Pe wi kan feni den piki

„A leri foe wan têgo pina de kontrari a bribi di sma e bribi taki Gado abi lobi gi sani di ben kria. . . . Foe bribi taki a sili sa kisi têgo strafoe foe den fowtoe di a doe ini wan toe jari, sondro foe gi a sili wan okasi foe poti sani kon reti baka, wani taki foe go teige ala den sani di a froestan e taki.” — NIKHILANANDA, WAN HINDOE FILOSOFIAMAN.

1, 2. Sortoe aksi e kon, foe di difrenti bribi de ini a tori foe wan libi, baka te wan sma dede?

NELEKI fa a de nanga a hindoe filosofiaman Nikhilananda, na so foeroe sma na ini a ten disi e firi froeferi foe a leri di e taki dati sma sa kisi têgo skin-ati. Na so a de toe, taki tra sma abi problema foe froestan den sortoe idea leki a doro di sma man doro a nirvana èn a de di wan sma de wán nanga Tao.

² Ma foe na idea ede taki a sili no man dede, den relisi foe Owstoesei kondre èn foe Westsei kondre kon nanga wan lo difrenti bribi di abi foe doe nanga wan libi, baka te wan sma dede. Wi kan kon sabi a waarheid di e sori wi san e pasa nanga wi te wi dede? A sili troetroe no man dede? Pe wi kan feni den piki?

Sabidensi nanga filosofia

3. Sabidensi noso a fasi fa sma e ondrosoekoe sani nanga jepi foe sabidensi abi den piki tapoe den aksi di abi foe doe nanga wan libi, baka te wan sma dede?

³ Sabidensi noso a fasi fa sma e ondrosoekoe sani nanga jepi foe sabidensi abi den piki tapoe aksi di abi foe doe nanga wan libi, baka te wan sma dede? Son ondrosoekoeman proeberi foe ondrosoekoe sani di abi foe doe nanga wan libi, baka te wan sma dede, èn den ondrosoekoe disi abi den gron tapoe tori di sma froeteri no so langa pasa ete di den ondrofeni di pikinmoro den dede noso di den ’komoto na ini a skin’. Di a katolik theologiaman Hans Küng ben e ondrosoekoe wan toe foe den sani di den sma dati taki, na ini en lezing „Dede leki wan fasi foe kon na ini a leti”, dan a ben kon na a bosroiti: „Den sortoe ondrofenitori dati no e boeweisi taki a kan taki libi de, baka te wan sma dede: den ondrofenitori disi e taki soso foe den lasti feifi miniti bifo wan sma dede èn no foe têgo libi baka te wan sma dede.” Hans Küng ben taki toe: „A tori di e taki dati a kan dati wan libi de, baka te wan sma dede, de toemoesi prenspari gi a libi di wan sma abi bifo a dede. Wan piki de fanowdoe di wi moesoe soekoe na wan tra presi efoe sabiman tapoe a kontren foe datratori no man gi a piki.”

4. Filosofia kan jepi wi foe feni den piki na mindri den foeroe fasi fa difrenti relisi e leri taki wan libi de, baka te wan sma dede?

⁴ Fa a de nanga filosofia? A kan jepi wi foe feni den piki na mindri den foeroe fasi fa difrenti relisi e leri taki libi de, baka te wan sma dede? Ondrosoekoe di e doe tapoe a kontren foe filosofia wani taki toe „prakseri noso taki fa sani de sondro foe abi nofo boeweisi”, na so na Ingrisi filosofiaman Bertrand Russell foe a di foe 20 jarihondro e taki. Soleki fa The World Book Encyclopedia e taki, dan filosofia na „wan fasi foe aksi sani foe kon sabi moro — wan fasi fa wan sma e loekoe sani finifini, foe ondrosoekoe sani foe man kon na wan bosroiti, foe froeklari sani, èn foe prakseri noso taki fa sani de sondro foe abi nofo boeweisi”. Ini a tori foe wan libi, baka te wan sma dede, sma e kon nanga difrenti filosofia idea, foe taki dati a dede di sma no man dede na soso wan denki di sma e winsi nomo èn foe froeklari toe dati a de wan reti di ibri libisma kisi te den gebore.

Wan toemoesi aparti fonten pe wi kan kisi piki

5. San na a moro owroe boekoe di oiti ben skrifi?

⁵ Ma wan boekoe de di abi troe piki tapoe prenspari aksi di abi foe doe nanga libi èn nanga dede. A de a moro owroe boekoe di oiti ben skrifi, èn pisi foe en ben skrifi so wan 3500 jari pasa kaba. A fosi pisi  foe a boekoe disi ben skrifi wan toe hondro jari bifo den moro owroe prèisesingi foe den hindoe boekoe, den Veda, ben skrifi èn wan sani foe wán doesoen jari bifo Boeda, Mahavira, nanga Confucius ben e waka na grontapoe. A boekoe disi ben kaba skrifi na ini 98 G.T., moro leki 500 jari bifo Moḥammed ben seti na Islam. A toemoesi aparti fonten disi pe wi kan feni a moro hei koni, na bijbel. *

6. Foe san ede wi kan froewakti taki bijbel e froeteri wi san na a sili?

⁶ Bijbel abi a moro soifri historia foe owroeten foe iniwan boekoe di de. A historia di skrifi na ini bijbel e go te na a bigin foe a libisma famiri èn a e tjari kon na krin fa wi ben kon de djaso na grontapoe. A e skrifi srefi foe a ten bifo Gado ben kria libisma. Ija, so wan boekoe kan gi wi inzicht foe kon sabi fa Gado ben meki libisma èn san na a sili.

7, 8. Foe san ede wi kan froetrow taki bijbel sa gi wi troe piki di e gi wi satisfaksi èn di e froeteri wi san e pasa te wi dede?

⁷ Boiti dati, bijbel na wan boekoe foe profeititori di kon troe sondro foe misi. Foe eksempre, bijbel ben taki na fesi finifini foe na opo di den grontapoemakti foe den Mediasma nanga den Persiasma, èn foe den Grikisma ben sa opo èn foe a fadon di den ben sa fadon. Den wortoe disi ben de so soifri, taki son sma di e kroetoe sani ben proeberi foe soso, foe sori dati den sani ben skrifi baka di den feni presi (Danièl 8:1-7, 20-22). Son profeititori di skrifi na ini bijbel e kon troe finifini na ini wi eigi ten srefi. * — Mateus kapitel 24; Markus kapitel 13; Lukas kapitel 21; 2 Timoteus 3:1-5, 13.

⁸ No wan libisma, awansi o koni a de, ben kan taki na fesi na so wan soifri fasi foe sani di ben sa pasa na ini a ten di e kon. Soso a Kriaman foe na universum di abi ala makti èn di abi ala koni ben kan doe dati (2 Timoteus 3:16, 17; 2 Petrus 1:20, 21). Foe troe, bijbel na wan boekoe di komoto na Gado. Seiker, so wan boekoe kan gi wi troe piki di e gi wi satisfaksi èn di e froeteri wi san e pasa nanga wi te wi dede. Meki wi go loekoe fosi san bijbel abi foe taki foe a sili.

[Foetoewortoe]

[Aksi foe a tori disi]

[Prenki na tapoe bladzijde 18]

A moro owroe boekoe di oiti ben skrifi

[Prenki na tapoe bladzijde 18]

Wan boekoe di e gi wi piki di wi kan froetrow èn di e gi wi satisfaksi