„So taki unu no sa kisi tesi”

„Un musu tan na ai èn begi doronomo, so taki unu no sa kisi tesi.”​—MATEYUS 26:41.

NOITI ete Yesus Krestes, a Manpikin fu Gado, ben kisi fu du nanga so wan hebi tesi. Ete wan syatu pisi ten, dan en libi na grontapu ben o kon na wan kaba. Yesus ben frustan taki heri esi sma ben o grabu en, den ben o krutu en fu kisi dedestrafu, èn den ben o spikri en na wan pina-udu. A ben sabi taki ibri bosroiti di a ben o teki èn ibri sani di a ben o du, ben kan gi en Tata wan bun nen, noso porinen. Yesus ben sabi tu taki den sani di a ben o du, ben o abi krakti tapu a tamara fu libisma. San a du di ala den tesi disi miti en?

² Yesus ben go nanga en disipel na a dyari fu Getseimanei. A ben lobi fu go na a presi dati. Drape a waka go pikinso moro fara fu den disipel fu en. Di a ben de en wawan, dan a begi en hemel Tata fayafaya fu aksi en krakti èn fu fruteri ala san ben de tapu en ati. A no wán leisi nomo a begi, ma a du dati dri leisi. Aladi Yesus no ben abi sondu, toku a no ben e firi taki en wawan ben o man pasa den tesi disi.​—Mateyus 26:36-44.

³ Na ini a ten disi, wi e kisi problema tu. Na a bigin fu a brochure disi, wi ben si buweisi kaba taki wi e libi na ini den lasti dei fu na ogri sistema disi. Den tesi nanga problema fu a grontapu fu Satan e kon moro hebi. Efu wi di e taki dati wi e dini a tru Gado, dan den bosroiti di wi e teki èn den sani di wi e du abi furu krakti tapu a nen fu Gado. Den sani di wi e du abi krakti tu tapu a howpu di ibriwan fu wi abi, namku fu libi na ini a nyun grontapu fu Gado. Wi lobi Yehovah. Wi wani ’horidoro te na a kaba’, dati wani taki na a kaba fu wi libi, noso na a kaba fu a sistema disi, awinsi sortuwan e kon fosi (Mateyus 24:13). Ma fa wi kan tan si o prenspari a ten disi de èn fa wi kan tan na ai?

⁴ Yesus ben sabi taki den disipel fu en na ini a ten dati èn na ini a ten disi, ben o kisi problema tu. Sobun a taigi den: „Un musu tan na ai èn begi doronomo, so taki unu no sa kisi tesi” (Mateyus 26:41). San den wortu dati wani taki gi wi na ini a ten disi? Sortu tesi yu e kisi? Èn fa yu kan „tan na ai”?

Tesi fu du san?

⁵ Ibri dei wi alamala e kisi tesi di kan meki wi fadon na ini „a trapu fu Didibri” (2 Timoteyus 2:26). Bijbel e warskow wi taki Satan e suku fu du ogri spesrutu nanga den anbegiman fu Yehovah (1 Petrus 5:8; Openbaring 12:12, 17). Fu san ede? A no fu di a wani kiri wi nomonomo. Satan no e wini te wi e tan getrow na Gado te na dede. Satan sabi taki Yehovah sa wiki sma na dede te a sa gi den wan opobaka na a ten di En wani.​—Lukas 20:37, 38.

⁶ Satan wani pori wan moro prenspari sani leki a libi di wi abi now; a wani taki wi no de getrow na Gado moro. Satan wani fu sori nomonomo taki a kan meki wi drai baka gi Yehovah. Fu dati ede, efu Satan ben o man kisi wi fu no de getrow moro fu di wi no e preiki a bun nyunsu moro, noso fu di wi no e hori wisrefi na Kresten markitiki moro, dan na en ben o de winiman na ini a strei! (Efeisesma  6:11-13) Sobun, „a Tesiman” e sorgu taki wi e kisi tesi.​—Mateyus 4:3.

⁷ Satan e gebroiki difrenti sani leki „triki” fu kori wi (Efeisesma 6:11). A kan kori wi nanga gudu, frede, tweifri, noso prisiri. Ma wan fu den sani di a e gebroiki furu tron èn nanga san a abi bun bakapisi, na lasi-ati. Fu di a de wan bedrigiman, a sabi taki lasi-ati kan meki wi kon swaki na yeye fasi èn disi kan meki wi fadon makriki (Odo 24:10). Sobun, spesrutu na den ten te wi e „firi brokosaka”, dan a e tesi wi so taki wi kan gi abra.​—Psalm 38:8.

⁸ Now di wi e doro a kaba fu den lasti dei, a e gersi leki moro sani e meki sma lasi-ati, èn den sani disi abi krakti tapu wi sosrefi (Luku a faki „Wan tu sani di kan meki wi lasi-ati”). Te wi lasi-ati, dan wi kan kon swaki. Leki Kresten wi musu du wan tu prenspari sani, soleki studeri Bijbel, go na den Kresten konmakandra, èn teki prati na a preikiwroko. Ma a kan de muilek sani fu bai a yoisti ten fu du den sani disi, spesrutu te yu skin weri, te yu frustan weri, èn te yu e firi brokosaka (Efeisesma 5:15, 16). Memre taki a Tesiman wani taki yu gi abra. Ma disi a no wan ten fu go du sani moro safri, èn wi no musu kisi a denki taki a ten di wi e libi na ini no de so prenspari! (Lukas 21:34-36) Fa yu kan kakafutu gi tesi èn tan na ai? Luku fo sani di kan yepi yu.

„Begi doronomo”

⁹ Sori taki yu e frutrow tapu Yehovah fu di yu e begi. Memre na eksempre fu Yesus na ini a dyari fu Getseimanei. Di Yesus ben de na ini hebi banawtu, dan san a ben du? A ben aksi Yehovah fu yepi en. A ben begi nanga so wan faya taki „a sweti fu en ben kon tron leki dropu brudu di ben fadon na gron” (Lukas 22:44). Prakseri fu disi. Yesus ben sabi Satan heri bun. Komoto fu hemel, Yesus ben si ala den tesi di Satan ben e gebroiki fu kori den futuboi fu Gado. Ma toku, Yesus no ben e firi taki a ben o makriki fu pasa ala den difrenti fasi fa a Tesiman ben o tesi en. We, efu a volmaakti Manpikin fu Gado ben firi taki a ben abi fu begi Gado fu yepi en, dan o moro wi musu du dati tu!​—1 Petrus 2:21.

¹⁰ Memre tu taki baka di Yesus ben gi en disipel a deki-ati fu „begi doronomo”, dan a taki: „A tru taki a yeye wani, ma a skin swaki” (Mateyus 26:41). Fu a skin fu suma Yesus ben e taki? A no de fu taki dati a no ben e taki fu en eigi skin, bika nowan swakifasi ben de na ini en volmaakti libisma skin (1 Petrus 2:22). Ma a ben de tra fasi nanga den disipel fu en. Fu di den no ben de volmaakti èn fu di den ben abi sondu firi, meki den ben o abi moro yepi fanowdu fu man kakafutu gi tesi  (Romesma 7:21-24). Dati meki Yesus ben gi den disipel fu en nanga ala tra tru Kresten di ben o kon baka den, a deki-ati fu begi fu aksi yepi so taki den man kakafutu gi tesi (Mateyus 6:13). Yehovah e piki den sortu begi disi (Psalm 65:2). Fa a e du dati? We, wi kan kari tu fasi fa a e du dati.

¹¹ A fosiwan, na taki Gado e yepi wi fu si sortu sani kan de wan tesi gi wi. Den tesi fu Satan de leki trapu di de na tapu wan dungru pasi. Efu yu no e si den, yu kan fadon na ini den. Nanga yepi fu Bijbel nanga den buku di e taki fu Bijbel, Yehovah e sori wi den trapu fu Satan, so taki wi kan wai pasi gi den. Na ini den yari di pasa, wi kisi buku èn wi kisi leri na kongres nanga kring konmakandra di warskow wi doronomo taki sani soleki frede gi libisma, seks hurudu, gudu nanga tra sani, na trapu di Satan seti gi wi (Odo 29:25; 1 Korentesma 10:8-11; 1 Timoteyus 6:9, 10). Yu no de nanga tangi taki Yehovah e sori wi san na den trapu fu Satan? (2 Korentesma 2:11) Ala den warskow disi na wan piki tapu den begi fu yu, di yu ben aksi Gado yepi fu man kakafutu gi tesi.

¹² A di fu tu fasi fa Yehovah e piki den begi fu wi, na taki a e gi wi krakti fu man horidoro te tesi miti wi. En Wortu e taki: „Gado . . . no sa meki unu kisi tesi di hebi moro san unu kan tyari. Ma te tesi miti unu, dan a sa puru unu na ondro a tesi, so taki unu man horidoro” (1 Korentesma 10:13). Solanga wi e tan frutrow tapu Gado, a no sa gi pasi noiti taki wan tesi e kon so hebi gi wi, taki wi no abi a krakti na yeye fasi fu horidoro. Fa a e ’puru unu na ondro a tesi’? A ’e gi santa yeye na den wan di e aksi en fu dati’ (Lukas 11:13). A santa yeye dati kan yepi wi fu memre Bijbel gronprakseri di kan meki taki wi e kisi wan moro fasti bosroiti fu du san reti, èn a kan yepi wi tu fu teki koni bosroiti (Yohanes 14:26; Yakobus 1:5, 6). A santa yeye kan yepi wi fu sori den fasi di wi abi fanowdu fu man wini takru firi (Galasiasma 5:22, 23). A yeye fu Gado kan meki wi brada nanga sisa tron ’wan yepi gi wi di e gi wi tranga’ (Kolosesma 4:11). Yu no de nanga tangi taki Yehovah e gi piki na so wan lobi-ati fasi te yu e begi en fu yepi yu?

Si sani soleki fa den de trutru

¹³ Efu wi wani tan na ai, dan wi musu si sani soleki fa den de trutru. Fu di wi e kisi problema na ini a libi, meki wi alamala e kon weri ten na ten. Ma wi musu hori na prakseri taki noiti Gado pramisi wi taki wi ben o abi wan libi sondro problema na ini na owru seti fu sani disi. Srefi na ini Bijbel ten, den futuboi fu Gado ben kisi fu du nanga problema, sosrefi frufolgu, pôtifasi, lasi-ati, nanga siki.​—Tori fu den Apostel 8:1; 2 Korentesma 8:1, 2; 1 Tesalonikasma 5:14; 1 Timoteyus 5:23.

¹⁴ Na ini a ten disi, wi sosrefi abi problema tu. Kande wi e kisi fu du nanga frufolgu, moni problema, wi e lasi-ati, wi e kon siki, noso kande wi e pina na tra fasi. Efu Yehovah ben o kibri wi na wan wondru fasi so taki ogri no e miti wi, dan Satan ben o abi nofo reide fu spotu Yehovah, a no so? (Odo 27:11) Yehovah e gi pasi taki den futuboi fu en e kisi tesi, èn son leisi a e gi pasi taki gensman e kiri den srefi.​—Yohanes 16:2.

¹⁵ Ma san Yehovah pramisi dan? Soleki fa wi ben taki kaba, a pramisi taki a sa gi wi krakti fu pasa iniwan tesi, solanga wi e tan frutrow tapu en nanga wi heri ati (Odo 3:5, 6). Nanga yepi fu en Wortu, en yeye, nanga en organisâsi, a e kibri wi na yeye fasi, fu di a e yepi wi fu tan abi wan krosibei banti nanga en. Efu wi tan abi wan krosibei banti nanga en, dan awinsi wi dede, toku wi wini. Nowan sani kan tapu Gado fu pai den getrow futuboi fu en, awinsi den kon dede srefi (Hebrewsma 11:6). Fu tru, na ini a nyun grontapu di de so krosibei now,  Yehovah sa du soleki fa a pramisi; a tyari tra bigi blesi kon gi den wan di lobi en.​—Psalm 145:16.

Memre a strei di Satan bigin

¹⁶ Efu wi wani tan horidoro te na a kaba, dan wi musu memre taki Gado gi pasi meki ogri de fu di a musu seti a strei di Satan bigin. Efu ten na ten den problema fu wi e kon hebi srefisrefi èn wi e kisi a firi taki wi no man moro, dan a de wan bun sani fu memre taki Satan ben taki dati Yehovah no abi reti fu tiri hemel nanga grontapu. A Bedrigiman ben taki sosrefi dati a no ala ten den anbegiman fu Gado ben o tan getrow na En (Yob 1:8-11; 2:3, 4). A strei disi èn a fasi fa Yehovah bosroiti fu lusu a strei, de moro prenspari leki a libi fu iniwan fu wi. Fa so?

¹⁷ Fu di Gado gi pasi taki ogri de fu wan pisi ten, meki tra sma kisi na okasi fu kon na ini a waarheid. Prakseri fu disi: Yesus ben pina, so taki wi man kisi libi (Yohanes 3:16). Wi no de nanga tangi fu dati? Ma wi de klariklari fu nyan pina pikinso moro langa so taki trawan kan kisi libi tu? Efu wi wani horidoro te na a kaba, dan wi musu frustan taki a koni fu Yehovah bigi omeni tron moro leki a di fu wi (Yesaya 55:9). A sa puru ogridu, ma a sa du dati na a ten di ensrefi wani. Na so fasi a sa seti a strei di Satan bigin, èn disi sa abi têgo bun bakapisi gi wi. Iya, tra fasi no de fu seti a strei disi, bika Gado no e du kruktudu!​—Romesma 9:14-24.

„Kon krosibei na Gado”

¹⁸ Efu wi wani tan hori na prakseri o prenspari a ten disi de, dan wi musu tan krosibei fu Yehovah. Noiti no frigiti taki Satan e du ala san a man fu pori a bun banti di wi abi nanga Yehovah. Satan wani taki wi musu bribi taki a kaba no sa kon noiti, taki wi e preiki a bun nyunsu fu soso, èn taki na fu soso wi e libi na a fasi fa Bijbel e taki. Ma Satan ’na wan leiman èn a tata fu lei’ (Yohanes 8:44). Wi musu teki a fasti bosroiti fu „kakafutu gi Didibri”. Noiti wi musu si a banti di wi abi nanga Yehovah leki wan sani di no de so prenspari. Na wan lobi-ati fasi Bijbel e gi wi a deki-ati: „Kon krosibei na Gado, èn a sa kon krosibei na unu” (Yakobus 4:7, 8). Ma fa yu kan kon krosibei na Yehovah?

¹⁹ A de tumusi prenspari fu begi èn fu denki dipi fu san yu leri. Te a gersi leki den problema fu a libi e kon so hebi taki yu no man tyari den moro, dan fruteri Yehovah ala san de tapu yu ati. Taki finifini fu den problema fu yu. Te yu e du dati, dan a sa de moro makriki fu si a piki di a e gi yu. Kande a no ala ten yu o kisi a piki di yu e fruwakti, ma efu yu wani gi en grani èn efu yu wani tan getrow na en, dan a sa gi yu a yepi di yu abi fanowdu fu man horidoro (1 Yohanes 5:14). Te yu e si fa a e tiri yu libi, dan yu sa kon moro krosibei na en. A de tumusi prenspari tu fu leisi èn fu denki dipi fu a fasi fa Yehovah de èn a fasi fa a e du sani, soleki fa a skrifi na ini Bijbel. Te yu e denki dipi fu den sani disi, dan dati sa yepi yu fu kon sabi en moro bun; disi sa naki yu ati, èn yu sa kisi moro lobi gi Gado (Psalm 19:14). A lobi dati na a moro prenspari sani di sa yepi yu fu kakafutu gi tesi èn fu tan na ai.​—1 Yohanes 5:3.

²⁰ Wan tra sani di de prenspari tu fu man tan krosibei fu Yehovah, na fu tan krosibei fu wi Kresten brada nanga sisa. Wi sa taki fu disi na ini a lasti pisi fu a brochure disi.

AKSI GI A STUDIE DISI

• San Yesus ben du di a ben de na ini hebi banawtu na a kaba fu en libi, èn sortu deki-ati a ben gi den disipel fu en? (Par. 1-4)

• Fu san ede Satan wani du ogri spesrutu nanga den anbegiman fu Yehovah, èn na sortu fasi a e tesi wi? (Par. 5-8)

• Efu wi wani kakafutu gi tesi, dan fu san ede wi musu begi doronomo (Par. 9-12), si sani soleki fa den de trutru (Par. 13-15), memre a strei di Satan bigin (Par. 16, 17), èn „kon krosibei na Gado” (Par. 18-20)?

[Faki na tapu bladzijde 25]

Wan tu sani di kan meki wi lasi-ati

Gosontu/owrudei. Efu wi abi wan siki di no e dresi, noso efu wi no man du son sani moro fu di wi e kon owru, dan wi kan lasi-ati fu di wi no man du so furu moro na ini a diniwroko gi Gado.​—Hebrewsma 6:10.

Brokosaka. Wi kan firi brokosaka te furu sma no wani arki te wi e preiki Gado Wortu.​—Odo 13:12.

Te wan sma e firi taki a no warti noti. Efu wan sma pina furu yari langa fu di trawan libi takru nanga en, dan a kan kisi na overtoigi taki nowan sma lobi en, èn taki Yehovah srefi no lobi en.​—1 Yohanes 3:19, 20.

Te sma e du wan hati sani nanga wi. Efu wan brada noso wan sisa du wan hati sani nanga wi, dan disi kan trobi wi so te, taki wi no e go na den Kresten konmakandra moro, noso wi no e teki prati na a preikiwroko moro.​—Lukas 17:1.

Frufolgu. Sma di no abi a srefi bribi leki yu kan gens yu, den kan frufolgu yu, noso den kan spotu yu.​—2 Timoteyus 3:12; 2 Petrus 3:3, 4.

[Prenki na tapu bladzijde 26]

Yesus ben gi wi a deki-ati fu „begi doronomo” so taki wi kan kisi yepi fu man kakafutu gi tesi