Fa yu libi de now?

• Furu sma abi so furu fu du na ini na aladei libi, taki den no e poti prakseri na a fasi fa den e libi.

• Bijbel e sori wi taki wan tumusi moi ten de na wi fesi. A e warskow wi sosrefi taki na heri grontapu, wan bigi kenki o kon na ini den sani di libisma seti. Efu wi wani kisi wini fu san Bijbel e fruteri wi èn efu wi no wani taki rampu miti wi, dan a de tumusi prenspari taki wi du wan sani nownow.

• Son sma sabi san Bijbel e taki èn den e pruberi fu du san skrifi na ini, ma den e meki den broko-ede fu a libi hari den prakseri, so taki den e go du tra sani.

• Yu de koloku nanga a fasi fa yu libi de now? Te yu wani du wan sani, dan yu e luku tu sortu krakti disi sa abi tapu den marki di yu wani doro na ini yu libi?

[Faki/​Prenki na tapu bladzijde 9]

San na a moro prenspari sani gi yu?

Luku den sani di e kon now. Gebroiki den nomru 1 te go miti 10 fu sori sortuwan fu den sani disi de moro prenspari gi yu.

Furu fu den sani disi de na a yoisti presi na ini a libi, ma efu yu abi fu taki sortuwan fu den de moro prenspari, dan sortuwan yu o poti na a fosi presi na ini yu libi? Sortuwan yu o poti na a di fu tu presi? Go so moro fara.

․․․ Prisiriten

․․․ A wroko fu mi

․․․ A gosontu fu mi

․․․ Wan koloku libi

․․․ A patna fu mi

․․․ Mi papa nanga mama

․․․ Mi pikin

․․․ Wan moi oso, moi krosi

․․․ Ala ten mi musu du sani moro bun leki trawan

․․․ Na anbegi fu Gado

 [Faki na tapu bladzijde 10, 11]

Den bosroiti di yu e teki sa meki yu de koloku?

LUKU DEN AKSI DISI

PRISIRITEN: Den sani di mi e du fu abi prisiri, e meki mi firi bun trutru? Den sani di mi lobi fu du na ini mi prisiriten kan meki mi kon siki, noso den kan meki mi kon malengri? Mi e du sani di e meki mi firi prisiri fu wan tu yuru nomo, aladi den kan meki mi firi sari mi heri libi langa? Srefi efu mi abi prisiri na wan bun fasi, a de so dan taki mi e gebroiki so furu ten gi dati, taki mi no abi nofo ten fu du tra sani di de moro prenspari?

A WROKO FU MI: Mi e wroko fu man bai den sani di de fanowdu na ini a libi, noso a wroko fu mi na a moro prenspari sani na ini mi libi? A e teki so furu ten nanga krakti fu mi taki a gosontu fu mi e go na baka? A de moro prenspari gi mi fu wroko moro langa leki san mi gwenti, noso a de moro prenspari gi mi fu de nanga mi patna, noso nanga mi pikin? Efu mi wrokobasi wani mi fu du wan wroko di e trobi mi konsensi, noso wan wroko di e teki a ten di mi ben poti gi yeye afersi, dan mi o du a wroko dati soso fu di mi no wani lasi a wroko?

A GOSONTU FU MI: Mi e si en leki wan sani di no de so prenspari, noso mi e meki muiti ala ten fu tan gosontu? A de so taki a gosontu fu mi na a wan-enkri sani fu san mi e taki ibri tron baka? A fasi fa mi e sorgu gi misrefi e sori taki mi e broko mi ede nanga mi osofamiri?

WAN KOLOKU LIBI: A moro prenspari gi mi taki mi de koloku, noso mi e luku fosi taki mi patna, noso mi osofamiri de koloku? A fasi fa mi e suku fu de koloku e kruderi nanga a fasi fa wan anbegiman fu a tru Gado musu libi?

A PATNA FU MI: Mi e si mi patna leki mi mati soso te mi wani? Mi e sori lespeki gi mi patna fu di a e frudini dati? A bribi di mi abi na ini Gado abi krakti tapu a fasi fa mi e si mi patna?

MI PAPA NANGA MAMA: Efu yu no de wan bigisma ete, dan aksi yusrefi: Mi e gi yesi na mi papa nanga mama? Te den e taki nanga mi, dan mi e piki den na wan lespeki fasi? Mi e du a wroko di den gi mi fu du, èn mi e kon na oso na a ten di den wani? Mi e arki den te den e warskow mi gi takru mati, noso te den e taigi mi fu no du son sani? Efu yu na wan bigisma kaba, dan aksi yusrefi: Mi e arki mi papa nanga mama na wan lespeki fasi, èn mi e yepi den te den abi yepi fanowdu? Mi e handri nanga den soleki fa mi wani, noso soleki fa Gado Wortu e sori?

MI PIKIN: Mi e firi taki na mi abi a frantwortu fu leri mi pikin fu tyari densrefi na wan fasi di fiti, noso mi e fruwakti taki den sa leri dati na skoro? Mi abi ten gi mi pikin, noso mi e gi den preisani, mi e poti den na fesi a telefisi, noso na fesi a computer so taki den kan tan tiri? Mi e gi mi pikin trangaleri ibri leisi te den no wani gi yesi na den rai fu Gado, noso mi e du dati soso te den du wan sani di e meki mi atibron?

WAN MOI OSO, MOI KROSI: San den krosi di mi e weri èn den sani di mi abi e sori? Den e sori taki mi wani taki birtisma musu luku mi? Den e sori taki mi na wan anbegiman fu Gado? Den sani di mi abi e sori taki mi e broko mi ede nanga a tanbun fu mi osofamiri?

ALA TEN MI MUSU DU SANI MORO BUN LEKI TRAWAN: Mi e firi taki a de prenspari fu du sani bun? Mi e meki muiti ala ten fu du sani moro bun leki trawan? A e hati mi te wan tra sma e du wan sani moro bun leki mi?

NA ANBEGI FU GADO: A moro prenspari gi mi taki Gado feni mi bun, noso mi e feni en moro prenspari taki mi patna, mi pikin, mi papa nanga mama, noso mi wrokobasi feni mi bun? Mi o poti a diniwroko fu Gado na a di fu tu presi na ini mi libi soso fu di mi wani tan abi wan switi libi?

 LUKU FINIFINI SORTU RAI BIJBEL E GI

O prenspari na anbegi fu Gado de na ini yu libi?

Preikiman 12:13: „Frede a tru Gado èn hori den komando fu en. Bika disi na a heri plekti fu libisma.”

AKSI YUSREFI: A fasi fa mi e libi e sori taki mi e agri nanga Preikiman 12:13? A fasi fa mi e du den frantwortu di mi abi na oso, na wrokope, noso na skoro e sori taki mi wani gi yesi na den komando fu Gado? Mi e poti so furu prakseri na tra sani èn na den broko-ede fu a libi taki mi no abi ten moro gi Gado?

Sortu banti yu abi nanga Gado?

Odo 3:5, 6: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti.”

Mateyus 4:10: „Na Yehovah yu Gado yu musu anbegi èn en wawan yu musu dini.”

AKSI YUSREFI: Na so mi e denki fu Gado? Den sani di mi e du ala dei, sosrefi den sani di mi e du te problema miti mi, e sori taki mi e frutrow tapu Gado trutru èn taki mi e dini en fayafaya?

O prenspari a de gi yu fu leisi èn studeri Bijbel?

Yohanes 17:3: „Disi wani taki têgo libi, fu den teki sabi na ini den fu yu, a wan-enkri tru Gado èn fu en di yu seni kon, Yesus Krestes.”

AKSI YUSREFI: O prenspari a de gi mi fu leisi Gado Wortu èn fu denki dipi fu en? Mi e sori nanga dati taki mi e bribi trutru san Yohanes 17:3 e taki?

O prenspari a de gi yu fu go na den konmakandra fu a Kresten gemeente?

Hebrewsma 10:24, 25: „Meki wi poti prakseri na makandra tu, so taki wi kan gi makandra deki-ati fu sori lobi èn fu du bun wroko; no meki wi lasi a gwenti fu kon makandra, . . . o moro unu e si a dei e kon krosibei.”

Psalm 122:1: „Mi ben prisiri di den ben taigi mi: ’Meki wi go na a oso fu Yehovah.’”

AKSI YUSREFI: A fasi fa mi e libi e sori trutru taki mi e warderi a rai disi di skrifi na ini Gado Wortu? Mi misi wan tu Kresten konmakandra na ini a mun di pasa, fu di mi ben si tra sani moro prenspari leki dati?

Yu de fayafaya fu fruteri tra sma fu Gado èn fu den sani di a abi na prakseri fu du?

Mateyus 24:14: „A bun nyunsu disi fu a kownukondre o preiki gi ala sma na heri grontapu, so taki ala kondre kan yere dati, èn dan a kaba sa kon.”

Mateyus 28:19, 20: „Fu dati ede, go na ala kondre èn meki sma tron disipel, . . . Leri den fu du ala san mi taigi unu.”

Psalm 96:2: „Singi gi Yehovah, blesi a nen fu en. Fruteri sma ibri dei fu a bun nyunsu fu a frulusu di a e gi.”

AKSI YUSREFI: A wroko disi de na a yoisti presi na ini mi libi? A fasi fa mi e du a wroko disi e sori taki mi sabi o seryusu a ten de na ini san wi e libi?