Wan howpoe di de seiker

„Sensi a momenti te wan libisma gebore, na okasi de doronomo taki a kan dede iniwan momenti; èn te foe kaba wan libisma sa dede troetroe.” — ARNOLD TOYNBEE, WAN INGRISI HISTORIA SKRIFIMAN.

1. Nanga sortoe troe tori a libisma famiri ben abi foe libi, èn sortoe aksi e opo kon?

SOEMA no kan agri nanga a troe sani di wi taki foe en na tapoesei èn di de sensi owroeten kaba? Ala ten a libisma famiri ben abi foe libi nanga a troe tori di takroe srefisrefi taki sma e dede. Èn te wan sma di wi lobi dede, o tranga a firi de taki wi no man doe notinoti na dati! Na a momenti dati a gersi leki noti no man doe na a lasi dati. Wi kan de baka nanga den lobiwan foe wi di dede? Sortoe howpoe bijbel abi gi den dedewan? Loekoe a tori di e kon now.

’Wi mati dede’

2-5. (a) Fa Jesus ben sori taki, di en mati Lasarus dede, a ben de klariklari foe gi en wan opobaka èn taki a ben man doe dati toe? (b) San ben de a bakapisi foe a wondroe foe na opobaka, boiti taki Lasarus ben tjari kon na libi baka?

² A ben de a jari 32 G.T. Lasarus nanga den sisa foe en, Marta nanga Maria, ben libi na ini a pikin foto Betania, dri kilometer dorosei foe Jerusalem. Den ben de krosibei mati foe Jesus. Wan dei Lasarus ben kon siki tranga. Wantewante den sisa foe en di ben broko den ede nanga en, ben seni a njoensoe disi go na Jesus, di ben de abrasei foe a Jordan liba. Jesus ben abi firi foe lobi gi Lasarus nanga den sisa foe en, dati meki baka wan pisi ten a ben go na Betania. Di den ben de na pasi, Jesus ben taigi den disipel foe en: „Lasarus, wi mati, go rostoe, ma mi e go drape foe wiki en na a sribi.” Foe di den disipel no ben froestan wantewante san den wortoe disi ben wani taki, meki Jesus ben taki krin: „Lasarus dede.” — Johanes 11:1-15.

³ Di Marta ben jere taki Jesus ben de na pasi e kon na Betania, a ben lon go na dorosei foe miti en. A ben naki Jesus ati taki Marta ben sari, èn dati meki a ben gi en a djaranti: „Joe brada sa opo baka.” Marta ben piki: „Mi sabi taki a sa opo baka na a opobaka na a lasti dei.” Ne Jesus ben taigi en: „Mi na a opobaka nanga a libi. A sma di e poti bribi na mi, sa kon na libi, awinsi a dede.” — Johanes 11:20-25.

⁴ Baka dati Jesus ben go na a grebi èn ben gi a komando foe poeroe a ston di ben tapoe a mofo foe a grebi. Baka di a ben begi tranga, a ben komanderi: „Lasarus, kon na doro!” Èn ala di ala ai ben loekoe a grebi, Lasarus ben kon na doro troetroe. Jesus ben gi Lasarus wan opobaka — a ben gi libi baka na wan man di ben dede fo dei kaba! — Johanes 11:38-44.

⁵ Marta ben bribi kaba na ini a pramisi foe wan opobaka (Johanes 5:28, 29; 11:23, 24). A wondroe foe a kisi di Lasarus ben kisi libi baka, ben tranga a bribi foe Marta èn dati ben meki trawan kisi bribi (Johanes 11:45). Ma san a wortoe „opobaka” wani taki troetroe?

„A sa opo baka”

6. San a wortoe „opobaka” wani taki?

⁶ Den vertaal a wortoe „opobaka” foe a Griki wortoe a·naʹsta·sis, di troetroe wani taki „na opo di wan sma e opo tanapoe baka”. Hebrewsma di vertaal a Grikitongo, vertaal a·naʹsta·sis nanga den Hebrew wortoe techi·yathʹ ham·me·thimʹ, di  wani taki „a libi di den dedesma e libi baka”. * So boen, na opobaka wani taki foe opo a sma poeroe en na ini a situwâsi pe den dedewan de sondro libi — foe meki a sma libi baka leki fa a ben libi kaba.

7. Foe san ede a no sa de wan problema gi Jehovah Gado nanga Jesus Krestes foe gi sma wan opobaka?

⁷ Foe di Jehovah Gado no abi wan kaba na koni èn e memre sani na wan volmaakti fasi, meki a de makriki gi en foe gi wan sma wan opobaka. A no de wan moeilek sani gi en foe memre a fasi fa den dedesma ben libi fosi — den eigifasi foe den, a historia foe den nanga ala den finifini sani foe a sortoe sma di den ben de. (Job 12:13; teki gersi Jesaja 40:26.) Jehovah na so srefi a Sma pe a libi e bigin. Foe dati ede, wantewante a kan tjari a srefi sma kon na libi baka èn gi en a srefi persoonlijkheid ini wan njoen skin. Boiti dati, Jesus Krestes de klariklari foe gi den dedewan wan opobaka èn a man doe dati toe, soleki fa na ondrofenitori foe Lasarus e sori. — Teki gersi Lukas 7:11-17; 8:40-56.

8, 9. (a) Foe san ede na opobaka nanga na idea foe a sili di no man dede, no e kroederi nanga makandra? (b) San na a loesoe foe dede?

⁸ Ma a bijbel-leri di e taki foe na opobaka no e kroederi nanga a leri di e taki dati a sili no man dede. Efoe wan sili di no man dede e tan na libi, baka te wan sma dede, dan no wan sma ben sa abi foe kisi wan opobaka, noso ben sa moesoe tjari kon na libi baka. Ija, Marta no ben sori taki a ben prakseri dati wan sili di no man dede ben e libi go doro na wan tra presi, baka te wan sma dede. A no ben bribi taki Lasarus ben go na wan jejekondre kaba foe libi go doro. Kontrari foe dati, a ben sori taki a ben bribi a prakseri di Gado abi foe poeroe den bakapisi foe dede. A ben taki: „Mi sabi taki a sa opo baka na a opobaka na a lasti dei” (Johanes 11:23, 24). Na so toe, Lasarus srefi no ben froeteri no wan ondrofenitori foe wan libi, baka di a dede. No wan sani ben de foe froeteri.

⁹ A de krin taki, akroederi bijbel, a sili e dede èn a loesoe foe dede na a opobaka. Ma miljardmiljard sma dede sensi di a fosi man, Adam, ben e waka na grontapoe. So boen, soema sa kisi wan opobaka, èn pe?

„Ala sma di de na ini den memre-grebi”

10. Sortoe pramisi Jesus ben gi ini a tori foe den sma di de na ini den memre-grebi?

¹⁰ Jesus Krestes ben taki: „A joeroe e kon pe ala sma di de na ini den memre-grebi, sa jere en [Jesus] sten èn sa kon na doro” (Johanes 5:28, 29). Ija, Jesus Krestes ben pramisi taki ala sma di de  na ini a memre foe Jehovah, sa kisi wan opobaka. Miljardmiljard sma ben de na libi èn den dede. Soema foe den de na ini a memre foe Gado èn e wakti na opobaka?

11. Soema sa kisi wan opobaka?

¹¹ Den sma di doe moeiti foe libi wan regtfardiki libi leki foetoeboi foe Jehovah, sa kisi wan opobaka. Ma miljoenmiljoen tra sma dede sondro foe sori efoe den ben o gi jesi na den regtfardiki markitiki foe Gado. Den no ben sabi den markitiki foe Jehovah noso den no ben abi nofo ten foe tjari den kenki kon di ben de fanowdoe. Den sma disi de na ini a memre foe Gado toe èn foe dati ede den sa kisi wan opobaka, bika bijbel e pramisi: „Wan opobaka o de foe den regtfardikiwan nanga den onregtfardikiwan.” — Tori foe den Apostel 24:15.

12. (a) Sortoe fisjoen na apostel Johanes ben kisi foe na opobaka? (b) San „fringi go na ini a se foe faja”, èn san den wortoe dati wani taki?

¹² Na apostel Johanes ben kisi wan span fisjoen foe sma di ben kisi wan opobaka èn di ben e tanapoe na fesi a kownoestoeroe foe Gado. A ben skrifi foe a sani dati, taki: „A se ben gi den dedewan abra di ben de na en ini, èn dede nanga Hades ben gi den dedewan abra di ben de na den ini, èn den ben kroetoe ibriwan foe den aparti akroederi den doe foe den. Èn dede nanga Hades ben fringi go na ini a se foe faja. Disi wani taki a di foe toe dede: a se foe faja” (Openbaring 20:12-14). Prakseri san dati wani taki! Ala den dedesma di de na ini a memre foe Gado sa kon fri foe Hades, noso Sjeol, a grebi foe a libisma famiri (Psalm 16:10; Tori foe den Apostel 2:31). Baka dati, „dede nanga Hades” sa fringi go na ini a sani di den e kari „a se foe faja”, di e agersi wan pori di de krinkrin. A grebi foe a libisma famiri no sa de moro.

Pe den sa kisi na opobaka?

13. Foe san ede Gado ben seti sani so, taki son sma sa kisi wan opobaka foe go na hemel, èn sortoe skin Jehovah sa gi den?

¹³ Wan pikin groepoe mansma nanga oemasma sa kisi wan opobaka foe go libi na hemel. Den sma disi sa tiri nanga Krestes leki kownoe nanga priester èn sa abi wan prati na a wroko foe poeroe ala den bakapisi foe dede di a libisma famiri ben kisi foe a fosi man, Adam (Romesma 5:12; Openbaring 5:9, 10). Soleki fa bijbel e sori, dan a nomroe foe den na soso 144.000 di den teki poeroe na mindri foe den bakaman foe Krestes, èn a ben bigin nanga den getrow apostel (Lukas 22:28-30; Johanes 14:2, 3; Openbaring 7:4; 14:1, 3). Jehovah sa gi ibriwan foe den sma disi di sa kisi wan opobaka wan jeje skin, so taki den kan libi na hemel. — 1 Korentesma 15:35, 38, 42-45; 1 Petrus 3:18.

14, 15. (a) Sortoe libi a moro bigi pisi foe den sma di dede sa kisi te den kisi wan opobaka? (b) Sortoe blesi a libisma famiri di e gi jesi sa ondrofeni?

¹⁴ Ma a moro bigi pisi foe den sma di dede, sa kisi wan opobaka foe kon libi na grontapoe (Psalm 37:29; Mateus 6:10). Sortoe grontapoe? Grontapoe na ini a ten disi foeroe nanga strei, a kiri di sma e kiri makandra, a doti di sma e doti grontapoe, nanga ogri di e doe nanga tranga. Efoe den dedesma ben moesoe kon na libi baka tapoe so wan grontapoe, dan seiker iniwan prisiri ben sa de foe wan sjatoe pisi ten nomo. Ma a Kriaman pramisi taki heri esi a sa tjari wan kaba kon na a disiten grontapoe libimakandra di de na ondro a tiri foe Satan (Odo 2:21, 22; Danièl 2:44). Na a ten dati, wan regtfardiki njoen libisma libimakandra — „wan njoen grontapoe” — sa de wan troetroe sani (2 Petrus 3:13). Na a ten dati, „no wan sma di e libi drape sa taki: ’Mi siki’ ” (Jesaja 33:24). Srefi a hebi pen di dede e tjari kon no sa de moro, bika Gado „sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” — Openbaring 21:4.

¹⁵ Den safri-atisma „sa feni troetroe switi prisiri na ini vrede pasa marki” na ini a njoen grontapoe di Gado ben pramisi (Psalm 37:11). A hemel tiri foe Krestes Jesus nanga den 144.000 kompe foe en sa tjari a libisma famiri di e gi jesi, safri-safri go baka na a volmaakti fasi di wi fosi papa nanga mama, Adam nanga Eva, ben lasi. Den sma di sa kisi wan opobaka sa de na mindri den sma di sa libi na grontapoe. — Lukas 23:42, 43.

16-18. Sortoe prisiri na opobaka sa tjari kon gi osofamiri?

¹⁶ Bijbel e sori wi pikinso a prisiri di na opobaka sa tjari kon gi osofamiri. Prakseri o kolokoe a weduwe foe Nain ben firi di Jesus ben stòp a  beri èn ben gi a wan-enkri manpikin foe en wan opobaka! (Lukas 7:11-17) Baka ten, krosibei na a se foe Galilea, di Jesus ben tjari wan oemapikin foe 12 jari kon na libi baka, a papa nanga a mama foe na oemapikin „ben abi bigi prisiri srefisrefi”. — Markus 5:21-24, 35-42; loekoe so srefi 1 Kownoe 17:17-24; 2 Kownoe 4:32-37.

¹⁷ Gi miljoenmiljoen sma di e sribi na ini dede now, wan opobaka sa wani taki foe libi na ini wan njoen grontapoe pe vrede de. Prakseri nomo foe a toemoesi moi howpoe di a sani disi e gi Tommie nanga a bisnisman di wi ben taki foe den na ini a bigin pisi foe a brochure disi! Te Tommie e wiki foe go libi na ini a Paradijs na grontapoe, dan a sa de a srefi Tommie di en mama ben sabi — ma sondro siki. A sa man fasi en, brasa en, èn lobi en. Na so a bisnisman foe India abi a toemoesi moi froewakti toe foe opo en ai na ini a njoen grontapoe foe Gado èn si den manpikin foe en, na presi foe kon fasi na ini wan sistema pe sma e gebore ibritron baka, di pikinmoro no abi wan kaba.

¹⁸ Te den wan di e libi now sabi a waarheid ini a tori foe a sili, foe san e pasa nanga wi te wi dede èn foe a howpoe foe na opobaka, dan dati kan abi foeroe krakti toe na tapoe den. Meki wi go loekoe fa.

[Foetoewortoe]

[Aksi foe a tori disi]

[Prenki na tapoe bladzijde 26]

Na opobaka sa tjari têgo prisiri kon