San Yehovah Kotoigi E Bribi?

„Wi denki taki a de wan yoisti sani fu yere fu yu san yu e prakseri, bika fu tru, fu a sekte disi wi kon sabi taki na ala presi sma e taki takru fu en” (Tori fu den Apostel 28:22). Den fesiman disi fu a libimakandra na ini Rome fu a fosi yarihondro ben gi wan bun eksempre. Den ben wani yere a tori fu den fosi yarihondro Kresten srefi, na presi fu yere en fu sabiman di e krutu sma tori nomo.

Na a srefi fasi a de na ini a ten disi, taki nofotron sma e taki takru fu Yehovah Kotoigi, èn a ben o de wan fowtu fu denki taki den sma di e krutu den Kotoigi sondro fu sabi a fini fu a tori, o leri yu fa den de trutru. Dati meki wi breiti taki wi kan tyari kon na krin gi yu san na wan tu fu den moro prenspari sani di wi e bribi.

Bijbel, Yesus Krestes, Nanga Gado

Wi e bribi taki „na Gado ben meki sma skrifi ala den Buku fu Bijbel nanga yepi fu en santa yeye èn den bun fu gi leri” (2 Timoteus 3:16). Èn ala di son sma taki dati wi no de Kresten trutru , toku disi no tru kwetikweti. Wi e agri krinkrin nanga a sani di na apostel Petrus ben taki fu Yesus Krestes: „No wan tra nen de na ondro hemel di gi na mindri libisma èn di musu gi wi frulusu.”​—Tori fu den Apostel 4:12.

Ma fu di Yesus ben taki dati en na „Gado Manpikin” èn taki a ’Tata ben seni mi kon’, dan Yehovah Kotoigi e bribi taki Gado bigi moro Yesus (Yohanes 10:36; 6:57). Yesus srefi ben erken: „A Tata bigi moro mi” (Yohanes 14:28;  8:28). So bun, wi no e bribi taki Yesus de a srefi leki a Tata, soleki fa a Dri-wánfasi leri e taki. Na presi fu dati, wi e bribi taki Gado ben kria en èn taki a lagi moro En.​—Kolosesma 1:15; 1 Korentesma 11:3.

Na ini Sranantongo a nen fu Gado na Yehovah. Bijbel e taki: „So dati libisoema sa sabi dati Joe disi Joe nem wawan de JEHOVAH, de da moro hei wan abra heri grontapoe” (Psalm 83:19, Da Bijbel na ini Sranantongo). Fu di Yesus ben agri nanga a fruklari disi, meki a ben poti furu krakti na a nen fu Gado, ala di a ben leri den bakaman fu en fu begi: „Wi Tata na hemel, meki yu nen kon santa.” Èn ensrefi ben begi Gado: ’Mi tyari a nen fu yu kon na krin gi den sma di yu ben gi mi.’​—Mateus 6:9; Yohanes 17:6.

Yehovah Kotoigi e bribi taki den musu de leki Yesus, fu meki a nen fu Gado èn den prakseri fu En bekènti na tra sma. Fu dati ede wi teki a nen Yehovah Kotoigi, bika wi e waka na baka na eksempre fu Yesus, „a Getrow Kotoigi” (Openbaring 1:5; 3:14). A fiti fu dati ede taki Yesaya 43:10 e taigi a pipel di e teki presi gi Gado: „ ’Unu na mi kotoigi,’ na so Yehovah taki, ’iya, mi futuboi di mi frukisi.’”

A Kownukondre fu Gado

Yesus ben leri den bakaman fu en fu begi: „Meki yu kownukondre kon”, èn a ben meki a Kownukondre dati de a moro prenspari sani di a ben leri sma (Mateus 6:10; Lukas 4:43). Yehovah Kotoigi e bribi taki a Kownukondre na wan trutru tiri na ini hemel, taki a sa tiri grontapu, èn taki Yesus Krestes di wi no man si na a Kownu fu a tiri disi. „A wroko foe basi da kondre de na tapu hem skowroe”, Bijbel e taki. „Da gro foe hem kownoekondre nanga vrede noiti sa kaba.”​—Yesaya 9:6, 7, Da Bijbel na ini Sranantongo.

Ma a no Yesus Krestes wawan sa de kownu fu a tiri fu Gado. A sa abi furu tra tiriman makandra nanga en na hemel. „Efu wi e tan horidoro,” na so na apostel Paulus ben  skrifi, „dan wi alamala sa tiri leki kownu tu” (2 Timoteus 2:12). Bijbel e sori taki den libisma disi di e kisi wan opobaka fu go tiri nanga Krestes na hemel, na soso „den wán hondro fotenti na fo dusun, di den ben bai na grontapu”.​—Openbaring 14:1, 3.

A no de fu taki, dati ala tiri musu abi borgu, èn Yehovah Kotoigi e bribi taki boiti den hemel tiriman disi, milyardmilyard sma moro sa kisi têgo libi. Te fu kaba, grontapu di sa tron wan moi paradijs, sa abi soso den sma disi di warti fu de borgu fu Gado Kownukondre, èn den alamala sa saka densrefi na ondro a tiri fu Krestes èn den sma di sa tiri makandra nanga en. So bun, Yehovah Kotoigi e bribi tranga taki grontapu no sa pori noiti èn taki a pramisi na ini Bijbel sa kon tru, taki: „Na den regtfardiki sma sa abi grontapu leki a gudu fu den, èn den sa libi na tapu fu têgo.”​—Psalm 37:29; 104:5.

Ma fa Gado Kownukondre sa kon? ¿Fu di ala sma sa saka densrefi na ondro a tiri fu Gado nanga den fri wani? Kwetikweti, Bijbel e sori wi na wan krin fasi taki a kon di a Kownukondre sa kon, sa wani taki dati Gado sa bumui ensrefi langalanga nanga den sani di e pasa na grontapu: „A Gado fu hemel sa opo wan kownukondre di noiti no sa kisi pori. Èn a kownukondre srefi . . . sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu.”​—Danièl 2:44.

O ten Gado Kownukondre sa kon? Den Bijbel profeititori di e kon tru now, e meki Yehovah Kotoigi e bribi taki a Kownukondre sa kon dyonsro. Wi e gi yu a kari fu luku wan tu fu den profeititori di e taki na fesi san na  den sani di ben o pasa na ini „den lasti dei” fu a godelowsu seti fu sani disi. Den skrifi na ini Mateus 24:3-14; Lukas 21:7-13, 25-31; nanga 2 Timoteus 3:1-5.

Fu di wi ’lobi Yehovah, wi Gado, nanga wi heri ati èn nanga wi heri sili èn nanga wi heri frustan èn nanga ala wi krakti, èn a sma na wi sei leki wisrefi’, meki kondre, ras, noso sani na sociaal sei no e prati wi (Markus 12:30, 31). Furu sma sabi wi fu a lobi di de fu si na mindri wi Kresten brada di de na ini ala nâsi (Yohanes 13:35; 1 Yohanes 3:10-12). Na so fasi wi no e bumui nanga den politiek afersi fu den nâsi disi. Wi e pruberi fu de leki den fosi yarihondro disipel fu Yesus, di a ben taki fu den: „Den no de wan pisi fu grontapu, neleki fa mi no de wan pisi fu grontapu” (Yohanes 17:16). Wi e bribi taki efu wi no e moksi wisrefi nanga grontapu, dan disi wani taki dati wi musu wai pasi gi a morsu fasi fa sma e tyari densrefi, san de so wan gewoon sani na ini a ten disi, èn wi e wai pasi tu gi lei, fufuru, sutadu, hurudu, homoseks-libi, a fowtu fasi fa sma e gebroiki brudu, na anbegi fu kruktu gado, èn den sortu sani disi di Bijbel e krutu.​—1 Korentesma 6:9-11; Efeisesma 5:3-5; Tori fu den Apostel 15:28, 29.

Howpu gi a Ten Di E Kon

Yehovah Kotoigi e bribi taki a libi di wi e libi now na ini a grontapu disi, a no ala san de. Wi e bribi taki Yehovah ben seni Krestes kon na grontapu fu trowe en brudu leki wan lusu-paiman, so taki libisma kan kon de regtfardiki na fesi Gado èn kisi têgo libi na ini wan nyun seti fu sani. A de soleki fa wan apostel fu Yesus ben taki: „Gado ben fruklari taki wi de regtfardiki nanga yepi fu Krestes brudu” (Romesma 5:9; Mateus 20:28). Yehovah Kotoigi e taigi Gado nanga en Manpikin tangi fu di den gi wi a lusu-paiman disi, di e meki taki wi man libi na ini a ten di e kon.

Yehovah Kotoigi e bribi dorodoro taki wan libi sa de na ini a ten di e kon, fu di dedesma sa kisi wan opobaka te Gado Kownukondre e tiri. Neleki fa Bijbel e leri, na so wi e bribi taki te wan sma dede dan a no de moro  kwetikweti, taki „na a dei dati den prakseri fu en e lasi gowe” (Psalm 146:3, 4; Esekièl 18:4; Preikiman 9:5). Iya, na ini a ten di e kon dedesma sa man libi, fu di Gado sa memre den na ini wan opobaka.​—Yohanes 5:28, 29.

Ma Yehovah Kotoigi e bribi taki furu sma di e libi now sa pasa libilibi te Gado Kownukondre o tyari wan kaba kon na ala den tiri fu a ten disi èn taki neleki fa Noa nanga en osofamiri ben pasa a Frudu libilibi, na so den sa tan na libi tu fu prisiri fu têgo libi na tapu wan grontapu di kon krin (Mateus 24:36-39; 2 Petrus 3:5-7, 13). Ma wi e bribi taki sma kan pasa libilibi te den e du san Yehovah wani, soleki fa Bijbel e taki: „Grontapu e pasa gowe . . . , ma a sma di e du a wani fu Gado, e tan fu têgo.”​—1 Yohanes 2:17; Psalm 37:11; Openbaring 7:9, 13-15; 21:1-5.

A de krin, taki wi no man taki dya fu ala den sani di Yehovah Kotoigi e bribi, ma toku wi e gi yu a kari fu kon sabi moro fu a tori.

Efu wi no sori en tra fasi, dan ala den bijbeltekst teki fu a New World Translation of the Holy Scriptures.

[Prenspari pisi na tapu bladzijde 4]

Wi teki a nen Yehovah Kotoigi, fu di wi e waka na baka na eksempre fu Yesus