Lès 6

San na a Kownoekondre foe Gado?

O pe a Kownoekondre foe Gado de? (1)

Soema na a Kownoe foe en? (2)

Tra sma e tiri makandra nanga a Kownoe? Efoe dati de so, omeni sma o tiri makandra nanga en dan? (3)

San e sori taki wi e libi na ini den lasti dei? (4)

San a Kownoekondre foe Gado o doe gi a libisma famiri na ini a ten di e kon? (5-7)

1. Di Jesus ben de na grontapoe, a ben leri den bakaman foe en foe begi foe a Kownoekondre foe Gado. Wan kownoekondre na wan tiri di abi wan kownoe leki edeman. A Kownoekondre foe Gado na wan spesroetoe tiri. A opo na hemel èn sa tiri a grontapoe disi. A sa meki a nen foe Gado kon santa. A sa meki a wani foe Gado pasa na grontapoe soleki fa a e pasa na hemel. — Mateus 6:9, 10.

2. Gado ben pramisi taki Jesus ben sa tron a Kownoe foe En Kownoekondre (Lukas 1:30-33). Di Jesus ben de na grontapoe, a ben sori taki a ben sa de wan volmaakti Tiriman di abi switifasi èn di de regtfardiki. Di a ben drai go baka na hemel, Gado no ben poti en wantewante na tapoe a kownoestoeroe leki Kownoe foe a Kownoekondre foe Gado (Hebrewsma 10:12, 13). Na ini 1914, Jehovah ben gi Jesus a makti di A ben pramisi en. Sensi a ten dati, Jesus tiri na hemel leki a Kownoe di Jehovah poti. — Danièl 7:13, 14.

3. Jehovah teki so srefi wan toe getrow man nanga oema foe grontapoe foe go na hemel. Den sa tiri a libisma famiri makandra nanga Jesus leki kownoe, kroetoeman nanga priester (Lukas 22:28-30; Openbaring 5:9, 10). Jesus ben kari den kompe tiriman disi na ini en Kownoekondre wan „pikin ipi”. Den de 144.000. — Lukas 12:32; Openbaring 14:1-3.

4. So esi leki Jesus ben tron Kownoe, a ben trowe Satan nanga den ogri engel foe en komoto na hemel, saka go na a birti foe grontapoe. Dati meki sensi 1914 sani kon so takroe djaso na grontapoe (Openbaring 12:9, 12). Feti, angriten, pestsiki, kroektoedoe di e kon moro foeroe — ala  den sani disi na pisi foe wan „marki” di e sori taki Jesus e tiri èn taki a seti disi de na ini den lasti dei foe en. — Mateus 24:3, 7, 8, 12; Lukas 21:10, 11; 2 Timoteus 3:1-5.

5. Heri esi Jesus sa kroetoe sma èn prati den neleki fa wan skapoeman e prati den skapoe foe den bokoboko. Den „skapoe” na den sma di sa boeweisi taki den na den loyaal borgoe foe en. Den sa kisi têgo libi na grontapoe. Den „bokoboko” na den sma di sa weigri foe erken a Kownoekondre foe Gado (Mateus 25:31-34, 46). Na ini a krosibei ten di e kon, Jesus sa pori ala sma di gersi bokoboko (2 Tesalonikasma 1:6-9). Efoe joe wani de wan foe den „skapoe” foe Jesus, dan joe moesoe arki a Kownoekondre boskopoe èn doe akroederi san joe e leri. — Mateus 24:14.

6. Nownow grontapoe prati ini foeroe kondre. Ibriwan abi en eigi tiri. Foeroe tron den nâsi disi e feti nanga makandra. Ma a Kownoekondre foe Gado sa poeroe ala libisma tiri èn kon na ini a presi foe den. Leki a wan-enkri tiri a sa tiri a heri grontapoe (Danièl 2:44). Dan feti, takroedoe nanga ogri di doe nanga tranga no sa de moro. Ala sma sa libi makandra ini vrede nanga wánfasi. — Mika 4:3, 4.

7. Na ini a Doesoen Jari Tiri foe Jesus, getrow libisma sa kon de volmaakti èn a heri grontapoe sa kon tron wan paradijs. Na a kaba foe a doesoen jari, Jesus sa doe ala sani kaba san Gado ben aksi en foe doe. Dan a sa gi a Kownoekondre baka na en Tata (1 Korentesma 15:24). Foe san ede joe no e froeteri joe mati nanga lobiwan foe san a Kownoekondre foe Gado sa doe?

[Prenki na tapoe bladzijde 13]

Na ondro a tiri foe Jesus, a si di sma no wani si trawan na ai noso foe kroetoe sma sondro foe sabi fa sani de, no sa de moro