San e pasa nanga a sili te wan sma dede?

„A leri di e taki dati a libisma sili no man dede èn sa libi go doro baka te a sma dede èn taki en skin e pori, na wan foe den oekoeston foe a kresten filosofia nanga theologia.” — „NEW CATHOLIC ENCYCLOPEDIA.”

1. San a New Catholic Encyclopedia e erken ini a tori foe a sili di e tan na libi, baka te wan sma dede?

MA A boekoe di kari djaso na tapoesei e erken taki „na idea taki a sili e tan na libi, baka te wan sma dede, no de foe si makriki na ini bijbel”. Dan san bijbel e leri troetroe foe san e pasa nanga a sili te wan sma dede?

Den dedewan no sabi noti

2, 3. San na a situwâsi pe den dedewan de na ini, èn sortoe tekst e tjari dati kon na krin?

² A situwâsi pe den dedewan de na ini, tjari kon na krin na ini Preikiman 9:5, 10 pe wi e leisi: „Den dedewan no sabi noti . . . No wan wroko, no wan prakseri, no wan sabi noso koni de na ini a grebi” (Moffatt). Foe dati ede, dede na a de di wan sma no de. A psalm singiman ben skrifi taki te wan sma dede, dan „a e go baka na en gron; na a dei dati den prakseri foe en e lasi gowe”. — Psalm 146:4.

³ So boen, den dedewan no sabi noti, den no e doe noti. Di Gado ben meki a strafoe foe Adam bekènti, a ben taki: „Doti joe de èn na doti joe sa drai go baka” (Genesis 3:19). Bifo Gado ben meki Adam foe a doti foe a gron èn ben gi en libi, Adam no ben de. Di Adam dede, a ben go na a fasi dati baka. A strafoe di a ben kisi ben de dede — a no ben abra go na wan tra presi.

A sili kan dede

4, 5. Gi eksempre di komoto na ini bijbel èn di e sori taki a sili kan dede.

⁴ Di Adam dede, san ben pasa nanga en sili? We, memre taki na ini bijbel, foeroetron a wortoe „sili” e sori go na wan sma nomo. Dati meki, te wi e taki dati Adam dede, dan wi e taki dati a sili di nen Adam, dede. A sani disi ben sa kan gersi wan freimde sani gi wan sma di e bribi taki a sili no man dede. Ma bijbel e taki: „A sili di e sondoe, ensrefi sa dede” (Esekièl 18:4). Lefitikus 21:1 e taki foe „wan sili di dede” (wan „dedeskin”, Jerusalem Bible). Èn den ben taigi den Nasireisma foe no kon krosibei na „iniwan dede sili” („wan dede skin”, Lamsa). — Numeri 6:6.

⁵ Na wan srefi fasi 1 Kownoe 19:4 e taki foe a sili. Elia di ben brokosaka srefisrefi, „ben bigin aksi taki en sili ben sa kan dede”. So srefi Jona „ben tan aksi efoe en sili ben sa kan dede, èn ibritron baka a ben taki: ’A moro betre gi mi foe dede, leki foe de na libi’ ” (Jona 4:8). Èn Jesus ben gebroiki den wortoe „foe kiri wan sili”, di The Bible in Basic English e vertaal nanga „kiri” (Markus 3:4). So boen, a dede di a sili dede, wani taki nomo dati a sma dede.

A „e komoto gowe” èn ’e kon baka’

6. San bijbel wani taki, te a e taki dati a sili foe Rakel ben „e komoto gowe”?

⁶ Ma fa a de nanga a sari dede foe Rakel, di ben feni presi di a ben meki en di foe toe manpikin? Na ini Genesis 35:18 wi e leisi: „Ala di en sili ben e komoto gowe (bika a dede), a ben gi en a nen Ben-Oni; ma en papa ben kari en Benjamin.” A pisi disi e sori taki Rakel ben abi wan sma na inisei foe en di ben komoto di a dede?  Kwetikweti. Memre taki a wortoe „sili” kan sori go so srefi na a libi di wan sma abi. Dati meki djaso a „sili” foe Rakel ben wani taki nomo a „libi” foe en. Dati meki tra bijbel e vertaal den wortoe „en sili ben e komoto gowe” leki „en libi ben e komoto gowe safrisafri” (Knox), „a ben bro en lasti bro” (Jerusalem Bible), èn „en libi ben komoto gowe foe en” (Bible in Basic English). No wan sani e sori taki wan dangra pisi foe Rakel ben tan na libi, baka di a dede.

7. Na sortoe fasi a sili foe a weduwe en manpikin di kisi wan opobaka „ben kon baka na en ini”?

⁷ A de a srefi nanga na opobaka foe a manpikin foe wan weduwe, di skrifi na ini 1 Kownoe kapitel 17. Na ini vers 22, wi e leisi taki, di Elia ben begi foe a jongoe boi ede, „Jehovah ben arki a sten foe Elia, so taki a sili foe a pikin ben kon baka na en ini èn a ben kon na libi baka”. Djaso a wortoe „sili” wani taki „libi” toe. Dati meki a New American Standard Bible e taki: „A libi foe a pikin ben kon baka na en èn a ben libi baka.” Ija, a ben de a libi, no wan sani di gersi wan djoembi, di ben kon baka na a boi. Disi e kroederi nanga san Elia ben taigi a mama foe a boi: „Loekoe, joe manpikin [a heri sma] de na libi.” — 1 Kownoe 17:23.

A moeilek problema foe a „pisi ten di de na mindri”

8. San foeroe sma di e taki dati den na kresten e bribi san o pasa na a ten foe na opobaka?

⁸ Foeroe sma di e taki dati den na kresten e bribi taki wan opobaka sa de na ini a ten di e kon, pe den skin sa kon wán baka nanga sili di no man dede. Baka dati den wan di sa kisi wan opobaka sa gi abra na san sa pasa nanga den te foe kaba — wan  paiman na den wan di ben libi boen noso strafoe na den godelowsoewan.

9. San den wortoe „a pisi ten di de na mindri” wani taki, èn san son sma e taki dati e pasa nanga a sili na ini a pisi ten disi?

⁹ Na idea disi gersi wan sempel sani. Ma den wan di e hori densrefi na a bribi taki a sili no man dede, abi problema foe froeklari san e pasa nanga a sili na mindri a ten te a sma dede nanga a ten foe na opobaka. Foe troe, foeroe jarihondro langa a „pisi ten [disi] di de na mindri”, soleki fa sma e kari en foeroetron, meki sma taki ala sortoe sani sondro foe abi boeweisi. Son sma e taki dati na ini a pisi ten disi a sili e go na a vagevuur, pe a kan kon krin foe den sondoe di a kan kisi pardon foe den, so taki a kan de klariklari foe go na hemel. *

10. Foe san ede a no de akroederi bijbel foe bribi taki den sili e tan na ini a vagevuur baka te sma dede, èn fa a sani di Lasarus ben ondrofeni e boeweisi dati?

¹⁰ Ma soleki fa wi si kaba, dan a sili na a sma nomo. Te a sma dede, dan a sili dede. Foe dati ede, wan sma no sabi sani moro, baka te a dede. Ija, di Lasarus dede, Jesus Krestes no ben taki dati a ben de na ini a vagevuur, Limbus noso iniwan tra „pisi ten di de na mindri”. Na presi foe dati, Jesus ben taki nomo: „Lasarus go sribi” (Johanes 11:11, New English Bible). A de krin taki Jesus, di ben sabi a waarheid di e sori san e pasa nanga a sili te wan sma dede, ben bribi taki Lasarus no ben sabi noti, a no ben de.

San na a jeje?

11. Foe san ede a wortoe „jeje” no ben kan sori go na wan pisi foe wan sma di de sondro skin èn di e tan na libi, baka te a sma dede?

¹¹ Bijbel e taki dati te wan sma dede, dan „en jeje e komoto gowe, a e go baka na en gron” (Psalm 146:4). Disi wani taki dati wan jeje sondro skin troetroe e komoto èn e libi go doro, baka te wan sma dede? Dati no ben kan de so, bika a psalm singiman e taki baka dati: „Na a dei dati den prakseri foe en e lasi gowe” („ala den prakseri foe en e kon na wan kaba”, NEB). Dan san na a jeje, èn fa a e „komoto gowe” foe wan sma te a sma dede?

12. San a Hebrew wortoe nanga a Griki wortoe di vertaal nanga „jeje” na ini bijbel wani taki?

¹² Na ini bijbel den wortoe di vertaal nanga „jeje” (Hebrewtongo, roeʹach; Grikitongo, pneuʹma) foeroetron wani taki „bro”. So boen, na presi foe „en jeje e komoto gowe”, a vertaling foe R. A. Knox e gebroiki den wortoe „a bro e gowe libi en skin” (Psalm 146:4, Knox). Ma a wortoe „jeje” wani taki moro leki foe bro nomo. Foe eksempre, Genesis 7:22 e taki foe a ten di a libi foe libisma nanga meti ben kisi pori di a Froedoe ben kon na heri grontapoe: „Ala sani pe a bro foe a krakti [noso jeje; Hebrewtongo, roeʹach] foe a libi ben wroko na ini en noso-olo, namkoe ala sani di ben de tapoe a drei gron, ben dede.” So boen, „jeje” kan sori go na a libikrakti di e wroko na ini ala libi kriatoeroe, libisma nanga meti, èn a hari di den e hari bro e meki taki a libikrakti e wroko.

13. Na sortoe fasi wi kan agersi a jeje nanga stroom?

¹³ Foe gi wan eksempre: Stroom e gi krakti na wan aparaat. Efoe den tapoe a stroom, dan na aparaat no e wroko moro. A stroom no e tron wan sani di e wroko foe ensrefi. Na so a de toe, taki te wan sma dede, dan en jeje e tapoe foe gi libi na den cel foe a skin. A no e gowe libi a skin èn e go na wan tra presi. — Psalm 104:29.

14, 15. Fa a jeje e go baka na Gado te wan sma dede?

¹⁴ Dan foe san ede Preikiman 12:7 e taki dati te wan sma dede, „a jeje srefi e drai go baka na a troe Gado di ben gi en”? Disi wani taki dati a jeje e rèis troetroe pasa na ini a kontren foe na universum go na Gado? Den no leri so wan sani. Memre taki a jeje na a libikrakti. Efoe a libikrakti dati gowe kaba, dan Gado wawan man gi en baka. So boen, a jeje „e drai go baka na a troe Gado” na a fasi disi, taki iniwan howpoe di a sma dati abi foe kisi libi na ini a ten di e kon, de krinkrin ini anoe foe Gado now.

¹⁵ Na Gado wawan kan gi a jeje, noso a libikrakti, baka, foe di a e meki wan sma kon na libi baka (Psalm 104:30). Ma Gado abi a prakseri foe doe dati?

[Foetoewortoe]

[Aksi foe a tori disi]

[Faki na tapoe bladzijde 23]

Sani di sma e memre foe wan fosi libi

EFOE noti e tan na libi, baka te a skin dede, dan fa a de nanga den sani di son sma e memre foe wan fosi libi di den e taki dati den abi?

Hindoe sabiman Nikhilananda e taki dati ’den sani di sma ondrofeni baka te den dede, no man boeweisi nanga a froestan’. Theologiaman Hans Küng e sori ini a lezing „Eksempre foe a bribi di sma foe den relisi e bribi na ini têgo ten”: „No wan sma ben kan sori efoe den tori — di moro foeroe e kon foe pikin-nengre noso foe den kondre pe sma e bribi na ini a nasi di sma e nasi — di e taki foe sani di sma e memre foe wan fosi libi, troe.” A e taki moro fara: „Moro foeroe foe [den ondrosoekoeman di e wroko na wan opregti fasi èn di e doe ondrosoekoe tapoe a veld ini a tori foe sabidensi] e erken taki den ondrofeni di den tjari kon na fesi, no de wan boeweisi di e overtoigi sma troetroe taki sma e kon libi na grontapoe ibritron baka.”

Fa a de efoe joe e denki taki joe e memre sani foe joesrefi foe wan fosi libi? Den sortoe denki dati ben kan kon foe difrenti sani ede. Foeroe foe den bodoi di wi e kisi, kibri ini wan oekoe di de na ini wan moro dipi presi foe wi froestan, foe di wi no e gebroiki en wantewante. Te sma e memre sani di den ben frigiti, dan son sma e si dati leki a boeweisi taki a sma ben abi wan fosi libi. Ma tokoe a de so, taki wi no abi boeweisi foe ondrofenitori foe wan tra libi, leki a wan di wi e libi now. A moro bigi pisi foe den sma di e libi na grontapoe no e memre kwetikweti taki den ben libi kaba; èn den no e bribi toe taki den ben kan libi fosi.