Libi ini na froewakti foe na kon troe foe na pramisi
Kapitel 11
Libi ini na froewakti foe na kon troe foe na pramisi
1, 2.(a) San de foe psa ete soleki na „wortoe foe Gado” di no kan drai e taki, èn sortoe aksi e kon foe datede? (b) Fa na apostel Petrus e taki foe nasani di sa psa nanga na seti foe sani foe tide?
WAN kenki foe na heri grontapoe seti foe sani de foe kon. Ibriwan kontren foe libisma libi sa ondrofeni na krakti foe en. Na kenki disi a no kan tra fasi ofoe a moesoe kon bikasi nanga na „wortoe foe Gado” di no kan lé a wet taki kaba dati na hemel foe now nanga grontapoe sa moesoe foe wai gwe foe meki presi gi wan glorifasi njoen, hemel nanga njoen grontapoe. San den fasi fa sani sa waka sa wani foe taki gi wi? Fa wi nanga na fasi fa wi e libi kan sori dati wi e froewakti na sani san Jehovah Gado ben pramisi troe troe?
2 Na baka di a ben taki foe na grontapoe froedoe ini Noach dé, na apostel Petrus skrifi: „Den hemel nanga den grontapoe foe now kibri gi na faja èn den e kibri gi na dé foe na kroetoe èn foe na pori foe den godlosoe sma” (2 Petrus 3:7). Moro fara na apostel e taki dati ’den hemel sa psa nanga wan bari (leki foe wan sneki), ma den elementi, faja foe troe, sa smelter èn na grontapoe nanga den wroko na tapoe sa kon na leti’. — 2 Petrus 3:10.
3. Na sortoe fasi foe prakseri di no kan de trafasi wi moesoe kon na na sé foe na loktoe di meki foe stof, foe san wi grontapoe de na ini toe?
3 Foe den wortoe disi di skrifi ondro na krakti foe na santa jeje wi moesoe froestan dati na na grontapoe srefi, so toe na son, na moen nanga den star sa pori? Foe wi kan piki na aksi disi, dan wi moesoe ondrosoekoe Gado fasi foe si den sani na na sé foe en égi wroko. Foe a kaba doe den ten foe mekisani na Genesistori e ferteri wi: „Gado ben si alasani di a ben meki èn loekoe! a ben de heri boen” (Genesis 1:31). Den fosi sma ben abi na den fesi foe libi foe tégo ini kolokoe na grontapoe, efi den ben sa tan gi jesi (Genesis 2:16, 17; 3:3). Noti na ini na Genesistori e sori dati na grontapoe ben meki nomo foe wan sjatoe libipe foe libisma èn te baka ten a ben sa pori baka wan dé foe kroetoe di ben de na en fesi foe kon. Disi e sori soleki na gesontoe froestan e sori dati na loktoe di meki foe stof, wi grontapoe de na ini toe, sa tan foe tégo.
4. (a) Sortoe difrenti Petrus ben meki mindri na setuwasi bifo na Froedoe èn baka en? (b) San na Froedoe no ben doe?
4 Moro fara na apostel Petrus ben meki wan difrenti foe di a ben taki fosi dati (1) „ini owroeten hemel ben de nanga wan grontapoe, di ben dri watra èn di ben de mindri watra” èn baka ten a ben taki foe (2) „den hemel nanga na grontapoe foe now” (2 Petrus 3:5, 7). Tokoe na grontapoe di ben de bifo na Froedoe, de, na srefi planeet di de te now ete. A de so troe dati na fasi fa na grontapoe ben loekoe na Froedoe kenki en. Foe di watra no ben de moro hé tapoe na gron, na fasi foe si sani foe na hemel di ai kan si ben kenki te joe ben sa loekoe foe na presi foe wan libisma di e loekoe en. Ma den kenki disi ben de nomo wan toe sani di kon foe de so leki na bakapisi foe na Froedoe. A marki foe na Froedoe no ben de foe pori na grontapoe srefi, ma foe pori na godlosoe libisma seti foe sani na dorosé foe na ark. Nanga na Froedoe ala den wroko nanga seti di na godlosoe seti foe libisma ben meki nanga seti, ben pori gwe.
5. San moesoe psa tapoe na dé foe pai, efi disi wani kroederi nanga na grontapoe froedoe?
5 Efi nasani di taki na fesi foe na ten di moesoe kon ete, akroederi nanga na grontapoe froedoe, dan foe datede ala sani di tai makandra nanga na godlosoe seti foe sani foe na ten disi, moesoe pori, leki na faja ben bron den poeroe. Ja, ala den libisma afersi, makandra di ben kon foe de na baka na froedoe, kibri gi na pori èn foe na dé foe kroetoe noso pai.
6. Na owroe seti foe sani a sa pori nanga troe troe faja?
6 Dati na „faja” di kari djaso de wan agersi sani foe na finifini fasi foe na pori, na bijbelboekoe Openbaring e sori dati krin, pe na Masra Jesus Kristus de foe si leki wan kownoe di e feti orlokoe. Drape a skrifi dati baka di a doe en sraktiwroko foeroe dedeskin so tan abra tapoe grontapoe, di den tingifowroe sa njan (Openbaring 19:15-18). Na tori disi no ben sa kan psa srefi srefi efi na grontapoe disi ben sa tron soso wan bigi ipi foe krofaja pe libi no de.
7. San den wortoe ini 2 Petrus 3:10 e sori na na sé foe na pori di moesoe kon ete?
7 Na pori di Petrus ben taki foe en foe na grontapoe foe tide èn foe na hemel abi foe doe nanga na pori foe na godlosoe libisma seti foe sani. Den libisma regeri di ben regeri leki „hemel” abra na seti foe libisma, sa wai komopo. (Agersi Jesaja 34:2-5; Micha 1:3, 4) Te den sa poeroe komopo nanga pori gwe, disi sa psa nanga wan „babari leki foe wan sneki”, soleki te smoko di e komopo na ondro wan patoe di de ondro druk, èn na babari disi sa kon moro tranga alaten. Den „elementi”, dati wani taki na prakseri di e troesoe den godlosoe libisma foe prakseri na den fasi di no e grani Gado, sreka sani na fesi, foe taki nanga foe doe, sa loesoe. Noti sa tan abra foe en. (Agersi Tori foe den apostel 9:1; Efesesoema 2:1-3.) Disi sa de na kaba foe ala filosofie, theorie, regeling nanga sani di sreka na fesi di e wroko leki wan spikri gi na prakseri foe den sma di drai baka gi Gado. „Na grontapoe nanga den wroko na tapoe sa kon na krin”, dati wani taki, a sa kon na krin dati den e ferdini na pori. No wan sma foe no godlosoe libisma seti foe sani, na „grontapoe”, sa lon psa (Agersi Genesis 11:1; Jesaja 66:15, 16; Amos 9:1-3; Zefanja 1:12-18.) A sa kon krin dati ala wroko foe den sma di e libi sondro wet — soboen den sani san den seti nanga orga so toe san di den bow na na sé dati — abi Gado atibron èn sa poeroe trowe leki doti di no abi no wan warti.
8. Sortoe rai foe Petrus wi moesoe teki na ati, foe di ibriwan pisi foe na seti foe sani foe tide sa pori gwe?
8 Wi leki foetoeboi foe Gado foe datede nanga wi fasi foe libi wi moesoe sori dati wi e bribi troe troe dati ibri wan pisi foe na godlosoe seti foe sani disi sa pori gwe foe alaten. Foe doe dati na apostel Petrus ben gi wi dekati nanga den wortoe di e kon now:
„We, di ala den sani de go lasi èn proi, a no fiti oen dan foe oen libi èn waka wan santa Gadolibi? Tokoe oen froewakti foe go miti na kon foe na bigi dé foe Masra esi, na dé, di den hemel sa bron na ini faja, gwe, èn den elementi sa smelti na ini na tranga faja!” — 2 Petrus 3:11, 12.
9. Soema wawan sa psa na bigi pina di e kon nanga na den fesi tégo blesi?
9 Te ibri pisi foe na seti foe sani disi sa loesoe pori, nanga na „faja” foe Gado atibron, di sa lon nanga jepi foe Masra Jesus Kristus, nomo den sma sa lon psa di de difrenti foe di den abi wan leti-fasi foe tjari densrefi nanga gadofasi foe gi densrefi. Na troe anbegi no de so dati ai meki sma doe nanga en nomo èn a no e kon na fesi nomo foe di sma no e doe son spesroetoe kroektoe sani. Nanga aladi a de prenspari foe tan krin na moreel nanga jejesé, wi abi na plekti foe sori wi lobi gi libisma leki wi foe di wi moesoe feni en switi foe jepi den na skin nanga jejesé. Èn disi e tjari bigi prisiri kon bikasi „ai gi moro foeroe kolokoe foe gi dan foe kisi”. — Tori foe den apostel 2:35.
DOE DI E SORI DATI WI E BRIBI INI NA KABA DI E KON
10. Sortoe fermane Petrus ben gi na na sé foe na „kaba foe ala sani” di e kon krosibé?
10 Den wortoe foe na apostel Petrus di e kon now e sori tranga te san wi moesoe doe foe di na „kaba foe ala sani” e kon krosibé: „Oenoe tan kebroiki oenoe froestan . . . wakti na ini begi. Ma moro foeroe oenoe moe lobi makandra nanga wan krin lobi bikasi lobi e tapoe wan bigi ipi foe sondoe. Teki makandra ini oenoe oso sondro konoroe. — 1 Petrus 4:7-9.
11. San de fanowdoe foe kan tan „gesontoe foe froestan”?
11 Foe tan moreel krin noso letatfasi èn foe meki na jeje tanboen foe trawan kon na fesi, wi moesoe tan „gesontoe foe froestan” soleki fa na fermane disi e taki. Disi wani taki dati wi no moesoe gi pasi dati wi firi basi wi, sodati na froestan sé wi e lasi balans. Wi moesoe èrkèn san de troe troe prenspari ini libi èn kroetoe nanga balans san abi na fosi presi. — Filippensen 1:9, 10.
12. (a) Foe sanede a de prenspari foe „tan na ai” na na sé foe begi? (b) Fa Petrus ben leri disi foe ondrofeni?
12 Efi wi wani de Gado getrow foetoeboi doro, wi no kan abi na howpoe dati wi sa kan doe dati nanga wi égi krakti. Foe jepi wi moesoe loekoe na Jehovah Gado èn wi moesoe tan „na ai nanga begi”. Na apostel Petrus ben leri foe en égi ondrofeni o prenspari a de foe tan „na ai” na na sé foe begi. Sjatoe ten bifo Jesus Kristus ini na djari foe Gethsémane wan groepoe sma di ben abi fetisani ben kon graboe en, a ben gi Petrus, Jakobus nanga Johannes dekati foe begi, sodati den no ben sa fadon na ini tesi. Ma ala dri den apostel fadon na na kefarlek ten dati a sribi (Mattheüs 26:36-46; Markus 14:32-42; Lukas 22:39-46). Foe di a ben kon swaki foe di a no ben „tan na ai” nanga begi, Petrus bakaten ben taki dri tron taki a no sabi Jesus Kristus (Johannes 18:17, 18, 25-27). Tokoe a fesi foe disi Petrus ben taki nanga ala fertrow: „Masra, mi de klari klari foe go nanga joe alwasi a de na ini doengroe-oso noso na ini dede” (Lukas 22:33). „Alwasi ala den trawan kisi tra memre, libi joe, tog mi no sa kisi tra memre, libi joe noiti wanten!” — Mattheüs 26:33.
13. San wi kan leri foe na ondrofeni foe Petrus di a no ben „tan na ai na na sé foe begi”?
13 San ben psa nanga Petrus, de wan eri prenspari lès gi wi. A kan meki wi sabi seker o kefarlek a de foe fertrow toemsi tapoe wisrefi. Foe den sani di e misi èn den swakisé foe wi a nomo nanga Gado jepi wi kan kaka foetoe gi tesi. Meki a de so dati wi foe datede nanga wan prakseri di e tan na ai an nanga wan ati di e tan na Jehovah Gado nanga Jesus Kristus sé sondro wan degedege, ori doro na ini begi.
14. San moesoe troesoe wi foe wi doe wi kristen foerantwortoe, èn fa disi moesoe sori na na fasi fa wi e makandra nanga sma foe wi bribi?
14 Leki discipel foe Kristus wi no moesoe tan na ai noso ori balans wawan, ma wi moesoe prakseri toe efi wi e doe wi foerantwortoe nanga lobi (1 Korinthiërs 13:1-3). Na apostel Petrus ben taki dati wi moesoe abi wan „tranga lobi” gi sma foe na srefi bribi leki wi. Sowan tranga lobi e sori foe di wi e gi pardon na trawan. Te dati de so wi no e meki den fowtoe foe wi brada nange sisa e sori moro bigi èn wi no e sori tapoe wan fasi di no fiti tapoe den swakisé foe den. Wi no e soekoe fowtoe èn wi no poti den sondoe foe den na ini na moro takroe leti. Foe di wi e gi pardon na sowan fasi, wi lobi sa tapoe wan eri ipi sondoe presi foe wi e taki nanga trawan foe den.
15. Foe sanede a kan de fanowdoe foe teki sma na ini wi oso, èn fa foe doe?
15 Na teki foe sma ini joe oso de wan fasi toe foe sori lobi. Fa dati de wan eri boen sani te wi e prati wi njanjan nanga trasani di de troe troe fanowdoe foe na libi nanga trasma, fornamkoe nanga sma di de na nowtoe! (Lukas 14:12-14) Te sma di de na na srefi bribi leki wi e lasi ala sani di den abi foe di natuur, bigi onkolokoe noso ferfolgoe naki den, disi kande sa wani foe taki dati foe wan moro langa pisi ten wi sa moesoe foe opo wi oso gi den. Disi sa kan meki wi abi foeroe sani di no de so switi gi wi èn wi ben sa kan abi na firi foe klage foe na extra ebi di disi sa kan taki gi wi goedoe èn wi krakti. Na den ten disi wi moesoe loekoe boen foe no go klage dati wi ben moesoe teki den ini wi oso èn presi foe dati wi moesoe èrkèn dati disi de wan eri boen fasi foe sori wi lobi gi den di e kisi Gado lobifasi boen.
16, 17. (a) Fa wi moesoe prakseri foe den presenti di wi abi? (b) Sortoe eri boen fasi foe doe Paulus ben taki gi wi foe doe èn ensrefi ben poti na ini en libi?
16 Wi alamala abi presenti di wi kan kebroiki foe boen foe trawan. Efi wi wani tan foetoeboi foe Gado di ai feni boen, wi moesoe kebroiki den presenti disi nanga faja èn nanga wi eri ati. Wi sa doe eri boen foe no agersi wisrefi nanga trawan. Wi no sa lasi ati te wi e si dati trawan kan doe moro foeroe leki wi. Na na tra sé wi no sa firi wisrefi moro leki trawan te na wan spesroetoe kontren wi kan doe moro leki trawan (Galaten 6:3, 4). Loekoe san na apostel Petrus ben taki: „Dini makandra, ibriwan nanga na gnade, disi en ben kisi leki sma, di sabi foe wroko boen nanga ala den difrenti gnade foe Gado” (1 Petrus 4:10). Foe datede wi abi na plekti foe kebroiki na presenti (gnade) di wi abi kande, dorodoro. Nanga Gado eri boenfasi di wi no e ferdine wi de san wi de èn wi abi san wi abi. Foe datede wi kan kebroiki ala wi krakti, koni nanga presenti leki gnade di wi kisi foe Jehovah boenfasi di wi no e ferdine foe kebroiki den foe grani èn glori na Moro Héwan.
17 Na apostel Paulus ben taki fa na joisti fasi foe doe ben foe de foe di a ben poti den aksi di e kon now: „Bikasi osoema ben teki joe poti na fesi? Èn san joe abi, di joe no ben kisi (foe boenati)? Ma alwasi joe ben kisi en, fa joe kan meki joesrefi bigi dan, leki joe no ben kisi en (foe boenati)?” (1 Korinthiërs 4:7) Nanga aladi Paulus ben kan taki foe ensrefi dati a ben „wroko moro” leki ala den tra apostel a no ben gi ensrefi na grani, ma a ben taki moro ete: „. . . ma no mi srefi (ben doe dati), ma na gnade foe Gado, di de nanga mi.” — 1 Korinthiërs 15:10.
18. Fa wi moesoe kebroiki wi presenti?
18 Leki getrow basja wi moesoe abi na lostoe foe kebroiki den presenti di wi abi kande, someni leki a kan foe jepi trawan na jeje nanga skinsé. So srefi toe na fasi fa wi e doe dati de prenspari troe troe. Foe na tori disi na apostel Petrus ben skrifi:
„Efi wan sma e taki wan sani, meki a taki dati leki Gado Wortoe; Efi wan sma doe wan diensti, meki a doe dati nanga na tranga di Gado de gi en; Na ini foe alasani Gado moe kisi bigi nen nanga Jezus Kristus, di moe abi glori nanga krakti tégo alaten. Amen! — 1 Petrus 4:11.
19. Fa wi kan grani Gado te wi e jepi trawan na jejesé nanga wi goedoe?
19 Te foe datede wi e jepi trawan na jejesé, wi moesoe taki na so wan fasi nanga den dati den e si dati den wortoe foe wi di e trostoe, den e kon foe Jehovah Gado. Te dati de so, wi préki nanga leriwroko sa bow trawan èn a no sa meki den sma di wi e proberi foe leri kisi na firi dati den lagi moro wi noso den firi sjensen. So toe te wi e gi wi ten nanga krakti foe jepi trawan na skinsé, wi moesoe fertrow tapoe Gado foe kisi wi krakti. Nanga dati wi no ben sa poti foeroe prakseri tapoe wi égi koni èn dan na fasi fa Gado e kebroiki wi okasi foe doe san boen, sa kon na fesi. Na sowan fasi wi hemel Tata sa kisi grani (1 Korinthiërs 3:5-7). Foe di so wan glori nanga grani e gi na na Tata foe di wi de discipel foe en Manpikin, Jehovah Gado e kisi ’grani nanga jepi foe Jesus Kristus’. Ja dati wi abi na koni nanga na krakti foe doe san de boen, wi e tangi na na Moro Héwan.
20. Foe sanede wi moesoe loekoe na fesi nanga faja foe na kon foe na bigi dé foe Jehovah, èn san wi moesoe doe foe datede?
20 Te wi e kebroiki wi ten, wi goedoe nanga wi krakti foe jepi trawan dan wi e sori dati wi de klarklari na jejesé, klari foe na bigi dé foe Jehovah. Ja, na sabi dati na Masra Jesus Kristus kan kon leki na kroetoebakra di sa teki wraak foe Gado, kan gi wi na dekati foe tan na ai na jejesé. Foe datede wi wani foe tan ori na sekerfasi foe na kon foe Jehovah bigi dé alaten na wi fesi. Foe di na dé disi sa opo gi ala getrow discipel foe Jesus Kristus grani okasi, dan nanga leti wi kan tan abi wan faja froewakti foe en. Na dé foe Jehovah sa wani taki gi wi dati wi alaten sa kon fri foe na no letifasi nanga na druk foe na seti foe sani foe foe tide èn dati wi sa abi prisiri ini den ségi foe na „njoen hemel nanga wan njoen grontapoe”. O prenspari a de dati wi ’ori boen na prakseri’, a dé disi, ja, dati wi e angri foe en (2 Petrus 3:12, 13). Nanga wi faja teki prati na na préki foe san Gado seti na fesi foe doe wi sori dati wi abi na joisti fasi foe doe. Nanga dati wi e sori dati wi de seker dati Jehovah dé sa kon èn dati tra sma moesoe jere foe en èn moesoe ander foe kroederi nanga na eri prenspari sabi disi.
21. (a) Foe san wi kan de seker foe na pramisi foe Gado foe „njoen hemel nanga wan njoen grontapoe”? (b) Fa disi moesoe wroko tapoe wi?
21 Gado pramisi foe „njoen hemel nanga wan njoen grontapoe”, sortoe pramisi foe na fosi tron a ben gi nanga mofo foe na profeti Jesaja, sa kon troe dorodoro (Jesaja 65:17; 66:22). Wan leti regeri di sa tiri nanga Jesus Kristus nanga en kownoe, di sa tiri makandra nanga en èn den priester makandra nanga en abra wan grontapoe seti di e tjari ensrefi soleki fa Gado wet e taki, moesoe tron wan troe tori (Openbaring 5:9, 10; 20:6). Den sekerfasi disi kan troesoe wi foe doe sani, a kan troesoe wi foe doe ala san wi kan foe de na na sé foe den sma di sa abi prati ini den ségi foe na leti regeri. Na apostel Petrus ben pirai: „Foe datede oen lobiwan, di oen de froewakti den sani disi, doe moeiti dan foe en moe feni oenoe sondro flaka èn sondro fowtoe èn nanga frede” (2 Petrus 3:14). Leki Gado foetoeboi wi e broko wi ede dati Masra Jesus Kristus feni wi boen èn foe datede wi no wani foe meki na fasi foe prakseri nanga doe foe na grontapoe disi drai wi froestan. Wi e winsi foe de fri foe na flaka foe sondeo. Foe di sondoe e trobi wi fréde nanga Gado, na en bigi dé wi sa kan kon feni nomo ’ini fréde’ te wi e tan na wan fasi dati wi sondoe kan kisi pardon.
WARDERI GADO PASENSI
22. Foe sanede wi no moesoe lasi pasensi na na sé foe na kon troe foe na pramisi foe Gado?
22 Na na srefi ten te wi e loekoe na fesi foe na „njoen hemel èn wan njoen grontapoe”, wi no wani lasi pasensi na na sé foe na kon troe foe na pramisi. Foe di Jehovah bigi dé no kon langa ten kaba wi égi jepi ben kan kon troe. Na apostel Petrus ben ferklari:
„Èn na pasensi foe mi Masra oen moe loeke foe na boen foe oen sili, soleki wi lobi brada Paulus ben skrifi toe gi oenoe nanga na dipi froestan, di Masra ben gi en, èn so a de doe na ini ala den brifi foe en, te a taki foe densani disi; son tori de na ini toe di e trobi sma foe kisi den krin èn dati den sma e teki drai, di no sabi sani, èn di no de tranga na ini bribi, so leki den e doe toe nanga den tra boekoe, èn nanga dati den e pori densrefi.” — 2 Petrus 3:15, 16.
23. (a) Foe sanede wi no moesoe abi kroektoe gwenti na na sé foe Gado pasensi? (b) Fa son kristen ini na fosi jari ondro ben sori dati den no ben froestan na gron foe Gado pasensi?
23 Foe di wi e warderi Jehovah pasensi, wi moesoe loekoe boen dati a no tron wan kroektoe gwenti foe wi foe waka wan gridi pasi nomo doe di wi e prakseri dati Gado bigi dé de farawe na wi fesi ete. Ini na fosi jari ondro G.T. fa a sori dan sma di ben bribi ben de di e doe so. Na apostel Petrus e skrifi foe den leki sma di no kisi leri èn sma di e degedege”. Den no ben abi wan krin froestan foe Gado wortoe èn den no ben de fasti ini na kristenleri nanga fasi foe libi. Den ben proberi srefi foe teki sani san na apostel Paulus ben skrifi ini en brifi ondro na krakti foe santa jeje nanga tra pisi di ben de na ini na Skrift leki wan pardon foe den kroektoe fasi foe tjari densrefi. Kande den ben sori na nasani san Paulus ben taki foe na troe tori dati ibriwan sma moesoe doe soleki en konsensi ben tjari en èn foe na ferklari dati wi sa kon kisi leti nanga bribi èn no nanga wroko foe na wet foe Moses èn foe datede den ben teki ala sortoe tjans foe doe sani di no ben kroederi nanga Gado wani. (Agersi Romeini 3:5-8; 6:1; 7:4; 8:1, 2; Galaten 3:10.) Kande den ben kebroiki son sani san ben taki di e kon now na wan kroektoe fasi:
„We, tan faste dan na ini na fri, di Kristus ben meki wi kon fri. No meki den kisi oen baka, poti oen na ondro dwengi leki knegti” (Galaten 5:1). „Mi a pasi foe doe alasani” (1 Korinthiërs 6:12). „Gi den krin sma ala sani de krin” (Titus 1:15).
Den no ben bisi nanga san Paulus ben taki toe:
„Bikasi, oen brada! Gado ben kari oen, foe oen moesoe tron friman; ma no mesbruike na fri, foe oen skin no kisi wan okasi (foe doe san di boen na en) ma nanga lobi oen moesoe dine makandra leki srafoe foe friwani. Bikasi na eri Wet de na ini na wan wortoe, disi de taki so: Joe moe lobi alasma na joe sé leki fa joe lobi joesrefi” (Galaten 5:13, 14). „No wan sma moe soekoe, san de boen foe ensrefi, ma ibriwan moe soekoe, san di de boen foe trawan.” — 1 Korinthiërs 10:24.
24. Foe sanede wi moesoe loekoe boen foe wi kompe srefi ini na gemeente?
24 Soleki ini na fosi jari ondro gemeente sma de now toe di ben wani go so bradi te ai kon foe den marki foe na kristen frifasi dati den ben sa wani go so fara dati den tron srafoe baka foe sondoe. A sa de wan boen sani efi wi e loekoe boen soema de wi kompe, sodati wi no e meki wi kon de fri foe ondrofeni wan kroektoe krakti foe wroko tapoe wi èn wi kon tjari go tapoe wan kroektoe pasi. Na apostel Petrus ben poti prakseri na den wortoe: „Ma oenoe oen lobiwan di oen sabi dati na fesi, meki un forsegti, foe na ferkerti fasi foe den ogri sma no moe kori oenoe toe, tjari oen go nanga den, èn foe oen no moe fadon, komoto na ini na faste bribi foe oenoe.” — 2 Petrus 3:17.
GO NA FESI LEKI KRISTEN
25, 26. San wi moesoe doe soleki fa 2 Petrus 1:5-7 e taki na baka di wi kisi bribi?
25 Foe no meki den ségi di Jehovah Gado abi na prakseri gi wi psa gwe na wi fesi, wi moesoe abi na winsi foe go na fesi ini wi kristen fasi foe libi nanga foe doe (2 Petrus 3:18). Te wi e doe dati, dan wi e doe soleki na dekati di wi e kisi foe na apostel Petrus:
We, foe datede, oenoe toe moesoe doe ala moeiti foe dati, meki na bribi foe oen moesoe moksi nanga boen maniri, èn nanga den boen maniri oen moe abi reti froestan, èn nanga na reti froestan oen moe kan dwengi oen srefi, èn di oen e dwengi oen srefi, oen moe abi pasensi, èn na ini na pasensi oen moe sori taki, oen frede Gado, èn nanga na frede foe Gado na bradalobi moe moksi, èn nanga na bradalobi na lobi foe ala sma.” — 2 Petrus 1:5-7.
26 Jehovah Gado gi wi nanga jepi foe en Manpikin na krakti foe kisi bribi. Ma kroederi nanga nasani san Gado ben doe gi wi, wi moesoe abi na winsi foe kweki tra eri boen égifasi, nanga san wi e bewijsi dati wi abi wan troe bribi. Wi e meki den égifasi disi gro foe di wi e meki Gado Wortoe nanga en jeje tjari wi na ini ala sani foe wi libi (2 Petrus 1:1-4). Na apostel Petrus e fermane wi ’foe poti ibri krakti di wi abi tranga’, dati wani taki meki tranga moeiti nanga wan boen konsensi foe wroko makandra nanga wi hemel Tata, di e feti nanga wi na wan fajafasi foe kan meki wi kon kisi dorodoro kristen lepifasi. — Agersi 1 Korinthiërs 3:6, 7; Jakobus 1:2-4.
27. San a wani taki dati wi moesoe moksi makandra boen maniri nanga wi bribi?
27 Moksi nanga wi bribi boen maniri, wani taki dati foe di wi e waka na wi Eksempre, Kristus, baka, wi e meki moeiti foe kisi eri boen moreel libi. Boen maniri noso eri boen moreel libi de wan boen égifasi. Soema abi den, a no taki ai ori ensrefi foe no doe son ogri nomo noso no doe libisma leki ensrefi ogri, ma ai meki moeiti foe doe san de boen èn foe prakseri na wan leti fasi gi jeje, skin nanga firi fanowdoe foe trawan.
28. Foe sanede a de prenspari foe kisi moro froestan?
28 Eri boen moreel libi no kan de sondro froestan. Wi moesoe abi froestan foe kan si na difrenti ini boen nanga ogri (Ebreër 5:14). Wi abi froestan fanowdoe toe foe kan kroetoe fa wi kan doe boen na wan spesroetoe setuwasi (Filipensen 1:9, 10). Kontrari nanga bribi esesi, pe froestan e loekoe leki wan sani san no abi foeroe warti noso san de kontrari nanga en, wan bribi di abi wan faste gron tapoe froestan èn alaten ai kon moro tranga nanga dati. Te foe datede alaten wi e poti na Skrift troetroe ini wi libi, disi sa tranga wi bribi, nanga aladi wi e tan gro na ini froestan omtrenti Jehovah nanga en Manpikin.
29. (a) Foe sanede froestan de fanowdoe foe kweki ori srefi? (b) San ori joesrefi abi foe doe nanga ori doro?
29 Na froestan disi kan kibri wi foe gi wi srefi abra na sondoe lostoe foe skin, trangai èn sondro ton noso na na tra sé mankeri tranga foe de leki wan prenki foe Gado ini wi fasi foe prakseri, taki nanga doe. Na froestan e jepi wi foe abi na krakti foe ori wisrefi, na krakti foe kan basi soboen joesrefi leki joe wortoe nanga doe. Nanga na meki moeiti foe ori joesrefi, wi sa kan abi no égifasi ori doro di de wan di wi no kan misi. Na krakti di e wroko na ini wi di wi e kisi foe di wi e ori doro, kan kibri wi toe foe no gi wisrefi abra na sondoe skin lostoe, lasi ati te wi e ondrofeni ferfolgoe noso feti toemsi nanga ibri dé sorgoe, prisiri noso goedoe di wi abi. Na ori doro disi kan te wi e foertrow tapoe na Moro Héwan foe kisi krakti nanga tiri. — Agersi Filippensen 4:12, 13; Jakobus 1:5.
30. (a) San na frede Gado, èn fa ai sori ensrefi? (b) San e sori dati frede Gado no kande sondro bradalobi?
30 Na na ori doro wi moe sori dati wi frede Gado noso lespeki en. Na eri libifasi foe wan troe kristen e sori so nanga na fasi disi foe tjari densrefi. Ai kon na krin nanga wan gesontoe grani nanga lespeki èn bigi sorgoe foe papa nanga mama noso trawan di e ferdine dati sma gi den srefi na den (1 Timótheüs 5:4). Sondro bradafasi lobi na frede foe Gado no kan de. No apostel Johannes ben ferklare:
„Efi wan sma taki: ’Mi lobi Gado’, kaba a abi ogri ati gi en brada, na sma dat de wan léman. Bikasi efi wan sma no e lobi en brada, di a kan si, fa a kan lobi Gado dan, di en ai no ben si” (1 Johannes 4:20).
Wan sma ben sa kan sori tapoe en lespeki nanga en gi ensrefi, ma efi a no e sori en brada nanga sisa lobi, switifasi noso boenfasi, tokoe a ben sa tan mankeri foeroe. Wi no kan abi wan faja ati gi Gado èn de kowroe nanga wi brada nanga sisa.
31. Gi soema wi moesoe sori lobi, èn foe sanede?
31 Lobi de na eri boen égifasi di ben foe kon na fesi ini wi libi fornamkoe. Na sortoe lobi disi no ben moesoe sori nomo gi wi kristen brada nanga sisa. Nanga aladi wi moesoe sori lobi gi wi jeje brada nanga sisa, wi moesoe sori na eri libismafamiri lobi. Na lobi disi no e didon na wan sma moreel fasi foe de. A moesoe sori srefi gi wi féjanti, èn fornamkoe a moesoe kon na fesi gi wi winsi foe jepi den na jejesé. — Matthéüs 5:43-48.
32. San sa de na bakapisi te wi e poti na rai foe 2 Petrus 1:5-7 ini wi libi?
32 San sa de na bakapisi te wi e moksi makandra nanga wi bribi, boen maniri, froestan, ori srefi, ori doro, frede Gado, bradalobi nanga lobi? Na apostel Petrus e piki: „Efi den sani disi de na oen foeroe, dati sa meki oen no tan lesi èn sondro froktoe na ini na ini na sabi, di oen sabi wi Masra Jesus Kristus” (2 Petrus 1:8). Wi no sa tan pi noso lesi noso do dede na jejesé. Te gadofasi égifasi e libi ini wi ati èn de troe troe wan pisi foe wi, a sa troesoe wi foe prakseri so foe dati, taki so èn doe dati Gado feni en boen (Agersi Lukas 6:43-45.) Efi dati de so nanga wi, dan na kon foe na Masra Jesus Kristus foe teki abra ala na tiri foe den afersi foe grontapoe, sa marki na bigin foe ségi di psa alasani san wi sa kan proberi foe prakseri now.
33-35. Sortoe winimarki a abi dati wi libi leki discipel foe Jesus Kristus?
33 Meki a de so dati wi noiti kon de sondro wi e bisi, no na na fasi fa wi e tjari wisrefi no na na sorgoe foe wi kristen foerantwortoe, na ini san na prenspari wroko foe na préki foe Gado boskopoe de toe. Efi wi teki besroiti leki discipel foe Kristus, wi kan abi prisiri nanga wan krin konsensi nanga gesontoe de makandra nanga sma foe na srefi bribi leki wi. Ini ten foe tesi wi kan firi Gado jepi di e gi krakti, èn o moro wi e poti bijbel gronprakseri ini wi libi nanga wan krin konsensi, wi fasi foe de nanga trawan sa kon moro betre alaten.
34 No wan kontren foe libi no sa de — na oso, na wroko, ini wi afersi nanga regerimakti na ibri wan sé — di no sa ondrofeni boen wroko te wi e meki moeiti foe libi soleki Gado Wortoe e taki. Wi sa kon froestan moro boen toe o prenspari a de foe nanga wi eri ati go miti someni sma leki a kan nanga na boskopoe di e gi trostoe di de foe na bijbel. A sa gi wi troe troe foeroe kolokoe nanga troe troe satisfaksi foe lekti den fanowdoe foe libisma leki wi, fornamkoe den jeje fanowdoe.
35 A moro prenspari sani de dati tjari wan libi leki wan troe discipel foe Jesus Kristus de na wan enkri libipasi di abi na ini na pramisi foe wan tégo, kolokoe ten di de na wi fesi. San wi wini wi no ben sa wani foe lasi en srefsrefi. Meki wi de sreka sreka ibri dé foe na kon foe wi Masra leki wan kownoe di sa wini foe troe. Nomo dan wi sa kan abi prati ini na prisiri di no abi marki foe di wi ben teki na besroiti foe ori faste na wi besroiti foe dini Jehovah getrow.
[Aksi foe a tori disi]
