Libi de, baka te wan sma dede?

„Gi wan bon srefi howpoe de. Efoe sma e koti en trowe, a sa sproiti baka srefi . . . Efoe wan man di gosontoe èn tranga na skinfasi dede, a kan libi baka?” — MOSES, WAN PROFEITI FOE OWROETEN.

1-3. Fa foeroe sma e soekoe trowstoe te den lasi wan lobiwan na ini dede?

NA INI wan oso pe den e poti dedeskin na New York, mati nanga famiri e waka safri pasa na opo dedekisi. Nanga froewondroe den e loekoe a skin, a di foe wan boi foe 17 jari. Den mati foe en foe skoro pikinmoro no sabi en moro. Foeroe foe en wiwiri fadon foe di den dresi en nanga chemotherapie; kanker meki taki a ben kon mangri. Disi troetroe kan de a mati foe den? Soso wan toe moen na fesi, a ben de nanga someni prakseri, someni aksi, someni krakti — someni libi! A mama foe a boi di e sari troetroe, e proeberi foe kisi howpoe nanga trowstoe foe a prakseri taki na wán noso tra fasi en manpikin de na libi ete. Ala di a e krei, a e taki ibritron baka san a leri: „Tommie moro kolokoe now. Gado ben wani taki Tommie de nanga en na hemel.”

² So wan 11.000 kilometer foe drape, na Jamnagar, India, den dri manpikin foe wan bisnisman di abi 58 jari, e jepi poti a dedeskin foe a papa foe den na tapoe wan ipi oedoe foe bron a dedeskin na tapoe. Ini a son di ben skèin krin afoe-pasi foe a mamanten, a moro owroe manpikin e bigin nanga a fasi fa den gwenti bron dedeskin, foe di a e leti den pisi oedoe nanga wan frambo èn e kanti spesrei di moksi nanga switismeri na tapoe a skin foe en papa di no abi libi na ini. Den mantra di a brahman e taki ibritron baka ini a Sanskrit-tongo, di wani taki: „Meki a sili di noiti e dede go doro nanga a moeiti di a meki foe tron wán nanga a moro hei sani di de”, tranga moro a babari di a faja e meki.

³ Te den dri brada e loekoe fa a skin e bron, dan sondro foe taki wan sani, ibriwan e aksi ensrefi: ’Mi e bribi taki libi de, baka te wan sma dede?’ Foe di den kisi leri na difrenti presi na grontapoe, meki den e gi difrenti piki. A moro jongoewan abi na overtoigi taki a lobi papa foe den sa nasi go ini wan libi di moro hei. A brada di de a mindriwan e bribi taki na wan fasi den dedewan e sribi, èn den no sabi notinoti. A moro owroewan e proeberi nomo foe libi nanga a troe tori taki sma e dede, foe di a e prakseri taki no wan sma kan sabi seiker san e pasa nanga wi te wi dede.

Wán aksi, foeroe piki

4. Sortoe aksi meki a libisma famiri firi brokosaka foeroe jarihondro langa?

⁴ Libi de, baka te wan sma dede? na wan aksi di broeja a libisma famiri doesoendoesoen jari langa. „Srefi theologiaman e tweifri te den e kisi foe doe nanga na aksi disi”, na so Hans Küng, wan katolik sabiman e taki. Na ini ala den jarihondro di pasa, sma foe ala libimakandra prakseri dipi foe a tori disi, èn kefalek foeroe piki de di tjari kon na fesi.

5-8. San difrenti relisi e leri foe wan libi, baka te wan sma dede?

⁵ Foeroe so-kari kresten e bribi na ini hemel èn na ini hèl. Hindoesma, na a tra sei, e bribi taki sma e nasi. Amir Muawiyah, wan jepiman na wan Islam relisi presi, e taki foe a fasi fa  moslimsma e si a tori, taki: „Wi e bribi taki wan kroetoedei sa de baka te joe dede, te joe e go na fesi Gado, Allah, san sa de neleki te joe e waka go na fesi kroetoebangi.” Soleki fa a bribi foe na Islam e taki, dan na a ten dati Allah sa loekoe na sortoe fasi ibriwan sma ben libi èn sa seni wan sma go na paradijs noso na hèlfaja.

⁶ Na Sri Lanka, boedasma nanga katoliksma e libi den doro nanga den fensre bradi opo te wan sma na ini na osofamiri foe den dede. Den e leti wan kokolampoe, èn den e poti a dedekisi nanga den foetoe foe a dedesma go na a sei foe a fesisei doro. Den e bribi taki den sani disi e meki taki a de makriki gi a jeje, noso sili, foe a dedesma foe komoto na ini na oso.

⁷ Ronald M. Berndt foe na Universiteit foe West-Australia, e taki dati den Aborigine foe Australia e bribi taki „libisma abi wan jeje di no man pori”. Son lo foe Afrika e bribi taki, baka te gewoon sma dede, den e tron jorka, ala di prenspari sma e tron den jeje foe den afo, di sma sa gi grani èn di den sa kari ini begi leki fesiman foe a libimakandra di sma no man si.

⁸ Na son kondre, bribi di abi foe doe nanga san sma e prakseri taki na den sili foe den dedewan, na wan moksipatoe foe a gwenti foe a kondre nanga so-kari krestendom. Foe eksempre, foeroe katoliksma nanga protestantsma na West-Afrika abi a gwenti foe tapoe den spikri te wan sma dede, so taki no wan sma ben sa kan loekoe ini a spikri èn si a jeje foe a dede sma. Dan 40 dei baka te a lobiwan dede, famiri nanga mati e hori wan fesa foe na opo di a sili opo go na hemel.

Wan tori di sma na ala sei e bribi

9, 10. Nanga sortoe fondamenti bribi moro foeroe relisi e agri?

⁹ Den piki tapoe na aksi foe san e pasa te wi dede de difrenti, neleki fa den gwenti nanga den bribi foe den sma di e gi den piki de difrenti. Tokoe moro foeroe relisi e agri nanga wán fondamenti prakseri: Wan sani di de ini wan sma — wan sili, wan jeje, wan kra — no man dede èn e libi go doro baka te a sma dede.

¹⁰ A bribi di sma e bribi taki a sili no man dede, de na ini pikinmoro ala den doesoendoesoen relisi nanga sekte foe krestenhèit. A de wan officieel leri ini a Djoe-bribi toe. A bribi disi na a fondamenti foe a leri foe a nasi di sma e nasi ini a Hindoe-bribi. Moslimsma e bribi taki a sili e kon na libi na ini a skin te wan sma e gebore, ma e libi go doro baka te a skin dede. Tra bribi — na Animist-bribi foe Afrika, a Sjinto-bribi èn srefi a Boeda-bribi — e leri difrenti fasi foe a srefi tori disi.

11. Fa son sabiman e denki foe na idea taki a sili no man dede?

¹¹ Son sma e denki heri tra fasi, taki a libi pe wan sma e sabi sani, e kaba te a sma dede. Na idea taki na emotioneel sei èn na froestan sei a libi e go doro na ini wan sili di no de leki wan sma èn di gersi wan djoembi èn di de aparti foe a skin, no gersi wan reidelek sani gi den. A Spanjoro skrifiman nanga sabiman Miguel de Unamuno foe a di foe 20 jarihondro e skrifi: „Foe bribi taki a sili no man dede, na foe winsi taki a kan taki a sili no man dede, ma foe winsi a sani dati nanga so wan fasti bosroiti, taki a bosroiti disi di teki sa meki taki wan sma e poti reide na wan sei èn tron wan onreidelek sma.” Aristoteles nanga Epikurus, barinen filosofiaman foe owroeten, a datra Hippokrates, David Hume, filosofiaman foe Scotland, Averroës, sabiman foe Arabia, nanga Jawaharlal Nehru, a fosi ministri-presidenti foe India baka di a kondre kisi srefidensi, de na mindri den wan di ben weigri foe bribi taki wan sma no man dede.

12, 13. Sortoe prenspari aksi opo kon ini a tori foe a leri di e taki dati a sili no man dede?

¹² Na aksi de: Wi abi troetroe wan sili di no man dede? Efoe troetroe a de so taki a sili man dede, dan fa so wan falsi leri ben kan de wan fondamenti pisi foe moro foeroe foe den relisi na ini a ten disi? O pe a prakseri ben bigin? Èn efoe troetroe a sili no e libi moro te wan sma dede, sortoe howpoe ben sa kan de dan gi den dedewan?

¹³ Wan piki di de troe èn di e gi wi satisfaksi de foe feni tapoe den sortoe aksi dati? Ija! Den aksi disi nanga tra aksi sa kisi wan piki na den bladzijde di e kon now. Na a fosi presi, meki wi go ondrosoekoe fa a leri di e taki dati a sili no man dede, ben bigin.

[Aksi foe a tori disi]