Baka 4026 F.K.

„A sneki” meki sma tweifri efu Yehovah abi a reti fu tiri èn efu a e tiri na wan bun fasi. Yehovah pramisi taki wan „pikin” o kon di o masi a sneki, Satan, te fu kaba (Genesis 3:1-5, 15). Toku Yehovah gi libisma na okasi fu tiri densrefi wan pisi ten, aladi a sneki abi makti na den tapu.

1943 F.K.

Yehovah taigi Abraham taki a pramisi „pikin” o de wan bakapikin fu en.​—Genesis 22:18.

Baka 1070 F.K.

Yehovah taigi Kownu David taki a pramisi „pikin” o komoto na ini en famiri. Bakaten Gado taigi David manpikin Salomo a srefi sani.​—2 Samuel 7:12, 16; 1 Kownu 9:3-5; Yesaya 9:6, 7.

29 B.K.

Yehovah taki dati Yesus na a pramisi „pikin” di o sidon na tapu a kownusturu fu David.​—Galasiasma 3:16; Lukas 1:31-33; 3:21, 22.

 33 B.K.

A sneki Satan meki sma kiri Yesus èn fu wan syatu pisi ten a pramisi „pikin” disi no man du noti. Na so Yesus, di no ben abi sondu, gi en libi leki wan ofrandi. Yehovah meki a kon na libi baka èn a opo go na hemel. Gado teki na ofrandi fu Yesus fu gi den bakapikin fu Adam pardon fu sondu èn fu gi den na okasi fu kisi têgo libi.​—Genesis 3:15; Tori fu den apostel 2:32-36; 1 Korentesma 15:21, 22.

Na wan ten fu 1914

Yesus fringi Satan, a sneki, kon na grontapu pe a musu tan wan syatu pisi ten.​—Openbaring 12:7-9, 12.

A ten di e kon

Yesus o sroto Satan 1000 yari langa èn baka dati a o kiri en. Na agersi fasi a o masi en na en ede. Den sani di Yehovah ben abi na prakseri gi grontapu nanga libisma o kon tru, a o krin en nen fu ala syen èn ala sma o sabi taki na en abi a reti fu tiri.​—Openbaring 20:1-3, 10; 21:3, 4.