Kristus — Na volmaakti eksempre
Kapitel 5
Kristus — Na volmaakti eksempre
1. San de fanowdoe efoe wi wani winsi foe waka baka Jezus Kristus?
EFOE wi wani waka nanga wi eri ati baka wan soema, dan wi moe bribi taki en eksempre boen foe waka na en baka. O moro bigi wi warderi nanga lobi de gi na soema dati, omoro wi sa abi na winsi foe de leki en. O fara wi sa waka baka Jezus Kristus leki wi model, e anga soboen boen foeroe foe na dipi lobi nanga warderi di wi abi gi en. San sa jepi wi foe meki wi lobi kon moro foeroe foe na Manpikin foe Gado?
2, 3. (a) San e sori dati wi no abi foe si Jezus letterlek nanga wi ai foe leri sabi en? (b) Foe san-ede meki foeroe djoe di ben si na Manpikin foe Gado troetroe, no ben abi warderi gi en?
2 Soleki foeroe sma ini na fosi eeuw di ben tron kristen baka Jezus dede, na so wi no ben si na Manpikin foe Gado persoonlek (1 Petr. 1:8). Ma dati wi no kan si en nanga wi letterlek ai, no e tapoe wi foe lobi en srefi moro. Foeroe sma di ben si Jezus Kristus ini libisma skin, no ben leri sabi en. Den ben kroetoe en nanga den égi prakseri di den abi foe na Messias èn den ben naki foetoe. Foe eksempre, sma foe en égi kontren ben taki: „Pe na man disi feni na koni dati nanga den krakti wroko disi? Disi no de na manpikin foe na temreman? En mama no nen Maria, èn en brada Jakobus nanga Jozef èn Simon nanga Lukas? Èn ala en sisa no de dja na wi? Pe na man disi ben feni ala den sani disi?” — Matteus 13:54-57.
3 Den ai nanga jesi foe den sma di ben taki na so wan fasi dati den no ben sori bribi, no ben gi den froestan nanga ati foe den joisti bodoi. Foedi den ben kroetoe Jezus nanga san den ben si na dorosé èn ben si en leki wan sma di ben komoto foe na oso foe wan eenvoudig temreman, dan den no ben teki en leki na pramisi Messias, na Manpikin foe Gado. San den wondroe foe Jezus ben wani taki ben kon doengroe ini den froestan. Den ben si den toemsi moi égifasi foe en, ma den ben kroetoe den na wan fowtoe fasi.
4. Fa wi kan leri sabi na Manpikin foe Gado moro boen, èn san wi kan leri foe en?
4 Ma na a tra sé, wi kan leri sabi Jezus Kristus moro boen èn lobi en moro tranga te wi loekoe soifri nanga ini begi san den Santa Boekoe abi foe taki foe wi (Teki gersi 1 Johannes 1:1-4). A bijbel e skrifi foe na Manpikin foe Gado na wan fasi di e waran na ati. Aladi Jezus ben de volmaakti, tog a no ben loekoe toemsi fini ofoe de asranti ini na demakandra nanga sma di ben siki èn pina (Matteus 9:10-13). Aladi a ben abi wan toemsi é koni, dan trawan no ben firi densrefi leki den don ofoe no e firi densrefi switi, bikasi a ben de „nanga safrifasi èn nanga sakafasi foe ati” (Matteus 11:29). Srefi pikinnengre ben firi densrefi boen na en (Matteus 19:13-15). Jezus Kristus ben teki den sani di en discipel no ben man doe ini prakseri èn nanga pasensi a ben taki ala tron baka prenspari leri (Johannes 16:12). Di a ben si den sikisma nanga den poti-sma na jeje fasi, dan sari-ati ben kisi en èn nanga ala prisiri a ben gi jepi (Matteus 9:36; Markus 6:34). Na belangstelling foe en gi den poti-sma ben de foe si, foedi en nanga en discipel ben abi wan gemeenschappelek kas, pe den ben kan teki moni foe jepi den potisma (Yohannes 12:4-6; 13:29). Nanga ala prisiri Gado Manpikin ben span ensrefi krinkrin gi tra sma èn nanga dekati a ben tjari farsi fasi kon na krin (Matteus 23:2-35). Te foe kaba, a ben gi en libi abra leki wan bewijsi foe en bigi lobi gi na libisma-famiri (Johannes 15:13). Fa disi ben de wan toemsi moi eksempre foe dekati, sakafasi nanga lobi, di na Manpikin foe Gado ben gi na wi!
FA JEHOVAH E SI EN MANPIKIN
5. Sortoe prenspari leri foe Jezus Kristus wi no kan kisi nanga jepi foe si, jere nanga fasi?
5 Boiti dati, soso den Santa Boekoe e leri wi fa Jehovah Gado e denki foe en Manpikin. A no ben kan kwetkweti foe leri sabi Jezus Kristus soso foe si èn, jere ofoe fasi en letterlek. Teki foe eksempre den wortoe di na apostel Petrus taki foe na respeki presi foe Gado Manpikin èn den blesi di a de tjari kon te wan sma kon na en. Na apostel skrifi:
„Kon na en leki wan libi ston, di libisma ben trowe kande, ma di Gado ben verkisi èn de diri na en, na sosrefi toe oenoe bow leki libi ston kon tron wan jeje oso foe de wan santa priester-famiri, foe tjari jeje slagti-ofrandi, di Gado e feni boen nanga jepi foe Jezus Kristus. Bikasi ini den Santa Boekoe tanapoe: ’Loekoe! Mi e poti ini Sion wan ston, wan di verkisi, wan fundamenti-oekoeston, diri; èn soema poti bribi ini en, no sa kisi sjen kwetkweti’” (1 Petrus 2:4-6).
San disi wani taki gi den fosi eeuw kristensma?
6. (a) Fa bribisma ben kon ini na fosi eeuw na a Manpikin foe Gado leki „na libi ston”? (b) Foe san-ede nanga reti Jezus ben kari dja na „libi ston”?
6 Te den ben teki Jezus Kristus leki den Masra èn leki na sma di nanga jepi foe en den ben kan kisi ferloesoe, dan den ben kon na en „leki na wan libi ston”. Na wortoe „libi ston” fiti toemsi. Jezus Kristus no de leki wan gewoon, kowroe, dede ston, pe noti kan teki poeroe foe na libi. Na Manpikin foe Gado de leki wan stonbergi, pe den Israël sma ini na sabana ben kan kisi watra. „Na stonbergi dati wani taki na Kristus”, so na apostel Paulus ondro krakti foe santa jeje skrifi. A ben de wan marki ofoe agersifasi foe na Manpikin foe Gado (1 Korinte 10:4). Jezus srefi ben taki:
„Efoe wan sma abi dré watra, meki a kon na mi èn dringi” (Johannes 7:37). „Ala sma di e dringi foe na watra di mi e gi en, noiti sa kisi dréwatra moro, ma a watra di mi sa gi en, sa tron ini en wan fonten foe watra di e koekoe kon na tapoe foe gi tego libi” (Johannes 4:14).
Na so fasi na Manpikin foe Gado ben sori dati a leri foe en, te wan sma ben teki en ini en leki kowroe watra, ben sa tjari ferloesoe kon — tego libi. Boiti dati, Jezus Kristus ben kisi makti foe gi libi. Foe dat’ede, tapoe na gron foe en zoen-ofrandi, soleki en Tata, a kan gi libi na tra sma èn wiki den foe dede. — Johannes 5:28, 29.
7. Fa Jezus Kristus ben trowe leki na „libi ston”?
7 Soleki Petrus ben sori, dan „libisma ben trowe” Jezus kande. Spesroetoe den émemre kerki fesiman no ben si ini na Manpikin foe Gado noti di den ben si leki foe waka na en baka. Den no ben warderi na sari-ati nanga lobi foe en gi libisma di ben de wan eksempre. Di Jezus ben gi jeje jepi na den sma di ben de leki sondari, den kerki fesiman ben kragi: „A man disi e bari wan switikon gi sondari èn e njan nanga den” (Lukas 15:2). Den ben si fa na Manpikin na wan sari-ati fasi ben kebroiki na sabbat foe opo na ai foe brenisma, foe dresi sikisma èn foe fri den malengrisma foe a pina foe den. Ma na presi foe den kerki fesiman ben prisiri èn ben prijse Gado, den ati ben bron èn den ben meki mofo foe kiri en (Matteus 12:9-14; Markus 3:1-6; Lukas 6:7-11; 14:1-6). Den taigi wan breniman di ben si baka: „A sma disi no de foe Gado, bikasi a no e ori na sabbat” (Johannes 9:16). Te foe kaba, na djoe é kroetoe, na Sanhedrin ben kroetoe en foe dede tapoe na gron foe den farsi kragi foe kosi Gado (Matteus 26:63-66). Foe na strafoe ben kan go doro, dan den djoe tiriman ben kenki na kragi kontra Jezus foe kosi Gado go ini oproeroe. Tapoe na aksi foe den, meki na Romein tiriman Pilatus ben gi komando foe kiri en na wan paal, leki a ben de na moro ogri politiek ogriman. — Lukas 23:1-24
8. Fa Jehovah e si en Manpikin?
8 Dati sma ben trowe Jezus Kristus leki fundamenti, no ben kenki na fasi fa Jehovah ben si en Manpikin. Foedi na Moro Éwan ben poti a fesi kaba en, leki na sma di nanga jepi foe en na libisma-famiri ben sa kisi ferloesoe èn leki na „libi ston” pe na kristen gemeente ben sa bow a tapoe, dan a ben de èn ben tan de na „wan di Gado verkisi”, soleki Petrus e taki. Noiti wan degedege ben de ini na prakseri foe na Tata dati na Manpikin ben sa doe na prakseri foe Gado sondro fowtoe. Jehovah ben sabi dati en Manpikin ben gi ensrefi krinkrin na en. Na grontapoe Jezus Kristus ben sori en dipi lobi gi en Tata, foedi srefi ondro pina a ben doe en wani dorodoro. Foedi a ben de getrow ondro ebi tesi, meki na Manpikin ben kon de toemsi diri ini na ai foe na Moro Éwan.
9. Foe sainde fosi-eeuw kristen ben kan de séker taki den no ben sa kisi sjen ini den bribi?
9 Den sma di na apostel Petrus ben skrifi gi, ben prakseri leti so foe Gado Manpikin. Na apostel ben verklari: „Gi oenoe a de foe dat’ ede diri, foedi oenoe de bribisma” (1 Petrus 2:7a). Den ben erken taki Jezus Kristus ben de na toemsi warti fundament-oekoeston, di na Tata ben poti ini na hemel Sion, sodati den wortoe ini Psalm 118:22, Jesaja 8:14 nanga 28:16 ben kon troe. Foe di den fosi-eeuw bribisma ben si Jehovah Manpikin a srefi fasi leki Jehovah èn den ben poti bribi ini en leki na fundament-oekoeston, dan so fasi den ben kan de séker taki den froewakti foe den no ben sa kisi sjen. No wan sma kan pori na diri fundamenti, di ben poti stéfi ini hemel èn na so fasi doe ogri na den sma di owpoe ben tai nanga dati. Solanga den bribisma ben de ini wanfasi nanga Kristus, na fundamenti foe na gemeente di no e seki, dan den ben kan de séker foe kisi na marki foe den bribi, namkoe libi sondro kaba. Ma den sma di no ben bribi ben sa ondrofeni bigi lasi. Na apostel Petrus e go moro fara foe taki:
„Ma gi den sma di no e bribi, ’a srefi ston di den basi ben trowe, ben tron na oekoe’, èn ’wan foe naki foetoe èn wan stonbergi foe naki foetoe fadon’. Den disi o fadon foedi den ben tranga jesi na wortoe. Na a kaba disi ben poti gi den.” — 1 Petrus 2:7b, 8.
10. Fa Jezus Kristus ben tron „wan ston foe naki foetoe èn wan stonbergi foe naki foetoe fadon”?
10 Foe di den prenspari djoe kerki fesiman ben wégri foe teki na Manpikin foe Gado leki a dren foe den èn poti den owpoe foe tego libi tapoe en, meki den ben lasi na moro bigi grani foe tron Kownoekondre-erfgenaam. Jezus Kristus ben warskow den: „Foe troe, mi e taki gi oen taki den tolnaar (di ben abi berow) nanga oeroeman (di abi berow) sa go na oen fesi ini a kownoekondre foe Gado” (Mattéüs 21:31). Na fasi foe doe di den kerki fesiman disi ben waka na en baka, no ben kan meki dati Jezus Kristus ben tron a „ede foe na oekoe”, na kroon ofoe sroto-ston foe wan „jeje oso”. Aladi den man disi ben handri nanga Jezus Kristus leki wan ston di no ben boen gi na bowwroko foe den, dan tog den no ben kan komoto na ondro, dati a ben de wan ston a den pasi. Srefi baka en dede nanga opobaka, den no ben kan doe leki Gado Manpikin no ben de, bikasi en getrow discipel ben tan gi kotoigi foe en nanga dekati (Tori foe den Apostel 5:28). Na so fasi Jezus Kristus ben tron wan stonbergi di ala sma ben naki foetoe na en di ben tan go doro foe no bribi èn di te foe kaba ben fadon. Leki den sma di e sori taki den de opregti bribisma, ben poti foe kisi ferloesoe, na so den sma de di e sori densrefi leki sma di no e bribi, ben poti foe lasi gwe. Na Manpikin foe Gado ben taki srefi foe ensrefi: „Ibriwan sma di fadon tapoe a ston dati, sa masi. Foe na sma di a ston fadon na en tapoe, a sa masi en tron poeri.” — Lukas 20:18.
San e psa te wan sma kon ’na a libi ston’
11. Fa den fosi-eeuw bribisma ben tron „libi ston”?
11 Foedi den fosi-eeuw bribisma ben teki Jezus Kristus leki na diri „libi ston” di Gado ben teki, dan densrefi ben tron „libi ston”. Fa so? Den no ben de moro langa leki „den de ini a pasa foe Gado wet èn ini sondoe”, ma den ben prisiri na presi foe dati leki manpikin foe Gado ini wan „njoenfasi foe na libi” (Romeini 6:4; Kolossensen 2:13). Nanga jepi foe Kristus, na „libi ston”, a libi foe den ben kon njoen. Ma den no ben moe didon lontoe leki bowston di no abi libi èn di no e dini wan boen sani. Nono, den ben moe de wan harmonisch oso. Foe kan de wan wanfasi bowwroko, den ben moe sori na wan srefi lobi gi makandra foe offer densrefi leki a Eksempre di a ben sori a den (Johannes 13:34). Den ben moe de sosrefi wrokoman, soleki Jezus Kristus di a ben de na grontapoe. Na Manpikin foe Gado ben gi ensrefi krinkrin foe doe a wani foe en Tata, foe sorgoe foe den fanowdoe foe tra sma, èn foe jepi den foe waka na pasi foe tego libi. — Johannes 4:34.
12. Den „libi ston” ben bow kon tron san, èn san de foe dat’ede a frantwortoe foe den?
12 Den wortoe foe na apostel Petrus e poti boen krakti a tapoe, dati kristensma di Gado e bow tron wan jeje oso, wan santa presi ofoe tempel, ben kisi wan prenspari wroko foe doe. (Teki gersi 1 Korinte 3:5-17; 6:19). Loekoe pikinso dai Petrus e taki: „Sosrefi toe, oen e bow leki libi ston tron wan jeje oso foe de wan santa priesterwroko”. Ja, a tempel foe „libi ston” de sosrefi toe wan „santa priesterwroko”. Ibri kristen di kon njoen gebore nanga jeje de wan priester foe dat’ede, di e dini loyaal ondro na bigi Granpriester Jezus Kristus. So wan kristen no abi wan libisma ofoe wan groepoe foe libisma fanowdoe foe doe priesterwroko gi en. Leki priester en wroko de ini disi foe tjari „jeje ofrandi”, di Gado e teki nanga jepi foe Kristus (1 Petrus 2:5). Ma san na den slakti-ofrandi disi?
13-15. San de den „jeje slakti-ofrandi”, èn fa disi kan bewijsi nanga jepi foe den Santa Boekoe?
13 Petrus e taki dati den „jeje” ofrandi, soboen den no de ofrandi foe meti ofoe karoe tapoe wan letterlek altari. A ten foe a tjari foe den sortoe ofrandi dati na skinfasi ben kon na wan kaba di a Manpikin foe Gado ben pristeri ensrefi leki wan ofrandi di e verzoen sondoe èn di Gado e teki. — Hebr. 10:11, 12.
14 Srefi ini den Hebrew Bookoe wi e feni sani foe a fasi foe „jeje slakti-ofrandi” di Gado e teki. So wi e lési foe eksempre: „Tjari tangi gi Gado leki joe slakti-ofrandi” (Psalm 50:14). „Meki wi tjari tangi ofrandi èn meki en wroko bekenti nanga prisiri-babari” (Psalm 107:22). „Meki mi begi sreka leki switi-smeri-ofrandi na joe fesi, na opo foe mi mindri-anoe leki karoe-ofrandi foe neti” (Ps. 141:2). „Wi wani tjari foe wi sé baka den jongoe kaw foe wi mofo-boeba” (Hosea 14:2). Na mindri den „jeje slakti-ofrandi” de soboen begi, prijse nanga taki tangi.
15 Ini den kristen Griki Boekoe wi e feni moro sani ete. Wi e kisi na dekati disi: „Meki nanga jepi foe en (Kristus), wi tjari gi Gado alaten wan slakti-ofrandi foe prijse, namkoe, na froktoe foe den mofo-boeba, di e meki en nen bekenti na publiki. Boiti dati, no frigiti foe doe boen èn foe trawan teki prati makandra nanga joe, bika den sortoe ofrandi disi de switi na Gado” (Hebr. 13:15, 16). Ini Filippenzen 2:17 na apostel Paulus e taki foe „na slakti-ofrandi nanga na publiki dienst di bribi ben tjari joe kon na en” èn di ensrefi „ben kanti trowe a tapoe leki wan dranki-ofrandi”. Ini den tekst disi krakti e poti a tapoe taki a de prenspari foe broko ede sref-srefi nanga na jeje èn skin tanboen foe trawan èn foe de klari foe kebroiki wi ten, krakti nanga sani di wi abi foe na boen foe den. So wan broko-ede e sori nanga a prati foe Gado boskopoe gi tra sma èn sma di de ini nowtoe na skinfasi, foe jepi den, soleki a Eksempre foe wi Jezus Kristus ben doe disi. Poti prakseri, dati na Moro Éwan e si na sani di en dienstknegti e doe foe meki na tanboen foe tra sma go na fesi leki wan slakti-ofrandi foe prijse di e prisiri en.
16, 17. Sortoe krin rede de foe a tjari foe den sortoe „jeje slakti-ofrandi” èn na meki bekenti foe Gado „toemsi boen wroko”?
16 Foe di Jehovah Gado ben doe nanga jepi foe a Manpikin den sortoe bigi sani disi gi den fosi-eeuw bribisma, dan den ben abi rede foe firi den ati naki den foe „tjari leki jeje slakti-ofrandi”. Wan dé den ben de ini bigi „doengroe” èn sondro owpoe. Di den ben de ete wan pisi foe na grontapoe, dan den ben tanapoe ondro na tirimakti foe Satan, na „tiriman foe na grontapoe”, „na makti foe na doengroe” (Johannes 14:30; Kolossenzen 1:13). Den pipel di no ben de djoe ben de krinkrin ini don tapoe a tori foe a troe Gado nanga en prakseri. Den no ben de ini wan matifasi nanga en. Na apostel Petrus e poti tapoe disi wi prakseri, di a ben taki: „Wantron oen no ben de en pipel, ma now oen de Gado pipel; oen ben de don sma di sari-ati no ben sori gi, ma oen de now den sma di sariati e sori gi” (1 Petrus 2:10). Ja, foedi den ben teki Jezus Kristus, meki djoe leki no-djoe ben tron „wan famiri-lo, di Gado ben teki foe en, wan kownoe priesterwroko, wan santa naatsi, wan pipel di de wan spesroetoe goedoe” (1 Petrus 2:9). Gado ben teki den leki en pipel èn ben kari den foe de makandra nanga Jezus Kristus kownoe-priester èn na so fasi ben de wan naatsi di ben poti aparti foe wan santa prakseri, èn den ben bai den nanga na diri broedoe foe en Manpikin leki na goedoe foe na Moro Éwan. (Teki gersi Exodus 19:5, 6; Openbaring 5:9, 10.) Fa disi ben de wan toemsi moi sori foe sari-ati fasi gi den jeje Israëlsma! Den memre foe na „santa naatsi” disi ben kisi krin leti foe Gado èn den ben kan prisiri sosrefi toe ini na leti foe en boen-ati. Dati ben de kontrari nanga a ten di den ben de ete ini „doengroe”, de leki freemde sma gi na Almakti Gado èn sondro sabi foe na wani nanga prakseri foe en.
17 Foe di Jehovah ben erken den discipel disi foe Jezus Kristus èn ben gi den na no-ferdini boen-ati foe en, dan den ben firi tranga foe meki bekenti na ala sma san na Moro Éwan ben doe gi den nanga jepi foe en Manpikin. Den no ben kan stop foe taki nanga tra sma foe den „toemsi moi wroko”, den froewondroe wroko foe den hemel Tata.
18. Fa wi moe tjari san wi ben loekoe ini na kapitel disi, kon tapoe wi égi libi, èn foe sanede?
18 Now ala troe discipel foe Jezus Kristus, makandra nanga den memre foe na „bigi ipi” di tai densrefi nanga na „santa naatsi” dati, moe firi tranga toe foe libi wan getrow libi èn feti foe jepi trawan foe kisi Gado boen-ati (Openbaring 7:9-15). A moe de wi ati-winsi foe span wisrefi foe jepi sma di de ini jeje nowtoe. Te wi e waka na so wan fasi na baka na Manpikin foe Gado, dan disi sa meki wi libi kon de moro goedoe. A kan gi wi bigi prisiri foe meki tra sna de kolokoe, trowstoe èn gi den tranga (Tori foe den Apostel 20:3-5). Na a tra sé wi e kisi na okasi nanga waarderi foe den sma di wi ben gi sondro gridi wi ten, wi krakti, wi goedoe. Aladi son wan no e sori grantangi, tog wi abi na dipi inisé satisfaksi, dati wi ben prisiri wi hemel Tata. Èn foe di wi e doe en wani, dati meki wi kan de séker foe en jepi nanga tiri (1 Johannes 3:22). Meki wi tan koti bigi blesi te wi e waka baka a eksempre foe na Sma di de ini a ai foe Jehovah Gado toemsi diri.
[Aksi foe a tori disi]
