Lès 4

Soema na Didibri?

Satan Didibri — o pe a ben komoto? (1, 2)

Fa Satan e kori sma? (3-7)

Foe san ede joe moesoe kakafoetoe gi Didibri? (7)

1. A wortoe „didibri” wani taki wan sma di e froeteri ogri lei foe wan tra sma. „Satan” wani taki wan feanti noso wan gensman. Disi na nen di den gi na a moro prenspari feanti foe Gado. Na ini a bigin, a ben de wan volmaakti engel di a ben de na hemel makandra nanga Gado. Ma, baka ten a ben prakseri toemoesi foeroe foe ensrefi, èn ben wani na anbegi di nanga reti de foe Gado. — Mateus 4:8-10.

2. Na engel disi, Satan, ben taki nanga Eva nanga jepi foe wan sneki. Foe di a ben froeteri Eva lei, meki a ben kisi en so fara foe trangajesi Gado. Na so fasi Satan ben bigin feti san den kari a „soevereiniteit” foe Gado, noso posisi leki a Moro Heiwan. Satan ben meki sma kon degedege efoe Gado e tiri na wan warti fasi èn foe a boen foe den borgoe foe En. Satan ben meki sma kon degedege toe efoe iniwan libisma ben sa tan loyaal na Gado. Foe di a doe disi, dan Satan ben meki ensrefi tron wan feanti foe Gado. Dati na foe san ede den ben kari en Satan Didibri. — Genesis 3:1-5; Job 1:8-11; Openbaring 12:9.

3. Satan e proeberi foe kori sma foe go anbegi en (2 Korentesma 11:3, 14). Wan fasi fa a e kori sma de nanga jepi foe falsi relisi. Efoe wan relisi e leri lei foe Gado, dan troetroe a e dini a prakseri foe Satan (Johanes 8:44). Sma di de memre foe falsi relisi e bribi opregti kande taki den e anbegi a troe Gado. Ma den e dini Satan troetroe. En na ’a gado foe a grontapoe disi’. — 2 Korentesma 4:4.

4. Afkodrei na wan tra fasi fa Satan e tjari sma kon na ondro en makti. Kande den e begi den jeje tranga foe kibri den, foe doe trawan ogri, foe froeteri na fesi foe a ten di e kon, noso foe doe wondroe. Satan na a ogri krakti na baka ala den wroko disi. Efoe wi wani plisi Gado, dan wi no moesoe abi noti foe doe nanga afkodrei. — Deuteronomium 18:10-12; Tori foe den Apostel 19:18, 19.

5. Satan e kori sma toe nanga jepi foe a toemoesi bigimemre firi foe wan sma ras nanga na anbegi foe politiek organisâsi.  Son wan e feni taki a nâsi noso ras foe den moro boen leki trawan. Ma disi no troe (Tori foe den Apostel 10:34, 35). Tra sma e loekoe go na politiek organisâsi foe loesoe den problema foe libisma. Foe di den e doe disi, den e weigri foe erken a Kownoekondre foe Gado. A Kownoekondre na a wan-enkri loesoe gi den problema foe wi. — Danièl 2:44.

6. Wan tra fasi fa Satan e kori sma, na foe tesi den nanga sondoe lostoe. Jehovah e froeteri wi foe tan farawe foe sondoe wroko, foe di a sabi taki den sa doe wi ogri (Galasiasma 6:7, 8). Son sma wani kande taki joe teki prati nanga den na den sortoe wroko dati. Ma memre taki na Satan troetroe wani foe joe doe den sani disi. — 1 Korentesma 6:9, 10; 15:33.

7. Satan e gebroiki froefolgoe noso gens kande foe kisi joe so fara foe libi Jehovah. Son wan foe den lobiwan foe joe kande e kisi atibron srefisrefi, foe di joe e studeri bijbel. Trawan e spotoe joe kande. Ma na soema joe abi foe taki tangi foe joe libi? Satan wani meki joe kon frede, so taki joe sa tapoe foe leri sabi Jehovah. No meki Satan wini! (Mateus 10:34-39; 1 Petrus 5:8, 9) Te joe e kakafoetoe gi Didibri, dan joe kan meki Jehovah prisiri èn sori taki joe e hori En soevereiniteit hei. — Odo 27:11.

[Prenki na tapoe bladzijde 9]

Falsi relisi, afkodrei, nanga lobi gi wan sma kondre, e kori sma

[Prenki na tapoe bladzijde 9]

Kakafoetoe gi Satan foe di joe e go doro foe leri sabi Jehovah