San ala den sani disi wani taki?

YESUS KRESTES ben taki: „A kaba fu a grontapu sistema disi” ben o abi leki marki taki orloku, angriten, pestsiki, nanga gronseki ben o de.​—Mateyus 24:1-8; Lukas 21:10, 11.

Sensi 1914, feti na mindri difrenti kondre nanga lo, pori a libi fu sma. Furu tron den feti disi ben kon fu di kerki fesiman go bumui nanga politiek, èn now furu fu den feti disi e kon fu di sma e du ala sortu ogri-ati sani fu gens tirimakti.

Aladi sabidensi kan sorgu taki nofo nyanyan de gi ala sma, toku hondrohondro milyun sma na heri grontapu no abi noti fu nyan. Ibri yari milyunmilyun sma e dede fu di den no abi nofo fu nyan.

Di Yesus taki fu a marki fu den lasti dei, dan a kari pestsiki sosrefi; dati na siki di e panya esi-esi fu a wan sma go na a trawan. Baka a Fosi Grontapufeti, wan sortu griep meki taki moro leki 21.000.000 sma lasi libi. Fosi, den sortu siki disi ben de na wan tu presi nomo, ma a griep disi ben panya na ala kondre fu grontapu, sosrefi na den èilanti di de farawe. Nownow AIDS lai na heri grontapu, èn na ini den pôti kondre sma e tan kisi takru siki soleki tuberculose, malaria, wan sortu siki di e meki sma breni, nanga a siki fu Chagas.

Nyunsu e sori taki ibri yari someni dusundusun pikin gronseki nanga bigi gronseki de. Aladi koniman abi ala sortu kefalek wrokosani fu si o ten wan gronseki o kon, toku furu tron wi e yere nyunsu fu rampu di kon leki bakapisi fu gronseki na presi pe furu sma e libi.

Bijbel ben taki na fesi tu: „Sabi disi taki na ini den lasti dei muilek ten sa kon, di tranga fu pasa. Bika sma sa lobi densrefi nomo, den sa lobi moni, den sa de asranti, den sa abi heimemre, den sa afrontu Gado, den sa trangayesi papa nanga mama, den sa de sondro tangi, den no sa de loyaal, den no sa lobi trawan, den no sa de klariklari fu meki kruderi, den sa de ogri-ati leiman, den no sa man dwengi densrefi, den sa abi wan krasi fasi fu du sani, den no sa lobi bun sani, den sa de toriman, den sa tranga-ede, den sa abi bigimemre, den sa lobi prisiri moro leki den lobi Gado; a o gersi leki den e dini Gado, ma a libi fu den o sori taki dati no de so; yu no musu bumui nanga den sma dati.”​—2 Timoteyus 3:1-5.

Yu no e agri taki wi e libi na ini ’muilek ten di tranga fu pasa’?

Yu no si taki bun furu sma lobi densrefi nomo, taki den lobi moni, èn taki den abi heimemre?

Yu no si taki grontapu lai nanga sma di e suku bun gi densrefi nomo, di no de nanga tangi, di no wani arki nowan tra sma, èn di no de getrow?

Yu e si taki dei fu dei moro pikin e trangayesi den papa nanga mama, èn taki sma no e sori lobi gi trawan moro? Yu e si tu taki den sani  disi no e pasa na wan tu presi nomo, ma taki den e pasa na heri grontapu?

A no de fu taki dati yu e frustan taki wi e libi na ini wan grontapu pe sma e denki soso prisiri nomo, èn den no lobi fu du bun. Bijbel e sori taki na ini „den lasti dei” furu sma ben o abi den fasi disi.

Yu wani abi moro buweisi fu sabi soifri na ini sortu ten wi e libi? Yesus ben taki tu dati na a srefi ten disi, a bun nyunsu fu a Kownukondre ben o preiki na ala sma na heri grontapu (Mateyus 24:14). A sani dati e pasa nownow?

A Waktitoren, wan tijdschrift di e meki a bun nyunsu fu a Kownukondre fu Yehovah bekènti, e kon na doro doronomo na ini moro tongo leki iniwan tra tijdschrift.

Ibri yari, Yehovah Kotoigi e gebroiki moro leki wán milyard yuru fu go na sma fu fruteri den fu Gado Kownukondre.

 Den e tyari buku kon na doro di e yepi sma fu frustan Bijbel na ini sowan 400 tongo. Den meki buku sosrefi na ini den tongo fu sma di e libi bun farawe èn na ini den tongo di pikinpikin grupu fu sma e taki. Yehovah Kotoigi tyari a bun nyunsu gi ala sma; den preiki sosrefi na furu èilanti nanga tra presi di pikin so te, taki den no de prenspari gi sma di de na ini politiek. Na ini moro furu fu den kondre, den Kotoigi e yepi sma doronomo fu frustan Bijbel.

Iya, a bun nyunsu fu Gado Kownukondre e preiki gi ala sma na heri grontapu. A wroko disi no e du fu kenki grontapu, ma a e du so taki sma fu ala kondre kan yere dati. Na ala sei sma e kisi na okasi fu sori efu a de prenspari gi den fu kon sabi suma meki hemel nanga grontapu, èn efu den sa lespeki den wet fu en èn sori lobi gi tra sma.​—Lukas 10:25-27; Openbaring 4:11.

Heri esi, Gado Kownukondre sa krin grontapu fu ala ogrisma èn a sa meki en tron wan paradijs.​—Lukas 23:43.

[Faki na tapu bladzijde 6]

Den lasti dei fu san?

A no den lasti dei fu a libisma famiri. Bijbel e pramisi taki den wan di e du a wani fu Gado, sa libi fu têgo.​—Yohanes 3:16, 36; 1 Yohanes 2:17.

A no den lasti dei fu grontapu. Gado Wortu e pramisi taki a grontapu pe sma e libi na tapu, sa tan fu têgo.​—Psalm 37:29; 104:5; Yesaya 45:18.

Ma disi na den lasti dei fu na ogri seti fu sani disi nanga den sma di no abi lobi èn di e tan du den ogri sani fu a grontapu disi.​—Odo 2:21, 22.

[Faki/​Prenki na tapu bladzijde 7]

Bijbel na a Wortu fu Gado trutru?

Ibri tron baka, den profeiti fu Bijbel ben skrifi: „Disi na san Yehovah taki” (Yesaya 43:14; Yeremia 2:2). Srefi Yesus Krestes, a Manpikin fu Gado, ben sori taki den sani di a ben taki, ’a no san ensrefi’ ben e prakseri (Yohanes 14:10). Bijbel srefi e taki krin: „Na Gado srefi ben meki sma skrifi ala den Santa Buku.”​—2 Timoteyus 3:16.

Nowan tra buku kon na doro na ini someni tongo leki Bijbel. Na organisâsi United Bible Societies e sori taki sma kan leisi Bijbel na ini moro leki 2200 tongo. Nowan tra buku prati so furu, bika now moro leki fo milyard kopi fu Bijbel prati. Dati na san yu kan fruwakti fu wan boskopu di Gado seni gi ala sma, a no so?

Efu yu wani abi moro fini buweisi taki na Gado meki sma skrifi Bijbel, dan luku a buku De bijbel — Gods woord of dat van mensen? (Bijbel​—A wortu fu Gado noso fu libisma?), di Yehovah Kotoigi tyari kon na doro.

Efu yu e leisi Bijbel èn yu e bribi trutru taki a de a Wortu fu Gado, dan yu sa kisi furu wini.

[Faki/​Prenki na tapu bladzijde 8]

San na Gado Kownukondre?

Dati na a spesrutu tirimakti di a tru Gado, Yehovah, a Mekiman fu hemel nanga grontapu, seti na hemel.—Yeremia 10:10, 12.

Bijbel e taki dati Gado gi Yesus Krestes a makti fu tiri a Kownukondre disi (Openbaring 11:15). Di Yesus ben de na grontapu, dan a ben sori kaba taki Gado ben gi en bun furu makti. A ben man tiri a winti nanga a se, a ben man dresi ala sortu siki, èn a ben man gi dedesma wan opobaka srefi (Mateyus 9:2-8; Markus 4:37-41; Yohanes 11:11-44). Na ini wan Bijbel profeititori, Gado ben meki sma skrifi taki A ben o gi Yesus ’tirimakti nanga wartifasi nanga wan kownukondre sosrefi, so taki den pipel, den grupu fu ala kondre nanga tongo, den alamala ben sa dini en’ (Danièl 7:13, 14). A tirimakti dati nen a Kownukondre fu hemel; Yesus Krestes e tiri now komoto fu hemel.

[Prenki na tapu bladzijde 7]

A bun nyunsu e preiki na heri grontapu