Kibri joe kristen howpoe
Kapitel 10
Kibri joe kristen howpoe
1. San sa meki na ’njoen hemel nanga na njoen grontapoe’ de sani di de foe gridi foe den kon?
O SWITI na prakseri dati wan libi sa de sondro skinhati, sari nanga dede de! Ma troe troe a de moro switi dati disi sa kan foe di no-folmaaktifasi nanga sondoe sa poeroe komoto na pasi. Fa dati sa de wan ségi foe no abi foe feti moro tegen takroe lostoe, foe san wi sabi dati den e doe wisrefi nanga trawan nomo ogri! A sa de troe troe wan bigi prisiri te ibri wan wortoe di wi e taki, ibri wan prakseri di wi e prakseri nanga ala sani san wi e doe sa de foe boen foe iniwan soema èn sa de leki wan spikri foe wi hémel Tata èn noiti sa komoto foe gridi boewégi. Ja, wi kan loekoe na fesi foe na ’njoen hémel nanga wan njoen grontapoe’ di Gado pramisi, pe troe troe retidoe sa libi. Disi de wan howpoe di warti foe kibr. — 2 Petrus 3:13.
2. (a) San wi moesoe doe foe kan si na kon troe foe wi kristen howpoe? (b) Foe sanede wi no moesoe froewondroe dati mindri soema di e kari densrefi kristen man ben sa de di e soekoe den égi boen nomo?
2 Foe wi kan abi prati ini na kon troe foe wi kristen howpoe, wi alaten moesoe hori en doro na wi fesi èn libi foe kroederi nanga en. Disi sa kan nomo te wi kan kaka foetoe gi ala krakti di sa kan swaki noso pori wi howpoe. Son tron den sortoe takroe krakti dati kan komoto foe soema di no e prakseri gadofasi, soema di e prakseri densrefi wawan di de wan pisi foe Gado pipel. Disi no moesoe ferwondroe wi, bikasi na apostel Petrus ben skrifi: „Falsi profeti ben hopo toe na mindri na pipel [Israël], sosrefi toe fa na mindri oenoe toe [kristen] falsi lériman sa de” (2 Petrus 2:1a). Soleki na ini na Israël na skinsé a ben de, kristen toe ben sa kan ondrofeni pori makti di e wroko tapoe den èn di e feni den bigin na ini na gemeente.
„POTI PORI SEKTI KIBRIFASI”
3, 4. Fa Petrus e taki foe na fasi fa falsi leriman e panja den leri di e broeja soema?
3 Foe na fasi fa den kroektoe lériman ben doe, na apostel Petrus e skrifi moro fara: „Den disi sa poti pori sekti kibrifasi” (2 Petrus 2:1b). Na apostel no ben skrifi djaso foe soema di ben abi nomo moeiti foe froestan spesroetoe sani, noso soema foe di den opregti fasi foe froestan sani kande no e kroederi nanga na moro bigi groepoe na alasé. (Agersi Romeini 14:1-6.) A ben méne soema di espresi ben tjari prati èn abi wan pori makti.
4 De sortoe soema dati wanwantron nomo de leti noso taki sani krin. Te den e „poti” den fasi foe prakseri di no de kroederi nanga na bijbel den e doe disi na wan kibrifasi nanga tapoe tapoe. Na Griki fasi foe taki disi di na apostel Petrus ben kebroiki foe „poti kibrifasi”, wani taki so leki fa a de „na en sé, noso poti na tapoe foe dati”. Dati na den fasi foe wroko. Makandra nanga na wan noso tra boen bijbel léri safri safri nanga triki den e poti den pori foe si sani di e tjari prati noso pori. Na fosi presi den e basi na prakseri foe den soema di e arki den nanga wan toe troe tori di de krin so noso kande nanga wan langa, dangra fasi foe bewési sani, èn dan nofo tron den man kisi den so fara dati den kan teki na wan noso tra gronprakseri di nomo kan broeja den. A kan dati den e kebroiki na bijbel foe dati, ma soleki fa a de den no e léri en. Den e kebroiki nomo san fiti den èn den e kron en foe den égi wini, sodati nanga dati den kan bewési den égi denki. Den e meki a sori leki wan sani de troe, nanga aladi ai misi ibri boenfasi foe na bijbel gronprakseri.
5. Fa na fasi fa Satan ben bedrigi Eva e sori, den fasi fa den falsi lériman e doe den wroko?
5 Na fasi fa na sani disi e waka e kon krin na fesi na na fasi fa Satan ben bedrigi Eva nanga jepi foe na sneki. Bigin foe bigin wan aksi ben sori leki a de sondro fowtoe ben aksi: „A de troe troe dati Gado taki dati joe no mag njan foe ibri bon foe na djari?” (Genesis 3:1). Nanga na aksi dati na troe ben drai ferkerti. A ben sori leki na Moro Héwan ben kwinsi den fosi libisoema toemsi, foe di a ben hori wan sani foe den no kisi nanga aladi den ben abi na reti tapoe en. Den wortoe foe na sneki ben moesoe wroko tapoe Eva foe a ben bigin aksi ensrefi foe sanede te joe e loekoe fini a no ben mag foe njan foe „na bon foe sabi boen nanga ogri”. Na na fasi disi Satan ben wiki ini en na winsi foe kisi na piki. Baka dati na piki foe na sneki di ben abi wan spesroetoe marki ben kon: „Foe troe joe no sa dede. Bikasi Gado sabi dati na na srefi dé di joe sa njan foe en, joe hai sa hopo troe troe èn joe sa de leki Gado, sabi boen nanga ogri.” — Genesis 3:4, 5.
6. (a) Sortoe loetoe ben meki Eva ben kan bribi na falsi tori? (b) Fa foe na létori foe Satan wan sekte ben hopo?
6 Foe di Eva prakseri ben sreka na fesi nanga triki foe kisi na lé piki disi, a no ben kon na en leki wan sekseki. Na troe tori dati na sneki „[ben sori] foe de na meti di e wroko nanga moro bigi forsegtigi fasi moro ini wan tra wèrder meti foe na firi”, ben sori foe tapoe pasi gi na okasi dati so wan mekisani ben sa kan gi wan kroektoe njoensoe (Genesis 3:1). Boiti dati a bon ben loekoe so wan fasi dati a ben hari joe èn a ben sori leki en froktoe ben boen foe njan. Eva ben bedrigi krinkrin. Na baka di a ben njan foe na froktoe di a ben tapoe foe njan, a ben hari Adam kon na en sé foe de tégen Gado (Genesis 3:6). Nanga sowan fasi Satan ben man foe nanga den lé wortoe foe wan sneki, meki libisoema drai baka gi den hémel Tata. Na troe foe na tori de dati nanga dati wan sekte di no de getrow, di ben de foe toe soema, ben poti.
7. (a) Foe sanhede wi kan taki dati soema di e tjari prati ini na gemeente, e drai baka gi Kristus? (b) Foe sanede wi kan taki dati den e tjari wan ’hes’hesi pori kon abra densrefi’?
7 Na sowan fasi son soema kan sai wan prakseri di e prati soema, wan prakseri foe sekte foe stré, ini wan gemeente. Foe di so wan splintrigroepoe roetoe ini kroektoe léri èn foe espresi ai proberi foe tjari prati, ai gi nanga en fasi foe si èn leri wan kroektoe fasi foe prakseri foe Gado Manpikin di ben bai na kristen gemeente nanga en broedoe. Foe dat’hede na apostel Petrus ben taki foe den sortoe falsi lériman dati „srefi den éginari, di ben bai den, den e drai baka gi en, nanga dati den e tjari wan heri gaw pori kon abra densrefi”. Ja, te wan soema no e hori ensrefi moro na Kristus leki hede, a de drai baka gi en èn bifo a sabi ai feni ensrefi tapoe wan pasi di moreel nanga jejesé e tjari go na bigi ongolokoe èn di e tjari go na pori. Te na ten foe na kroetoe di sa koti na kroetoe kon, drai drai no sa de. Gaw gaw reti sa koti. Foe di den soema disi nanga aladi den ben sabi heri boen den ben teki falsi léri, den ’sa tjari wan gaw pori abra den’. — 2 Petrus 2:1.
8. Sortoe wroko na ’jajolibi’ foe soema di e mene dati den de kristen kan abi tapoe soema di de na dorosé foe na gemeente?
8 Heroe den soema disi e poti, foe di den e taki dati den de kristen ma den e gi den srefi abra na wan jajolibi, wan porinen tapoe na heri boen nen foe Gado getrow foetoeboi. Foeroe soema di e loekoe na takroe fasi fa son soema di e kari densrefi kristen e tjari densrefi, e bigin foe taki bakabaka noso skempi foe ala soema di e kari densrefi kristen. Disi na san Petrus ben mene, di a ben skrifi: „Boiti dati foeroe sa waka na baka foe den takroe jajo libi, èn na den sa meki soema taki skempifasi foe na pasi foe waarheid.” — 2 Petrus 2:2.
LOEKOE BOEN DATI JOE NO ’SOIGI KOMOTO NANGA FALSI WORTOE’
9. (a) San e tjari mansoema di pori foe hari soema na den baka foe folgoe den? (b) San sa pasa nanga den sortoe man dati èn den soema di den e bedrigi?
9 San e troesoe den man disi di pori foe hari soema foe waka na den baka? Na apostel Petrus e piki na tori disi: „Foe gridi hede den sa soigi joe komoto nanga falsi wortoe” (2 Petrus 2:3a). Den soema disi e meki moeiti foe kisi wini nanga goedoe foe densrefi, noso den wani na makti. Na makti foe regeri nanga na grani di wan soema e kisi foe soema di e loekoe den leki den lériman. Nanga „falsi wortoe”, dati wani taki nanga bedrigi ferklari, makandra nanga sani foe sori taki den fasi foe prakseri de troe, den e proberi foe soekoe den égi boen foe di den e soigi trawan. Foe di san e troesoe den foe doe en so srefi toe den sani san de e léri de kroektoe, na pori sa kon abra den. Na apostel Petrus ben skrifi moro fara:
„Foe den sé, na kroetoe foe owroe ten no e boewégi lebelebe èn na pori foe den no e djonko. A de seker so, efoe Gado no ben hori ensrefi foe strafoe den engel di ben sondoe, ma den, foe di a trowe den ini Tartarus, a ben gi abra na den peti foe bigi doengroe foe kibri den foe na kroetoe; èn a no ben tapoe ensrefi foe strafoe wan grontapoe ini owroeten, ma Noach, wan prékiman foe retidoe, nanga sébi trawan a kibri sondro kefar, di a ben tjari wan bigi froedoe abra na grontapoe foe godlosoe libisoema; èn den foto Sodom nanga Gomorra a ben kroetoe den, foe di a ben meki den tron asisi, gi den godlosoewan a ben gi wan eksempre foe sani san ben moesoe kon ete; èn a ben fri na ret’hati Lot di ben ondrofeni hebi masi foe di soema di ben gens na wet ben gi den srefi abra na jajolibi — bikasi na let’hati man dati foe den sani di a ben si nanga jere di a ben libi mindri den, ibri dé a ben masi en leti sili foe den doe foe den di ben de kontrari na wèt — dan Jehovah sabi foe fri soema di abi gadofasi faja foe tesi, ma kibri den di no lobi letidoe foe na dé foe na kroetoe foe koti den poeroe, fornamkoe den di e waka na baka den lostoe foe na skin nanga na lostoe foe doti en èn di no e sori lespeki gi tirimakti.” — 2 Petrus 2:3-10.
10. (a) O’ten na fosi tron di Gado ben taki en kroetoe foe na ’siri foe na sneki’? (b) Foe sanede na ’kon troe foe en no e waka lebelebe’?
10 Na kroetoe noso strafoe di Gado ben besroiti sensi „owroe ten” tegen ala soema di ben sa de foe na ’siri foe na sneki’, moesoe foe pasa (Genesis 5:15; Johannes 8:44; Judas 14, 15). Nanga aladi na strafoekroetoe ben taki kaba sowan 6000 jari na fesi èn sensi na ten dati a ben taki baka someni tron, „a no de boewégi lebelebe” leki a noiti sa kon troe. Na pori sa kon troe troe, bikasi a no de djonko. Ini san Gado seti foe doe a de troe troe libi libi ete.
11. (a) San ben psa nanga den „trangajesi engel, èn san e wakti den ete? (b) San e kon na krin foe di den engel ben kisi strafoe, na pori foe den godlosoewan ini na froedoe èn na wai poeroe foe den sma foe Sodom nanga Gomorra?
11 Soleki fa Petrus ben taki, srefi den engel di ben libi ondro Gado hai ma bakaten den no ben tan getrow, no ben krin foe den ’hiti go na ini Tartarus’, dati wani taki, lagi te na moro lagi fasi foe broko saka den. Koti komoto foe ibriwan fasi foe kisi leti foe Gado. Jagi komoto foe na presi pe den ben bigin de ini hemel èn sjatoe den foetoe ini den difrenti wroko di den ben doe, den trangajesi-engel de na wan setuwasi di kan agersi nanga „peti foe bigi doengroe” èn den e wakti drape tapoe na strafoekroetoe di Jesus Kristus sa hori. (Agersi Openbaring 20:1-3, 7-10.) Na na srefi fasi Jehovah Gado no ben tapoe ensrefi foe pori wan heri grontapoe foe soema di abi takroe pori maniri nanga wan froedoe di tapoe heri grontapoe noso ini den dé foe Lot a ben hopo ensrefi tegen den soema foe Sodom nanga Gomorra di ben lagi densrefi na sekssé. Nomo let’hati soema leki Noach nanga en osofamiri èn soleki Lot kan abi na howpoe foe komoto foe na kroetoe foe Gado èn foe kon fri foe na tesi di na libi mindri soema di e gens na wet e tjari. Ma foe taki dati wan soema de wan kristen, no sa jepi no wan sma di e proberi foe doti na skin foe trawan nanga hoeroedoe.
LOEKOE BOEN NANGA SMA DI E WISIWASI TIRIMAKTI
12, 13. San de soleki 2 Petrus 2:10b, 11 na fasi foe doe foe soema di abi pori maniri na na sé foe regerimakti?
12 Nofo tron joe kan si den takroe hati prakseri foe soema di abi pori maniri na a fasi fa den e loekoe tirimakti. Den ’e wisiwasi tirimakti’, foe di den e wisiwasi ibri sortoe tirimakti. Na apostel Petrus e go moro fara nanga a fasi fa ai taki foe den: „Kaksi, tranga-hede, den no e béfi gi gloriwan, ma den e skempi, nanga aladi engel nanga ala den moro tranga èn krakti krin krin moro den, no e kragi den nanga skempi wortoe, wan sani san den no e doe foe di den abi lespeki foe Jehovah.” — 2 Petrus 2:10b, 11.
13 Foe dat’hede wi moesoe loekoe boen nanga soema di kaksi, asranti di no abi lespeki gi „gloriwan”. Getrow man di kisi frantwortoe wroko na ini na kristen gemeente, no de prakseri dati den tanapoe na tapoe den sma foe na srefi bribi noso den de moro hé leki den, ma den e loekoe densrefi leki sakafasi foetoeboi (Mattheüs 23:8; 1 Thessalonicenzen 2:5-12). Nanga den diensttoewijzing disi „glori” tai makandra, foe di santa jeje ben poti den foe de owroeman noso „herder” foe na skapoepen (Tori foe den apostel 20:28; agersi Romeini 11:13). So toe den e teki na presi foe Jesus Kristus, na Masra foe glori, nanga Jehovah Gado, na bigi Herder (1 Petrus 2:25; 5:4). Foe dat’hede na Santa Boekoe e gi memre foe na gemeente dek’hati foe saka ondro den di e teki fesi (Ebreër 13:17). Den sortoe man disi foe taki leti den kan meki fowtoe, soleki fa Petrus toe ben meki fowtoe, ma dati no de gi trawan na leti foe taki skempifasi tegen den. (Agersi Galaciasoema 2:11-14; 3 Johannes 9, 10.) „Herder” di e wroko tranga warti na lespeki foe na gemeente. Ma soema di e wroko tapoe trawan foe doe ogri, no e kiki baka foe pori na nen foe kristen owroeman. Efoe wan soema e pori na nen noso skempi en brada, Jehovah Gado nanga en Manpikin e loekoe disi leki a ben doe na den.
14. Fa den getrow èngel e sori wan heri tra fasi leki den falsi leriman?
14 Fa disi de wan bigi difrenti na mindri den sortoe gridi falsi leriman nanga den getrow èngel. Den èngel abi faja gi retidoe. Ma srefi te den abi foe doe nanga den feanti, den no e gebroiki bigi taki foe skempi. Di foe eksempre na gran-èngel „Michaël ben abi wan trobi nanga Didibri, di den ben stré nanga makandra foe na dedeskin foe Mozes, a no ben dorfoe foe poeroe wan skempi wortoe foe kroetoe en, ma a ben taki: ’Jehovah moe strafoe joe’” (Judas 9). Nanga disi wi e leri dati den tra getrow èngel, noiti ben sa poti tapoe wan trawan sjen ofoe ben sa skempi en, ma wan rustig èn safri fasi ben sa tjari den troe tori kon na krin, wansi a de toe nanga krakti. Den abi wan respeki gi den Mekiman di fiti èn den e froestan dati skempi taktaki de kontrari en santafasi ofoe krinfasi.
15. Leki fa Petrus gi rai, dan foe sortoe soema wi moe loekoe boen?
15 Wi moesoe loekoe boen nanga soema di e broko saka trawan na wan ogri hat’fasi èn dan den e troesoe densrefi kon na fesi. Wi alaten moesoe hori na prakseri dati den sortoe soema dati sa kisi kroetoe foe den doe èn den no sa komoto foe na strafoe foe den. Disi sa jepi wi foe de forsigtigi sodati wi no e gi jesi na soema di e sori dati den e bisi nanga trawan, ma soleki fa a de troe troe den e soekoe nomo den égi boen. Foe na kaba foe den sortoe soema disi na apostel Petrus ben skrifi:
„Den man disi, di gersi meti di no abi froestan, di kebore foe soema kisi den èn pori den, ini den sani foe san den no sabi noti èn den e taki skempifasi, ini den égi pasi foe pori den sa ondrofeni na pori toe, den e doe den srefi ogri leki paiman foe kroektoedoe.” — 2 Petrus 2:12, 13a.
16. Na sortoe fasi sma di pori de leki „meti sondro froestan”?
16 Sma di na ogri hat’ lostoe e regeri den, e doe leki „meti di no abi froestan”. Foe meti Jehovah ben taki: „Ala meti di e boewégi di de na libi, joe mag teki leki njanjan” (Genesis 9:3). Den soema di e taki skempifasi de leki „meti di no abi froestan” foe di den no e meki na sten foe wan boen konsensi hori den èn dan nanga dati den no e sori warderi foe Gado weti, doe nanga wroko. Den no man foe kroetoe warti jeje sani na wan joisti fasi, kande den e taki dati den no abi warti. Den kroektoe fasi foe prakseri sa de den pori. Foe den égi lasi den e tan hori na den kroektoe fasi foe si sani èn a no sa kan tra fasi den sa ondrofeni den takroe bakapisi foe den kroektoe fasi foe doe. Wi troe troe wani foe tan hori na wi faste howpoe èn wi no wani go makandra nanga den ini na pori.
LOEKOE BOEN NANGA SMA DI WANI NOMO ÈGI GRIDI LOSTOE NANGA WINI FOE DENSREFI
17. San de soleki fa 2 Petrus 2:13b-15a e taki ete wan toe foe den tra égifasi di de marki foe den pori sma?
17 Foe den takroe ègifasi foe soema di no e prakseri jejefasi wan faja lostoe de foe libi wan libi sondro sorgoe èn nanga prisiri. Na apostel Petrus ben skrifi:
„Den e feni wan libi leki wan goedoeman na déten leki wan prisiri. Den de fraka nanga morsoe, den e gi densrefi abra na prisiri sondro kaba na den bedrigi leri nanga di den e jojo njan feest nanga joe. Den abi hai di foeroe nanga soeta doe èn di no man kaba foe sondoe, èn den e hari den sili di no man hori doro kon na den sé. Den abi wan hati di leri foe de gridi. Den de pikin di wiswasi. Den e libi na reti pasi, den ondrofeni kori.” — 2 Petrus 2:13b-15a.
18. Na o’ fasi sma di no abi jeje prakseri gersi den ini Jesaja 5:11 nanga 12 Israëlsma di no ben tan getrow?
18 Den sortoe soema dati déten den e teki prati na feest, te den e njan nanga dringi psa marki, presi foe den doe wan sani foe bow trawan. Den a gersi foeroe son spesroetoe Israëlsoema di ben libi nomo foe prisiri. Na den feest win ben lon foe monjo. O’moro a dé ben go neti neti, den akanswari ben meki moro oproeroe èn prisiri sote, èn den ben meki den feest sekseki waka makandra nanga pokoe di e wiki sma sekslostoe. Na profeti Jesaja skrifi foe den sortoe sma dati:
„Heloe foe den di e hopo froekoe mamanten foe soekoe nomo dringi di e droengoe den, di e tan hanga lontoe te neti e tapoe den sodati na win srefi e meki den kon faja! Èn (harp) benta tité-instrument, tamboerijn nanga froiti, èn win moesoe de na den feest ma den no e loekoe na wroko foe Jehovah, èn den mekisani foe en hanoe den no ben si” (Jesaja 5:11, 12).
Den di e soekoe prisiri nomo ben doe leki noiti den ben kisi na ketoigi foe den graniwroko foe na Mekiman. Den no ben meki moeiti foe hori densrefi, foe di den no ben poti prakseri gi den frantwortoe na na sé foe Jehovah Gado, èn den no ben sa kan froewakti foe lon psa en kroetoe.
19. San e sori dati son sma di de na ini na gemeente lobi prisiri?
19 A no moesoe froewondroe wi te mindri soema ini na ten disi di e taki dati den de Gado foetoeboi ini na ten disi, sowan sortoe sani de foe si. Trowosofeest nanga memre trowosofeest kan kon lagi te den tron okasi di marki nanga pokoe di e wiki sekslostoe nanga wèrder, dansi di de nomo foe satisfaksi lostoe. So toe a kan dati na den okasi dati sopi dringi e kanti sodati ai monjo. Kande na tranga, feest sondro sma hori densrefi e kaba nomo na moesoedé mamanten noso te dé e broko. In son kondre na gi foe wan nen foe wan njoenjoenpikin, na wij foe wan njoen oso, beri nanga na wij foe oso di e go kebroiki foe anbegi-afersi, sma e kebroiki foe kon prisiri makandra èn hori wan feest. Drape a kan dati den sma di de na na feest e tjari den srefi na wan fasi di den e sori taki den no a bisi nanga trawan, èn den a hendri srefi grontapoe birti, sodati den sma disi moesoe kon aksi efoe a kan de moro safri. Srefi na ini den kondre pe sma lobi foe de tiri fornamkoe, a kan dati mindri boen mati den e dringi toemsi sodati trasma a taki wan skempifasi foe na waarheid foe na „boen njoensoe”. Troe kristen moesoe kibri den srefi seker seker foe den sortoe jajolibi dati. — 1 Petrus 4:3.
20. (a) Sortoe krakti sma di e libi wan jajofasi abi tapoe na gemeente (b) Fa srefi heri moi krin de makandra kan kon lagi tron presi foe dringiman?
20 Soleki fa na apostel Petrus ben taki, den soema dati di e doe so, de fraka nanga morsoe gi na kristen gemeente. Den e pori na boen nen foe Gado troe foetoeboi. Den de leki fraka tapoe wan krin krosi noso leki wan morsoe di takroe tapoe wan fesi di moi foe hai si. Foe di son sma de di poti na den hede foe doe alasani foe prisi den lostoe foe prisiri, den e pori srefi okasi di ben sa de troe troe switi. Den e meki moeiti foe meki trawan prakseri leki den foe foe teki prati na den wèrder dansi èn foe dringi foeroe sopi èn den e taki dati disi de wan kewon fasi foe broskin. Nanga dati toe kan kon na leti dati son wan, soleki fa Petrus ben taki, abi ’hai di foeroe nanga jajo libi’. Na den demakandra pe a switi mansoema nanga doti prakseri kan bigin loekoe na den oemasma di de drape di loekoe moi. Den doti lostoe kan kon so tranga dati srefi trowman kewon no man foe hori densrefi foe sondoe nanga den hai. (Agersi Mattheüs 5:28; Markus 9:47.) „Oemasma di no tanapoe stéfi ini kristen gronprakseri, leki „sili di no man hori doro” koemakriki kan tron na srafoe foe den pori mansma. — Agersi 2 Timotheüs 3:6, 7.
21. Foe sanede sma di ben sa wani foe meki trawan hari kon na ini wan jajolibi, de wan troe troe kefar gi na kristen gemeente?
21 Den sortoe mansma dati de wan troetroe kefar, bikasi den gaw foe kori den swaki wan. Na apostel Petrus e taki dati den abi ’wan hati di koni ini gridifasi’. Den heri libimarki sori dati a de nomo foe prisi den gridi lostoe, èn den e kon tron basi foe kan kisi san den wani. Na discipel Judas toe ben taki foe den sortoe sma dati di e ’kon ondr’ondro na ini sma mindri’ èn den e kenki Gado lobi boenfasi ini wan „sani foe krin densrefi foe doe jajolibi” èn nanga dati den no e tan getrow na wi wan enkri Eginari, Jesus Kristus. Ai sori dati den sortoe sma dati nofotron „foe den égi wini den e loekoe égifasi nanga ferwondroe” èn dati den sortoe sma dati di e meki prati kon, de „meti libisma”, „di no abi jeje prakseri” (Judas 4, 16, 19). Efi den sortoe sma dati kisi na okasi foe nanga switi taki noso doe leki den faja kisi makti noso wan hé-presi ini a gemeente, den de wan bigi kefar. Nanga leti den e kon ondro Gado froekoe èn den e verdini na pori, soleki fa na apostel Petrus ben skrifi. San de so gi mansma di abi so wan makti di e dijeri sowan prati, pori, de so toe seker foe oemasma di e doe so wan sani. — Agersi Openbaring 2:20-23.
22, 23. Na o’fasi sma di e pori trawan kan agersi nanga Bileam?
22 Na apostel Petrus ben agersi den sortoe pori sma dati toe nanga Bileam, foedi a ben skrifi:
„Dem ben waka na pasi foe Bileam, na pikin foe Beor, di ben lobi na paiman foe ongeregtigheid, ma a ben kisi na strafoe foe en ongeregtigheid. Wan stom meti di e tjari lai, di ben taki nanga wan libisma sten, ben tapoe na profeti foe go doro tapoe a lawpasi foe en” (2 Petrus 2:15b, 16).
Na loekoeman disi ben sabi heri boen dati a no ben kroederi nanga na wani foe na Moro Héwan foe froekoe den Israëlsoema. Nanga aladi na dorosé a ben sori dati a no ben sa go dorosé foe san Jehovah ben sa dwengi en foe taki, ini en hati a ben abi na winsi foe froekoe Israël. A ben wani foe abi na paiman di na koning foe Moab Balak ben Balak ben presenteri en. Ma na Almakti Gado ben sori Bileam nanga jepi foe en égi oema boeriki tapoe en fowtoe. Nanga wan wondroe na Moro Héwan ben meki wan stom meti di e tjari lai taki (Numeri 22:1-35). Disi no ben hebi gi Gado di srefi kan meki den ston bari (Lukas 19:40). Foe na heri bigi gridifasi foe Bileam, nanga reti Jehovah ben kebroiki na fasi foe sori en wan finga di no ben de wan kewon sani. Foe di a ben meki moeiti foe gens Gado wani na na sé foe Israël, Bileam ben doe leki wan lawman. Wan heri ten na piri-hai di en osometi ben gi en ben tapoe pasi gi en foe go doro tapoe en pasi, foe di a ben moesoe foe froestan dati kewon so a no ben man foe kisi foe froekoe Israël. — Numeri 23:1-24:9.
23 Tokoe te na ten dati Bileam ben abi na faste besroiti foe kisi na paiman. Te foe kaba a prakseri wan tra sani foe doe nanga san a ben kan kisi den Israëlsma foe densrefi tjari Gado froekoe kon na den tapoe. A gi Balak rai fa a kan tjari oema foe Moab nanga Midian foe meki den mansma foe Israël kon na ini tesi foe afkodré nanga hoeroedoe (Numeri 31:16; Openbaring 2:14). Na lagi prakseri disi ben abi wan maat foe kon door èn a ben tjari na dede foe 24.000 Israëlsma. — Numeri 25:1-9.
24. San na eksempre foe Bileam e sori wi na na sé foe sma di e prakseri densrefi wawan?
24 O krakti na tori foe Bileam e sori na fasi foe doe foe sma di foe den égi wini den e libi foe doe san de reti! Srefi wan wondroe no sa drai den foe no meki moeiti foe prisi den gridi. Foe datede wi moesoe wai pasi foe di krosbé kompe nanga sma di en fasi doe doe èn taki nanga den maniri foe en e troeboe wi konsensi troe troe. Sma di e prakseri densrefi wawan no abi no wan konsensi fonfon te ai go foe meki trawan ondrofeni lasi foe densrefi kan kisi den égi marki.
25. San de na sani san den wortoe foe 2 Petrus 2:17 e sori tranga na tapoe?
25 Petrus e go doro nanga en fasi fa ai taki foe den sortoe godlosoe sma dati nanga den wortoe: „So sortoe sma de leki peti sondro watra, den de wolkoe, di draiwinti de tjari; we, den sa feni den presi na ini na moro bigi doengroe” (2 Petrus 2:17). Hori krosibé kompe nanga doti sma no abi no wan winimarki. Den de leki peti na san wan pasasiri di weri e lon go miti nanga na howpoe foe feni switi watra te kaba foe kaba ai kon si dati a peti watra dré. Den de toe leki fini wolkoe foe san sma e froewakti kande nanga na howpoe dati den sa tjari na alen di de fanowdoe foe den sani di prani, ma di trangawinti e tjari gowe. Foe falsi leriman sma no kan froewakti leti, no wan leti foe meki sani kon krin. Den srefi e go miti na „moro bigi doengroe”, wan doro doro doengroe leki wan agersisani foe na strafoe-pai di e wakti den.
LOEKOE BOEN NANGA „BIGI TAKI”
26. Nanga sortoe wortoe na apostel Petrus e taki fa takroe sma e kisi den sani di den poti na den fesi foe kisi?
26 Kefarlek sma ini na gemeente abi wan bedrigi dorosé loekoe. Foe datede wi moesoe loekoe boen nanga den. Fornamkoe den di no tanapoe stéfi ini na kristen waarheid nanga libifasi moesoe loekoe boen. Den fasi foe doe foe den man dini di abi gridifasi kan naki sma hati foe troe. Ma eroe foe den sma di e ondrofeni kori foe di den e drai sma ede! Na apostel Petrus e taki:
Den e prodo nanga bigi taki, di no warti noti; èn nanga den lostoe foe skin èn nanga na takroe libi den e soekoe foe hari den sma kon abra, di ben Ion boen boen komoto kaba na mindri foe den sma di waka ferdwale. Nanga aladi den pramisi den, taki, den sa meki den kon fri, kaba densrefi de srafoe foe na porifasi. Bikasi na sma di ben wini joe, na en de joe srafoe.” — 2 Petrus 2:18, 19.
27. San de na égifasi foe den taki nanga na fasi foe doe foe sma di abi wan takroe makti tapoe trawan?
27 Sma di e drai trawan ede foe teki wan ferdwal leri noso foe meki den doe kontrari den konsensi di krin, nofo tron den e taki nanga fasti bribi. Den abi wan hé memre foe densrefi nanga den wortoe èn den abi bigi warderi foe den fasi foe taki (Agersi 2 Korinthiërs 10:10, 12; 11:3-6, 12, 13.) Presi foe nanga wan jeje foe sakafasi den tjari bijbel gron di boen na fesi, kande den e spotoe èn kande den e taki tapoe wan krakti, wan fasi di abi hé wortoe sondro warti, nanga san den e moi moi den swaki bewijs gron nanga skepi. (Agersi leki wan kontrari nanga dati 2 Korinthiërs 4:2.) Efi wan sma ben sa ondrosoekoe den bigi wortoe foe den ini na leti foe na Skrift, dan ai kon na krin dati den de légi wortoe, di no abi wan winimarki gi no wan sma.
28. Fornamkoe soema kan kon de ondro na makti foe den takroe sma disi di de na mindri foe na gemeente?
28 Ke, na okasi de dati sma di no tanapoe stéfi ini na Wortoe foe Gado, no man foe sabi na kefar. Den no leri a koni foe kisi sani krin èn foe sabi san na boen nanga ogri (Ebreer 5:14). Foe di den sma disi di no e hori doro kande a no solanga ete di den komoto na mindri foe den doe di no e gi Gado grani di na grontapoe abi e doe, den sortoe doe dati te now ete kan wroko wan spesroetoe krakti foe ari den.
29. San de na fasi fa na Santa Boekoe e taki foe prisiri nanga broskin, èn o ten wi moesoe loekoe boen?
29 Na na sé foe prisiri nanga broskin, soleki fa a de wi moesoe abi balans. Ini na Skrift a no skrifi dati Gado foetoeboi moesoe libi wan libi sondro prisiri nanga goedoe èn so toe no abi bisi nanga joesrefi a no e taki foe dat leki wan boenfasi foe ensrefi, ma leki wan égifasi di abi warti nomo te a abi wan boen marki (Agersi Prekiman 2:24; 3:1, 4, 13; 8:15; 1 Korinthiërs 13:3; Kolossensen 2:20-23.) Ma dati no e gi wan sma fri pasi foe go doe kroboisani, foe meki na fadon skin basi wi èn kebroiki na kristen fri fasi leki wan smoesi foe takroedoe (Galaciasoema 5:13, 14; 1 Petrus 2:16). So wan fasi foe doe noiti kan kon moksi nanga na gebod foe lobi Gado èn foe lobi wi birti leki wisrefi, na „kownoe wet” na ondro san wi tanapoe (Jakobus 2:8, 12). Sma di e taki wan tra sani èn e spotoe den sma di no e agri nanga den jajolibi, e sori dati den de srafoe ete foe den égi gridi lostoe.
30. San te kaba foe kaba kan psa ini na gemeente foe di wan krakti di e pori e wroko na inisé?
30 Wi moesoe kebroiki wi froestan èn wai pasi gi alatoe kroboi-sani. Wi no kan stré dati wi de na ini na kefar foe kon ondro na tesi foe lon baka na prisiri sondro foe bada wisrefi nanga noti. Safrisafri wan sma kan hari go na ini mara-watra foe prisiri, go na feest di te na ten e psa kan kon lagi èn tron dansi nanga dringi feest foe prisiri sote, noso go loekoe film noso tra komedi na ini san seks dotilibi nanga wan takroe fasi foe hati trawan noso masi den e kisi grani. A no ben sa sori foe wan boen froestan foe hori nomo dati den sortoe no-gesontoe makti dati no de wan kefar. Sondro foe twijfel den sa swaki na kristen konsensi èn lagi na moraal. Sma di no wani gi leti dati a de so, e fadon kon ondro katibo foe droengoe nanga seks takroefasi. — Odo 13:20.
31, 32. San son memre foe na gemeente sa tan doe te leki „na dé foe na kroetoe”, èn nanga sortoe bakapisi?
31 Na apostel Petrus ben skrifi troe troe soifri sortoe sani ben sa tan pse na mindri Gado foetoeboi te leki na „dé foe na kroetoe” ben sa doro gi den sma di e doe kroektoe „foe den koti komoto” (2 Petrus 2:9). Alaten sma sa de di e meki moeiti foe meki den marki foe na kristen frifasi kon fara moro bradi leki a fiti, èn disi nomo foe den kan prisi den lostoe foe prisiri densrefi. Den no e winsi foe arki na bijbel gebod di gi nanga krin taki: „We, kiri dan den lede foe oen, di de foe grontapoe, na foe taki: hoeroelibi nanga takroedoe nanga sjenhangri nanga ogrilostoe nanga na gridifasi” (Kolossenzen 3:5). Presi foe dati den e soekoe joisti den sortoe broskin disi di e wiki den kroektoe lostoe ini den. Te den e hari trawan kon nanga den, kande den e prakseri so: ’Efi mi konsensi e gi pasi foe doe so, dan a no kroektoe.’ Ma den no e taki dati a de so dati wan konsensi di doti no kan de wan séker fonfontiki (Tjariman). Den sma disi e gi densrefi abra na den kroektoe lostoe èn foe datede den no kan libi en. Den pramisi foe „frifasi” de kori sma.
32 Den sma di e drai go libi wan sondoe libi baka, wan troe wan bigi onkolokoe kaba e wakti den. Na apostel Petrus ben skrifi:
„Bikasi efi den ben komoto kaba na ini na doti foe kondre, di den ben kon sabi wi Masra nanga Helpiman, Jesus Kristus, kaba den fadon baka ini trapoe agen, meki sma wini den, dan a kon moro ogri nanga den a bakaten, leki a ben de na fositen. Bikasi a ben sa de moro betre gi den, efi den no ben kon sabi na pasi foe geregtigheid noiti wanten, leki taki, den sabi en, kaba den drai baka, libi na santa gebod, di den ben kisi. Bikasi a kon troe nanga den, leki na troe odo de taki: ’Dagoe de njan nasani baka, di a ben pio; èn so srefi: te hagoe komoto na wasi, wanten a go lolo ensrefi baka na ini tokotoko.’” — 2 Petrus 2:20-22.
33. (a) Sortoe kenki wan sma kan meki te a kon kisi na sabi foe na waarheid? (b) Foe sanede a de wan toemsi fornamkoe afersi te wan sma e drai go baka na den pasi foe na grontapoe?
33 Foe sanede na apostel Petrus ben kan taki dati? Te wan sma kisi wantron na joisti reti sabi foe na Masra Jesus Kristus, ai bigin foe si taki a moesoe tjari kenki kon. Kande ai tapoe foe dringi hebi, libi wan jajolibi, pré karta foe moni noso tra ogridoe. Foe di ai tjari en libi kon na krin èn foe di ai kroederi foe libi soleki san e froewakti foe wan discipel foe Jesus Kristus libi, ai lon gi den „kori foe na grontapoe disi”, den sani foe doe foe san a leri dati den no e prisi Gado. Efoe tokoe den doe di e pori Gado nen kisi en baka, dan nanga en égi wani ai trowe na sani foe san a sabi dati a de joisti. Èn sabi foe Jesus Kristus nanga en konsensi di ben kisi leri nanga na bijbel bigin foe bigin ben tapoe en foe wan kroektoe fasi foe tjari ensrefi. Efi a meki na gesontoe sani foe tapoe en lasi gwe, a kan psa dati a kon moro takroe leki bifo di a ben tron wan discipel foe Kristus. A kan go moro fara leki den sma di no sabi na pasi foe letidoe srefsrefi. Disi e kon foe di a doti en konsensi noso a bron en tapoe, sodati a kon tron leki meti di dede di no e firi moro. (Agersi 1 Timotheüs 4:2.) Efi a noiti ben sabi na troe pasi ete, dan en takroe fasi foe doe no ben sa pori na nen foe Kristus so meni, en sondoe no ben sa de so takroe dan gado kroetoe tegen en no ben abi foe de so tranga. — Agersi Lukas 12:45-48; 1 Timótheüs 1:13, 15, 16.
34, 35. (a) Sortoe lès wi kan leri foe na odo foe na doti dagoe nanga agoe? (b) San na odo disi moesoe leri wi tranga?
34 Soleki san wi e si foe na odo foe Petrus di ben taki di djonsro den sma di e go libi wan sondoe libi, soleki fa ai sori dan den e mankeri foe go moro na fesi tapoe na kristen libipasi (2 Petrus 1:2-11). Sonwan na dorosé den kande e libi den takroe gwenti, ma den noiti e kon so fara dati den abi bita-ati gi den troe troe. Den no e libi san den „pio”, na fisti doti foe na grontapoe disi, kande troe troe na baka den. Gi den te now ete wan sani di e hari den de drape na ini ete èn foe datede a kan dati den drai go baka na en. Na inisé den abi na lostoe kande ete foe go lolo ini na tokotoko foe na grontapoe di saka na moraalsé. Trawan no e meki den warderi foe na waarde foe na kristen de foe wan discipel kon moro bigi èn te kaba foe kaba san na grontapoe abi foe gi den, abi moro bigi krakti foe hari den. Ke fa dati de wan toemsi sari sani te wan sma ondrofeni kori na sowan fasi èn fadon go baka ini wan setuwasi di a ben foega gi!
35 Na odo di skrifi na ondro na krakti foe santa jeje de wan warskow gi alasma di taki dati den de kristen. Efi wi no e kweki ini wi ati moreel nanga jeje krinfasi èn no e foega troetroe gi na fisti doti foe na grontapoe disi, na bigi kefar de dati wi kan brokosaka na jejefasi. Kristensma no kan teki na tjans foe kon swaki ini den skorkoe tegen den kori foe na pori grontapoe. Wi moesoe kiri wi pori lostoe, wi no moesoe gi den okasi dati den basi wi èn wi no moesoe wiki den toe foe di wi e loekoe nanga bigihai na nasani di grontapoe abi foe gi wi. — 1 Korinthiërs 10:12; Kolossenzen 3:5.
TAN NA AI!
36. San wi moesoe doe, boiti dati na moreel noso jejesé wi tan krin, moro foe prisi wi Masra?
36 Wi no moesoe tan wawan na moreel nanga jejefasi krin, ma wi moesoe tan de faja ini na dienst foe wi Masra, foe di wi e jepi trawan na jeje so toe na skinsé. Wi heri libipasi moesoe sori dati wi de na ai na jejesé èn wi e wroko faja. Na apostel Petrus ben sori tranga o prenspari a de nanga den wortoe:
„We, oen lobiwan, disi de now na brifi di foe toe, di mi e skrifi gi oenoe, soleki na ini na fosi brifi, mi e fermane oenoe foe wiki oenoe krakti foe memre foe jepi oenoe toe prakseri krin, sodati oenoe kan memre den wortoe, di den Santa profeti ben taki na fesi, èn na gebod di ben kon nanga jepi foe joe apostel foe wi Masra nanga Helpiman. Èn dati oenoe moesoe sabi moro foeroe taki, na den laatste dé spotoeman sa kon, di sa waka na den lostoe foe den srefi baka èn den sa taki: ’Ope na pramisi tan dan taki en sa kon baka? Bikasi sensi den tata ben go sribi, alasani ben tan soleki fa a ben de.’” — 2 Petrus 3:1-4.
37. (a) Foe sanede wi ’krakti foe prakseri krin, moesoe wiki’? (b) Na sortoe fornamkoe sani di ben moesoe psa den proféti ben sori?
37 Ini na ten disi a de troe troe boen gi wi dati wi ’krakti foe prakseri krin wiki’, sodati wi kan si krin san wi moesoe doe foe Gado feni wi boen. (Agersi 2 Petrus 1:12-15.) Den „santa profeti”, foe bigin nanga Henoch, ben warskow foe wan dé foe kroetoe. Ini Judas 14, 15 wi e lési: „Enok srefi di ben meki sebi na baka foe Adam, ben taki foe so sma kaba na profetitaki, di a ben taki: ’Loekoe! Jehovah e kon nanga den foeroe doesoen santa sma foe en foe kroetoe ala sma èn foe strafoe ala den godloosoe sma na den mindri foe ala den ogri wroko, di den ben doe ogri, èn foe ala den tranga wortoe, di den godlosoe sondari ben taki, trowe na en tapoe.’” Hondro jari na baka Ebreër profeti soleki Jesaja, Daniël, Joël, Habakuk, Zefanja, Hagaï, Zacharia nanga Maleachi ben kisi krakti foe taki den sortoe profetitaki dati toe. — Jesaja 66:15, 16; Daniël 7:9-22; Joël 3:9-17; Habakuk 3:16-18; Zefanja 1:14-18; Hagaï 2:21, 22; Zacharia 14:6-9; Maleachi 4:1-6.
38. Foe sanede wi moesoe meki moeiti foe de klarklari?
38 Na kroetoe foe Gado di ala den proféti disi nanga tra sma ben taki na fesi sa kon sondro mankeri. Disi de aksi foe wi dati wi meki moeiti foe de alaten klari èn foe wi krin fasi foe tanapoe no fesi foe na Moro Héwan no kon na ini kefar.
39. Sortoe boskopoe de na ini na gebod foe Jesus Kristus?
39 Na boskopoe di den profeti ben tjari abra gi wi, de toe na ini na gebod foe wi Masra Jesus Kristus èn a ben kari baka nanga jepi foe den apostel, nanga Paulus toe. Leki discipel foe na Manpikin foe Gado wi moesoe de faja faja ini na dienst foe en, tan krin na moreel nanga jejesé èn de alaten klarklari foe ontfanga wi Masra te ai kon foe tjari na kroetoe abra den godlosoewan. Na Manpikin foe Gado ben taki:
„We, loekoe boen na oen srefi, foe oenoe no meki oenoe ati kon hebi nanga toemsi njanjan nanga dringi te foe droengoe, èn foe oen no broko oenoe ede toemsi nanga sani foe disi grontapoe foe na bigi dé no kon fadon onfroewakti na oenoe tapoe leki wan trapoe. Bikasi a sa kon fadon na ala sma tapoe, di e libi na heri grontapoe. Foe’datede oenoe moesoe tan na ai, begi alaten foe oenoe kon waarti foe ala densani di sa kon no moesoe kisi oenoe, èn foe oenoe kan tanapoe na fesi foe Soemapikin.” — Lukas 21:34-36.
40. San wi moesoe doe foe no fadon na sribi na jejefasi?
40 Ja, wi moesoe loekoe boen dati wi no fadon na srefi na jejefasi. Foe datede wi no mag gi wisrefi abra sondro foe hori wisrefi na njanjan nanga dringi nanga prisiri. Den sortoe jajolibi dati e tapoe wi froestan nanga prakseri foe si sani krin èn na ati e kon hebi nanga firi taki sma abi fowtoe. Nanga dati den boen prakseri foe na ati e kwinsi komoto. So toe wan broko’ede psa marki foe feni na ibridé brede, kan poeroe ini na ati na sekerfasi di e gi trostoe dati Jehovah Gado sa sorgoe foe ala sani san wi abi troe troe fanowdoe (Mattheüs 6:25-34). Na momenti te na winsi foe te na Masra Jesus Kristus e kon foe tjari na kroetoe, ai feni wi boen, no de moro na prenspari sani di de na ini wi ati, wi de na ini bigi jeje kefar. Na Masra Jesus Kristus ben sa kan feni wi ini wan fasi di a no feni boen.
41. Foe sanede na bribi ini na kon foe Kristus ini glori di de seker, alaten ben de wan jepi gi kristensma foe tan getrow?
41 Soleki Petrus den tra getrow apostel ben leri den sma foe na srefi bribi leki den foe tan hori na prakseri dati no wan twijfel no ben de dati Kristus sa kon foe tjari na kroetoe èn foe gi en getrow discipel den paiman. Na faste sekerfasi disi na na fosi presi ben sa jepi kristen foe den kan kon feni boen fasi te na Manpikin ben sa kon „nanga krakti nanga bigi grani” (Mattheüs 24:30). Na srefi fasi leki Jesus den apostel ben taki tranga dorodoro o prenspari a de foe tan getrow te na a kaba. Disi ben sa kan taki te den dede noso te „na dé foe na kon foe Jehovah.” (2 Petrus 3:12). Foe di na ini na Skrift srefi na opobaka foe Kristus mede erfgenaam e poti makandra nanga en kon baka, den froewakti foe ala troe discipel de krosibé makandra nanga na kon foe na Manpikin foe Gado leki na glorifasi hemel Kownoe (Mattheüs 10:28; 24:13, 36-44; 1 Thessalonicenzen 1:9, 10; 4:14-17). Na ini na heri historia foe na kristen gemeente na bribi di no e degedege ini na kon foe na Masra „nanga krakti nanga bigi glori”, ben de soboen wan bigi jepi gi kristen foe tan getrow na en.
NO MEKI SPOTOEMAN BEDRIGI JOE
42. (a) Foe sanede ini disi ten wi e jere na sten foe spotoeman? (b) Fa den e prakseri?
42 Foe wan pisi a ben de so foe na faja froewakti foe densrefi kan firi na openbaring foe Jesus Kristus ini glori, na ini ala den jarihondro pikinmoro a de e bribi ben de di e loekoe na fesi foe wan spesroetoe ten noso wan spesroetoe jari te na godlosoe seti foe sani ben sa kon na en kaba. Disi de so te na ini „den laatste” dé disi. Foe di son froewakti no kon troe, foeroe fadon komoto èn drai baka go na den pasi foe na grontapoe. Leki wan kon troe foe Petrus’ wortoe te na ini na ten disi wi e jere den sten foe spotman (2 Petrus 3:3, 4). Foe taki krin den e taki: ’Sortoe gron wi abi foe bribi dati na Manpikin foe Gado sa pori den godlosoewan èn a sa gi den discipel foe en paiman? Sensi na ten di sani ben meki noti no kenki. Na libi e go so doro leki fa a ben de alaten kaba èn a no sori dati ini na sjatoe ten di de na wi fesi wan ongolokoe pori sa kon. Man e trow èn oeman e gi foe trow, njoenjoepikin e kebore èn den libisma e tan kon owroe èn den e dede.’ Nanga dati den wani taki dati na Masra Jesus Kristus noiti sa kon foe tjari na kroetoe noso dati na sani disi de ete so farawe ini na ten di de na wi fesi dati gi wi a no de so wan wantron wan tron prenspari afersi.
43. San e sori dati kristus discipel alaten kaba den ben moesoe doe den foerantwortoe nanga wan boen konsensi?
43 Den sortoe spotoeman dati no e hori na prakseri dati efoe a de dede noso „na dé foe Jehovah” sondro foe a kan misi a sa kisi den. Na no wan foe den toe okasi den sa abi na okasi foe tjari goedoe kon makandra na ini hemel foe di den e doe heri boen wroko (Lukas 12:15-21, 31, 33-40). Soboen gi den discipel foe Jesus Kristus noiti ete wan ten ini historia ben de na ini san den ben kan teki wan tjans foe no doe den foerantwortoe. Ini wi ten disi de seker moro kefarlek.
44. Foe sortoe prenspari foerantwortoe wi moesoe doe wi plekti?
44 Na sortoe foerantwortoe wi moesoe hori wisrefi foe datede? Na na fosi presi wi kisi na gebod: „Meki discipel foe sma foe ala naatsi, dopoe den ini na nen foe na Tata èn foe na Manpikin èn foe na santa jeje èn leri den foe hori ala san mi komanderi oenoe” (Mattheüs 28:19, 20). Ja, wi abi na grani foe na na kaba foe na seti foe sani disi foe abi wan prati ini na grontapoe prékiwroko foe na „boen njoensoe foe na kownoekondre” (Mattheüs 24:14). Troe troe prenspari de now dati wi doe wi plekti foe sori ala wi brada nanga sisa lobi, jepi den te den abi jepi fanowdoe, sori dati wi e firi gi den èn gi den dekati. (Agersi Mattheüs 25:35-40; Ebreër 13:1-3; 1 Johannes 3:16-18.) Moro fara wi moesoe meki moeiti dorodoro foe wi tan krin foe den wroko foe na skin di e kon moro lagi dé foe dé. — Mattheüs 7:21-23; Galaciasoema 5:19-21.
JEHOVAH BEN BEWIJSI DATI DEN SPOTOEMAN NO ABI LETI
45, 46. Sortoe bewijsi Jehovah ben gi dati den spotoeman no abi leti?
45 Nanga di wi e tan libi wan libi soleki fa a fiti den discipel foe Jesus Kristus, wi alaten sa wani hori na wi fesi dati Jehovah ben gi na bewijsi langa ten bifo dati den spotoeman no abi leti. Na a tori dati na apostel Petrus ben poti prakseri na tapoe kaba:
„Ma foe espresi den no wani sabi, nanga na wortoe foe Gado na hemel ben de granwe kaba, èn grontapoe ben de toe, disi komopo n ini watra, èn disi tan na ini watra; nanga dati na grontapoe foe datiten ben lasi, di na watra foe na froedoe meki a soengoe.” — 2 Petrus 3:5, 6.
46 Na troe tori dati Jehovah Gado ben pori na fesi kaba wan grontapoe foe godlosoe sma, e sori dati den spotoeman no abi leti te den e kon taki dati no wan bigi kenki sa kon ini libisma afersi, ma dati ala sani ’sa tan go so doro foe sensi na ten foe di sani ben meki’. Wi abi Gado égi wortoe foe pramisi di a ben taki dati nanga jepi foe en Manpikin a sa opo foe strafoe den godlosoewan. Na wortoe dati de so krakti dati sondro mankeri a no sa tan sondro foe a psa.
47. Fa na tori foe fa sani ben meki e sori na krakti foe Gado „wortoe”?
47 Na fasi fa na bijbel e taki foe Jehovah mekiwrokosani, e sori na krakti foe en „wortoe”. Foe Genesis kapiter 1 wi e si dati na Moro Héwan e taki na wortoe noso ai gi wan gebod, san a prakseri na fesi de leki a doe kaba. (Agersi Psalm 148:1-6.) Foe na di foe toe dé wi e lési: „Morofara Gado ben taki: ’Wan sani moe de di e prati den watra na tapoe nanga den watra na gron.’ Ne Gado meki a sani. A prati den watra na gron nanga den watra na tapoe. Na so a psa” (Genesis 1:6, 7). Èn na tapoe na di foe dri dé, na so wi e lési, „Gado ben taki: ’Dati den watra na ondro loktoe moe kon makandra na wan presi, meki dré presi kan kon foe si.’ We, na so a ben psa”. — Genesis 1:9.
48. Fa a doe kon dati na grontapoe ben ’komopo na mindri foe watra’ èn „tan mindri foe watra”?
48 Na tori foe Genesis de kroederi krin krin nanga na fasi fa na apostel Petrus e taki foe en. Foe di na dré gron ben hé moro na tapoewatra di ben tapoe na gron, a ’ben tan na ini watra’. Ma na gron ben de „na mindri foe na watra” foe di a ben de lontoe lontoe nanga na watra di ben de na loktoe (di ben abi den gas di ben de fanowdoe foe meki libi kan go doro). (Agersi Odo 8:24-29.) Na sani disi di ben seti so ben kon foe de nanga na „wortoe foe Gado”.
49. (a) Fa a doe kon dati na grontapoe foe na ten dati „ben pori . . . nanga den sani dati”? (b) Sortoe sani di moesoe psa ete de foe ede foe na krakti „wortoe foe Gado” seker dati a sa psa?
49 Den watra di ben de hé tapoe na gron èn den watra tapoe grontapoe ben meki a kan dati wan grontapoe froedoe ben kan kon, èn na Moro Héwan ben kebroiki den sani dati toe foe pori wan godlosoe grontapoe. Na Froedoe ben de wan warskow eksempre gi den godlosoe spotoeman di e twijfri dati Gado sa gi strafoe te na ten foe Kristus kon nanga den libisma afersi. Na krakti wortoe di ben gi na okasi foe na bigi froedoe di ben tapoe na heri grontapoe, de na srefi wortoe di e sori tapoe na pori foe na godlosoe seti foe sani foe tide. Na apostel Petrus e go moro fara foe di ai taki: „Ma na hemel nanga na grontapoe foe now a ben kibri nanga na srefi wortoe; èn a de hori kibri den, meki den go na na faja na na dé foe kroetoe, te den godlosoe sma sa go na na ferdoemenis.” — 2 Petrus 3:7.
50. (a) Sortoe fasi foe si sani son sma di de na ini na kristen gemeente, teki na na sé foe na pori foe na godelowsoe seti foe sani foe tide? (b) Fa na fasi disi foe si sani e kon na leti?
50 Fornamkoe foe di foeroe jarihondro psa kaba sensi na apostel Petrus ben skrifi den wortoe disi èn foe di spesroetoe froewakti no ben kon troe, son sma di de nanga na gemeente e twijfri efi oiti sowan pori sa kon ete. Nanga aladi kande den no e kon krin krin wan nanga den spotoeman, den tokoe no e taki na „dé foe na kroetoe” leki wan sani nanga san den moesoe loekoe boen. Den lobi foe drai drai foe doe den kristen foerantwortoe èn den e fadon ini wan fasi foe jeje firi sribi. Den e meki moeiti nanga na feti baka prisiri nanga foedoe foe kisi someni leki a kan foe na seti foe sani foe tide.
WARDERI JEHOVAH PASENSI
51. Foe sanede wi no moesoe prakseri dati na kon foe Kristus leki kroetoebakra di e tjari pori kon moe meki wi wakti langa tapoe en?
51 Te joe e loekoe nanga na ai foe libisma den ai sori kande langa troe troe bifo Kristus kon leki kroetoebakra di e kiri sma foe teki refensi gi Gado. Ma ini na ai foe Jehovah dati no de so. Te wi no wani foe fadon na sribi na jejesé, den wi moesoe si den sani foe na sé foe na Moro Héwan. Dem wortoe foe na apostel Petrus kan de wan jepi gi wi na na tori disi. Wi e lési:
„Ma na wan sani oen moe sabi, oen lobiwan! Na Masra Jehovah ai wan enkri dé de tan leki wan doesoen jari, èn doesoen jari leki wan dé. Jehovah no e drai nanga nasani, di a ben pramisi, so leki son sma e denki taki, ai drai langa toemsi; ma ai ori pasensi nanga wi, a no wani no wan sma no moesoe go lasi, ma ala sma moesoe drai en libi. Ma tokoe na dé foe Jehovah sa kon leki wan foefoeroeman.” — 2 Petrus 3:8-10.
52, 53. Fa gi Jehovah doesoen jari de leki wan dé, èn wan dé de leki doesoen jari?
52 Jehovah no de sondro firi na na sé foe ten te a de wan afersi foe libisma (Genesis 1:14, 15). A ben wani dati libisma ben moesoe marki na ten. Ini na bijbel Gado ben marki spesroetoe ten, di leki fa libisma ben marki nanga den fasi foe teri ten na ini jari (Genesis 15:13-16; Exodus 12:40, 41; Galaten 3:17; Numeri 14:33, 34; 32:13; Deuteronomium 2:7; Jozua 5:6; Tori foe den apostel 13:20). Foe di a de wan Gado di no abi bigin èn a no de nanga kaba èn ai libi tégo foe tégo, en libi no kan marki nanga ten (Psalm 90:2, 4). Foe datede san de doesoen jari noso wan ten foe moro leki 365.000 dé, de gi na Gado foe tégo te a sa agersi en nanga dati nomo wan dé foe 24 joeroe.
53 Na Petrus di santa jeje ben wroko na en tapoe e taki toe dati „na Jehovah wan dé de leki doesoen jari”, ma nanga dati a no ben mene dati na na sé foe libisma afersi noso grontapoe afersi a ten e waka sondro kaba gi Jehovah. Gado ben sa kan doe ini wan dé foe 24 joeroe nèt someni leki san wan sma ben sa kan doe ini doesoen jari. Ma na Moro Héwan noiti ten e pers en, nanga aladi a kan meki wan sani psa moro esi. Ma efi a wani wakti bifo a doe wan spesroetoe sani, dan ai wakti, na wan sé, nomo wan „dé”.
54. (a) Foe sanede wi no moesoe prakseri dati Jehovah e drai drai? (b) Na sortoe fasi wi kisi winimarki foe Gado pasensi?
54 Presi foe wi si den jariondro di psa sensi na apostel Petrus ben skrifi na di foe toe brifi foe en, soboen wi no moesoe si leki Gado e drai drai, wi moesoe loekoe na ten leki wan wondroefasi foe Gado sori pasensi. Nanga dati sondro wan sma kan taki en trafasi na bewijse e gi dati wi hemel Tata wani dati libisma ibriwan presi moesoe kon abi sari ati èn tan ini libi. Soleki fa Petrus ben taki dan, kristensma ben feni boen foe Gado pasensi. Den toe ben de sondro bribi wan tron èn den ben moesoe sari sari ati foe kan kon na wan boen presi na na Moro Héwan. Efi Gado ben tjari kroetoe kaba gi na godlosoe grontapoe disi, den sma di no ben sari sari ati ete, ben sa dede. Na pasensi foe Jehovah ben meki a kan dati kristensma kisi jepi, soleki fa en pasensi te now ete e meki trawan kan sori sari ati èn tan na libi. Gado pasensi no sa tan sondro kaba. No froewakti, soleki wan foefoeroeman e kon, na Masra Masra Jesus Kristus sa sori ensrefi „ini wan bigi faja” te a sa bigin foe meki na kroetoe kon abra den godlosoewan. — 2 Thessalonicenzen 1:7-9.
55. San wi moesoe doe foe di a de seker so dati Kristus e kon foe tjari na pori, èn san disi kan wani foe taki gi wi?
55 Foe di na kon foe na Masra Jesus Kristus kan psa iniwan joeroe, wi moesoe prakseri dipi foe na fasi fa wi de nanga Gado nanga Kristus Jesus. Wi no abi ten sondro kaba foe meki wan rapport gi wi srefi foe eri boen wroko nanga san den ben sa feni wi boen. Na bijbel e sori krin dati den sma di no opo den ai foe tan na ai, sondro den froewakti na kroetoedé foe wi Masra sa kon abra den. Efi wi no ke foe wi kristen foerantwortoe, na sani disi di moesoe psa ben sa kan kon abra wi sondro wi sreka na fesi soleki wan foefoeroeman e kon. Foe datede wi moesoe meki moeiti foe libi ibri dé so leki a de wi laatste dé èn wi no moesoe gi pasi dati wi égi lostoe noso prisiri trobi wi ini wi getrow dienst foe Jehovah Gado nanga wi Masra Jesus Kristus. Dan na fasi fa wi kebroiki wi ten, wi krakti nanga wi grontapoe goedoe noiti sa meki wi firi sari. Èn te na Masra Jesus Kristus sa sori ensrefi, wi no sa kisi na sjen leki srafoe di no ben de getrow di e ferdini strafoe. Presi foe dati dan gi wi, a no abi trobi efoe wi de wan pisi foe Gado „njoen hemel” noso „njoen grontapoe”, wan ten foe ségi di no kan agersi nanga noti sa bigin. Disi de troe troe wan eri switi howpoe di wi moesoe sorgoe boen foe en. — 2 Petrus 3:13.
[Aksi foe a tori disi]
