„Den no ben poti prakseri”

RAMPU kan miti sma te den no e poti prakseri na warskow.

Na ini 1974, den sma na ini a foto Darwin na Australia ben e seti sani gi den fesadei di ben o kon, di wan alarm bari fu warskow taki wan bigi ogri winti de na pasi e kon. Ma sowan 30 yari kaba, a foto Darwin no ben kisi fu du nanga den sortu bigi ogri winti disi. Sobun, fu san ede dati ben o pasa now? Moro furu fu den sma na ini a foto no ben e si a bigi winti disi leki wan seryusu sani, teleki a bigin wai den daki nanga den skotu fu den oso puru pe den ben go suku kibri. A tra mamanten, a foto ben de wan brokopresi.

Na ini november 1985, wan bergi na ini Kolombia spiti faya. Snew nanga na ijs ben smèlter, èn a bakapisi na taki moro leki 20.000 sma di ben e tan na ini a foto Armero lasi libi di tokotoko saka kon na den tapu. Ma den sma ben kisi warskow na fesi? A bergi ben e sekiseki omeni mun langa kaba. Ma fu di moro furu fu den sma na ini Armero ben gwenti fu libi na ini a birti fu so wan bergi, meki den no ben e broko den ede. Lanti ben kisi fu yere taki wan rampu ben de fu kon, ma den no ben du furu fu warskow a pipel. Den ben meki bekènti na radio taki den sma no ben abi fu broko den ede. Den ben gebroiki den bigi boksu di ben de na a kerki, fu taigi a pipel taki den no ben abi fu bruya. Na a neti dati, tu leisi den sma yere bigi babari fu sani di ben sutu panya. Yu ben o lowe gowe libi ala den sani di yu abi? Wan tu sma nomo ben meki muiti fu du dati, ma trawan wakti teleki a ben lati tumusi.

Nofo tron sabiman man sabi pe wan gronseki o kon. Ma furu tron den no man taki soifri o ten disi o pasa. Na ini 1999, gronseki na difrenti presi fu grontapu meki taki sowan 20.000 sma lasi libi. Furu fu den sma dati di dede ben denki taki noiti so wan sani ben o miti den.

San yu e du te yu e kisi warskow di e kon fu Gado srefi?

Langa ten na fesi kaba, Bijbel fruteri krin sortu sani ben o pasa leki buweisi taki wi e libi na ini den lasti dei. Fu dati ede, a e gi wi a deki-ati fu prakseri „a ten fu Noa”. „Na ini a ten dati bifo a frudu”, sma ben e poti prakseri na den aladei sani fu a libi, aladi a no de fu taki dati den ben e broko den ede nanga na ogridu  di ben lai. Di Gado gebroiki en futuboi Noa fu warskow den, dan „den no ben poti prakseri na san ben pasa, teleki a frudu kon èn a wai den alamala puru” (Mateyus 24:37-39). Efu yu ben libi na ini a ten dati, dan yu ben o si a warskow dati leki wan seryusu sani? Yu e poti prakseri na a warskow di yu e kisi now?

Fa a ben o de efu yu ben e libi na ini Sodom, krosibei fu a Dede Se, na a ten fu a man Lot di ben de wan brada-pikin fu Abraham? A kontren lontu a foto ben gersi wan paradijs. A foto ben gudu srefisrefi. Den sma di ben e libi drape no ben de nanga broko-ede. Na ini a ten fu Lot „den ben e nyan, den ben e dringi, den ben e bai sani, den ben e seri sani, den ben e prani, den ben e bow”. Den sma drape ben e libi wan doti sekslibi sosrefi. Yu ben o poti prakseri di Lot ben krutu den ogri di sma ben e du? Yu ben o arki efu Lot ben taigi yu taki Gado ben bosroiti fu pori a foto Sodom? Noso yu ben o si en leki wan lawlaw sani, neleki den man di ben o trow nanga den umapikin fu Lot? A kan taki yu ben o bigin lowe gowe, ma yu ben o drai go baka, neleki a wefi fu Lot? Aladi den tra sma no ben e teki a warskow leki wan seryusu sani, toku, a dei di Lot komoto na Sodom, „faya nanga swarfu ben fadon komoto na hemel leki alen èn ben pori den alamala”.​—Lukas 17:28, 29.

Furu sma na ini a ten disi no e poti prakseri na a warskow. Ma Gado meki sma skrifi den eksempre disi na ini En Wortu leki wan warskow gi wi, so taki wi sa kisi deki-ati fu TAN NA AI!

[Faki/​Prenki na tapu bladzijde 22]

Wan frudu ben sungu heri grontapu trutru?

Furu sma di e ondrosuku sani finifini, e taki dati disi no tru. Ma Bijbel e taki dati a frudu pasa trutru.

Yesus Krestes srefi ben taki fu a frudu; a ben e libi na hemel na a ten dati èn a si ala sani di pasa.

[Faki/​Prenki na tapu bladzijde 23]

Sodom nanga Gomora ben kisi pori trutru?

Sabidensiman di ondrosuku owruten sani, e sori taki disi pasa trutru.

A historia e sori taki a tru.

Yesus Krestes ben taki dati disi pasa trutru, èn 14 difrenti buku fu Bijbel e fruteri fu a tori disi.