Wan toemoesi aparti howpoe!
Wan toemoesi aparti howpoe!
„Ibriwan sma di e libi èn e poti bribi na mi, kwetikweti no sa dede noiti.” — JOHANES 11:26.
1. Na ini sortoe kontren miljoenmiljoen sma di dede now sa kisi wan opobaka?
TE MILJOENMILJOEN sma e kisi wan opobaka, dan den no sa tjari kon na libi baka tapoe wan grontapoe pe no wan sma de (Tori foe den Apostel 24:15). Den sa wiki na ini kontren di meki kon moi èn den sa si taki tanpresi, krosi nanga bogobogo njanjan sreka gi den. Soema sa sreka ala den sani disi? A de krin taki sma sa moesoe libi na ini a njoen grontapoe bifo na opobaka na grontapoe e bigin. Ma soema?
2-4. Sortoe toemoesi aparti howpoe e wakti den wan di e libi na ini „den lasti dei”?
2 A kontroe foe bijbel profeititori e sori taki wi e libi na ini „den lasti dei” foe a seti foe sani disi * (2 Timoteus 3:1). A no sa teki langa moro fosi Jehovah Gado o boemoei ensrefi nanga den afersi foe libisma èn o figi godelowsoefasi poeroe foe grontapoe (Psalm 37:10, 11; Odo 2:21, 22). San o pasa na a ten dati nanga den wan di e dini Gado na wan getrow fasi?
3 Jehovah no sa pori den regtfardikiwan makandra nanga den godelowsoewan (Psalm 145:20). Noiti a no doe so wan sani, èn a no sa doe dati te a e krin grontapoe èn e poeroe ala takroedoe. (Teki gersi Genesis 18:22, 23, 26.) Te joe loekoe en boen, dan a lasti boekoe foe bijbel e taki foe „wan bigi ipi, di no wan sma ben man teri, di komoto na ala nâsi nanga lo nanga pipel nanga tongo”, èn di e komoto na „a bigi banawtoe” (Openbaring 7:9-14). Ija, wan bigi ipi sa pasa a bigi banawtoe libilibi pe a disiten godelowsoe grontapoe sa kon na wan kaba, èn den sa go na ini a njoen grontapoe foe Gado. Drape a libisma famiri di e gi jesi kan kisi wini dorodoro foe den toemoesi moi sani di Gado sreka foe fri a libisma famiri foe sondoe nanga dede (Openbaring 22:1, 2). So boen, a „bigi ipi” no abi foe dede noiti. Dati na troetroe wan toemoesi aparti howpoe!
4 Wi kan froetrow tapoe a froewondroe howpoe disi? Seiker! Jesus Krestes srefi ben sori taki wan ten ben sa de pe sma ben sa libi sondro foe dede oiti. Sjatoe bifo Jesus ben gi en mati Lasarus wan opobaka, a ben taigi Marta: „Ibriwan sma di e libi èn e poti bribi na mi, kwetikweti no sa dede noiti.” — Johanes 11:26.
Joe toe kan libi foe têgo
5, 6. San joe moesoe doe efoe joe wani libi foe têgo na ini a Paradijs na grontapoe?
5 Joe wani libi foe têgo na ini a Paradijs na grontapoe? Joe e angri foe si den lobiwan foe joe baka? Dan joe moesoe teki soifri sabi foe a wani nanga den prakseri foe Gado na ini joe. Jesus ben taigi Gado na ini begi: „Disi wani taki têgo libi, foe den e teki sabi na ini den foe joe, a wan-enkri troe Gado èn foe en di joe seni kon, Jesus Krestes.” — Johanes 17:3.
6 A de a wani foe Gado taki „ala sortoe sma moesoe kisi froeloesoe èn kon kisi wan soifri sabi foe waarheid” (1 Timoteus 2:3, 4). Now a de a ten foe kon sabi fa joe, makandra nanga miljoenmiljoen tra sma di e doe a wani foe Gado kaba, kan libi foe têgo na ini a Paradijs na grontapoe. Jehovah Kotoigi sa prisiri foe jepi joe kon sabi moro foe Gado nanga den markitiki foe en. Foe san ede joe no e meki kontakti nanga den na wan Kownoekondre zaal di de krosibei foe joe noso skrifi go na a adres di de moro krosibei foe joe èn di skrifi tapoe a bladzijde di e kon now?
[Foetoewortoe]
^ paragraaf 2 Loekoe San Bijbel e leri wi trutru?, kapitel 9, di Jehovah Kotoigi tjari kon na doro.
[Aksi foe a tori disi]
[Prenki na tapoe bladzijde 31]
„Wan bigi ipi” no abi foe dede noiti
