Wan nyun grontapu soleki fa Gado pramisi
Wan nyun grontapu soleki fa Gado pramisi
BIJBEL, a Wortu fu Gado di a meki sma skrifi, e gi wi howpu te a e taki: „Wi e fruwakti nyun hemel nanga wan nyun grontapu, soleki fa a ben pramisi, èn drape regtfardikifasi o tan.”—2 Petrus 3:13.
San na den „nyun hemel”? Te Bijbel e taki fu hemel, dan furu tron dati abi fu du nanga tirimakti (Tori fu den Apostel 7:49). Den „nyun hemel” na wan nyun tirimakti di o tiri grontapu. A de wan nyun tirimakti fu di a sa kon na ini a presi fu a disiten sistema fu tirimakti. Den „nyun hemel” na wan nyun fasi sosrefi fa Gado o meki den sani kon tru di a abi na prakseri. A de a Kownukondre fu san Yesus ben leri wi fu begi (Mateyus 6:10). Fu di na Gado seti a Kownukondre disi, èn fu di A e tan na hemel, meki wi e kari en „a kownukondre fu hemel”.—Mateyus 7:21.
San na a „nyun grontapu”? A no wan nyun planeiti, bika Bijbel e sori krin taki libisma sa libi na tapu a srefi grontapu disi fu têgo. A „nyun grontapu” na wan nyun libisma libimakandra. A sa de wan nyun libimakandra fu di nowan ogrisma sa de drape (Odo 2:21, 22). Ala sma di e libi na a ten dati sa lespeki a Mekiman èn den sa gi yesi na en, èn den sa libi akruderi den markitiki fu en (Psalm 22:27). Sma fu ala kondre e kisi wan kari now fu kon leri sabi san na den markitiki dati, èn fu kenki den libi akruderi den markitiki dati. Yu e du dati tu?
Na ini a nyun grontapu fu Gado, ala sma sa lespeki a tirimakti fu En. A lobi di yu abi gi Gado e meki taki yu e gi yesi na den komando fu en? (1 Yohanes 5:3) A fasi fa yu e tyari yusrefi na oso, na wrokope, noso na skoro e sori taki yu e gi yesi na den komando fu Gado? Yu e sori nanga a heri fasi fa yu e libi taki yu e gi yesi na den komando fu En?
Na ini a nyun grontapu dati, libisma o anbegi a tru Gado na ini wánfasi. Yu e anbegi a Mekiman fu hemel nanga grontapu? A fasi fa yu e anbegi Gado, trutru e meki yu kon de wán nanga tra anbegiman fu ala kondre, ala ras, nanga ala tongo?—Psalm 86:9, 10; Yesaya 2:2-4; Sefanya 3:9.
[Faki na tapu bladzijde 17]
A Gado di e pramisi den sani disi
En na a Mekiman fu den trutru hemel nanga grontapu. En na a sma di Yesus Krestes ben kari „a wan-enkri tru Gado”.—Yohanes 17:3.
Furu libisma e gi grani na gado di densrefi meki. Milyunmilyun sma e boigi gi sani di no de na libi. Trawan e gi glori na libisma organisâsi, grontapu filosofia, noso den eigi lostu. A no ala sma di e taki dati den e gebroiki Bijbel, e lespeki a nen fu a sma di Bijbel e kari „a tru Gado”.—Deuteronomium 4:35.
A Mekiman e taki fu ensrefi: „Mi na Yehovah. Dati na mi nen” (Yesaya 42:5, 8). A nen disi de fu feni moro leki 7000 tron na ini den fosi tongo di a Bijbel ben skrifi na ini. Yesus Krestes ben leri den bakaman fu en fu begi: „Wi Tata na hemel, meki yu nen kon santa.”—Mateyus 6:9.
Sortu sma a tru Gado de? Ensrefi e taki dati a abi ’sari-ati nanga switifasi, a no e atibron esi èn a abi lobi bun-ati nanga waarheid pasa marki’. A e taki sosrefi dati a no sa puru strafu kwetikweti gi den sma di e trangayesi den wet fu en fu espresi (Exodus 34:6, 7). A fasi fa a handri nanga libisma na ini ala den hondrohondro yari di pasa, e sori taki disi de so trutru.
Wi musu santa a nen, nanga a sma di abi a nen. Leki a Mekiman èn leki a Moro Hei Tiriman, a frudini en taki wi e gi yesi na en èn taki wi e anbegi en nanga wi heri ati. Yusrefi e du disi?
[Faki/Prenki na tapu bladzijde 18]
Sortu sani o kenki te a ’nyun hemel nanga a nyun grontapu’ kon?
Grontapu o tron wan paradijs Lukas 23:43
Wan libimakandra pe sma fu ala Yohanes 13:35;
kondre, ala ras, nanga ala tongo Openbaring 7:9, 10
e libi na ini wánfasi fu di den
lobi makandra
Vrede na heri grontapu, nowan Psalm 37:10, 11;
sma e frede nowan ogri Mika 4:3, 4
Wroko di e gi prisiri, Yesaya 25:6;
Siki, sari, nanga dede Yesaya 25:8;
no de moro Openbaring 21:1, 4
Ala sma na heri grontapu Openbaring 15:3, 4
e anbegi Gado na ini wánfasi
[Faki/Prenki na tapu bladzijde 19]
Yu sa kisi wini?
Gado no man lei!—Titus 1:2.
Yehovah e taki: „Mi wortu . . . no sa drai kon baka na mi sondro bakapisi, ma seiker a sa du a sani di mi abi prisiri na ini, èn fu tru, a sa abi bun bakapisi nanga a sani di mi ben seni en go du.”—Yesaya 55:11.
Nownow kaba Yehovah e meki „nyun hemel nanga wan nyun grontapu”. A tirimakti na hemel e wroko kaba. Yehovah bigin seti a „nyun grontapu” kaba.
Baka di Openbaring fruteri fu den tumusi moi sani di „wan nyun hemel nanga wan nyun grontapu” o tyari gi libisma, dan a e taki san Gado srefi ben taki, a Moro Heiwan fu hemel nanga grontapu: „Luku! Mi e meki ala sani kon nyun.” A e taki tu: „Skrifi, bika den wortu disi de getrow èn tru.”—Openbaring 21:1, 5.
A tumusi prenspari aksi di e opo kon now na: Wi e tyari kenki kon na ini wi libi trutru, so taki Gado feni wi bun fu de wan pisi fu a „nyun grontapu” dati, ondro a tiri fu den „nyun hemel”?
