah e arki soso den begi foe regtfardiki sma. Efoe joe wani taki Gado e arki den begi foe joe, dan joe moesoe doe san joe man foe libi akroederi den wet foe en (Odo 15:29; 28:9). Joe moesoe de nanga sakafasi te joe e begi (Lukas 18:9-14). Joe moesoe doe moeiti gi san joe e begi foe en. Na so fasi joe sa sori taki joe abi bribi èn taki joe e meine troetroe san joe e taki. Dan wawan Jehovah sa piki den begi foe joe. — Hebrewsma 11:6.